Rihlipui

Huaisenna / Dawihzepna hi Khawi Atanga Lo Kal Nge?

2012-01-26T01:50:00.000+08:00

Huaisenna kan tih hi a inchen lova, huaisen kan tih pawh hi a in ang lo. Chuvangin huaisenna emaw dawizepna emaw pawh hi kan hrilhfiah dan a thuin a in ang lo thei ang. Huaisenna emaw dawihzepna emaw hi khawia tanga lo kal nge ni? Enge kan huaisenna chhan, enge kan dawihzepna chhan?

Kan ram hi sipai awpna hnuaiah khan kan awm a, khawteah phei chuan sipai lubawk te te pawh hi an thu ve hlar a. Vawi khat chu tlangval pakhat sa tha tak mai hi zu a rui a, tumah reng reng hi a hlau lova, amah en deuhtu a piang mai chu a cho kual. Nakinah chuan sipai lubawk 2 hi an rawn kal a, kan tlangval huaisena chu phuarbeh ang mai chipchap pawh a tingam ta lo va, an bul hnaiah pawh chuan a awm tha ngam lo va. A pumrua han en chuan heng sipai 2 pawh tham lo viau tura ngaih chu a ni.

Chutah tlangval pakhat cher ve dinden huaisen hmel lo tak mahse fel tak mai hian sipai 2te chu nel tak leh hlau lo tak hian a rawn kawm a, thu a sawi pui a, a duh zawngte a tihtir ta mai a!

Khawi atang nge hlauhna a lo awm a, khawi atang nge huaisenna a lo awm?

Ringtute hi eng din hmunah nge kan din?

Thiam chan loh kan hlauh vanga dawihzep kan lo ni e kan ti a nih chuan Thiam min chantirtu chu Krista a ni a, amah kan lama a tan tlat chuan tuin nge thiam loh min chantir ang?

Hlau suh la zam hek suh tih chu kan tana Pathian thu chhuak a la ni reng a ni.

Joshua 1:9

2012 YZTP Hruaitute

2012-01-21T21:00:00.002+08:00

Yangon Zofa Thalai Pawl Hruaitu Thlan Tharte

1. President – Pachhunga
2. Vice President – Lalzidinga
3. Secretary – Lallawmpuia
4. Asst. Secretary – Tv. Chanchinmawia
5. Treasurer (1) – Lallunghnema
6. Treasurer (2) – Ropuii
7. Auditors – Siampuii (Convener)
- C. Lalawmpuia (Puibawiha)
- Lalsawivula
8. Journalist – Lalthangliana
9. Advisers – Thangchhuana
- Zothangliana
- Dr. Lalchianmawia
- Sairuma
- Ralthantawna

Beautiful Pic

2012-01-11T01:46:00.004+08:00

Ka thlalak zingah chuan ka la tihfuh (palh) ber a ni ve awm e.
Thlalak hi ka zir hran lo va, photography lam pawh tihtham ka chhiar lo, mahse nuam ka ti a, ka fapa thla hi ka la ka la thin.
Hemi tum hian ka fapa thla laturin a mah chu ka focus-a, ka hmeh (shoot) dawn ruaiah a rawn tlan hnai ta si a. Amah a lan loh hlauvin ka Camera chu hmehpah chuan ka lamah ka pawt phei a heti hian a rawn chhuak ta a ni.
Ka fapa hian plastic-a siam motor lem a hnuk mek a ni. tube light (2') pawh kawi zetin a lo eng ve bawk a nih khi.
Photographer thiam deuh ten engtin nge an ngaih ve ang aw?
Kei atan chuan ka thlalak tawhah chuan ala mawi ber a ni.

X'Mas Carol

2011-12-26T16:22:00.005+08:00

Kan kohhran thalaite ni 17 & 22 Dec. zan khan kan carol a.
Kan Carol-na hmun then khatte;
Moe Thee Hospital: damlo inentir tam tak an awm a, Mizo leh Kawl Kr ismas hla kan sa. Mizo hla hi a chhan an hre lovang, mahse mawi chu an titho ang.
Muslim inah: tha takin min lo welcome-a, thei tui in tur leh chhang ei tur min lo pe.
Kawlte, Karen inah te kan carol.
Kan kohhran member (mizo) inah pawh kan carol.
Kumin chu Carol hla thar kan zir a, kan thalaite an thiam bawk a, an phurin kan carol boruak a zanga, hlim tak leh phur tak, discipline nei tho si leh ringtu thalai niawm rengin hun kan hmanga, Thalai President ka nihna a tang pawhin kan memberte chungah nasa takin lawmthu ka sawi a ni.
Kan carol-na hmun apiangah hian Bible chhiar leh tawngtaina kan hmang zel thei a, kan lawm khawp mai.
In tam takin ei tur chi hrang hrang (sweet, serthlum, thingpui, chhang, etc) kan ril a tam hran lo khawp mai. Zan dar 12-ah kan carol kan zo thei.

2011-12-26T16:22:00.000+08:00

Lengthiam Magazine

2011-12-24T02:11:00.002+08:00

He monthly magazine-ah hian Interview leh zirchianna telh ziah a ni a.
Khawtlanga mi hmingtha leh mihlawhtling, chhuanawmte interview-na neih thin a ni a, hemi chungchangah hi chuan thil tih a harsa hran lo. Mahse Zirchianna (questionnaire, survey) chungchangah hian thil tih ala buaithlak deuh.
Kan mipui te hian zirchianna lam pang hi an la pawh tawk lo. Hetiang tana zawhna ang chi pawh hi an la tawng ngai lo va, kan inhrilhfiah fe hnuah pawh nuihzat thlak tak tak a tam duh hle. Tin, kan ram hi sipai sorkarin rei tak min lo hrual tawh a, mipui hi kan ti deuh dek hian a hriat a, hei vang pawh hi a ni mai thei.
He chanchinbu hi ka tupa buatsaih a ni a. Zirchianna huang a tan hian nasa takin ka pui thin a. A beidawng hle thin a, zawhna copy 200 vel sem chhuahte hian 100 vel chauhin an chhang a. Beidawng lo turin theih tawpin ka fuih ve thin a. Kan khawtlang leh hnam tan nakin zel rohlu a la ni dawn a ni. Tunah mipuiin Research chu la hre thiam hrih lo mahse zawi zawin an la hre thiam ve mai ang, tiin.
Kan chanchinbu hi chhiar zawh ruala bawlhhlawh bawmah paih mai a nih loh nan, thil chhinchhiah tlak leh khua leh hnam tan rohlu la ni thei tur hi kan zep tel hram tur a ni. Khawtlang leh kan mipuite tana Vision i neih chu kalpui zel rawh. Mipuite hi zirtir theih an ni tih hi pawm tlat bawk ang che tiin ka thiam tawkin ka fuih ve thin.
Zaninah ka tupa nen kan inchat-a ka fuihna te a hriat thiam thu leh mi tih ang leh sawiselna ang apianga a rilru sawhsawn mai mai lo turin rilru pawh a tihkhauh sauh sauh thu min hrilh ve a ka lawm khawp mai.

Mizo Kristian Thalai Pawl, Yangon

2011-12-19T01:06:00.005+08:00

Ni 17.12.2011 (Sat) khan Yangon Mizo Kristian Thalai Pawl (YMKTP) chuan UBS, Campus hmun, Pale-ah" Kristmas Hmuahna Sing Song Service" hlimawm tak a buatsaih a.

Vice President Saya Lalawmpuia'n (Puibawiha) Welcome Speech a sawi a; YMKTP-hi naupangte mah nise hetianga Program hlimawm leh ropui tak mai a buatsaih thei hi Pathian kaihhruaina vang chauh a ni a.

Mizo kohhran hrang hrangte Kristian thalaite bakah Burma rama kan Kristian pui hnamdang unaute, leh khawvel hmun hranga kan Kristian thalai puite thlengin inunauna tha leh thawh hona tha kan neih theih nan vawiina rawn kal khawmte hi kan pawimawh a ni.

Ringlo mite karah, ring lo mite khawpuiah kan chenga Daniela leh a thiante kha hre rengin kan thalai puite leh kan hnampuite rinna kawnga tichaktu leh Lalpa ropuina puang chhuaktu niturin i infuihin i intichak tawn sauh sauh zawk ang u. Vawiinah hian kan aw rawl neih zawng zawngin, rimawi chi hrang hrang hmangin Lalpa chu i fak ang u.

Aw Lalpa chhiahhlawh, Lalpa ina dinga, kan Pathian in hung chhung kawtlaia ding thinte u, Amah chu fak rawh u. Lalpa chu a tha si a. Lalpan Zion atangin malsawm che u rawh se.

Rev. Lallianvula'n thuchah a sawi a: Kan Mizo khaw hrang hrangah khawtlang (Social) leh Culture lam humhalhtu pawl bakah Kristian Thalai Pawl kan din zel thu a sawi a. Mizo (Thalai) ten Kristmas kan hman dan tha lo; Khawlaiah Sound box kan pai chhuak a, chutiang chuan thla hnih velah chuan Sawn Bawk kan lo pai puar leh ta thin a. Chuvangin Kristmas dik tak i hmang ang u tiin thahnem ngai takin thuchah a sawi.

Inkhawmna hun hman zawh a nih hnu hian kan thalai ten an nghahhlelh em em Sing Song Service hlimawm tak hman chhunzawm nghal a ni. Annoucer te an zei dun bawk a. Hla sak kar lakah min tinui reng a. Alpha Dance Group an han lam zet mai chu Ptr. Hmangaihpuia pawh a awm mai mai thei lo, a Camera lekkawhin kan dancer te a dinchilh hnai thei hle a ni.

Pantei

YMKTP hruaituten kan Musiciante leh Singer te zai thiam zia an hmuhin YMKTP Music Festival buatsaih tura Project hial duan a that an rin thu an ti ti nghe nghe a ni. A hranpa takin lawm thu sawi dawn ta ila kan Musician te leh kan zaithiamte chungah hian lawmthu sawi kan ba nasa hle awm e.

Chuani

Sing Song Service hman zawh hian Games intihlimna Rev. Hrangauthuama'n a kaihruaia; mi

pahnih zel hruiin min thlun zawma chumi phelh theih dan chu kawng khat chhiah a awm a ti a, phelh dan tur ngaihtuahin kan buai sup sup mai a ni. He infiamnain a zirtir chu sual phuarna lak ata hi chhuah theih dan kawng khat chauh a awm a, chu chu Isua Krista Rin hi a ni. Tun laia sakhaw intluk tlanna ngaisang pawl leh Pluralism zirtirna chuan Sakhaw hrang hrangin mahni kawng theuhin Pathian kan bia a, Rome khawpui theng turin thlawhnain, a thenin motor leh lawngin kan pan theuh a, chutiang bawk chuan Van khawpui chu mahni kawng kawngin kan pan theuh a ni tia an zirtirna hian, "Kei hi kawng…… ka ni" tia Isua thusawi hi a kalh a ni. Game dangte kan infiam zawh hnuin zanriah kan kil ho.

Zanriah kan kil zawh hnu hian member thenkhatte rawtna angin group Photo lak a ni a, mahse member thenkhat erawh an haw hman tawh a, pawi kan ti hle.

Haw kawngah thalaite ti ti tam ber chu, " Rangona ka ruai theh tawhnaah chuan kan la hnianghnar ber awm e. Kan chawhmeh thleng kha a phai hman lo reng reng," tiin. Fatuten min vil hneh bawk a, Bel te phai thei lo an sawi ang mai a ni. Mizopa chawhmeh tui ber Ar sa leh vawk sa chhum pawlh antam thlak a ni a, a tuihang pawh a tui kher mai.

Kan chaw ei laia nula then khatin hmaizaha min han zap heuh heuh mai kha chu aw… phu lo ka inti, awm dan ka thiam lo tep zawk a, mahse ka rilruah Burmaah ka awm a ni tih chiang takin min hriattir a, kawl zingah rawngbawla kan kal changte hian kan chaw ei laiin kha tiang khan hmaizahin min lo zap heuh heuh thin a, Kawl ho culture pakhat ni ve maiin ka hria.

Thlengtute lo inbuatsaihna mawlh kha a fakawm a ni. An hall mawi takin an lo chei a, banner mawi tak leh panpar nen, an music instrument phal takin min hmantir a, fatu mawhphurhna engkim min laksak bawk a, an hotute leh zirlaite inlungrualna, inpekna kha keini YMKTP tan hian malsawmna van tla a ni a, hmun hla tak tak atanga rawn kal Memerte inpekna nen kan theihnghilh tawh loh tur YMKTP history chu a ni.

Chawhchawrawi

2011-12-16T00:50:00.004+08:00

Rangonah hian kan awmna a inkarki a, Kan member thenkhatte chu mel 10 a hla atangte an rawn inkhawm a. Chungvangin Chawlh niah hian Sunday school kan neih zawh veleh pawn pawh chhuak tawh chuang lovin Inkhawm kan chhunzawm nghal thin. Tih tawk a awm a ni ber mai. Nilai zan, Inrin zan, etc inkhawm a awm ve tawh lo. Keini erawh Chawlh ni zanah hian Preaching point inkhawm kan nei ve thin a. In hnih thum vel, in-ah kan inkhawm ho ve thin.

Rangona kan kohhran pic tlem

Thalai member hi kan tam lo hle a, a then foreign-ah an la kal zui bawk nen. Bible school zirlai te hi an awm a kan khaw har lutuk bik lo hlauh. Thalai inkhawmah hi chuan Kawl tawng nena pawlh deuh a ngaih thin, Kan bible zirlaiah hian hnam dang (Karen, Kachin, Shan) an awm ve a vangin.

Kumin Sunday school exam lai.

He tilamah chuan kum tawpah hian Exam-na buatsaih thin a ni a. Tin, Mark hmu that e hnenah leh kai tam te hnenah Lawmman pawh pek thin a ni.

School zawng zawngah chuan result chhuak chhe ber thin chu Sunday school hi niin ka hria.

Sacrament kil lai.

Hun a rei loh zawk nan tihian kan ding tlar teuh mai a ni. Tum hnih kan kil chuan kan zo a ni mai. Thla khatah vawi khat chawlh ni hmasa berah kan kil thin.

A chang chuan inkhawm banah thingpui leh chhang kan ei ho thin.

Kan nu hi puan thui thiam a ni a, hmanni-a a kawr thui pakhat chu heta tan hian kan hmet ve ringawt a.

Ram danga awm Halkha unaute, Falam unaute hian Hnam incheina (tahpuan) kawr leh Skirt an thui tir nasa thin khawp mai. Tin thenawm vela Kawl leh Karen te pawhin an thuitir bawk.

Ramdanga awm ten an sawi ka lo hriat danin heng kan unaute hian an hnam inthuam hi an uarin an thehlar ve nasa. Mipa pawhin kawrchung-ah te an thui a. Necktie atan te an thui a, kut ni vangthla, puipun niah chuan hak turah an ngai emaw tih mai tur a ni.

Tunlai inneih dan (Parcel) Zirchianna

2011-12-15T01:04:00.002+08:00

Kan nulate zingah Parcel-a pasal neih chak zawk hi tlemte chauh an ni.

Source: Lengthiam Magazine (Tahan)

Tunlai kan inneih dan chikhat (Parcel) chungchanga Zirchianna Result atang hian Burma rama kan Mizo mipuite ngaihdan chiang takin a hmuh theih a. Tunlai kan nunphung leh khawsa zia nen pawh hian an chhanna hi a inmil hle niin a lang. An hmuh dan leh ngaihdan dik tak hmanga kan zawhnate min chhansaktu zawng zawngte chungah lawmthu kan sawi tak meuh meuh a ni. Hei hi kan mizo khawvel hriatah puan zar mek a ni. He zirchianna atana kan zawhnate min semdarhsaka, a result min lakkhawm sak lehtu Lengthiam Editor chungah pawh lawmthu kan sawi tak meuh a ni. Kum zabi 21-na tantir lama Parcel inneih dan chungchanga Burma Mizote dinhmun chiang tak haichhuaha, pholana a awm thei hi kan lawm tak zet a ni. Questionaire (Survey) buatsaihtute: Saya Lalawmpuia (Puibawiha) & Saya Rodingliana.

Tunlai inneih dan chikhat (Parcel) hi a tha ti mi zaah 39.32% an awm laiin, tha ti lo zaah 51.68% an awm. He zirchianna atanga a lan danin Parcel inneih dan hi kan zingah tha ti leh ti lo kan awm nuk mai tih a chiang a. Ngaihdan fumfe nei lo pawh tlem azawng kan awm a ni.

Hetianga innei te hi dam chhunga nupa kawpchawi rem tak an nihtheih leh theih loh tur chungchangah ngaihdan fumfe neih a har a ni ang ring leh ring lo an inzat thuak a, ngaihdan nei lo an thahnem hle bawk. A tam zawk erawh chuan chhan chi hrang hrang avangin nupa kawpchawi rem an nih theih an ring lo.

Tlangvalin nupui tur an rawn chahna chhan hi atam zawk ngaihdanah chuan mahni mi leh sa ngei neih an duh vang a ni a. An awmna ramah nupui tur an hmuh loh vang mai mai a ni ti pawh an awm ve tho.

Ram danga nupui/pasal inthawn tifuh lo sawi tur hria kan thahnem hle. Hei hian fimkhur a ngai a ni tih min zirtir se.

Hmangaihte nen chuan bahra khur laih pawh ka thlang zawk tih thu hian kan zingah hmun a chang sang vak tawh lo niin a lang. Ram danga Parcel-a kan inthawnna chhan hi sumpai um vang tia chhang an thahnem ber a, Hmangaihna avang a ni ti erawh an tlem ber thung (a lungchhiat thlak em?). Sumpai um vanga innei te nge zik tluak anga hmangaihna avanga innei te hi—ngaihtuah a tithui hle mai.

Ramdanga kal ve lo tualchhung tlangval tuar na na fe fe kan zingah an pung tual tualin an ring tlat mai le. Tualchhung tlangvalte tanlak a tul tan viau dawn niin a lang.

Kan chhanna atanga a lan danin ramdanga kal ve lo tlangvalte hian nupui tur an van phah kan ring lem lo.

A hnuai ami hi kan zawhna leh chhanna chu a ni a, mahnia chik taka lo zirchiang duh te tan kan han tarlang a ni e.

He zirchianna (questionnaire) hi Kohhran nu leh pa te, Thalai te, Office hnathawhna hmuna awm nu leh pa leh thalai te hnenah copy 200, November 2011 atang khan sem chhuah a ni.

Mi (90)-in an chhang a; Mipa (48) leh Hmeichhia (42) an ni. Single (42) leh Married (48) an ni.

Note: Khualkhung ( ) chhungah hian chhangtu zat (number) tar lan zel a ni.

I kum zat _____, Mipa ( ), or Hmeichhia ( ); Single ( ), Married ( ).

1. Tunlai inneih dan; nupui/pasal inthawn (Parcel) hi tha i ti em?

(a) tha ka ti (35), (b) tha ka ti lo (46), (c) ngaihdan ka nei lo(8).

2. Kan hnam inneih dan hmang ti-hmelhemin i hria em?

(a) ti-hmelhem (46), (b) tihmelhem lo (35), (c) ngaihdan ka nei lo (9).

3. Nulate zalenna ti-tla hniamin i hria em?

(a) aw (42), (b) aih (40), (c) ngaihdan ka nei lo (8).

4. Damchhunga nupa kawpchawi rem tak an ni theiin i ring em?

(a) ring (29), (b) ring lo (35), (c) ngaihdan ka nei lo (26).

