Oct 18, 2009

Rangon Thu-nawi

1. Chin Kut
Kum danga la awm ngai reng reng lo, thil thar diak “Chin Kut” hman a ni dawn ta.
Yangon-a cheng Chin hnam chhunga unauza: Mizo, Tedim, Falam, Haka, Mindat, Paletwa, Asho, etc. -te chuan a huhova Kut hman zai an rel a, a hun atan ni 31, Oct. 2009 an ruat a, a hmun tur Myanmar Baptist Convention hmun pui Judson Memorial Hall-ah zing dar 9:00 atang hman a ni dawn a, Fund pawh mi tlawmngaite hnen atangin thahnem tak hmuh a ni tawh.
Kut kan neihte: Khawdo, Fang Er, Tho, Kum Ci, Pawl kut leh kut dangte hming chu chawiin he “Chin Kut” hi hman a ni ang. Hetah hian mahni hnam lam leh zai, inchei te entir tur a ni. Yangon Zofa Society pawh a tel ve dawn a, YZTP ten hnam lam an entir dawn a ni.
A kal thei a piang tan a hmunah thei tui leh chhang ei tur buatsaih a ni ang. He Kutah hian mahni hnam incheia incheiin kal theuh i tum ang u. Video te lain TV Myawaddy channel-a tihchhuah tum a ni bawk.

2. Yangon Mizo Society (YMS) chuan Kristmas hmuahna ropui taka buatsaih a tum a, a hun atan Dec. 5, 2009 tinzawn a ni a, in tinah thawhlawm pawh khawn tan a ni.
Source: Zonun News Letter (vawi 9-na).

Oct 3, 2009

YANGON CHIN CHRISTIAN COMBINED WORSHIP SERVICE

Yangon Chin Christian Combined Worship Service hi Yangona awm Engnga (Mizo) tawng hmang kohhran hrang hrangte inpawlhona a ni a. Combined Worship Service hi quarterly a neih thin a ni. He Chin Bombine-ah hian zo hnahthlak a duh a piangte (hnam tin) an leng vek a, worship service-ah hian Mizotawng hman a ni. Kohhran tin ten annual fee kan thun thin a, kumin 2009 atan annual fee chu cheng sing khat (Ks. 10,000) a ni. Kumina Yangon Chin Combine memberte chu heng kohhrante hi an ni:- MCUM, PCM, Nazarene, WCM, EFC, UPC, CBCM, RPC, Lutheran, Salvation, ETMC, MBCM, REC, CMA, RLBC, CLJC, EMC, Living Impact, PCG, IBC, BPCM, TPCM. Ziah hmaih palh leh tihsual palh a awm a nih chuan siam rem leh a ni ang.
Chin Combined worship service-ah hian Rangona awm rawngbawltu mithiam tak takte hmangin thlarau ruai kan kil ho thina, a ropui tak zet a ni. He hunah hian kohhran hrang hrangte zaikhatin kan luang za a. Inpumkhatna leh inngainat tawnna pawh min thlen ngei mai. Thu hriltuten thiam takin Pathian thu hmangin min hrut rual a. Kan zo nun zemawi tak vawng nung tura kan upa te thahnem ngaihna lah hai rual a ni lo. Engemaw changa Lenkhawm zai hmanga kohhran then khatte zaipawl nei tura an han ruat thin te hian, kan hnam nun leh zia thangthar zelteah chawinun zel an tum zia; tarmit vuah lo tan pawh a hmuh fiah theih hle a ni. Burma ram khawpui, hnam dang karah kan Kristianna leh kan Mizo-na theih tawp chhuaha kan lantirna hun pawimawh tak a ni reng a. Kan nulate tan pawh an thawmhnaw thar nalh tak tak an show-na hun a ni lo bik chuang lo.
He Chin Combine inkhawmah hian chawimawi phute chawimawina neih thin a ni a. Tin kum upate pawh chawimawina hlan an ni thin. He inkhawm hi YZTP tan pawh puan tur pawimawh an neihte puanna hun tha tak a ni. Rangon veng hrang hranga awm inhmuhna hun nei hlei thei lo te tan inhmuhna hun tha tak pawh a ni a, Bible school hrang hranga kalte tan pawh chutitho, kan inchibai sup sup mai zel a ni. Ka hriat ve phak chinah chuan Pu Lianchia (fam) president hun lai kha kan vung that lai tak niin ka hria. Kohhran hrang hrang zaipawl intihsiakna ropui tak neih thin a ni a, thalai rualte pawh hla zirna lamah tan an la nasa thin hle a ni. Ni 19, Dec., 1999 Chin Combined inkhawm tuma Kum 2000 hmuahna Ruai (mipui 600 bawrvelin) kan han kil mup mup te kha mizopa tehna atang chuan ropui tak a ni.
Zanriah ruai kan kil zova, Kohhran hrang hrang thalai rualte Kristmas Carol turin mahni kohhran theuh ruahmannain motorin an inphur liam sung sung a. Thalai rual, vanglai hun nuam ti em emten phur tak leh thiam tak mai a, “Kumpui sul a lo vei changin,” tih hla an han rem zet chuan lunglen a kai thovin ngaihtuahna mitthlain kiltin a hrutkuala, Kristmas ni-a kawrmawi leh balloon te hlimpuia tual kan chai lai panlai hunte ngaihtuahna mitthlaah a rawn inkahpuk chaw zut zut mai a nih kha. Israel faten mi ramah fakna hla rem thei lo mah se, keini zawng Krista zarah, kawl khawpuiah, ringlo mite karah “Chungnung berah Pathian ropui takin awm rawh se,” kan ti dup dup mai le. Kan thalai rualten, muang fan raih mai a, “Silent night, holy night te, Khawchhak lal pathumte” an han rem zet mai chu an aw mawi thang khawk lo hre pha Buddhist hote pawhin an inah Carol ve nghal turin an sawm nghala, eiturte tui tak takte pawh an hlui thin a. Rilru thahnem ngaihna chuan, “An hla ngaihthlak, kan hla thu hlu tak takte hi a chhan han hrethiam ve vek sela aw…” a ti vawng vawng mai a ni.
Khawpuia cheng mitinte mahni hna, rawngbawlna leh zirnaah kan tul a. Kohhran khata lawi ho kan nih ngawt loh chuan inhmuh zen zen pawh thil har tak a ni. Tin, Rangon-ah hian Mizo te hi tun hma ngaihtuah chuan hnihthum ve viau tawh mah ila, kohhran kan hnih thum ve a, member kan induhthawhin mahni kohhran theuhva thahnem kan ngai tlang hle a ni. Chhiat ni that niah tlawmngaih kan chhuah tlang dial dial tih lohva chuan, hnam khat kan nihna leh Kristian kan nihna atanga inpawl hona hun hi a hranpaa neih har sa tak mai a ni a. Hengte han ngaihtuah chuan he Chin Combined Worship Service hi kan za atan hian a hlu a ni tih hai rual a ni lo.
Ni 27, Sept., 2009 (3:00- 5:00pm) khan a vawi 105-na Yangon Chin Christian Combined Worship Service chu Nazarene biak inah neih a ni a. Inkhawm kal pawh kan thahnem thawkhat a, ruah a sur avangin beisei erawh kan pha lo.