5. Hetianga inneite hi zaah (%) engzat hi nge damchhunga nupa kawpchawi rem ni theia i rin?

(a) 5% ai tam lo (15) (b) 15% ai tam lo (19) (c) 30% aia tam lo (17) (d) 50% aia tam lo (25) (e) 60% ai tlem lo (13).

6. Tlangvalin nupui tur an rawn chahna (parcel) chhan hi

(a) mahni mi leh sa ngei neih an duh vang (39) (b) an awmna ramah nupui tur an hmuh loh vang (20) (c) a pahnihin (15) d) Inhmangaihsa an nih vang (16).

7. Ramdanga awm nulate hian pasal tur an chah ve lohna chhan hi

(a) hnamdang neih an pawisak loh vang (18) (b) kan hnamdanah hmeichhia zawkin pasal an biak loh vang (48) (c) an awmna hmunah kan mi leh sa neih mai tur an awm tho vang(25).

8. Ramdanga nupui/pasal inthawn tifuh lo engzat nge i hriat?

(a) 1 (23) (b) 2 leh a aia tam (44) (c) hriat ka nei lo (23)

9. Ramdanga nupui/pasal kan inthawnna chhan hi

(a) sumpai um vang (43) (b) ramdang ngaihsan vang (28) (c) nu leh pa thuawi vang (10) (d) hmangaihna vang (9)

10. Inngaihzawn lawkna awm lova nupui/pasal inthawn hi hmeichhe tan harsa-in i ring em?

(a) ring (70) (b) ring lo (15) (c) ngaihdan ka nei lo (5)

11. Ramdanga kal ve lo tlangvalte hian nupui an van phahin i ring em?

(a) ring (10) (b) ring lo (71) (c) ngaihdan ka nei lo (10)

12. Ramdanga kal ve lo tlangval tuarna fe fe an awm phahin i ring em?

(a) ring lutuk (41) (b) ring vak lo (35) (c) ring lo hulhual (14)

13. Ramdangah kan tlangvalte an chhuah nasat avangin khuaa awm kan nula te hi hnamdang tlangval nen an inneih phahin i ring/hria em?

(a) ring (20) (b) ring lo (59) (c) ngaihdan ka nei lo (11)

14. Kan nulate zingah Parcel-a pasal neih chak zawk an awm em?

(a) an tam mai (24) (b) tlemte chauh (60) (c) an awm lo (6).

15. Nupui/pasal inthawn (parcel) hi chin tam zel tlak niin i hria em?

(a) chin tam zel tlak (17) (b) tlak lo (50) (c) ngaihdan ka nei lo (23).

16. Nupui/pasal inthawn ta lo ila hnamdang nupui/pasal nei kan tam phahin i ring em?

(a) ring (28) (b) ring lo (56) (c) ngaihdan ka nei lo(6).

17. Nupui/pasal inneih (Parcel) chungchangah mawhphurtu ber chu

(a) Tlangval (27) (b) nula (30) (c) Nu leh pa. (33)

18. La inhmu ngai miah loh te tan engtinnge mipa-in an nupui tur an thlan i rin?

(a) thlalak/video atangin (31) (b) nu leh pa (16) (c) chatting hmangin (12) (d) avai hian (31).

Sailova, Bethsy, & Nancy Tahan-ah

2011-12-15T00:40:00.004+08:00

Tun tum kan mizoram lam unaute Burma ramah rawngbawlna neia an rawn kal chu a ropuiin mipuiin kan hlut tak zet niin ka hria.
Tahan venglai Presbyterian biak inah rawngbawlna hi neih a ni. Mipui biak inah lenglo hall lamah pawh an khat tlat tihthute kan hria a ni.

Burma lam atang hian Mizoramah rawngbawltu lar tak tak pawh an lo awm ve tawh thin a. El-Bethel Speaker angte kha. Hetianga tha lama pur kan inchawktawn hi Kristian kan nihna mai pawh nilo unau kan nihna atang pawh hian a hluin a ropui ka ti lo thei lo.

Tahan mipuite pawh Siam thar lehna crusade atang hian insiam thar an tum nasa tih thawm pawh a thang e. Rangon lam pawhin vawiin ni thlengin Sailova thusawi kan la sawi chhawng reng mai a ni.
Lalpan ropuina chang sela keini unau za tan malsawmna ni zel rawh se.

Nancy-i zai hi ka va han ngaithla ve chak tak em!!!

Thlalak te hi kan group mail a mi ka rawn post chhawng ve tawp mai a ni

Vanlalsailova leh Bethsy-i

2011-12-10T01:47:00.008+08:00

Mipui zai lai

Ni 5-7 Dec. 2010 khan Rangon English Methodist Church-ah YZTP buatsaihin Siam Thar Lehna Crusade buatsaih ani a. Vanlalsailova chu Speaker a ni. Inkhawm hun hi chhun dar 1:00 - 5:00 pm thleng a ni a.

Keipawh a tawpni-ah ka va inkhawm ve a. Biak in kan khat tha hle a ni.
Rangon Mizote Mizotawng hmang nasa lehzual turin fuihna thu tha tak thuhmaah a sawi a. Duh aiin in Kawl mah mah a ni a ti. "Tho la i kross pu rawh" tih thupui hmangin Sermon ngaihnawm tak a sawi.
Inkhawm hi chawlh pawh awm loin dar 5 thleng hun hman a ni a. Bethsy-in hla 4 a sa a. Vanlalsailovan a thu sawi zawhah hla 4 vel a sa bawk a. Mipuiin an ning lo hle a ni.
Inkhawm banah thlalak pui duhte tan hming pek luh a ni a. Mipuiin thla an lak pui chur chur mai.
Inkhawm banah mipui te hawnna turin Bus 5 ruahman a ni. Chhim leh hmar chhak leh thlang atang mel 10 chuanga hla atanga kal khawm kan ni.
Thil tih zawngchhang tlak chi tak niin ka hria.
Tunah hian Tahan lam hun an hmang mek.Hetiang hian mipuiin thla an lakpui.English Methodist Biak In ( A sir zawnga lak).

Chakai

2011-12-06T20:41:00.001+08:00

Chakai hi kan hmeh khat bawka, rawp a na a niang a bawkpui lian tawk han chhutkeh a tuiin a manhla ngei mai. A ketang pawh a lian thama, hip a manhla tha hle a ni.

Kan nu erawh nau keng (rai) a ni a, a ei ve ngam lo, ka fanuin a duh em em bawk lo nen kham hnawkin ka ei.

Sailove leh Bethsy te Rangon-ah

2011-12-03T01:24:00.001+08:00

Vawiin 2 Dec. 2011-ah Sailova leh Bethsy te Rangon an rawn thleng a, ni 5-7 ah English Methodist biak inah Cursade neih a ni ang. Ni 9-ah Tahan lamah kal 12 thleng hun an hmang dawn a ni awm e.

Awlsam takin blog kan access ve thei ta

2011-11-30T00:33:00.001+08:00

Rin loh takin blog pawh awlsam takin kan access thei ve ta e. Kan ram (Myanmar) sorkar pawh tlem tlemin a inher danglam ve hret hret niin a lang a lawmawm khawp mai.Tunah chuan thlalak pawh a upload ve theih ta e.
A lawmna ang rengin kan ka nupui leh fapa thla hi kan upload ve reng reng ang e.

Kum 2008 buai atang khan kan ramah Blog hi block vek a ni a. Kha tia an block-na chhan kha Blogger te khan chanchin leh thlalak nasa taka khawvelah an theh darh vang ni deuh berin alang.
Ka blog hi ka dairy ang reng atana ka siam a ni a. Hetia ka hmang leh thei hi a lawmawm ka ti hle a ni.

TAHAN KHAWTLANG THALAI DIN TAN NI

2011-10-25T21:54:00.000+08:00

(Vawiin hian ka blog ka access thei leh hlauhva 'Pic erawh upload theih loh,' he thu hi kan dah tha a ni)

Tahan khaw dintuten kum 1948 October thlaah khawtlang thalai kan awm/din tan a, keini Lusei ho thalai inenkawlna bul chu zawlbuk a ni. Zawlbuk awm loh hnuah thalai enkawlna ber chu thalai pawl siam a ni. Tahan din thara thalai pawl siam kum 1948 October thla hian Pu Sapbawia inah inthlanna neiin din thar a ni a.
President -Laltawna
Secretary -F.Zasanga
Financial Secy -Tv. Thanghrima
Treasurer -Tv. Lalchhunga
Committee Memberte
1. Sapbawia
2. Lamputa
3. Hrangliana
4. Velpahranga
5. Lalawia
6. Tialchhuma
7. Lalliana
8. Kawlkhuma
Thalai Thupui
1. Kan ram roreltute thu awih
2. Khawchhung, kangmei leh misual laka ven him
3. Ruih theih lam do
4. Tanpui ngaite tanpui
5. Aia upa te zah thiam leh thutna ken (kian)
6. Kristian mi, hotute thu awih,
Heng thu hi awiha, nunpuia, zawmtu nih kan inzirtir.
KRISTIAN THALAI PAWL
Din kum : March 1947
A hmun : F. Lamputa In
Inthlanna kan nei nghal:
President - F. Lamputa
Secretary - F. Zasanga
Financial Secy - Tv. Thanghrima
Treasurer - Tv. Lalchhunga
Committee Members:
1. Nl. Saimanthangi (Saimani)
2. Nl. Hranghluni
3. Nl. Lianchhungi
4. Nl. Hmingthangi
5. Pu Saikhuma
6. Lalliana
7. Pu Laltawna
8. Tv. Lalawia
THUPUI
1. Kohhran hotute thu awih,
2. Ram roreltute thu awih,
3. Tanpui ngaite tanpui
4. Nu leh pa te thu awih,
Heng thu hi tipuitling turin kan inzirtir.
Sum zawn dan: Thawhlawmah nu leh pa te tibuai loin rama thing kan phura, kan zuara kan inhlawhfa.
TAHAN KRISTIAN YOUTH FELLOWSHIP CHANCHIN
Tahan Kristian Youth Fellowship hi 1975 August 14 khan Kohhran hrang hrang hruaituten lungrual takin an lo din a, a din tirh atangin inkaihhruai dan leh Motto felt akin an lo duang a. Chu dan hmang chuan tun thleng hian lungrual takin kan la inkaihruai zel a ni. Kohhrana thahnem ngai leh fel tak takten hetianga Kristian thalaite impumkhatna leh lungrual taka rawng kan bawlho theihna tura, TCYF an lo din hi a lawmawm tak meuh a ni. TCYF hi a din tirhah chuan EYC (EFC), PYF (PCM), MYA (Methodist), IYD (ICM), AT (SDA), leh Seventh day Baptist kohhran panga chauh an ni a, zawi zawia lo pung a ni.
TCYF THUVAWN (MOTTO)
“Thangthar zel te Krista tana buatsaih”
A THIL TUMTE
1. Tahan khawngchhing Kristian nungchang mawi taka siam.
2. Kohhran tina thalaite inpumkhatna nei tura theih tawp chhuah.
3. Kohhran tin thalai zinga Kristian nungchang mawi tak putute chawimawi.
4. Khawvel suahsualna laka thalaite fihlim tura zirtir.
5. Hun hmang thiam tur leh taima taka hna thawk tura zirtir.
6. TCYF-a tel zirlai tithate chawimawi.
TIH LOH TUR DANTE
1. Eng politics-ah mah a inrawlh lo vang a, eng politics mahin hmanruaah a hmang thei lo vang, sakhaw rawngbawlna tan chauh a ni.
2. Kohhran mal bik duh dana thunun leh hruai theih a ni lo.
3. Tu doctrine mah a paih thei lova, pawl bik doctrine-ah hruai turin a zirtir tur a ni lo.
TCYF MEMBER NIH THEIH DAN
TCYF thil tum tihlawhtling duh kohhran thalaite leh Isua Lal leh Chandamtua pawm te tel theih a ni.
TCYF RAWNGBAWL DAN TLANGPUI
Tun hma kha chuan Essay inziak siak te, Debate te, Consultation te, Retreat te, Football inkhelh te, sing song service leh Christmas hmuahna te an lo hmang thin a. Khawtlang tan Bazar leh a chhehvel then fait e, thlanmual kawng siam that leh thlanmual hnim thian fai tein khawtlang tan theih tawp an lo chhuah tawh thin. Tun hnu hi chuan zirlai titha te chawimawi, sing song service, thupui thlan bik hmanga inkhawm, Christmas hmuahna inkhawm te leh TCYF hminga inral thin te hi an rawngbawl dan tlangpui a ni.

Nu Rpui Jokebedi

2011-09-20T01:37:00.004+08:00

(Exo. 2:1-4; 6:20; Num. 26:59)

Mosia nu Jokebedi: Hetih hun lai hian fanaute zalen taka enkawl theihna an nei lo. chawlh hahdam hun leh mut hun tak ngial pawh duh anga nei lo Sal hian a hun awl neih chhun chu a fapa tan a hlan zo vek thin.

Hlauthawng reng rengin thla 3 chhung a fapa a thuhruk lai khan chhun zan zawmin a fa tan atawngtai thin a. A tawngtai chhanna Pharaoha fanua fapa atan kum 12 chhung enkawl theihna a nei ta. Nangteh ifate enkawl nan hun engtiang nge i neih?

He hun chhung hian a hlawhchham hlauh chuan a fapa chu Setana khua leh tui niin Aigupta ro a chenin a hun chu a hmang dawn a ni. He hun tawite hi eng ang taka hman tangkai leh hman that tul ang maw?

Jokebedi hi a fapa a enkawlna kawngah a hlawhtling hle tih a lanna chu, "Rinnain Mosia chuan a lo puitlin hnu khan Pharaoa fanua fapaa vuah a duh lo va; rei lo te atan sual nawmna hlimpui ai chuan Pathian mite nena tihduhdah tuar a thlang ta zawk a," Heb. 11:24,25.

Nu leh pate u, in hun hlu chu eng angin nge in hman thin le?

Nula tlangvalte u, in thil duh leh ngaihhlut ber enkawl nan engtiangin nge hun in hman thin?

Rei lo tea tan sual nawmna hlimpui hi kan thlang fo zawk em ni? Sual nawmna kan hlimpui loh vanga eng ang tuarna nge kan tawh ve tawh? Tuarna ni lovin malsawmna hlir kan chang a nih phei chuan a va lawmawm nasa dawn em!!!

Zanin chu ka lawm kher mai, ka blog ka sign in leh thei a.
Ka blog ka sign in theih loh avangin Facebook lamah ka lenglut phah a.
Mahni blog-ah pawh comment takngail pawh ka pe thei lo kha chu mang ang thlak tak a ni.

Cobus - Boys Like Girls - The Great Escape (DRUMS COVER)

2011-09-20T01:25:00.003+08:00

Ka blogah hian ka sign in thei lohna a rei tawh a. Proxy (bypass) ka hman thin hi kan sorkar-in a lo block leh tawh a nih ka ring deuh a. Heti hian Youtube atang ka tichhina a lo theih hlauh maia a lawmawm hle.
A hnuai ami hi; drummer hi a thiam khawp mai.

Kan Hotute Nen

2011-09-20T01:17:00.001+08:00

Hmanni khan kan kohhrana zirna lama kan hotu lian International Board of Education (IBOE) ten min rawn tlawha, kan Bible college an rawn enfiah a, kan inkawmhona atangin hma bak kan la ngah zia a lang.

Ka fanuin thla a lakpui

Ka fapa

Ka tupa tan

2011-07-11T23:36:00.000+08:00

Mi puitlinga siam che hi ka tum a. Tih lar che pawh ka tum a ni.
Tawng tam loh zir la, in la thu tak la, thusawi thiam zir bawk ang che.
Thu i sawiin i aw hi ti thum deuh la a thain ka ring, i aw hi a chhe ve si a.
Mahni inring tawk takin awm tum tlat ang che. Zam hmel leh zam aw-ka put loh hram tum la, nangmahin inzir thin rawh. Chanchinbua i thil chhuah te hi khawi hmunah pawh miin an zawt thut thut thei che a, a tam thei ang ber byheart tum ang che.
Zawhna an zawt che a nih chuan an beiseina bo lo zawngin chhang thin ang che. Engtirnan, Thil huphurhawm leh beisei awm lo tak pawh nise, "tihhram kan rawn tum dawn a nia," Kan tangho anga…'nangni in awm bawk a," "lo thlaphang suh u" tih ang chite hian i chhang thin dawn a nia.
Leader pakhat i ni tih hi hre reng ang che. Thawmhnaw inbel uluk ang che (a hun leh a hmun mila thawmhnaw thlan thiam a pawimawh).
Thian tha siam zel la, thian kawm duhtui bawk ang che. Thian changkang lo leh fel lo deuh (zu heh) chu kawm duh suh, han nuih deuh vur vur la, kal sawn vat zel mai rawh.
Kohhran leh sakhuana ngainep zawngin engmah ti suh ang che. Mizo zawng zawng deuh thaw hi Kristian kan ni a, sakhuana ngaisang mi kan ni si a. Chapona hi i cheziaah leh tawmkamah lan chhuahtir lo turin insum tlat ang che. Han insawi theih leh han chapo ve deuh hi kan chak ve tlat thin a, mahni insum theih a ngai a ni, tuman min pui thei lo, mahni kan pawimawh. Mi rinchhanin thil ti lo la, mahni kea din theih hi tum tlat ang che. Mi rethei nih tum lo la, inkhawl thei mi nih tum zawk ang che. Sum leh pai te hi Emergency-a hman tul hun a awm thin a ni tih hriain khek thin ang che. Sum tam tak sen ngai Accident te pawh tawk thut thei vek kan ni. Kum khat chhungin thil thar tha tak pakhat tal neih tum tlat la. I thil tih turah plan fel takin saim sa thin ang che. A chipchiar thei ang berin ruahmanna siam lawk rawh. Then khat chuan rawng ka bawl dawn an ti tawp a, a chipchiarin an ngaihtuah lawk lem lo; eng ang rawngbawlna chiah nge? Khawi hmunah nge? Tute hnenah nge? Engtik hunah nge? Hun leh tha eng zat nge sen ngai? Kum khat chhungin a rahchhuah (out come) eng zat nge kan beisei? kum 10 chhungin eng ang taka thanglian tur nge ni ang, etc.? hengte hi ngaihtuah lawk thin ang che. Tawngtai thlah thlam suh ang che, Lalpa tih hi finna bul a ni tih hi vawiin ni thlengin a la dik reng a ni tih pawm tlat ang che.

Zirchianna: "Tuivar Khua"

2011-07-09T22:27:00.000+08:00

Tun tumah hian Tuivar khua zirchianna uluk taka neih a ni a, Tuivar khua ni ve lo te tan pawh; keini tlangmi kawl phaia chengte dinhmun min thlir thiamtirtu tha tak a nih kan beisei.
Tuivar khua hi khaw hlun tak mai a ni a, Tahan atang Mel 3 vela hlaa awm a ni. Tunah hian in 300 awma ngaih a ni. Kan zawhnate in 145-in uluk takin min chhan sak a, chuta a result chu hetiang hi a ni:
1. Chhungkua: In 145ah chhungkaw member zat 899 an awm. In 300ah chhungkaw member 1860 (Khuaa mihring zat) awma ngaih a ni. Chawhrualin Chhungkaw khatah member 6.2 awm ang an ni.
2. Thalai: In 145ah thalai member zat 330. In 300-ah thalai awm zat 682.75 (Tuivar khua thalai zawng zawng zat). Chawhrualin In khata thalai awm zat 2.3 a ni.
3. Naupang: In 145ah naupang kum 15 hnuailam mi 238 an awm. In 300ah chuan naupang 492.414 (Naupang awm zawng zawng zat). Chawhrualin in khatah naupang awm zat 1.641 (Naupang an tam lo hle mai). Naupang kan thlahthlam thin avangin khawlaiah naupang an tama, naupang ngah angin kan lang thin.
4. Graduate: In 145ah mi 44 graduate an awm a. In 300 (khaw pumpui)-ah chuan graduate mi 91.03 awm ang an ni.
Kawng dangin lo chhut leh ila; mi 899-ah graduate mi 44 an awm a. Mihring za zelah graduate 4.89% awm ang an ni.
5. Graduate ho Degree neih te: M.Sc, M.Th, M. Div, M.Min, B.Sc(Bot), B.Sc(zoo), B.Sc(che), B.Sc(Geo), B.Sc(phy), B.A(Geo), B.A, BRE, B.Th, L.T.H, AGTI. Khaw vannei tak an ni, degree tha tak tak nei an lo kuhtul mai.
6. Ram danga awm: In 145 atang mi 155 ram dangah an awm. In 300ah chuan mi 320.69 ram danga awm ang an ni. Mihring za zelah mi 17.24% ram danga kal ang an ni.
7. Ei zawnna: Eizawnna hi in khat atang pawhin chi hnih chi thum a awm thei a, a tlangpui lo tar lang ila. Leilet=81, Sangha dil=32, Ram dang atang=20, Pathian rawngbawl=13, Sumdang=10 leh kut thiam chi hrang hrang atanga ei zawngte an ni.
An Sangha dil hi fan tham zet a ni a, Kalay Myo, Tahan leh a chhehvel khuate sanghaa min chawmtu an ni a, an chungah hian lawmthu sawi pawh kan ba hial awm e.

He research a hlawhtlinna tura thahnem ngai taka min tanpuitu Pu Sawma (Tuivar Youth Association President) chungah lawm thu kan sawi a, tin kan zawhnate min chhan saktu in 145 chhungkuate chungah pawh lawm thu kan sawi nghal bawk e.
Mimal, chhungkua, Khawtlang hmasawnna leh dinhmun zirchianna hi thil pawimawh leh tha tak mai a ni a. Khawtlang hmasawnna leh dinhmun ziaka dah tha duh tan pawh he thil hi thil tangkai tak tur a ni.

Note: He zirchianna hi 2011 June thla chawlhkar hnuhnung ber khan peihfel a ni.
(Hei hi ka tupa (Thangchhuahzova) chanchinbu "Lengthiam"-a chhuah tur kan buatsaih a ni, Pba.)

Thlan

2011-06-28T23:21:00.003+08:00

* Tahan thlan Pic chu hetah hian ka lo dah ang= http://facebook.com/puibawiha (Kan ram zawng engmah chiang tak a sawi theih loh,ka blog-ah pawh comment ka ziak thei lo, thlalak ka upload thei hek lo, thu ka la post thei hram a, zia tak awm)

Mizo puithuna chi khatah chuan:
Thlan khur laih sa zan riahtir a tha lo, tih a ni a. A tawi zawngin sawi mai ila, mitthi phumna tur thlan kan lai a, mahse phum tur an awm leh si loh chuan thlan chu chhilh leh ngei tur a ni, chhilh lova zan riahtir a tha lo, ruang a chhuak duh, tih a ni thin. A hming hrim hrim han lam pawh hian mi dawihzep deuh tan chuan hmulthi din ur urna tham chu a tling ve reng a ni. Mizo tlangval hrisel (dam) pangai tan chuan mitthi an awmin thlan lai tura ngaih a ni thin a.

Tun hma deuh khan Tahan-ah pawh thlan kan lai thin a. Thlanmual hmun hi tui a hnai khawp mai a, feet 4 vela thuk kan laih chuan tui a put mai thin a, duh anga thuka laih pawh a tihar thin. Ka tlangval chhung khan Tahan-ah ka awm tam lo em a, ka awm ve laia thlan ka laih ve lai kha chuan Khaukhurh ang chi te hi kan lai ve pawhin ka hre lo. Mi bik deuh, tlawmngai thlan lai taima deuhte thlan erawh kan theih anga thukin kan lai ve ngei chuan ka hria. Tahan phai thlan laih hi a harsatna chu tui a hnai a, tin lung hi a chang em em mai a, thlan khur then khat phei chu lungral te nen beih hle a ngai thin.

Hruaitute ruahman dan nia ka hriat chu Thlan pakhat leh pakhat inkar hi thlan pakhat lenga dah awl thin tur a ni. A chhan chu an chhung dangte thi an awm hunah phum tlan an duh thin vangte, tin thlan bul hnaitea thlan thar kan laih leh nghal chuan thlan hlui zawk rim hi a rawn nam chhuak thei bawk. Tui a hnai (put hma) ropui si a. Tum khat pawh thlan awmsa bul hnaiteah kan laia thlan hlui atang chuan tui dum tle rilh relh hi a rawn put chhuaka a uih kher mai. Sawipui rawn lai ve rawh kan ti a. "Aih, ka pumin a ngaih lo" a ti a. Tlangval pakhat chuan Chithlum kan pe ve dawn lo che a nia, a ti a. Sawipuia chuan, "Ka vaw thlu ang che" a ti hmuk a. (Sawipuia hi mi ang zan lo a ni a, mitthi inah hian a thleng hmasa pawl a ni thei ziah. Mitthi awmna chu a hre thei hle a ni. Tichuan khawhar inah hian a riakin a eiin nghal a, tui chawituah a tangkai thin hle a ni.)

Hun a lo kal zel a, kawng chen vela thukin kan lai a, tichuan a chhuat leh a bang zawng chu leirawhchana zut kan intihhmuh a. Mitthi an awm pawhin thlan lai tura chhuak chu an tlem ta pharh mai a ni. Aizawl lamah pawh veng thenkhatah chuan thlanlaitu tur chu hlawhfa an la tawh mai thin an ti. Thlan lai turin tlangval tha 100 rual sen a tul tawh lo a ni mai e. Tun hunah phei chuan Tahan-ah Thlan laih a awm ta lo!!! (Thlalak en duh tan- puibawiha.webs.com) Lei lai tawh lovin lei chungah khan kuang leng tawkin leirawhchan (cement) kan zuta, a hma lam kan tiawng a, chuta tang chuan kuang chu rawlh luh mai thin a ni a. Tichuan cement-in kan zut phui leh mai thin a ni. Rangonah pawh hian Kristiante chu Kristian thlan mualah (Yei Wee) kan inphum deuh kher thin a. Sipai tanglai thi sipai inhalna hmuna in hal ta mai pawh an awm. Inhlana hmunah hian gas hmanga hal mai thin a ni. Thlanmual man hi a to khawp mai a zat chiah ka sawi thei mai lo. A tlangpui thuin thlanmual vengtu ten thlan laih leh cementa zutte rawng hnawihte mawhphurhna an la thei mai a, pawisa pek an ngai a ni. Rangona thih chu thih man a to an ti thin.

Aw le, ka sawi duh tak chu kan Mizo Puithunaah mitthi phumna tur thlan ruak chu zan riahtir a tha lo tih a ni a. Hei hi khaw tam takah chuan kan la la thupuiin kan serh hlein ka ring a. Tahan-ah chuan mitthi phumna tur thlan ruak kan siam sa teuh mai le. Kan puithuna atanga thlir chuan ngaihthatpui awm lo tak a ni thei ang. Tahan khawtlang hruaitute hi khap mai chi chu an ni bik awm si lo!!!!

Rangon Mizoten kawlho puithunna kan tawmpui. Kawl tawng chuan 'Yet-Le' an ti a. Chu chu, mi athih atanga ni 7-naah a chhungten mitthi puala inkhawmna an nei a, hetah hian an puithiamin mitthi thlarau kha a kalna hmun turah kal turin a tawngtai thin a ni. Hetianga Yet-Le an hman loh chuan mitthi thlarau kha an chhehvelah awm rengin a hrang anga a rawn tibuai thin ang tih an hlau em em a ni. Chuvangin keini Kristiante pawhin thenawm khawvengte hmaizah vang (niberin ka hria)-in kan ti ve ta thin a ni. Thenkhat a la run deuh chuan hei hi puithuna kan neih/chin tharah hial ngaiin, an duh lo ang reng hle a ni. Rangona awm ten kan hriat atana tha chu heng thil kan tih chhan hi kan fate fiah takin kan hrilh tur a ni, chuti lo chuan Kawl ho rinna hi kan lo tawm ve reng alawm maw le an ti palh ang.

He ti hian kan thu chu khar ta mai ila a tha awm e; Hlaua awm leh turin bawih nihna thlarau min pe lova, hlau lova kan awmna turin fa nihna thlarau min pe zawk a ni. Hlauhna thlarau min pe lova, hmangaihna leh thiltihtheihna, fel taka ngaihtuah theihna thlarau min pe a ni zawk.
(Puithuna ka ziak sei lutuka, bung hnihah ka siam rem ta zawk mai.Pba).

Puithuna

2011-06-25T10:12:00.004+08:00

Puithuna kan tih te, Thiang lo kan tihte hi thil engemaw kan tih avanga mihringte chunga chhiatna, vanduaina thlen thei tura kan ngaih te hi an ni a.
Thlarau (spirit) leh huai biaa inthawi thinte hian Puithunna leh thiang lo kan tih hi an ngah bik em em ang tih hi a rin theih a ni. Engvang nge kan tih chuan, an hlauva, tlawn lungawi an duh a, an bia. Thlarau leh huai an biak te kha tihnat palh an hlau em em a, an huat thu sawi leh tawhpalh pawh an hlau hle thin a. Chuta tang chuan "puithuna" leh a bik takin "thiang lo" kan tih hi an siam chawp ta niin a lang. Tin a thente hi chu nun dan tha zirtirna te pawh an ni ve.
Kan pipute huna puithuna leh thiang lo kan tih tam tak kha han en ila; thlarau sual leh ramhuai an hlauh avanga thiang lo an ni deuh nual. Entirnan; kawna In sak chu a thiang lo, ramhuai ho liamna a ni a, an kalna dal taka in lo sak chu a thiang lo va ngaih a ni. Chhungkuaah thihna hial a thlen thei. Tunah chuan Kawn chu khaw tinah hmun lun lai ber leh inhmun to ber a ni ta zel a, thihna a thlen thu lam kan ngaihtuah ta hek lo. Tin, he thil hi kan piputen Khampat an chhuah san hnua an siam chawp niin a lang. A chhan chu, phaizawlah chuan 'Kawn' han tih bik tur a awm hran chuang si lova.

Puithuna kan tih tak hi chu an ni tin nuna thil tha lo thleng thei nia an hriat laka invenna atana khauh taka an inzirtirna chi khat (vau khanna) a ni ber a. Hnam fing deuh puithuna chu fing deuh tura ngaih pawh a ni ang. Mahse kan puithuna te hi en ila, mawl lai, hmanlai thil a ni deuh zel. Mihringte finna a lo sang zela, Science hmangin thil chi hrang hrangte chu finfiah zel a lo ni ta a. Puithunna chhuak thar pawh a awm ta lo reng a ni a tihtheih awm e. Mihring hi mawl tak chu la ni reng ila, puithuna hi a chhuak thar zel anga tun ai hian kan ngah hle tur a ni. Mahse tunah zawng a awm tawh sa pawh kan mausam ta zel zawk a nih hi. Kan Puithuna then khat i han tarlang ila:
Sephung laih laiin tumah a lu lamah awm loh tur; Upa tawng han hawh ve lawk ila, kan naupan lai chuan thian zahoin Sephung kan lai thin a, tichuan kan insiktir thin a ni. (Burmaah chuan Sephung hi Chep tiin kan ko), tunlai naupangte chuan an lai duh ta lo. “Sephung laih laiin tumah a lu lamah awm loh tur, meihawlah a chang duh" an ti thin a. Sephung laih lai chuan a lai ve lo te hi a bih hnai hnaiah an tang thin a, in cheh palh pawh hlauhawm thin tak a ni. Hei vang hian a ni ngei ang kan pipute khan fing takin he puithunna hi an lo hman thin ni. A lu lama awm a vangin Sephung meihawlah a chang hauh lovang le.
Puithuna nichiah lo mahse thu pakhat han zep lawk ila. Kan naupan lai khan ar kan talhin kan nu leh paten duhsak ni awm takin a lu leh a ke chu kan ei duhna turin Ar mit ei chu mit varan, a ke chu tlan chakna an ti a, lungawi em emin kan ei thin. Mitvarna leh tlan chakna tak tak chu ni sela tar leh a upa hlei hlei khan an mamawh zual awm tak an ni. Mahse kan ring ve em em zel zawng a nih kha!

Ni khata Chhim leh hmar, Chhak leh thlang zawng a in khat atanga zin chhuah a thianglo, ruang a chhuak duh. He thu hi tunlaiah pawh mi tam takin an la awi a, an la tih hle a ni. He thu a lo chhuahna chhan sawi tur chu ka hre lova, in khat atang a ruala zin chhuah huk chu in lo nghaktu tan a khawhar thlak hle dawn pawh a ni mahna. Thianglova min ngaihtirtu tak hi a buai thlak lai tak chu a ni a. Chu chu, a thiang lo a ni tih tanfung nei tura ngaihbel tur min zawntirtu hi a ni. Rinna avangin heng zawng zawng hi hneh theih a ni a, Pathian tana thil ropui tak tihtuma zin chhuah tumte tan lek phei chuan in daltir phal chi a ni lo. Tak takah chuan zin chhuak lova thi te hi kan zingah an tam deih zawk a ni.
Thenkhat phei chuan Rawngbawltu thawhtana kal chhuah ngai a ni lo, la cham hrih rawh te an ti a. An la thlehlel hle vangte pawh a ni mahna. Thenkhat leh chuan Nilai-a zin chhuah chu ka duh lo, kan lai hut duh te an ti bawk a. Khawngaih thlak tak an ni. Kei chuan an program a thawl deuha duh hun an la thlang theiah ka ngaih sak mai.

August Thla (Thitin thla)
Kan nu leh pate hi an la puithu hle niin ka hria. Innei turte hian palai kan intir thina, tichuan kan inneih ni leh thla turte chu kan palai, nu leh paten an ruat thin tlangpui a ni. Vawiin thleng hian August (Thitin thla)-a in nei hi ka la hre lo a ni. Hei vang hian kan nu leh pa te kan inneih ni leh thla ruattute hian August thla hi an lo la serhin an la puithu hle a nih awm hi maw ka ti ta ringawt mai a ni.
Mizo thla chhiar dan Rami pa ziak hi a sawifiah dan a tha khawp mai a, mahse ka tan chuan thil thar deuh a ni a, ka han past tawp mai teh ang;
"Chenna hmun leh tlang a dan ang bawkin thlai chin hun leh seng hun te, thing leh pangpar par hun te a inan vek loh avangin, mahni chenna ram milin thla hming an lo nei hrang thliah a ni tih hriat a tha.

1. Thi Tin Thla:
Buhcheng chin nachang an hriat hmaa an kum tawp thla chu “Thi Tin Thla” an ti a; sakhua lamah “Khawn then Thla, Kawngpui hawn Thla” an ti bawk. Tin, Minkut, Fang-er, Khawdo, Dawngrawlh, Dawngpui, Tho tiin hnam hrang hrangin hming an sa thliah a ni. A hun hriat theih dan chu: Derhken, Nawithang, Anthur leh Senhrinu a par a, Tuahfavang a par bawk. Sawrkar thla chuan September chawhnu lam ni 16 atanga October chawhma lam ni 15 thleng a huam. Kum that ni serh an hman zawh atangin kum hlui leh kum thar a then khak thin.
12. Vansar thla:
August ni 6 atanga September ni 15 inkar a ni. A chhinchhiahna chu Vawkpui hmul a kawlh thin a, thla thum chhung a kawlh thin. Serh leh sang ngaipawimawhte chuan he thla chhunga nupui-pasal neih an duh lova, an serh thin. Tin, lu meh leh hmul meh chena serh pawh an awm. Serh lo chu vanduaina eng eng emaw an tawk thei a, sarah an thi duh an ti. “Thlazing” ti an awm bawk."

Puzawnte thli dawnga an kawmthlanga awm a tha lo, hrisel lohna leh thihna hial a thleng thei tih ang chi te hi engemaw zawng taka ngaihtuah chuan a fing ang reng hlein ka hria. Awm tlan dual dual hi engemaw zawng chuan nuam tak a ni a. Mahse chhungkua intihthiam lohna a thleng duh. Naupang na na na chu intihtah changte an nei a, kan fate leh unaute fa an intihthiam loh changin nupuiten an fate tan an lo tina ve ngei thin si a. Tin nupuite awlsam takin mahni pateinah an tlan mai thin. Chuvangin he thil hi hrisel lohna ai mahin chhungkaw intihthiam lohna laka invenna hi a zirtir tum tak niin a lang. Puithuna hi awih vek turah ka ngai lova a phena a zirtirna erawh hmuh thiam a tha.
Van ekkhum tum a tha lo tihte phei hi chu a finfiah tumtute chu an inchhir thin. Mawng vanlam hawiin han bungbu la, tichuan han e ta la, i ek chu i kaah a tla lut mai dawn a sin.
(Ka ziak sei deuha chhiar a huphurhawm em mai. Bung hnihah ka chhuah leh ta zawk. "Thlan" hi a chhunzawmna a ni e.Pba)

Thlan

2011-06-07T17:24:00.001+08:00

Mizo
Dear Kima & Varte,
Zia lo hle mai, pawimawhah min rawn ko thuta Thlan chu ka tlansan deih a lawm le.
Ka sawi tum tak chu: Helamah chuan thlan kan siam sa. Mitthi an awm veleh kuang nena rawlh luh nghal mai theih turin. Kan puithuna nen chuan a inmil chiah lo.
Famkim deuh zawkin ka la rawn ziak ang.

Mizo Version

2011-06-01T23:28:00.003+08:00

Mizo Version
He tilamah chuan Vedio Mizo version hi en nuam an tihlawm khawp mai.
Tahan leh a chhehvel khaw hrang hrangah April-May thla khan rawngbawlin ka awm a. Merlin Film Mizo version kha khaw tinah an en vut vut mai, kan kalna apiangah naupang ka zawta Merlin-a hre lo an awm lo.

Mizo Version an rawn tichhuak hi chu ka lawm tak zet a ni. He lamah chuan Mizo tawng thiam lohte hi an intihhmuh hman tep tawh a. Tunah Korea film emaw sap film pawh nise Mizo version-a tih chhuah a ni hi, Mizo tawng thiam tha duh vak lo pawhin an thiam phah a.

Chichai khuaa ka hmel hriat pakhat phei chuan kan naupang ho chuan mizo tawng an thiam vek tawh a ti a. Chuvangin helam tan chuan Mizo tawng theh darhna tha tak a ni.
Tahan leh a chhehvelah chuan Mizo version hi an en luai luai zel mai a nih hi. Keipawhin ka fanu entur tlem azawng ka lei ve a. Mizo tawng an inzir nan a tha khawp mai. Rangon-ah hian kan fate hian an school-ah hnam dang hlir an kawm a. Kawl tawng hlir an hmang bawka, in lamah nu leh paten Mizo tawng hmanna kawngah tan lakpui an ngai tak zet a ni. Theih tawp chhuahpui chung pawhin an aw phawi leh thluk hi a awn (kawl aw phawi) hma em em a. Tin Mizo tawnga an han tawngte hian direct translate-in kawl tawng kha Mizo tawngin an han hmang ta thin a, a dik lo hu thin a ni.