Zofate Zinga Mihmasa Thenkhatte:

(Chhunzawmna)

Kawlram Zofate Zinga Mihmasa Thenkhatte:

Rev. Tuahhranga: 1923 February-ah Missionary J.H Cope-an Ordination a pe.
Kawlphai zofate zinga hmasa ber a ni.
Rev. Dr. Lalthanliana: 1935-ah USA a kal, kal hmasa ber a ni. 1938-ah Dip.Th (USA).
Pi Zohmingthangi: 1946-ah India-ah Matric a pass.
Pu Saptawna: 1952-ah Kalemyo-ah Matric a pass.
L.T Vuta & a hote: 1959-ah Israel an kal.
Pu Kamlianbuaia: 1962-ah B. Sc a pass
Rev. Dr. Lalrawngbawla: 1969-ah Insein, Yangon-ah B.Th a pass.
Rev. Dr. Chhunvela: 1975-ah Insein, Yangon-ah B.D a pass
Rev. Dr. Khuangnawni: 1975-ah B.R.E a pass, kawlphai mizo hmeichhiaah a hmasa ber.
Dr. Khuanga: 1976-ah Australia-ah Ph.D a pass
Pu Savuta: 1948-ah S.D.O a hmu.
Pu Zakhuma:1974-ah Lt. Col. a kai
Pi Zoramkhumi: 1980-ah London a kal.
Rev.Dr. Kawlthangvuta: 1983-ah D. Miss, USA-ah a pass. Kawlphai zofa zinga hmasa ber.
Dr. Lianhlupuii: 1998-ah M.B.B.S a pass, kawlphai mizo hmeichhiaah a hmasa ber.

NB : He thu hi ni 10 Dec. 1998-a Pu Lianchia (fam) buatsaih atang lak chhawn a ni a, a indawt dante erawh tlem ka rem tha. A buatsaihtu hian; Kawlram Zofate zinga mihmasa thenkhat te hi a lar deuh deuh tarlan mai a nih thu leh tarlan awm tak tak a tarlan tak lohte hnenah ngaihhnathiamna a dil. -Puibawiha.