Kan thenawm Mizo tleirawl pakhat chuan "ka aw a chhang" tih turah "ka aw a lut" a ti daih mai le. A awmzia chu kawl tawngin aw chhang tih chu "a-tan wen dre" tih a ni a, hei hi direct translate chuan "aw lut" tihna a ni ve chiah a ni. Kan thalai member nula pakhat pawhin "A va ni sa ve," a ti a. Engtin maw tiin ka zawt nawn leh a, a ngai thoin a sawi leh a. "Ni a va sa ve" tih zawk tur a lawm tiin ka hrilh. Pastor pakhat (a hming chu sawi lo mai ila) pawhin "Kal ta ula, thlamuang takin Lalpan malsawm che u rawh se" zuk ti thin a. Aaa.. hetiang ang vel hi sawi tur a tam mai.

Rangon chu Mizo tawng duhtui deuh tan chuan khawsik hluah hlauhna tham a tling a ni. Nu leh pa tam tak pawh hi thu an sawi/ puan te hian an uar tumna lamah a thluk hi a lai leh hu thin.
Mi then khat chuan Kohhran pawh hi "hran" tih lai hi an lam dan a dang, an lam ri sang ta thin a ("hran san" tih angin). Chawimawina pawh "chawi" lai hi an lam ri sang a, 'mawi' hi an tihniam leh daih bawk a. Thiam lo na na na chu duh tui tur leh tur loh pawh kan hre lo va, thiam lo duhtui bawk si lo chu le.. a harsa a ni e. Hetih lai hian thiam tak tak pawh an awm ve tho tih erawh hriat a tha ang.

Mizo Version video film hian Mizo tawng min zirtir mek chu a ni ta ber mai le. Letlingtu (LPS & Zonet)-te an fakawm hle a ni. Chutih rualin fimkhur taka hma la zel turin ka chah duh a. Tun hma kha chuan Bible hi Mizo tawng kan zirna ber a ni thin a. Tunah chuan Mizo Version hian kan khawtlang a deng chhuak a, mitinin kan hlut a, naupang tan lek phei chuan a ni leh zual a. Hmuh nawm thlir chungin Mizo tawng min zir a, Mizo tawng zir nan a ninawm si lova Bible aiin hma a la chak zawk deih a ni.
He lamah chuan Common language te hi neih kan duh tlanga, mahse mahni hmasialna leh mahni chi leh kuang tanghma haina hian khua min hawi thui tir thei si lo. He Mizo version hi a sutkianna tha tak pakhat chu a ni a. Mizo tawng dinhmun rawn chawisang leh theitu pawh a ni. Rawn chawisang leh kan' tihkherna chhan pawh hi, kan naupang ve lai khan Tahanah Mizo tawng kan hmang veka, kan hre vek bawk. Thawk khat deuh atang khan dona leh erna a nasa ta hle a. Then khat a hria leh thiam pawhin an hmang duh lo lui ta thin a nih hi. Zaithiam tan leh thu ziak mi tan market zau tur chuan common language pawimawh zia a lang a. Hnam tlemtein anmahni tawngin Music Album an tichhuaka, lehkhabu an chhuaha an hnam pumpui pawhin lei se la, hausakpuina tham a tling zo lo. Mahni tawng tihmasawn leh vawn nun tum hi thil sual a ni hauh lo. Mahse, tawng a tam thei ang ber thiam chu a tha fe zawk a ni.
Helamah chuan Mizo Version hi atangkai hle a. Zo hnahthlak zawng zawng tan hian tangkai zel bawk se la, a duhawm a ni.

Champion League Final

2011-05-31T17:17:00.000+08:00

Tun dinhmuna ka club duh ber Barca chuan England club tha bera ngaih Man U chu 3-1 an hnen ta.
Kum 2006 World Cup atanga ka lo hmelhriat ve chauh Argentina player Lionel Messi ka idol chu he final-ah hian a dan pangaiin a che tha leh hle mai. Burma-ah hian Man U' fun an tam ber. Tin Burmaa Magazine hralh tla ber chu Sport Magazine a ni an ti.
Barca' club hian semifinalah Real Madrid chu mawi lutukin an lo hnen tawh a. An ball possession pawh a inthlau hle a ni.
Tun tumah Messi, Xavi, leh Iniesta te han tlan kual vel tak tak kha chu a hmuh nawm a ni. Man U midfielder Giggs and Carrick leh Park te khan an khan lo deuh em a ni.
Messi'an ball an tlanpui tak tak hi chu a hmuhnawm dangdai ve reng reng a ni. Ball leh a ke hi khap khat pawhin a inhlat awm love tih turin ball duh tawkin a tlangpui thei a. Chu aimaha la ropui leh zawka ka hriat chu, a ding lamah emaw a vei lamah emaw bahlahna awm miah lo leh ball per hla chuang hauh lova speed ngai renga a tlankawi (direction thlak thleng) pui zak zak thei hi a ni.
Messi hian Champion league top scorer azawngin vawi 3 a la thei te hi Goal thuna a chung chuan zia a lanna a ni.

A lawmpuina atan chauhva ziak ka ni e.

Ngaihtuahna Far Chhuak

2011-05-28T22:56:00.002+08:00

Mizoram hi Burma ram ni se, Burma ram hi Mizoram ni ta sela. A ni thei dawn si lova ka sawi tum a fiah phah chuang tlat lo mai. Mizorama mihringte hi Chin State leh Kalay Kabaw velah hian awm ta sela, tuna Chin State leh Kaly Kabaw vela tlangmi chengte hi Mizoram-ah awm ve ta thung ila enge kan an ang?
Kawlrama awm tlangmite hi kawl leh hnam dangte nen inawm pawlh, fing depde thiam (kawl tawng chuan "le") ve tak kan niin ka hria. Hnam inchiahpiah lutuk kara awm chuan tute pawh nise rilru a dazat duh deuh dawn niin a ngaihtuah theih. Bengali ho karah va seilian ta ila ka fing chalak thiam ve viau thoin ka ring.
Kawl ho hi chuan "kei ka puar phawt chuan midang chu ril tam mahse pawi lo, kei ka thih lo tak-ah" an ti mai. Sem sem dam dam ei bil thi thi tih tawngkamte hi nei ve hek lo le, an dem awm bik hran lo ve.Bangladesh rama awm Mizote hi enge an an ka hre lova.
Ka hriat ve phak tawk kum 1980 chho vel atang khan helam atang Mizorama pem hi an awm ve pheuh pheuh a. Mizoramah Sum leh pai atamin zirna lam pawh a zia awm deuha ngaih a ni a. Kum 1984 khan pawl riat ka zir ve tana, kan exam hmain Mizoramah ka pain zir turin min ti a, tichuan 1985 January thlaah Mizoram chu a vawi khatna atan ka zuk thleng thla ve ta rawih mai a. Tedim atang ke hlirin kan kala, ka ke a rawlin a vung deuh a, ka nuin kan thlenna apiangah tui lumin min deh sak thin a. Kal kawng chu a chhuk chhovin ka tan chuan a thui kher mai.

Heng hun lai atang tawh reng hian Mizoram hi keini kawl rama Zo hnathlakte tan chuan kan pur chawkna a ni a. Tedim-ah hian Kuli an la a, phur hi mihringin an phura, sakawr neiin sakawr an hmang bawk a. He mitum hian keini chuan Tedim mi Kuli-ah kan ruai a ni. Heng kuli tam takte hian in chung "rangva" an tuak nasa hle a ni. Heng hunlaia kan dinhmun hi a la sang lo hle a. Kum 1970 chho vel bawrah hian Tahanah hian Concrete building a la tlem em em a ni. Kan in pawh hi a hmasa pawl chu a ni ve ang, ka pa sak lai hi ka hre pha lova, ka pian hma deuha a sak a nih ka ring.
Kum 1985-a Aizawl Mizorama lehkha ka zir chu Mizo tawng thiam tha vak lo nen, English ka hneh bawk si lo, a inthlahrunawm duh khawp mai. Bible chhiarin Mizo tawng ka inzir ve a, ka chhungte hian min nuih nasa thin khawp mai. Mahse, heng hun laia Aizawla lehkha zir thei han nih chu Tahan velah chuan a la inchhuanawm ve tho a ni.
Khilai Chin State-a unaute pawh khi Zoram hi an pur chawkna ber a ni thin a. An thlai hnah leh thil neihte Chawnchhim (Champhai) lamah an va zuar thin a ni, vawiin thleng hian ram ri hnai deuh amite khi chuan Champhai-ah an la bazar reng a ni. Tahan leh a chhehvela Zo hnahthlak Kamding hmasa zaa sawmkua 90% vel hi chu Mizoram lama sumdawnga, inchhek ngahte an ni awm e. Keini Zo hnahthlakte tan Zoram hi kan inpui a ni tih hi a dikna chen a tam hlein ka hria. Zoram thatna tur ngaihtuah lem lova, a par tlan ringawt tum, sumdawnna dik lo leh thil tha tih chingte an lo awm leh thin hi a pawi a ni.

Mizoram-in ruihhlo do kum nasa taka an beih laia, Burma mi thenkhat hnawh chhuah chungchangah khan mi thenkhat chuan Zoram lam an dem ve bawk a. An tanpuina ringawt beiseia, an tana thil tha tih tum lem si lote hian vuihmui an pu duh chawk. Tuna Burmaa awm te hi Mizorama awm zawk lo nita sela, kan nasa lo viauin ka ring thin. Tlawmngaihna hre lo tak tak lah bo lo. Mahni tanghma hai kawngah khaw hmu lo fe fe, rinna kawngah der dep tak tak, Sapho bum tur zawng kan tam si. Kan pachhiat hlawm em vang pawh a ni mahna, Mizorama awm zawk niin lo hausa ve ta sela ka rin dan ang lo tak hian kan tha ve phian pawh a ni thei e.
Mahse, tun dinhmun ang chiah hi chuan in awm thleng ta ila chuan he lam ami te hi chu kan nasa lo hlein ka hria. Keima mimal thlirna tukverh atanga alan dan a ni. Thlirna tukverh dang chu remchan huna hawn leh atan ka dah hrih mai ang. Chutah ve thung chuan Pangpar mawi tak tak ang maiin a lo par chuai mai thei a ni. (Remchangah la chhunzawm leh tum a ni)

I Meizial Khuin Midangte Harsatna Thlen Suh Se

2011-05-27T11:59:00.001+08:00

Mizote hma kan sawna meizial zu lo kan tam ta hle. March thla khan Aizawlah kar khat chamin ka zin zawk a. TV News-ah zial zuk lohna hmuna meizial zu an man zat leh sum an chawitir zat puan a ni a. Ka rilru te tein lawmawm ka tiin hma kan sawn ve zel a nih hi ka ti a.
Philippines-a ka zir lai khan, kan seminary-ah ramdangmi pakhat chuan "Meizial zuk hi in Culture-ah a tel em ni?" tiin min zawt a. Ka rilru a khawih ang reng hle a. Min zawhna chhan hi thil dang ni lovin tun hmain he Seminary-ah hian keimahni tlangmi pakhatin meizial a lo zu thin a, kan culture a ni e, tiin insawi thiam nan a lo ti a ni. Keichuan a mi zawhna chu chhangin kan culture chu a ni lo va, tun hma chuan tlangramah lo hna thawka eizawng kan ni a, thosi te an tam thin em avangin meizial zuk hi thosi um bo nan an hmang thin a, chutia zu nasa chu kan ni, kan culture erawh a ni lo, tiin ka chhang.
Khawhar inah meizial khu vut vut te khan van botuakah min liam sa taa a lawmawm hle. Mahse, motor chuanna hmunah hian mipui kan la inthlahdah hle a ni. Rangon atang Bus-in kan chhungin Tahan kan haw a, Bus chhungah tumah meizial zu ka tawng lo va ka lawm khawp mai. Mahse Tiau lui kan kan chiah Night Bus-ah kan chuanga, Aizawl thlengin Driver leh handyman te meizial khuin min ur zan khua ta mai a, ka fate ka ngaihtuah khawp mai, meizial khu an hip lut ve ta nual si a. Hawlamah pawh Sumo-ah tawt zetin kan chuanga Driver-in zu miau hek le, passenger te pawhin an zu a, tukverh bulah ka thu hlauhva a ziaawm deuh.
Meizial zu ve tawh thin ka ni a, chak a nat theih zia ka hriat thiampui, mshse mi bulah (Busah)inthlahrung hauh lova zu put put thinte hi chu ka hmu changkang thei thak lo. Zuk leh hmuah kan inthlahdah lutuk hi chu a pawi a ni. Mizote hi Kristian kan tam ang huin Kristian puitling kan tih hi an tlem hle si. Hei hi thil dang vak ni lovin zuk hmuamah kan inthlahdah vang ni berin ka hria. Piangthar a tluk lehna chhan tam ber hi thianghlimna hlamchhiah vang ani. Thianghlimna hi inzirtir nasa sauh sauh ila piangthar tlu leh pawh hi kan tlemin Kristian puitlinga chhiar tur pawh tun ai hian kan tam ngei ngei ang.
Burma ramah hian kawl tawngin I meizial khuin midangte harsatna thlen suh se tih hi an tar thin a, tha hlein ka hria. Meizial zu te pawhin hei hi hre rengin zu thin sela, midang tan malsawmna kan nih theih loh pawhin harsatna thlengtuah chuan tang lo hram teh ang u. Meizial chu a zutu mai pawh ni lo a bula mite tan pawh a that loh zia Doctorte sawi kan hre teuh si a.

Hi Kidz Report

2011-05-24T21:44:00.000+08:00

Hi Kidz Myanmar Foundation hi 2009 May atang khan Rev. Jubilee Thanga kaihhruainaa din a ni a. Rev. Jubilee-a hi National Director a ni a. Hi Kidz hotupa ber niin a tul apiang ngaihtuahtu a ni. National Board Chairman atan Saya C. Lalawmpuia ruat a ni. Ani hi naupang rawngbawlna tui tak, experience pawh nei tha, naupang rawngbawlna subject (Holistic Child Development) pawh lo zir nual tawh a ni. Hi Kidz Vision ropui tak chu kum 50 chhungin Burma rama naupang maktaduai 20 hnen thlen theih hi a ni. Hi Kidz chu Pawl bik awm lo, naupangte tan hmangaihna leh tlawmngai taka thawhhona pawl a ni e.
A remchanna hmun a pianga Naupang Club din te, naupang zirtirtu (saya/sayama) Training pek te, naupang rawngbawlna neitute nena thawhhona tha ngaihtuah te, thal chhunga naupang Camp/Training buatsaih thin te hi a hna pawimawh tak a ni. Nikum lamah TCYF naupang sport leh Icon thlanna Tahan-a neihah khan Hi Kidz chuan sum leh pai hmangin theih tawpin a tanpui a, naupangten hlimna leh hmasawnna an neih hi a duhsak tak meuh meuh a ni.

Nikum 2010 March thla atang khan Kalay Kabaw lamah Naupang Camp buatsaih tan a ni a. A hmasa ber atan Letpanchoung Nazarene Kohhran (Immanuel) Biak In-ah Saya C. Lalawmpuia hova neih a ni. Kum 2010 thal chhung khan Hi Kidz rawngbawlna atangin Tahan leh a chhehvel leh Mon State leh Karen State-a naupang 2,000 ten chhandamna leh hmasawnna an nunah an chang a, nu leh pa leh kohhranhote an lawm hle a ni.

Kumin 2011 Thal chhung hian Mon state, Karen state leh Twinty Myo-ah te naupang 1,000 vel hnenah Camp buatsaih a ni a. Tin, Kalay Kabaw-ah Hi Kidz Naupang Training/Camp hmun 10-ah tluang taka neih a ni a, naupang 2,000 laiin hmasawnna leh Chhandamna an changa a ropui tak zet a, Lalpa hming chu fakin awm rawh se. Camp-na hmun tam zawkah khawtlang huapa buatsaih a ni hi a ropui tak zet a ni. Entirnan; Kanan khuaah chuan Kohhran tangrualin Methodist Biak inah a buatsaiha. Tuivar Khuaah chuan Tuivar Youth Association (TYA) kaltlangin CMA Biak inah buatsaih a ni a. Hmuntha-ah chuan Presbyterian Biak inah khawtlang huapin buatsaih a ni a. Tuingo-ah chuan Tuingo Nu ho tangrual pawl hmingin CMA Biak inah buatsaih a ni a. Tin CBCM, Salvation Army, leh Weslyan biak inte pawh class lakna atan hman a ni. Tin, Satawmah leh Tuivarah ni khat awh Seminar buatsaih a ni a. Rev. Jubilee-an Seminar kaihruaiin ‘Fanaute enkawl dan’ paper a buatsaih chu zir ho a ni a, kan hlawkpui hle.

Kan Camp-na hmun apiangah Sunday School zirtirtute pawh sawm tel ve zel an ni a. Hei hi anni tan training tluk a ni a. Awka vin leh hmawlh hmang lova naupang thunun dan te, Awlsam taka Bible chang byheart tir dan te, hlim taka naupang zirtir dan te, hla leh lam te, infiamna hmanga Pathian dan ngaihpawimawhna chang hriattir te, Leader chher chhuah te, Magic leh thawnthu tawi hmanga Pathian thu sawifiah te, inelna thianghlim leh mark pea hun vawng dik tura kaihhruai dan te kan hnen atang hian an zir chhuak a. Kan haw san hnuah pawh heng Sunday school zirtirtute hian an naupangte an kaihruai chhunzawm theia, a lawmawm tak zet a ni.

Tun tumah hian naupang pianthartir mai ni lovin, an rilru chawikan saka rah chhuah tlak nun tam neitur leh Kohhran hrang hrang Sunday School inziritr dan tihhmasawn hi kan tum ber pakhat a ni. Tun hma kum 40 kal taa kan Sunday school inzirtir dan leh tuna kan inzirtir dan hi hmasawnna hmuh tur a la awm lo va. Kohhran te hian Sunday school inziritr dan tihmasawn tur hian thiam kan nei lo nge, tan lak kan tum lo zawk? Kan inchhung khawsak a changkang tulh tulh a, Sunday school pawn lamah chuan TV, Computer, Internet etc. kan ti a. Chutih laiin kan Sunday school hian naupangte a hip mawlh lo a ni. Thak pawh inhiat ngam lo khawpin naupang kan kuangkuahtir a, an tan chuan kan Sunday school hi hremhmun tluk hial pawh a ni mai thei e. Kohhrante inbih chian a hun ta hle a ni. Sunday school zirtirtu kan inlak dante hi hmun then khatah chuan; “a zin bo ngai lova, a awl thawng bawka, a ni hi a chi ang,’ tiin zirtirtuah kan in ruat leh chawt thin. Naupangte bula meizial zu put put leh kuhva ei sen huam thinte hian i fate chu eng tak zirtir ang maw. Naupangte hian an mit hmuh atangin nasa takin an inzir thin si a.

Kumin thal kan rawngbawlna a hmawr bawkna atan Children Night (May 13, 2011) Tahan PCM Venglai hall-ah hlim taka hman a ni. Hall leng lo khawpin naupang an kal thaa, tlar khatah mi 10 te thuttirin naupang 1000 vel leh nu leh pa engemaw zatin min tawiawm bawka. Naupangte an hlima thil la awm ngai lo a ni a, tih leh zel pawh an chak hle a ni. He Children Night hi Hi Kidz leh TCCN (Tahan Christian Children Network) tangkawpa buatsaih a ni.
Kumin thal chhung hian rampum huapin naupang 3,000 hnenah chanchin tha hril turin kan plan a. Kan tawngtainate chhanga kan plan min tihhlawhtlin saktu Lalpa chu fakin awm rawh se.

In His Vineyard

Naupang Rawngbawlna

2011-05-14T19:11:00.002+08:00

Kumin thal chhung zawngin naupang rawngbawlna Tahan leh a chhevel khua/hmun 9 laiah tluang takin kan nei thei a. Naupang 2000 bawrvel hnenah Chanchin Tha leh an moral develop=na lam thu leh hla te kan fah a, mahni inngaihhlutnachang an hriat a, chhungkua leh khawtlang tan mi tangkai tak an nih theih zia te kan zirtir a. Zaihona leh Game hlimawm tak takte kan neih puia, an hlimin an lawm takzet a ni.

Ni zan (May 13, 2011) khan Tahan Presbyterian Venglai Hall-ah TCCN (Tahan Christian Children Network) nen tangkawpin "Children Night" kan buatsaih a, Hall-a leng lo khawpin naupang an pungkhawma, naupang hi 1,000 chu an tling ngeiin kan ring, nu leh pa engemaw zatin min tawiawm bawka, kan hlim tak zet a ni. Tih leh zel atan a Zawngchhang thlak hlein kan hria.
Program hlimawm takin kan buatsaiha Naupangten Item chi hrang hrangin hun an hmang a.

Naupang rawngbawlna nei tur hian March thla atang khan Rangon atangin Tahanah ka kal a. Tunah chuan kan rawngbawlna rah duhawm takte hmuin hlim takin Rangon lam haw turin kan inbuatsaih mek a ni. Naupangin thinlung leh tihtakzeta mittui tla chunga Pathian hnena an nun hlana an tawngtai lai hmuh zet chuan rilru a khawih tak zet a ni. Kan rawngbawlna hmun a piangah an naupang sunday school zirtirtute training kan pe nghal zela a hlawk thlak hle a ni. Kan haw san veleh an lo chhun zawm ve zel a. A tlangpui thuin kan camp-na hmunah khawtlang huap a ni deuh zelte hi a ropui leh zualna a ni. Entirnan, Kanan-ah chuan Kanan Kohhran Tangrualin kan Team hi min ruaia. Tuivar khuaah chuan Tuivar Youth Association-in, Tuingo khuaah chuan Tuingo Nuho Fellowshipin chutiang zel chuan kan tihna hmunah hian nakumah pawh nei leh turin min Book lawk sa vek a ni.

He rawngbawlna hi Lalpan mal a sawmin, kan khawtlang hian a lo mamawh em a, ngaihhlut kan hlawh ve phah niin ka hria. Kan Sunday school inzirtir dante hi hman laia kan tih dan ngai reng kha a la ni a, hei hi ka vei em em a, kan in leh lo, kan thil neihte a changkan ve tawh teh reng nen hian, kan sunday school inzirtir dan hian naupangte a hip zo lo va, an mamawh pawh a phuhru zo hek lo. Khuahkhirhna nen kan zirtira, kuangkuah rawh tihpahin kan kuk tawlh bawk a, hremhmun tluk zetin an tan chuan a hreawm mai thei a ni. Naupangte an ngaihtuahna hmang tur leh an zirlaiah Participation an neihna tur kan ngaihtuah pui lo va. Anmahni ngeiin an tih ve a, an tel ve hian an hlim theih vei nen.

Tun atang chuan hma kan sawn chhoh ve zel a beisei awm.

Ka Fapa Pic

2011-03-29T01:14:00.004+08:00

Kan nau Valpuia N.Zealand kal tur kan thlah tuma Burma Airfield-a kan lak a ni a, he tihlai hian ka fapa hi thla 10-a upa a ni. A thuamhnaw inbel hi a nu thui sak a ni a, a inhmeh kan ti ve em em a ni.
Tunah chuan a kal ve thei tawha min tihlim ve thin kher mai.
Heng khawvel thil; in leh lo, sum leh paite hi Bible chuan 'ro' tiin a sawi ngai lova.Lalpa laka kan rochan hlu chu fanaute hi an lo ni e.

Philippines Mizo Pic

2011-03-29T00:23:00.003+08:00

Zanin chu Philippines-a Mizo Fellowship Pic hlui ka ena lung a leng hle mai. Burma atang ka blog-ah hian thlalak ka upload thei si lova, Aizawla awm chhung hian upload ila a tha ang.

Kum 2007 khan Philippines Mizo Fellowship kan din a, a tling lo ber mai Presidentah min ruat a. Inhmuhkhawm chuan chaw eikhawm nghal zel a ngai a, tlemte mah ni ila kan hlimtlang ve viau a nih kha. Pi Ch.D.i te, Pu Bawla te, leh member zawng zawngte an ngaihawm e.

7day zirna runpui-ah hian inkhawm hona te kan nei thin a. An hmunhma an changtlunga, a mawiin a nuam a hle a ni.

Heng pic te hi in tuanna ram atang in lo thlir ve a nih chuan in lung a leng ve ngeiin ka ring.

Tricycle kan chuanga, a bengchheng thei hle, mahse ngaihawm ve tho mai.

TAHAN "Chapchar Kut"

2011-03-24T14:24:00.002+08:00

Ni 30-31 March 2011 hian Tahanah Chapchar Kut ropui taka hman a ni dawn.

Kumin Chapchar kut lo awm tur hi Tahan Mizo te tan chhinchhiah tlak tak a la ni dawn a.

Sorkar lam milian te pawh sawmin Tahan leh a chhehvel khuate sawmin Hnam lam chi hrang hrang show tur a ni a. Burma TV-ah tihlan tura ruahman ani.

Burma ram sorkar hian Lusei tiin min hre ber a, mahse Mizo tihhian min huap kim bera, Mizo kan inti vek tawh bawk a, chu chu Burma sorkar pawh hian a lo hre ve ta a, lo hre lar zual ve zel se tiin MWO pawh hian kawng hrang hrangin hma a la zel a ni.

Burma rama kan Mizote hma lakna hi khawvel hmun hrang hranga kan unaute pawh hian hriatpuiin i support ve zel ang u. Dik tak chuan Burma ram Mizo te hi fahrah ang reng taka kan lan chang hi a awm thin a, in support-na pawh hi kan mamawh reng a ni.

Tahan lamah

2011-03-18T19:26:00.000+08:00

Tunlai hian Tahanah ka cheng a, ka blog update nan ka han thai ve mai mai a ni.
April thla atang Naupang camping buatsaih kan tum a, Pathianin rem a tih chuan Tahan leh a chhehvel khaw 8-ah Camp kan nei ang.
Hmakar hian Aizawlah chhungkuaa zin zawk ka tum a, Lalpan rem atih chuan rawngbawlpui tur pawh ka dap pah dawn a ni.

Kum 2011 MWO Yangon Branch Hruaitu Tharte

2011-01-27T12:21:00.000+08:00

d) Kum 2011 MWO Yangon Branch OB thlan tharte:
President : Pu Lianhlira
Vice President : Pu Zothangliana
Secretary : Pu C. Lalawmpuia
Asst. Secretary: Rev. Alfred Biaka
Treasurer : Pi Malsawmi
Auditors : Ptr. Tlanglawma, Pu Lalronghaka, Pu Lalramnghaka,
Pu Ralthantawna, Pi Zoliani.
e) EC Memberte: 1) Pu Tetea 2) Upa Lalkhuma 3) Pu Lalhmangaiha
4) Pu Khuangluaia 5) Pu Lalrinawma 6) Rev. Lalramthanga
7) Rev. Lalremtluanga 8) Pu Lallawmpuia 9) Pu Hrangliankhuma.
f) Advisors: 1) Rev. Hrangzuia 2) U Thein Zaw 3) Rev. Dr. Lalsangliana

Mizo Welfare Organization hian Mizo ka ni titawhphawt chu a Umbrella zarhliap hnauiah min khung vek a, India ramah Mizo hnam tan Mizoramin hma a lak ang hian, Kawlramah Mizo hnam tan hma a la a ni. Kawlramah Mizo hnam tan hma latu awm chhun a ni a, Mizo tawhphawt chuan a chhiat a thatah mawhphurhna kan nei a ni.
Heng kan tlangmi unaute pawhin anmahni zawn theuhva hma an la a. Entirnan, Falam chuan Falam pawlpi tiin, etc. Keini pawhin chaktakin hma kan la mek a, kan la zel tur pawh a ni. Nakinah chuan Burma rama tlangmi pawl lian pui puite chu inzawmkhawmin awmzia nei zawk leh chak zawkin hma pawh kan la lak theih a beisei awm hle a ni.
Kristian kan ni a, kan hruaituten kal dan an thiam zel theih nan finna dila tawngtaisak hi kan mawhphurhna duhawm tak a ni.
Ka lawm e.

KUM 1928-AH TAHAN BIAK IN SAK A NI

2011-01-27T12:16:00.000+08:00

Khaw thar kai ni mah se la Kristian vek an ni a, thiante ina inkhawm reng thei an ni lova, in 34 lai an lo ni tawh a; bawk khawh leh in sa pahin Biak In chu phur takin an sa a. Kristian vek an nih avangin an lungrualin an hlim tlang a. Krismas leh kumthar an hmang zawm fo thin. Hna an thawk nasaa ei leh in an intodelh a, thlai thar an neihte chu ‘sem sem dam dam, eibil thi thi’ pi puten an tih angin an awm a. Thlaitharh sahrang thlengin an inhleh hlawm a ni. An sawi dan han hriat chuan an penticost hle mai. An khawchhung chu an Kristian veng veng mai anih chu! Tin, Japan ral hlaua an tlanchhuah hmain khawtlang (khawchhung) thalai tlawmngai pawl an ding tawh. Mizo zingah chuan Mizo tlawmngaihna hi a bang bik lo a nih hi !

(Pu F. Zasanga (f) ziak Tahan Khaw Chanchin hi min chhut thattir mek a, ka rem chan dan a zirin ka rawn tar lang zeuh zeuh ang. Pba)

Tahan Khaw Chanchin

2010-12-31T16:48:00.002+08:00

By - F. Zasanga

PU SAPCHHAWNA LEH TAHAN
Pu Sapchhawna Mizoram Bawngchawm khua, Tahan khawsattu chanchin:
Amah hi pa sang zet zawt fit nga leh inches ruk vel, pa ngo lam deuh pian thiam tak, hmai tluak, intih thianghlim peih, nu leh pa zah thiam, khawtlang tan mi tangkai, tawng tam vak lo, taima tak, rinawm tak, sakhaw mi, mi biang biak thiam, mi inngaihlu lo, lehkha chhiar peih; Vai leh Sap dictionary lehkhabu nei hmasa pawl a ni. Hun vawng thiam tak, nupui fanau nei, a nupui chu Khuanglianthangi (Ralte) a ni a. Pu Sapchhawna hi Pachuau a ni awm e, ti an awm a, a awmpui Pu Hrangzinga’n hmar a ti a, a eng ber dik hriat a har. A fapa Lalmuana chauh hi fa a nei a, tunah hian Rangon-ah a awm. Sapchhawna hi a pa hian fela a hriat em avangin kawng engkumah a ring tawk a, a pa hian thu a neih pui vak lo.
Pu Sapchhawna leh an chhungkaw chanchin ka ziak hi unau, a neih a in-khata cheng Pu Hrangzinga (Rokhuma pa) sawi ka hriat a ni.
PU SAPCHHAWNA’N KAWL PHAIAH KHUA SIAM A TUM
Pu Sapchhawna’n Myanmar Kalay phaia khua siam turin a pa Suakbawnga, a pa nau Suakchhunga te chhung nen Lusei ram Bawngchawm khua atangin Kawl phai panin champhai an thleng a. Pem pui tur zawngin an cham a, Kawl phai pempui tur an hmuhte chu:
1. Hranghnuaia pa Dozika
2. Paliana pa Thawmeka
3. Thangkhuma pa Ralkaia
4. Pu Lalliana pa Suakmanga
5. Rangkhuma pa Chawngruma
6. Hrangzinga pa Chalbuanga
7. Pu Hrangluta te chhung
8. Pu Haua te chhung
te an ni.
Pu Sapchhawna te leh a pa unau te nen in riat (8) te chuan Kawlphai Kalaymyo lam panin kum 1922 February thlaah Champhai atangin an chhuak a. Kalaymyo phai Tuihang lui chu an thleng a. Tuihang lui hmar lamah awmhmun an bengbela in an sa hlawm a. Tuna Indaikung khua hi a la awm lo. Zofa tih takah thingtlang lo neih tur an en a, mahni duh lai lai pawmin an vat a, thlawhhma an siam a ni. Tuihang lui kamah hian kum khat an awm a. An hotu Sapchhawna chu Kalaymyo-ah a leng thin a, hetih hun lai hian sorkar Office leh sorkar hna tha chu Vaiin an luah vek tih theih a ni. An lal Sapchhawna hian Vai tawng leh Kawl tawng a lo thiam a, a Kawl a Vaiin thian a lo nei hman an ti. An lal chuan “Kan awmna khawhmun hi a dik lo, hawh u lamlianpui hmar lamah thingtlang lo neih tur a tam a, insawn ila a tha ang,” a ti a. An insawn leh a, an awmna khua chu ‘Phulzuan’ an ti a. Pinkhung leh Chawngraih khaw inkarah Thanthuama’n khua a din ve a, Thanglui kamah kum 1923-ah, mahsela lal nih aiin mission tirhkoh hna a duh zawk avangin Phulzuan khua Sapchhawna khuaah chuan an rawn fin, an ti. Phulzuan-ah hian kum li lai an awm a. Chutah Sapchhawna pa Suakbawnga’n a boral san a. Phulzuanah hian in sawmhnih leh pariat, belhtute nen in sawmthum lai kan awm, an ti.
SAPCHHAWNA’N KHAW THAR KAI A REL
Sapchhawna’n an awmna Phulzuan hmun tha tawka a hriat loh avangin a khuate a ko khawma, ‘kan awmna hi a tha tawk lo, Kalaymyo ni thlakna lama lamlianpui kawng Chin Hills ram leh Lusei ram thlenga inzintawnna lam Kawlpui atanga mel thum, kawngpui kam ve veah awm ila nakinah thangthar hoten phai thatzia an la rawn hria anga, Chin Hills leh Lusei ram thlengin an lo kalin an lo pem anga, keini tlang miten Kawl chu kan kawp rei thei dawn lo; khita khua kan siam chuan tlang mite khawpui a la ni dawn a, Kawlphaia awm tawhte pawh an lo pem duh dawn a nia, nakumah khaw thar i kai leh ang u,’ a ti a. Kan lungrual a kum 1926 buh seng hmain pa sawmthum lai khawthar vat turin kan chhuak a, Sanmyo kiang luikawr atangin chhim lam leh hmar lam kawngpui kam ni hnih kan vat a. Buh seng zawh 1927 January hi sawmah bawkte khawha awm nghal turin kal kan rel a.Krismas te, kum thar te kan hman zawh chuan kan vaia kal rual chu a lo rem deuh lova, heng zawng hi kal hmas thei chu kan ni.
1. Kal lal Sapchhawna te chhung
2. Pu Ralkaia te chhung
3. Pu Thangkhuma te chhung
4. Pu Dozika te chhung
5. Pu Hranghuaia te chhung
6. Pu Sawivela te chhung
7. Pu Rangkhuma te chhung
8. Pu Chalbuanga te chhung
9. Pu suakchhunga te chhung
10. Pu Paliana te chhung
11. Pu Suakmanga te chhung
In sawm leh pakhat te hi Pu Sapchhawna khua, Luseiin ‘Aihnahphah’ an tih te an ni. Heng in sawm leh pakhatte hnu rei vak lovah in nga lai an chho ve leh a. Mi dangte chu khaw dangah an lut a, Phulzuan khua chu a ram ta; kal hmasa ho lamlianpui kama awm tura chho kha kawngpui kama awm an duh ta lova, a khuate chuan Nangmahin va awm la, i khua te kan ni tho alawm, kawngpui kam chu pi leh puten hri vei te, mi zun ek thiarnam a hrisel ngai lo an ti a, he laiah hian kan awm dawn an ti tlat a, tuna Methodist Biak In pui velah awmhmun an khuar (nghet) ta a ni. In pui sak chhunga awmna tur buk an sa a. An Pu Sapchhawna hi tawng thiam hma mi a lo ni a, kum ruk lai Kawlah an lo awm tawh a ni.
Ni khat chu Kalaymyo atangin Kawl pahnih U San Maung leh U Ko Thun-a te an lo kal a, lal inah kan inkawm khmaw a, thu an sawi a; Pu Sapa’n a let a, “He lai hmun hi kan pi puten ‘Tahan’ an ti a, tumah an la awm ngai lo va, ram sa te leh sa dang an tam a, ram sa ei chi sakei chi dang dang an tam mai a, chuvangin Tuivara sangha man tura kan kal hian mau benthek kan keng thin a, kan ralmuang lo. In lal Pu Sapa hi a lo leng thin a, pa fel fing tak, kawm nuam tak a ni. Kan thian tha a ni a, he lai hmuna in awm kan hria a, rawn hmuh che u kan duh avangin kan lo leng a nih hi! He lai ram hi ram rem tak, tlang pawng sang awm lo, phul awm lo, kawr thuk pawh awm lo, kawngpui chhim leh hmar lamah ram sa tan tui tem tur a awm tha a, chungleng tan rah tlan tur a tam a, hnuaileng tan ei tur a tam a. Thing awm te hi an lianin an tha em em a. Kalaymyo ni tlakna lam kawngpui lei awmna ‘Ta-da le’ atanga zawlkin thlengin a ram hmingah pi pu ten ‘TAHAN ‘an lo tihna ramah Lusei hovin khua in din a, U San Maung-a nen in khaw hming kan nemnghet ang, ‘TAHAN’ khua tiin kan nemnghet a ni. Tahan chu Ramtha, Ramthahmun tihna a ni’ an ti a. Tahan khua kan ni ta. Hriatpuitu khaw hming satu kan nei . Kan khaw hming neih hi January 27, 2927 a ni.
Kum 1927 atangin mahni ram duh lai lai lo atan kan vat a. Thingtlang lo neih dan pangngai kan nei a, kan thlawhhma a tha a, kan lawm tlang a mahni chhung kham buh kan nei a. Ramsa leh chungleng leh suzu min tlanpuitu an tam a, ven ngun a ngai hle, an ti. Tuna Indaikung leh Myohlah kalkawngah Tuiro lui kan tih a awm a. Tahan lo nit a khawthar kai hmain, Pu Sapchhawna hoten khawthar kaitlang turin an sawm a, mahsela 1927 kumah an tel ta lo va, 1928 kumah Tahan an lo lut ve ta a ni.
1. Pu Tuahhranga (Rev) ni ta.
2. Pu Saichhuma
3. Pu Thanthuama
4. Pu Darkhawtawpa
5. Pu Lallama
6. Pu Dengkhuma
7. Compounder Lianmanga
8. Pu Hauchhuma
9. Pu Vanhnuaithanga
10. Pu Sapbawia
11. Pu Challiana
12. Pu Sawia
13. Pu Khawzama
14. Pu Lianalha
15. Pu Saibuanga
16. Pu Sailianthuama
17. Pu Laltawia
18. Pu Dochanga
19. Pu Laldokhuma
20. Pu Zaduha
21. Pu Thanruma
22. Pu Tekrawia
23. Pu Vulchuka pa
A chunga kan tarlante hi nupui fanau nei vek an ni.
Heng mite hian Tahan khaw chhung invawn dan an siam a:-
1. Tahan hi Kristian khua a ni.
2. Zu leh sa ei leh in kan phal lo.
3. Zu zawrh leh siam kan phal lo.

* A rem chan dan a zirin chhunzawm a ni ang.

Happy New Year

2010-12-31T12:03:00.000+08:00

Internet kaltalnga ka thian te, kal blog min lum saktu zawng zawngte, a hnuaia thuziak mawi tak hmang hian Kum thar chibai ka buk a che u.

As the new year takes the flying start, may it brings peace of heaven to your house and fills your heart with grace and glory. Wishing you 365 days of unstop laughter and good cheers.

Kawlrama Cheng Lusei Hnam Nihna Dinhmun Leh Hmasawn Chhoh Zel Dan Tur Thlirna IV.

2010-12-31T11:47:00.000+08:00

4. HNA CHELH CHUNGCHANG
(Lusei nih hlau tura intihthaihna; sorkar hna lian pawh an chelh thei lo tih hi Lusei/Mizo duh lo kan unau then khatte thu puarpaw leng a ni a, chu chuan kan mipui tam tak chu awm nuam lo takin a siam a. Vawiin ni thlengin Mizo hming list laknaah pawh kan hnain a tuar phah thei angem tiin hlauh thawnna nen an la awm hi han ngaihtuah teh, Mizo te hi min lo va tiduhdahin, hnam chhantu hi kan lo va mamawh tak em! Kan hnam lam mawi tak ‘Cherawkan’ te pawh hi min neih sak an duh; Burma-ah hian Lusei/Mizo tih hi awm lo sela, Lusei tih aiah Hualngo, Mizo tih aiah Chin tih duh zawk pawh hi an awm nuk mai lo ang maw? Pb.)
Socialist sawrkar hun laia Chin Hill –a hna lian chelh tura sorkarin a ruat lawkte Lusei nih vanga thawk thei ta lo an awm hran lo. Lusei hnam nih vang ni lovin Mizorama piang (Burma rama piang anga insawi) an lo nih vang zawk chauh a ni. Lusei zingah sawrkar hna sang tak tak thawk an awm nual tho. Amaherawh chu kha tih lai khan party leh council-a hna vuan turte chu an mahni atanga pi leh put e thlenga pian leh murnaah sorkar a fimkhura pian leh murna avangin an thawk ta lo mai a ni. Mizote Burma ram sipaia an tan hian sorkarah sipai tan phalna hmuh loh hlauin Tahan leh a chhehvela hmelhriat leh chhungkhat lainate pa te hming lo pe ta mai te, Tiau kam hrut vela an hmelhriat chhungkhatte pa ber hming lo in pe mai te Burma ram khua pakhat khatah te an lo in chhal a. He mite pawh hi Thinglei khuaahte an lo in chhala, pian leh murna an han zawh khan an sawi ang chu a lo ni si lo a, chuvang chu a ni Pu Kamlianbuaia leh Pu Lianchia te pawh hian an hriat veleh Thinglei khuaah lehkha an thawn vat a, sorkarin heng mite pian leh murna an rawn zawh che u chuan in khuaa piang dik takah in lo sawi dawn a nia tiin lehkha an thawn vat a. Mahse, an lehkha thawn chu nikhat chiahin a tlai a, pawi an tih thu an sawi an sawi thin. Mizo rama piangah lo inchhal law law sela a pawina a awm lo zawk ang. Falam a mite leh Tonzang a mite pawh hi an mahni inhnukdawk lo mahse la, harsatna chu an tawk chuang lo ang. 1974 inthlanpuiah khan Lusei te hi vote chauh pe theia thlan ve theih lohin thenkhatten an sawi a, chuvangin Central lam an zawt a, Central election commission chuan thlan tlin theih an nih thu thirhruiin an rawn thawn. 1990 inthlanpuiah pawh khan Pu Saptawna chu Lusei ram piang a ni ngei a, U Nu a party MP-ah a in candidate a, chunglam mawhphurhna neituten pian leh murna chenin ngun takin an zawt a, candidate an phal sak vet ho a, Pu Dothawnga ten en pawh vote bawm an hung tlang thei tho a nih kha. Tahana mi pawh kha term khat phei chu a thawk zo tawh a, a term hnihnaah hekna a tawh avangin a ni. A ni pawh hi Lusei nih vang ni lovin pian leh murnaah tho a ni zawk. Amah hi ka thianpa a nih avangin a hming pawh sawi mai ila, Pu B. Zatawna a ni a, term khat a thawh zawh hnuin, a trem hnihna rurah hekna a tawk a, mawhphurhna neituten an finfiah (sit si) chiam a, a finfiahtute chuan kawrkarin a ngaihmawh tak chu hetiang hi a ni lo. Entirnan, Chinese te, Vai kan tih ang chi te hi an ni an ti a. A hektu pawh an ko a, keini chuan kan ngaipawimawh lo, I duh chuan chunglamah i thlen chho thei an ti a, a thlen chho leh zel reng a, mahse, a hlawhtling lo, Hetihlaia Council chairkman zawk hi Pu Zatawna nen hian inthian tha tak an ni a, a ni chuan hlawh a dang chuang si lo ak hek tawh tawh hi a ninawm mai mai, school zirtirtu hna hi chhunzawm leh zawk mai rawh. Thil pawi pakhat a awm chuan school zirtirtu hna apwh hi I chan palh thei a ni. Penson loin I bang palh ang e a ti a. Chuvangin a chhun zawm duh ta lo mai a ni. Hualngo pa dik tak Falam leh Tonzang a mite pawh kha term khat an thawh zawh hnuah a term hnihna tur an thawh lohna chhankha pian leh murna vang tho niin a lang. Lusei ho hi sap ho hun lai chuan sipaiah company din hran an awih lo tih hi a dik ngei ang. Mahse, independent lak hnu rei lo teah Karen an hel ta a, Burma sipai nen nasa takin an inkap a, chu tatanga rei vak loah chuan eng hnam mah ni a chi binga company emaw battalion emaw din hran chu kawl ram kawkar hian a phal tawh lo hrim hrim. Luseite pawh hi Lavy-ah emaw UMP-ah emaw tan phalna an dil khan General Ni Win-a chuan Lusei te hi Lavy leh MUP mai ni loin Burma Army-ah ngei tang zawk rawh se a ti hial a ni.
5. POLITICS
Pu Thanghleia te hun lai khan politics khel tham mi thiam an awm lo. Pu Thanghleia te pawh kha a vengva pawl ni mah se, sipai kawltawng kan tih ang hi an thiam tawk tawk chauh a ni. Khang hun lai khan politic lama tui pawh tumah an awm lo. Sorkar inrelbawl dan angin khaw tinah lal chu an awm ve ngei mai. Khampat lhua hi mizote khawpuiah siam an tum vet e pawh chu a ni mahna. Mahse chu chu engnge a pawina awm? Hetih hun lai vel hnaiah Lusei ho bak hnam dang tih tham an awm lo. Anmahni leh anmahni rau rauah Khampat chu khawpui ber ni rawh se tih an duh chu a sualna ka hre lo.

Kawlrama Cheng Lusei Hnam Nihna Dinhmun Leh Hmasawn Chhoh Zel Dan Tur Thlirna III

2010-10-30T00:40:00.000+08:00

(Chhunzawmna)

2. Ma Ma Endiktu pawl (sit syi yi ):
(A sei deuh avangin chhiar tur tlangpui ka’n thai lang hmasa ang e:
Kawlphaia Lusei fate pem luh chungchanga mawhphurhna latu te hi L Committee (Lusei-te ngaihtuahtu pawl committee), a hun laia sorkar Minister lian U Kyaw Ngeing leh U Bah Swe te an nih thu leh Luseite hi Burma rama awm hnam dangte ang bawkin ram mi nihna nei kan ni a, kum 1963-a pawm chawp mai kan ni lo, hemi chungchangah ram pawnmia puha sawi thaiha, mi rilru tichi-ai zawnga sawi thintute hi dan anga an chungchang ngaihtuah theih a nih thu te leh National Registration Card (Hmat Pung-Tin) chungchang te, Chin hnam hlawm atanga sahthlak kan nihna te, Sorkar Danpuiah Lusei hming a lang lova LWO-in hma a la leh a, Lusei tih pawh hi Mizo tia thlak tura ruahman a nih thu leh, sorkarah Lusei tih emaw Hualngo tih emaw hi pawn lang zawk a awm lo, Taing Yin Ta (ram mi) vek kan ni, tih thu te a ni. Pb)

Hei hi devision pakhata hotu thenkhat te thil tih mai a ni lo.an hmalakna hi Sagaing Devision mai ni lovin Chin state-ah pawh hma an la tel tlat. A chunga kan tarlan tawh angin sawrkar laipui hmalakna ngei niin a lang. U Bah Swe leh U Kyaw Ngeing-te hi Lusei tana theih tawp chhuahpui thintute an ni. Anni pahnih hi Lusei ho Kawlram chhungah a tam thei ang bera rawn pem lut tura sawm tute an ni. Zahreliana hian englai mahin Lusei te hi Kawlrama pem lut tura a sawm lai kan hre lo. Japan ral lai khan Army diktak pawh ni lo, commission officer bawk hnih (Leutinent)-in Shilong a zuk tlawh zawk tih hi kan hriat dan tlangpui chu a ni. Chu mi hnuah S.D.O a thawk leh a, 1953 velah khan politics a bei tana, a kum a la naupang bawk nen, leh a hna thawhna hmun han chhui hian Lusei te nen inchulnelna hun a awm hman lo. (Yangon-a awm Hualngo upate aiawha Pu Lallianchhunga thu thehdarh phek 2-naah chuan Pu Zahrelian-an pem rawh u a tih avanga Luseite hi Kawlphaiah pem ni awm takin a ziak, “… Lushai Hills-a unaute pem rawh u” tiin.Pb)

Kawlram lo pem luh chungchangah hian India korkar a thikthu a chhe deuh niin a lang a, chuvangin Champhai-ah te, Rih bangle-ah te, korkar thuneitute inbiak tawnna an nei thn. Chuvangin 1963 kum atang chuan pem lut khap a lo nit a a.chumi hnua lo pem lut reng reng chu hawn kirtir leh ngei ngei tur a nit a. Lusei te hi hnam nihnaah hian Myanmar (Taing Yin Ta) tih a ni a. Heng hnam dang (Taing Yin Ta) Kachin, Karen, Shan, Chin tithe nen a inang chiah, dang lamna a awm lo. Thenkhat te’n sawi danglam phet an tum hi chu a hahthlak thlawn mai a ni. Chutianga mi rilru tichi-ai zawnga sawi an awm chuan dan anga an chungchang ngaihtuah theih a ni zawk. Mipui an thuhmun thei fo thei lo thih a ni a. Khatih lai Hualngo pa langsar tak Pu Savuta SDO te, Pu Hrathnuna te, Pu Khuangkhalha te Capt.Darrokhuaia te kha chuan tha an ti hmiah mai. Naing Gan Ta sit syi yi an rawn thlak danglam hma kha chu an tidanglam duh lem lo. PuThantluanga erawh chuan tha a tih pui ve lo.

Hemi chungchangah hian kan hresual ang tih a hlauhawm a. Hmanah kha chuan Kawlram chhunga piang ni lo Lusei te khan sawi thaihna avangin Lusei ni ai chuan Chin intih chu him leh nghet zawk turah an ngai a. Lusei tih thiatin Chin an in ti a, hnawhchhuah an tawrh phah. Thenkhat erawh chu immigration atanga engmah sawi lo va lo thiah sak mai te pawh an awm a, chungte pawh chuan zawhna tam tak an tawh phah. Keini chhung ngei pawh hi (Myanmar Taing Yin Ta Lushai) tihlai hi Falama awm immigration officer Mangbura khan min thiah sak a, ka pa hi Methodist Pastor a ni a, hekna kan tawk tlat mai a, Sagain atangin Sagain Devition immigration Director a lo kal a, Pu Saptawna tawng lettuah a hmang a, zawhna tam tak min zawt. Tunchinah chuan thlamuang takin awm tawh rawh u, tuman an tibuai tawh lo ang che u. An tibuai che u a nih chuan ka hnanah rawn report ang che u a ti nghe nghe.
Hualngo diktak pawh nise, Lusei intia (Hmat-Pung Tin) a siam tawh hnua Chin tia a tihdanglam chuan Mizo ram atanga lo kal a nih ve bawi si chuan hnawh chhuah tur a ni ve tho. A ram chhunga piang dik tak Hualngote’n tih danglam vawi li nga lai an dil a nih hmel a, sorkarin a phal sak a ni ang. A ram chhunga piang dik tak tan tihdanglam a hlauhawm lo tihdanglam duh lo te chuan (id card) an thlak thleng khan an tihdanglam duh chuang lo a, a pawina a awm chuang lo.Tunah erawh hi chuan inzawh chianna pawh awm chuang lovin Chin tih leh Lusei tih hian hlauhthawn tur a awm ta lo a ni ang e. Thawktute’n an mahni thu-in, an duh duhin an ziak zung zung mai a ang.

3 LUSEI NIH THARTHAWH CHUNGCHANG
Tun sorkar kaihhruaina a ram dan leh hrai kaihhruaina (Basic principle of constitutions) an siam lai hian sorkar laipui hruaitute lam atangin Lusei te hi Chin hnam hlawm atanga paih innih hnuah ram dan leh hrai kaihhruaina (basic principle of constitution)-ah lanna in nei tawh lo, General Ni Wina sorkar lai 1963-a ram mi innihna puan kha chu rammi (taing yin ta) in nih zia tihlanna mai a ni a, tuna a basic principle of Constitution (a chhi khan u pa- dri)-ah in hnam hming ziah luh chiah a awm lo. Tuna sipai sorkarin ram dan leh hrai inkaihhruaina (a chhi khan u pa-dri) kan endik/siam lai hian Application rawn theh lut leh rawh u an ti a, Kawlram Dan (a chhi khan u pa hri)-a kan hming a lo lan ve leh nana theh lut kan ni. He lehkha theh luhna-ah hian Lusei tih leh Mizo tih kan hman pawlh nuaih. A chhan chu sorkarin Mizo tiim min khung lut se tih duh vang a ni. Mizo tih kan ziah hmasak chuan braket-in (Lusei) kan ti leh a. Lusei tih kan ziah hmasak chuan braket-in (Mizo) kan ti leh bawk. Hei hi sorkar thuneituten a chhan leh avang min zawt a, tunhmain Lusei tiin kan theh lut a, tunah chuan Mizo a thlak kan duh vang a ni kan ti. Thu neitute chuan keini hi sipai sorkar mai kan ni a, kum 2008 ah sorkar thar a lo ding anga, chutah chuan thlak zawk rawh u, nang mahni thu thu a ni, awlsam te a ni ang an ti. Tun hi hna kan ngah lutuk a, a awlsam zawngin 1947 a in lo hman tawh Lusei tih bawk khan I ziak lut leh mai ang u tih a nih vangin Lusei tih bawkin kan inziak lut leh ta a ni.

Hemi chungchangah hian Rev. Darrothanga hian kan ram lal leh Mizoram lal ho Tiau leidawh hawnnaa ramria an inhmuh khan CM Zoramthanga chuan kan ram lal hnenah Kalau Kabawvelah khian kan mizo puite an awm ve a, that akin min lo enkawl sak dawn nia, an ni chuan Lusei an la inti a ni mai thei. Mahse, Lusei tih leh mizo tih hi a in ang reng kan duh duh kan hmang mai a ni a ti e tiin min hrilh. Chumia han tel ve Kalaymyo sipai officer Aung Moe Myint chuan Kalaymyo an lo thlen veleh Department zawng zawng kartin an committee thinna hmasa berah chuan kan awmna district chhunga Lusei te hi Mizo tia koh theih an ni. A duhin Lusei, a duhin Mizo an lo inti mai a lo ni tiin thuchah a sawi.

Hualngo nisi intih Lusei hi thil hlauhawm tak pawn lang zawka indahna anga sawi pawh hi tunlaia kan buaina ber chu a ni reng a ni. Immigration department hian tihsual palh an nei a an ni min hmuh dan chuan Chin leh Lusei te hi in ang renga min hmute pawh an awm a ni maithei. Card-ah hian Lusei dik tak si Chin tia an ziah an tam hle mai a. Tamu bial lamah chuan sorkar lam leh immigration te tang dunin khaw tin an fang a, an tih fel sak. Keini Kalaymyo bial chu mihring kan tam lutuk a, inthlanpui hmaa tihfel hman ziazang a ni lo tih hi kan hriat dan a ni. Hei hi Office hrang hrang-ahte Division lam thlengin kan sawi ho tawh. Kan district pumpui tih fel hma chu a duh Lusei mai, a duh Chin tih mai mai hun niin a lang. A eng zawk zawkah pawh lo ding ila ram mi v eve kan nih a vangin pawn lang zawk din hmuna din chu a awm lem lo ang.

Kawlrama Cheng Lusei Hnam Nihna Dinhmun Leh Hmasawn Chhoh Zel Dan Tur Thlirna II

2010-10-15T18:19:00.001+08:00

Chhunzawmna- Burma ram pawh independent turin a inpuahchah ut mai a, a ram dan leh dun pawh a duang tan ta a,Pb.)
Kum 1947-ah Pha. Sah. Pa. Lah hotuten Basic Principle for Burma Constitution an siam khan (Pyi Mah) kawl ho, Kachin state, Shan state, Karen Ni state, Chin special devision te an ni. Chu an dan pui zam chu kum 10 chhung (1957) thleng hman tur a ni. Kum 1957 a lo thlen chuan state 3 leh devision 4 pawh sorkar laipui hnuaia mahnia dan leh dun tih danglam theihna an nei. Independent kan hmuh hnua Chin minister hmasa ber chu Kanpalet lam mi Vawmtumawnga a ni. A term 2-na kum 5 a tan an han inthlang leh a, Zahrelian kum 28 mi lekin chakna a la ta a, mahse sawrkar ding mek priminister U Nuh-a party a nih loh a vangin U Nuha’n minister atan a pawm duh ta hauh lo mai a, a la naupang lutuk, kum 30 mi a nih hnuah chauh ka pawm thei ang a tihsan ta a ni. U Nuh-a chuan Zahrelian aiah Kanpalet lam mi bawk Pu Singthang zawk chu a ruat ta a, he mite pahnih Chin ministera an thawh chhung hian Lusei ten harsatna an nei lo.
Zahrelian khan a ngaihtuah vang vang a, minister a nih theih lohna chhan hi Chin congress party a din vang leh U Nuh-a party (Pyi Htawng Soh Party) a zawm loh a nih a ring tat lat a tichuan U Nuh party chu a zawm nghal ta vat a ni. Zahrelian an U Nuh-a party a zawm hnu chuan U Nuh chuan minister Singthanga chu a ban a, term chanve la bang tan Zahrelian chu Minister-ah a ruat leh ta zawk a ni. Zahrelian Chin Minister a lo nih atang chiah hian Lusei-te chuan buaina an tawk tan ta.

1947-a Burma Constitution Basic Principle an ziah lai hian Chin hnam hlawmah hian hnam cheknawk 24-in an record-a chutah chuan Lusei, Naga leh Kuki te an tel. Hetih lai hian Hualngo tiha inziah luh a la awm lo. Zahrelian Chin minister a nih mek lai hian 1947-a Constitution an siam pawh chu kum sawm (10) a lo tling ta a, mahnia dan leh dun tihdanglam theih a lo nih ve leh Zahrelian chuan a pu a pa te hun laia an ram anga an lo neih chhiah pawh an lo lakna Hualngo tlang dung Lusei Hill tia mapa lo lang ta chu tih danglam a tum ran ta mai a ni. Amaherawh chu a cabinet zinga MP langsar zual deuh deuh Rothangate, Ralhminga te, hrangnawla te Mangtungnunga te leh Singthang te chuan tha an tih pui lo a, a awm pangngai hian awm mai sela ziah belh tur dangte kan ziah belh mai zawk anga a ni mai lawm ni an ti a, an hnial thei chuang lo. Hrangnawla phei chuan kan Chin Hill chu Zahrelian kingdom a ni ta mai a nih hi a tih khum an ti. Tichuan Luseite chu hnawl an lo nit a a, chumi rual chuan Naga leh Koki pawh hnawl an ni ve. Naga leh Kuki te pawh an hruaitute Zahrelian nen hian inbiak hona an nei vet ho ni awm tak a ni a. Engnge an sawia an inkarah eng boruak nge thleng tih hriat a ni lo. Heng a chunga kan tarlan tak te hi han thlir hian Luseite chu Chin hnam hlawmah atir atang a vawinni htlenga tel duh lo ni awma an sawi thin hi thu awihawm a ni thei lo. Hualngo ho hek tiin Lusei hoin an sawi tih pawh hi a dik lo tih a lang chiang a ni.

Zahrelian Kawlpui (Tahan bul lawk)-a a lo kal tum khan Lusei puipate zinga mi Pu Saptawna te, Pu Hranghlira te ho nen Kawlpui bungalow –ah khuan inkawmna an nei a, Zahrelian chuan Luseite hi Chin inti ve mai rawh u a ti a. Lusei lam upate chuan kum 1947 Constitution Basic principle siam a nih atang khan Chin kan nih tawh reng a lawm an ti a. Zahrelian chuan Lusei tih a tel hian India ramah Lusei ram a awm tih sawrkarin a hre sia, tun hnuah nangmahni tan a la pawi thei ang a ti a. India-ah Lusei an awm a, Kawlramah pawh Lusei kan awm ve tlat si a, a that lohna kan hre lo. Chin ah hian hnam cheknawk kana wm teuh a, chung te chu: Zahhau te, Tidim te, Halkha te, Lumbang te, Matu te, Kanpalet te, Lusei te tih a ni duah a, “keini Lusei tih lai kan thiah chuan eng hnam ber nge kan nih ve tak ang,?” an ti a. Chin in nih chuan a tawk mai a lawm a tihsan mai a ni. Hemi chungchang thu-ah hian tum thum meuh inbiakna an nei a ni. A tawpah chuan “Chin hnam zinga hnam cheknawk tarlan zawng zawngte hi thiat vek ila hnam cheknawk hming ziak tawh loin Chin inti vek ila a ni mai a lawm,” an tih lahin a duh bawk si lo an ti. (Lusei tih hming hian ngaihmawh a hlawh a, vawiin ni thlengin unau thenkhatten an hnam hliahkhuhtu leh harsatna thlen theituah an ngai tlat pek a).

Luseite hnawl an nih hnuah khua a lo rei deuh a, Zohmun khua a mi in 4 chu an hnawtchhuak ta mai a. Khampat lamah te pawh harsatna a lo chhuak nghal zel a, Tahan leh a chheh velah te pawh hnawhchhuah an nei tan ta a. Entirnan, Pu Piangthula te kawta awm Pu Biaklala te Unau pawh an unau zinga mi Vana leh a chhang chiah chu Chu tiin an lo in thlak a, an unau hnih chuan More-ah an um chhuak nghal. Chuvangin Lusei puipate (LWO) chu sorkar laipuiah chumi chungchang thu thlen turin Rangoon ah an kal ta a, Sorkar laipui vuan tute chuan kan lo ngaihtuah vat ang nge an ti a, mahse, anmahni leh anmahni-ah buaina neuh neuh a awm a, an ngaihtuah hmain General Ni Wina’n thu neihna a lak sak leh ta si a.

Sipai sawrkarah chuan an thu chu an thehlut nawn leh ta ringawt a ni. Sipai sorkar chuan a lo ngaipawimawh hle mai a, a rang thei ang berin an ngaihtuah sak ta a ni. General Ni Wina chuan Lusei te hi ka ralkah pui tam tak an awm a, tlawm an ngai a, zu pawh an heh ve lo, ral kah pawh an huaisen chuvangin Lusei ram atanga lo pem lut Lusei te chu chutianga um chhuah mai mai tur a ni lo, special-in (hmat-pun tin) kan siam sak zawk ang a ti ta a.

Tichuan General Ni Wina chuan West command Col. Luntin leh Col. Vankulha te a rqawn tir a, Luntin chuan Luseite hi General Ni Wina hian a fak hle cheu a, ral kah inhuaisena, tlawm in ngai a, in rinawm a, chuvangin inharsatna a ngaipawimawh hle tih thu a sawi a, Luseite chu a bik takin leilet pa in ni a, chu chu korkar lawm zawng tak anih thu te a sawi. “Luseite hi tunhma chuan Chin hlawmah in bet a, Chin-in an hnawl che u a, tuna tang chuan nangmahni liau liauin in ding hrang taw hang a, Kawlramah Arsi pakhat kan pun belh ta a ni,” a ti bawk.

Col. Vankulha pawhin sorkar hmasa khan inharsatna te hi an buaipui thei lawk lo che u a, an mahni-ah buaina neuh neuh an neih vang a nih a rin thu a sawi a, tun sipai sawrkar chuan a ngaipawimawh hle cheu a, chuvangin a rawn chifel sak t ache u a nih hi a ti. Chu chu kum 1963 March 23 a ni. Hemi ni hi thenkhat chuan Kawlram sorkarin Luseite a ram mi atana a pawm ni niin an sawi thin a. B. Lalthangliana pawhin helam hawi zawngin a ziak a, mahse Kawlramin Lusei te hi a ram mi atan a pawm ni chu hnam dang (Tayng Yin Ta) te ang bawka 1947 Basic Principle (A chhi-khan U pa dri)-a an pawm ni hi a ni zawk.

Kum 1963-a Col. Luntin leh Col. Vankulha te lo kal dan hi chu kum 1947 kuma Chin hnam hlawma an khung luh, Chin minister pakhat (Zahrelian) maiin Chin hnamhlawm atanga Luseite a ban a vanga Lusei te buaina rawn chinfel sak mai tur an ni zawk. Chumi ni chu Lusei Day te kan lo ti thin a, a fuh lo a ni. Hemi ni a pawm chawp mai mai kan ni lo. Sorkar pawhin fuh chiahin a hre lo a, Lusei Day tia hman zel pawh tha a ti lo reng a ni.
(Chhunzawm tur)

Kawlrama Cheng Lusei Hnam Nihna Dinhmun Leh Hmasawn Chhoh Zel Dan Tur Thlirna

2010-10-02T13:38:00.001+08:00

Pu Vanmawia.

Kawlram chhung a cheng tlangmi te zinga lusei hnam chikhat te hi kan dinhmun leh nihnate hrechiang lo tam tak kana wm a rinawm a, Pu B. Lalthangliana “Mizo Chanchin” tih lehkhabu a van em avang leh chiang kuang taka chhiarte kan tlem em avang te, HLCA chairman Pu Lalbiakthang (hming tawpah ‘a’ a dah lo) leh Rangon lama Hualngo puipa te aiawha Pu Lallianchhungan, hnam pakhat leh pakhat in kara harsatna lian tak thleng thei thilte a rawn tlang zarh takah chuan a pawimawh zual then khat tal thangtharte’n kan hriat ve a tan tha in a lang a, pawl pakhat emaw, lusei hnam hruaitu puipate mawhphurhna pek vang ni miah lo, keima rilru puak chhuak liauin ka han tarlang ve a ni.
1. Kawlram mihlun (citizenship) dik tak nihna

Pu B. Lalthangliana Mizo Chanchin ziahna bu kan chhiar chuan, kawlram luseite hi, kawlram laili Monywa khawpui chhehvelah te, Kalewa khawpui ral Yazachu velah te, Shan hnam tawng hminga sak Khampat khawpuiah te, kum za tam kan lo chen tawh thu kan hmu a, chu ta tangin Thantlang leh a chhehvelah te, Seipui khua leh a chhhehvelah te hun rei tak kan lo awm tawh thu leh a then India ram nit a, Tiaural kan a, Mizoramah te kan tlak thlak zel dan te, a then te chu tuna kawl ram huap Tiau chhak lama kan la cham ban thu te kan hmu a ni.
Tun hma chuan Sapho hian Pakistan, India, Bangladesh leh Kawlram te hi ram khat ang chiahin min lo awp bet a, chung ram ho te chuan Independent kan han hmu ta sap sapa kawl ram pawh hian 1948 January ni 4-ah independent kan hmu ve ta a, ram then hran a lo nih takah chuan seifa thenkhatte chu Tiaural India ramah an bet a, a thente chu Tiau chhak kawlram chhungah kan bet ta a ni.

Kawlram in independent kan lak dawn khan “dan leh hrai” Basic Principle (a chhikhan upa drie) a duan a lo ngai a. Chu chu Kawlramin Independent kan lak hnu 1948 January ni 4 atanga hman tan tur a nih avangin 1947 kumah Burma sorkar hotu (Phah. Sah. Pah. Lah)te chuan chu ‘dan leh hrai’ (Constitution) innghahna tur chu a duang ta char char a. Keini lusei hnamte hi kawlrama awm kan tlem em avangin, kawlram sipai Taung Oo a awm Pu Thanghleia chuan an dan siam thar turah chuan Lusei hnam an ziah luh theihnghilh palh ang tih hlauvin, sorkar (Phah. Sah. Pah. Lah) hotute hnenah chuan lehkha ziakin an theh lut ve ta a.

Sorkar hotute chuan chu mi kum chuan Pu Thanghleia chu tum hnih meuh kovin an hriat duh pawimawh te an zawt a, Lusei te chu kawlram chhunga cheng hnam dangte ang bawk a kawlram mi hlun dik tak an nih zia pawmin (a chhikhan upa-drie) Basic Principle ram dan pui an duan mekah chuan an ziak lut a ni. Amaherawh chu eng hnam hlawmah nge an tel duh an zawta, Chin hnam hlawmah ziak lut che u ila a tha ang em? an ti a. ‘Aw le’ a ti hmiah a, chin hnam hlawmah an ziak lut ta a ni. (Burma hnam hrang hrangte hi hnam hlawm lian 8-ah then an ni, Puibawiha.).
Chin hnam hlawma an ziah luh danah chuan chutih laia Lusei te chenna chu an zawt a; Tahan leh a chheh velah khaw 4 vel leh Tiau kam velah khaw 40 vel an awm thu a hrilh a ni. Pu Thanghleia hi sipai hmuna awm daih a ni a, Tahan leh a chhehvela khaw awm zat a hre chiah lo a ni ang. he tih hunlai hian Tahan leh a chhehvelah hian khaw 10 lai an awm tawh zawk. 1947-a ram ‘dan leh hrai’ an siam lai hian Hualngo zinga pa langsar tak Pu Savuta pawh a tel ve. Pu Thanghleia an koh vawi hnihnaah Pu Savuta chuan Pu Thanghleia chu a lo chibai a. Pu Thanghleia chuan Mizo I ni e lo? A lo ti a. Pu Vuta chuan ni e, tlangmi kal pang ate zinga pakhat ka ni ve a sin a ti a. Pu Thanghleia chuan nangin tan I lo la a niang chu a lo ti a. Pu savuta chuan harsatna a awm lo, a fel vek tawh e a lo ti a, a hriat pui hle tih a lang a ni.

Heng hun lai hian kei ni seifa te hian ram tia kawh tur kan nei ve lo a ang. Tuna Hualngo tlangdung kan tih pawh Zahau Lal Thang Tin Liana ram, a awp behna hnuaia awm a ni a, an hnenah chhiah pawh an chawi a. Tuna Thang Tin Liana in ban te pawh hi thinglei khua chhehvela far ban hah em em a suih saka puin an tum sak a ni. Chawnghawih khaw lal inchuh thu-ah Lianvela leh Nungbika te pawh Tlaisun lal hnenah an kal a, Tlaisun lal chuan Lianvela chu a pawm zawk thu te, Nungbika pawh Bualhreiah khua an pek thu te, Vangva lal Zanghingloa pawh silai cheng chher a thiama, Tlaisun lal a pek a vanga Vangva khua a sat chauh a nih thu te hriat a ni. Chutia Pu Thanghleian Lusei te chenna tia a lo kawh takah chuan; kawlram sorkar pawh chuan (lusei taungtan) lusei tlangdung tih hming a lo puttir ta a, school zirlaiah hial lo telh-in map-ah pawh an lo lang ta a, chutih laia kan seifa te zinga mithiam langsar deuh Pu Savuta phei chu a lawm hle niin an sawi. Hetih hun lai hian Kawlramah chuan hnam pui 5 awm anga ngaih a ni a, chungte chu- Kawl, Kachin, Shan, Karen Ni leh Chin te an ni.
(Remchan huna chhunzawm tur)

MYANMAR MIZO KRISTIANTE KHAWVEL THLIRNA

2010-10-02T13:15:00.000+08:00

Rev. Jubilee Thanga

Khawvel hi varak tui anga bial mum, degree 23 leh a chanvea awnin darkar 24 danah vawikhat amaha vir chhuak a ni a. Tin, ni hi ding lam zawngin a hel map map maia. Ni vawikhat hel chhuak tur hian ni 365 a rei a, chu chu kum khat tiin kan ko ta mai thin a. Chutiang chuan nuna nei chi tam tak kan chenna khawvel hian chawlh lai reng nei miah lovin a her mup mup mai a. A pian tirh ata a her dan pangngaiin a her zela, a letling zawngin vawikhat mah a la her kir ngai lo a ni. Chuvangin, kan chenna khawvel hian hun thar zel a her chhuahpuia, hun kal ta lamah a lung a len lo hle. Hei hian khawvela cheng leh roreltu ber mihringte khawsak dan leh nun dan tur pawh min zirtir niin ka hria. Pathianin Evi leh Adama a siam ni ata kha mihringte hi hun tharah kan chuang kai zela, hun kal taah tumah kan let thei lo. Chuvangin Pathian ruat dana chawlh zai rel miah lova kal mek hun hi kan hriat thiam a tha. Hun hi tui luang ang hi a nia, chumi mila kan nun khawsak thiam loh chuan lungawina reng reng ka nei lo tih hi kan hring nun hman ral dan tur a ni mai. Mithiamte chuan, “hun kal tawh chuan thil tha lo min hriat fiah tira, tun hun hian insiam thatna hun min pe a, hun lo la kal tur chuan a rah min seng tir dawn a ni,” an ti bawk.

Chutiang chuan mi hring chanchin (Human History) kan tihte pawh hi thil dang chiam a ni lova, hun kal tawha mi awm dan leh khaw sak dan mai a ni. Chutiang chuan mi tin, chhungkua tin, chi tin, hnam tin, leh ram te hian chanchin (history) kan lo nei vek a. Chu history chu a tha zawnga hmang thiamte tan chuan finna leh hlawkna a ni bawk. Hun kal taa thil lo thlengte en let thiam chuan chhiatna lakah te, buaina lakah te, sualna lakah te an inveng him thei a. Chutiang mi chu Baibul chuan mi fel, mi fing tiin a sawi. Nimahsela, history hi a ni lo zawnga kan hman erawh chuan harsatna, buaina, leh sualna kawngah hruai bovin a awm theih bawk. Chutiang mi chu Baibul chuan mi a, mi sual tiin a sawi. Chutianga mi fing (fel) nihna leh mi a (sual) nihna thlentu chu mitin tana Pathian thilthlawn pek HUN hi a ni tlat mai.

Tunlaia Myanmar Mizo Kristiante khawvel ka thlir hian chung pikna-in min zel a. Myanmar Mizote harsatna kan tawh rei ber chu hnam nihnaa kan buaina (identity crisis) hi a ni. Tawng khat hmang leh inti Kristian (thlarau mi) ni si hian kan insuihkhawm thei tlat lo mai. Chu bakah kohhran/pawl inlak hranna a lian lu tukte hian buaina min thlen mek bawk a ni. Chuchuan unaute zingah inpum khat theih lohna te, inrel chhiatna te, inelna thiang lo te, sawrkara inkhingna te, leh inmawhchhiatna te a thleng a. Heng zawng zawng hi Setana mizia, Pathian dan pawn lama awm mizia sual vek a ni. Hetianga harsatna kan tawhte hi Pathian thilthlawn pek kan HUN chan theuh kan hriat thiam loh vang leh kan hman thiam loh vangte ni hian ka hria. Chuvangin tunlai khawvelina hun a rawn her chhuah dante hi Mizo Kristiante khawvel thlir fiah nan hman kan tum dawn nia.

1. Globalization khawvel thara cheng kan ni tih I hria ang u.
Tuna kan hun hman mek hi Globalization hun a ni. Globalization tih hi hrilhfiah dan hrang hrang a awma, mawl taka sawifiahnaah chuan khawvel ram hrang hrang hi khaw te pakhata siamna a ni ber. A awmzia chu khawvel hi tuifinriat leh khawmual zau takin a inthen a, chutah chuan ram hrang hrang ramri inthenna a awm leh a. Chutianga inthenna zawng zawng chu awm tawh lova khawvel pumpuia ram leh mipuite hi khaw te pakhata cheng anga siamna a ni. Chuchu tuna kan khawvel hman mek a ni a. Tehkhin nan, America rama New York leh Los Angel khu khawvel khawpui nia ngaih a ni. A chhan chu khawvela hnam tin, chi tin awm khawmna a ni bera, American kalchar lalna ram a ni tawh lo. Chutiang bawk chuan American eiin, silhfen, music, leh hmanrua tam tak hi America kal miah lo tan pawh Yangonah hian kan tem thei tawh. Tun hma chuan China chaw dawr (China Restaurant) hi Yangonah awm chhun a lo nia, tunah chuan Europe, American, Thailand, Japan, Korea, Vietnam, India, etc.. a awm vek tawh. An rama kal ngai miah lovin an eiin kan tem ve thei tawh. Chutiang zel chuan ram pawh hi mahniin a ding thei lova, ama region chhunga ram dang nen thawhho a ngai angin khawvel pum huapa UN nen pawh thawho a ngai vek tawh. Chuvang chuan ram tinah Embassy indahin palai an nei vek a. Chutianga tel duh lova, in la hrang ramte erawh chuan retheih leh thlak hniam chiah kan hma bak.
Hei hian khawvela mihringte min chawhchawrawi zo vek tawh a. Mi pakhat tan ram pakhat mi (citizen) nih aiin ram tam tak mi nih a tha tawh zawk. Ram 2, 3 mi nih chu mi ropui leh hlawhtlingte in elna a ni tawh zawk. Mizote zingah pawh ram dang mi nupui, pasala nei kan awm ve ta nual maia, a lawmawm khaw mai. Chutiang zel chuan ram pakhat chhungah pawh hnam leh chi te tea ramri neihin (state, division, province,etc..) awmzia a nei tam vak ta lo. Chi 2, 3 nih theih chu a tha zawk tawh. Chuvangin, hnam, chi leh kuang inlakbingna hi Globalization nen a inmil tawh lo. Chutiang rilru chu khawvel huap pha lo khaw te rilru a ni tawh zawk.
Tin, tunlaia mipui tam zawkin khawpui lam kan pan vek tawh. Globalization hian mihringte hi a huhova cheng turin a hruai tlat avangin, khaw hmun nuam leh changkang zawkah mi kan tla fun tam tawh zawk. Mithiamte chhut danin kum 2025-ah chuan khawvel mipui 80% hi khawpuiah kan la awm vek ang an ti. Mizo khawpui tur atan hian Kualalampur (Malaysia) te, Meryland (US) te, Singapore te pawh rei lovah kan la hmang zawk mai thei a ni. Tin, Khawpui nunin a ken tel chu inchiahpiah nun a ni a. Hnam, chi leh kuang-in awmzia a nei tlem telh telh a, kan chi leh kuang te, thenawm te ai mahin kan hna thawhna lama mite nen kan inhre chiang zawk thin. Chuvangin hnam dang nena inneih pawlhte hi sual lutukah kan ngai mai tur a ni lo. Amaherawh chu sakhua inang (Krsitian) ni thei se. Hnam inneih pawlh hi Globalization-in a rawn her chhuahpui a ni miau si a.
Chutiang khawvela cheng kan nih avangin chi leh kuang lama inlak bing emaw, khua leh tui zawnga inkhawm bik emaw hi hnam puitling nun zia a ni lo. Kan khua leh tui, hnam, chi leh kuang tana thahnem ngai tak tak kan nih chuan kan hna thawh leh zirna lamahte mi hlawhtling nih tum hi a fuh zawk. Chuchu hnam leh khua hming chawimawina a ni, hmangaihtu dik tak awm dan pawh a ni. Tichuan, hnam leh khua hmasawnna leh changkanna turin kan inpe thei chauh vang. Chuti ni lova, mi pawi sawi zawng leh mi dangte diriam/ hmusit zawnga kan inlakbing a, mahni engkawngah mah hlawh tling taka thawh nei si lo tan chuan mi hnawksak nihna mai a ni.
Globalization hian mi puitlinga a ngaih chu mahni thiltih kawnga mi thiam tak (professionalism) leh mi hlawhtling (success) a nia, mitin an thawh rah ena hna pek leh hlawh pek an ni. Mi thiam lo leh taima lo tan chuan hna hmuh a har sa. Chuchu tuna khawvel inrel bawl dan a ni miau si a. Kan duh emaw, duh lo emaw kan zawm a tul tlat mai. Chutiang khawvela cheng kan nih tlat avangin Mizo Kristiante chuan kan hnam nihna te, kan khua leh tui te chhuanga inlak hranna rilru neih a hun tawh lo. Mitin, chitin tana that chhuah leh mi rilru hneh zawnga kan hna taima leh rim taka kan thawh a hun tawh. Khawvela hruaitu ropui nih tling pha John Maxwell pawhin hlawhtlinna thuruk a sawinaah, mitin chunga ang khata zahderna rilru dah theihna leh mahni tih tur huai tak leh taima taka thawh niin a sawi. Chu chu mi rilru hneh theihna bul ber niin a sawi bawk. Chuvangin Mizo Kristian thangthar ten rilru zau tak neiin kan tuina zawnah theuh thiamnna leh taimakna kan chhuah a tul. Chutichuan, Globalization lawngpuiah hian khawvel tuipui fawn vela kan him theih nan kan chuang thei chauh vang.

2. IT khawvel hmanrua hmang kan ni tih I hria ang u.
Tuna Globalization khawvela kan nun khawsakna atana hmanrua tangkai ber chu IT (information & Technology) hi a ni. Information hian chanchin leh thu hla lam inhriattirna lam a kawk a. Chutianga inhriattirna hmanrua tha ber chu technology atanga siam chhuah computer leh mobile hi a ni ber awm e. Chu bakah electronic thil tam tak pawh technology nen kawpin engkim siam thar vek a ni tawh a. Tunlaia Mobile ho phei chu computer ang chiah hian engkim a tih theih tawh leh nghala, computer aia hmang an tam tawh a ni.
Hetianga IT hmanrua tha tak tak rawn chhuak hian khawvel hi a ti zim tawh em em maia. Baibul thu ang khan, lang lo tura thuhruk a awm thei lo a ni ber tawh. Ram khat chanchin chu sawi loh mimal chanchin pawh hi a chhia emaw a tha emaw khawvelah second khat chhungin a darh vek thei tawh a ni. Chuti chuan internet lama inbiak pawhna hi a chakin a zalen ber tawh a. Email chu sawi loh, group mail te, website te, news te, leh etc.. hi a zalen em em mai a. Ramri tiam chin awm lova mahni duh duh sawi leh ziahna a ni deuh ber tawh a ni. Chuvangin website-a thu leh hla hi a chhia emaw a tha emaw feeling pui vak chi a ni lo. Internet hian kalchar leh literature hran a nei tlat maia, a luh chilh ve lo tan chuan mual bova bo awl tak pawh a ni. Internetah chuan serh leh sang pawh hi a awm lo emaw tih hial theih a ni. Chutianga a zalenna chu kan duh lova, kan pawm thei lo a nih chuan keimahni kan inti hah thlawn mai mai a ni ang.
Mizo tawngah chuan “zawnga hmai mah zah a na” tih a ni a. Mahse IT hunah hian chuan hmel pawh inhmu ngai lo, khua pawh inhre lo, chhungkhua background pawh inhre si lovin internetah kan inkawm a ni ber mai a. Kan tual lenna khawvel a sang lu tuk hi a mangan thlak zawk thin a ni. Kan duh tlan pawh ni lovin, Facebook-a thian pakhat kan siam tawh chuan a thian chhawng engemaw zatin min lo hre ve nghal maia. Thiante inkhawmna pawh private takin a tih theih lova, a duh apiangin an lo chhiar thei vek ta mai si. Hetiang ang ema inkawm dan zalen hi mizo khawvelah tun hmain a la awm ngai lo. Hmai chhanah chuan pi, pu, u, pa tia inzah derna tawngkam mawite a awm a, internetah erawh chuan a awm thei tawh lo. Chutianga zalenna chu hre thiam lova khaw khat, hmun khata inkawm dan anga inkawm kan tum phawt chuan internet khawvela cheng ve loh mai tur a ni. Interneta mi tawng kam kan tuar thiam loh fo dawn chuan en loh mai, ziah ve loh mai hi kan tan a him zawk. Kan duh emaw, duh lo emaw IT khawvel hian min hruaina a ni tlat si a.
Hei hian tunlai Mizo Kristiante khawvel tharah min hruai a ni ber mai. A tha zawnga kan hman thiam erawh a tul. Hetianga zalenna hi kan thlarau nun leh khawsak dana hma sawnpuina atana kan hman thiam a tha. Tin, khawvel ram hrang hranga Mizo Kristiante inpumkhatna leh inunauna tha zawk kan neih theih nan hmang thiam ila chuan a hlawk thlak hle ang. Chumai ni lovin, chawimawi tlak leh entawn tlak kan hnam zinga mite inhriattirna leh infuih tawnna hnamrua atan IT hi I hmang thiam bawk ang u. Chutiang chuan thangthar ten hman ngei pawh tum ila Lalpa malsawmna pawh Myanmar Mizo Kristian ten kan dawng ngei ang.

3. Khawvel tharah hian thil dang zawng aiin kan Kristianna hi I hria ang u.
Myanmar Mizo Kristiante hi khawvela hnam tlemte zinga thurin leh kohhran/pawl inthen tam ber kan ni mai awm e. Hei hi kan hnam chak lohna leh kohhran hmasawn loh phahna pakhat niin ka ring. Heng hi ngaihtuah chian chuan mahni theuhvah kan dik vek a, mahse mi tana hnawksak leh pawisawi zawnga thusawi leh zirtir a tha kher lo. Tuna khawvelin a kalpui mek Pathian thu chu thuam thar lehna (Transformation/restoration) a ni. Tun hma ang khan mi chal delh zawng leh do zawngin kan uar bik Pathian thu (doctrine) sawi vak vak a hun tawh lo. Pathian thu mawl leh fiah taka mite nun Krista anna kawnga siam puitlin hi world evangelization thu ken chu a ni. Chuti lova mahni duh zawng zawnga Pathian thu her pui vaka, mite awi tura zirtir chiam chiam hi kal sualna pakhat a ni tawh zawk. Chuvangin kan Pathian thu sawi leh zirtir dan te hi kohhran vangtlang leh Kristian khawtlang tana rah seng tur zawngin kan sawi a hun. Doctrine inang lo mah ila, Kristian nun vangthlang thatna tura lentlang rual taka Pathian thu sawi leh zirtir kan uar a tul. Chutilo chuan Pathian mi kan chhuah tamna apiangah kohhran leh pawl kan keh tam mai dawn a ni.

Tunlai hian Myanmar Mizo Kristian ten Krista leh a kohhran thianghlim mission rawngbawlna buaipui aiin chi leh kuang thu kan buaipui tam zawk em aw ka ti. Kan hnam, chi leh kuang, leh kohhran hi Krista atanga chhuak hmangaihna dik tak nena kan enkawl a ngai. Chumi piah lamah chuan Krista Chanchin Tha la hre ve lote hnenah mission rawngbawl hna kan buaipui a ngai bawk. Chuchu ram leh hnam hmangaihtu Kristian dik takte awm dan tur pawh a ni. Khawvela mi te ber pawh ang khata hmangaihtu Pathian nung betute kan nia, engah nge Kristian unaute zingah pawh hmangaihna leh remna hi a len theih loh? Rawngbawltute leh kohhran hruaitu tam takte hian Pathian rawng bawl lovin, hnam, chi leh kuang rawng kan bawl zawk a ni lo maw? Baibul chuan, “Lalpa rawng bawl duh lo ram leh hnam chu an la boral ang” a ti a (Isaia 60:12). Chuvangin hnam, chi leh kuanga buai chi rawngbawltu, pastor, evangelist, leh upa/ hruaitu kan nih chuan inchhira Pathian hnena ngaihdam dila, sim vat a tha. Chutianga kan tih theih loh chuan rawngbawlna atanga ban vat a tha. Pathian rawng bawl lova khawvel rawng bawl kan nih chuan Pathian thin urna chhungkua, kohhran leh khawtlangin kan tuar phah dawn. Lalpa thin urna chu tuma thelh theih a ni dawn si lo.
Chuvangin kohhran mipuite pawh hian rawngbawltu leh kan upate khawvel thila an inhmang lutuk a nih chuan an chungchang rel fel vat mai tur. Mihring thin urna aiin Lalpa thin urna hi kan hlau zawk tur a ni. Hnam kam dinna leh hmasawnna bul ber chu Krista Isua hi a ni tih kan hriat a tha. Kan hnam zinga Krista hnung tih tak zeta zuitu kan tam chuan Lalpan min chawimawi anga, hnam dangte tih leh zah kan hlawh zawk dawn a ni. Chuti ni lova, hnam leh kohhran hi Lalpa tel lova politic zawng taka kan buaipui chuan kan la boral vek ang tih a phan awm hle.
Mizo pipute sulhnu kan neih ropui berte chu Khampat Bungpui leh Rih Dil hi a ni a. Ka naupang laia sava veh nuam ka tihna ber chu Khampat Bungpui hi a nia, ka puitlin hnua ka khual zin kawnga hmun nuam leh mawi ka tih ber chu Rih Lipui hi a ni bawk. Pathian khawngaihna zarah Europe, UK, US, Asiaa ram 12 vel ka thleng ve tawha, ka rilru min la hneh ber hmun chu Khampat Bungpui leh Rih Lipui hi a ni. A chhan chu keimahah hian pipute rauvin thu a sawi thuk tlat mai. Ka fiah ve dan chuan Khampat Bungpui hi pipute insuihkhawm tura thu thlunna hmun niin, Rih Dil hi pipute thlarau intawhkhawmna pialral kal kawng a ni. He hmunpui pahnih hian mizo cultural value (kalchar puithuna) a ti famkim thei chauh niin ka hria.
Pathian khawngaihna zarah ka pa Lusei leh ka nu Zahau atanga piang ka ni a. Lalpan nupui Hualngo nu fel tak min pe chu Lalpaah ka lawmna a zualin ka thlamuang thin hle. Ka nihna hi ka ngai hlu vek bawk. Nimahsela, chung zawng zawng aia ka ngaihlut zual zawk chu Kristian, Pathian fa duh tak, van khua leh tui mi ka nihna hi a ni. He khawvela ka nihna zawng zawng hi chu kum rei lovah mual ka liam san mai dawna, Kristaa ka nihna erawh chuan chatuan thlengin min tinung dawn tih ka fiah chiang si a. Chumi hre fiahtu tan chuan Kristian ka nihna aia chhuan tur hlu leh tha ka hre lo. Ram hrang hranga ka zinna mi ka zawh apiangin Muslimte chuan an hnam, chi leh kuang nihna an sawi tawh lova, an Islam nihna chauh an sawi thin hi an en tawn tlak a ni. Keini Pathian nung neitute phei chuan kan Kristianna hi kan chhuan ber tur a ni. Chuvangin, Myanmar Mizo Kristiante hian thil danga kan nihna zawng aiin Kristian kan nihna hi chhuangin Lalpa rawng chauh I bawl ang u. Chuchu kan hnam tan damna leh hmuingilna bul a ni.

Tlipna
Myanmar Mizo Kristian ten kan ram leh hnam kan hmangaih tak tak a nih chuan Pathian hun ruat dan hi hre thiamin, pakhat leh pakhat chungah inhriat thiamna leh inleinatna I nei ang u. Globalization khawvela IT a tha zawnga hman thiam I tum bawk ang u. Tin, kan hnam lungphum hi thil dangah zawng lovin Lalpa leh a dan pekah I zawng zawk ang u. Tichuan, kan awmna hmun apiangah Ama rawng bawl tlat ila, kan ram leh hnam hi Lalpan a la chawimawi ngei dawn a ni.

Burma Lusei/Mizo Chungchang III.

2010-09-23T12:45:00.003+08:00

Burma Lusei/Mizo Chungchang III
Sap ho leh mi ropuite chanchin (biography) ka chhiar hian, ka ngaihsan em em pakhat chu; an chanchin a thalai ringawt ziak lova, an tlin lohna leh an tihsualna ngeite pawh an thailang ngam hi ropui ka ti. Keini ho hi han in en ve ta ila, zu vanga thi tih hriat ngawih ngawihte pawh a vuinaa a chanchin han chhiar hian sual kaidum awm lo, mi thianghlim ang maiin a thatna lai hlir kan sawi kurduah a. A lo tihsual ve thin ziate, tling lo chung chunga Pathian thu a lo duh ve zia leh piantharna pawh a lo tem ve tawh thu te sawi ta ila mihring nihphung dik tak a phawk zawkin, a lo ngaithlatu tan pawh beng a khup lo deuh ngei ang.

Kan nu leh pa, kan pi leh pu ten an lo tisual ve a nih pawhin engvang nge hmaisen urh-a kan lo tan teh vak ang, an tihsualna lai chu hliah khuh talh kan tum dawn em ni? Chu ai chuan mihring ve bawk an ni a, an lo tisual palh a ni, a pawikhawp mai tih mai hi a hahdam thlak zawk a ni. Chuti ni lova, lo tuar nat chiam a, inbauh nantea lo hman hi keini thangthar hunah hian tangkaina a nei lo mai ni lovin, hmasawnna tur leh insiam thatna tura ke penna a dal thei zawk a ni. Kan history-ah hian va lut leh tur kan ni lova, inenfiah nan hmangin hmalam huna kan tihsual tawh loh nan history hi kan hmang tur a ni zawk.

Tun hma kawlphai lusei/mizote harsatna tawngpha leh hre pha, mit ngeia hmua lo tuar ve tam tak an la dam a, chanchin sawi chhuah nikhuaa sawi tur tam tak hria te hian thil hi a ruhlang rawtin an sawi duh lova, a chhan ni thei awm ang chu: (1) Thil kal tawhte a nih avang leh thenkhatte tan rilru natna thlen thei thilte a nih vang. (2) Miizote chu thukhuh kan uar thin vangin a ruhlangin an sawi lem lo. Upa Malsawma chuan, “Kan pipute hi tawngkamah an fimkhur hle a, a ruh lang rawtin an sawi ngai lo, thihna hial pawh hi a ngaithlatu tana ngaihthlak hrehawmin an sawi duh lo,” a ti. (3) Tin, mahni tan hlawkna a thlen lem lo bawk nen, an sawi tha duh vak lo. (4) Mizopa tlawmngaihna leh mizia; sawi vak vak aia chet atul huna chet chhuah mai duh zawk kan nih vangin an sawi tam lem lo. (5) Unaute chunga rilru tha lo pu anga lan an duh loh vang. (6) Ram pawn mi nihna chungchanga sawi thaihnain an thinlung a hneh vang. (7) Tin heng thu sawi avanga inhnuh hnawk buai (thubuai neih) an hreh vang a ni thei bawk ang.
Kan nu leh pa te leh sipai a tangte kha ziak leh chhiar lamah atlangpui thuin an sang em em lem lo va. An thil tawn leh hriatte pawh ziakin an tlangzarh ve em em lem loh avangin anmahni kawma zawh tawp loh chuan hriat tur a tam lo hle thin a ni. Tunlai angin Media a la chak lo va, hmun hrang ami chanchin kim chang taka inhraitpawh zung zungte kha a harsa a (Eg. Tahan chanchin kha LetpanChaung pa chuan a hre vak lo mai thei), chuvangin khatih hunlaia chanchin sawi deuh hat hat tling chin tawh ngat kha chu a na mai lo viau ang tih chu rin a harsa lem lo. Vengchhung erawh an inhre pawh em em thung entirnan, nula tlangval che khawlo deuh emawte chu veng pumin an hre thuai thin.

Burma Lusei/Mizo te chanchin hi ngaihven peih tan chuan upa zawkte ka atang hriat tur a lo awm teuh mai hi a lo ni. Tun ang IT (Information Technology) hunah hi chuan veng kilkhawra thil thleng te tak te pawh kan mizo khawvelin a hre ve ta zel mai a nih hi. Tun hma ang ngawt kha zawng a ni ta hauh lo mai!

Hei, tunhma hun hre pha te an rawn tawng chhuak tan ta pheuh pheuh mai hi a lawmawm tak zetin ka hria. Hei hian kan thanmawh bawk; kan inhnial thinna (LWO leh HLCA)-te leh rammi (citizenship) chungchanga kan insawithaihna te a tikiang ngeiin a rinawm. Thangtharte tan hnam leh sorkar chungchangah bengvarna pawh min pe. Thawk khat lai khan Mizoramah Party ruihchilh a nasa em em a, “kan party a nih phawt chuan Vawkpui pawh ding se ka vote ang” ti an awm. Chutiang bawkin, tunhma thil kal tawhah te kan chi leh kuang an nih avang ngawta tan hmun lo khuar chiam chiam te hi a hun tawh lo. Hmathlir (Vision) sawi tur enge an neih tih hi in chhutsak zawk ila a changkang. Mizo kan nih si chuan mizo hnam tan tha tura inhman hi kan bat a ni.

Kan history te hi intihvuivai nan ni lovin hmalam hun thlir thiamna min petu atan hmang ila. Tichuan a tu zawk zawkah pawh dik lohna lo awm sela, thil kal tawh a ni a, lak nat ten tun tur pawh a awm chuang lo. Tangrual tur kan tanrual loh avangin kan hnam hian a tuar thin a ni. Tun huna kan hmalakna daltu atan lek phei chuan hmang lo ila, kan tih tur zawk chu: “Nehemia’n, Jerusalem kulh bang chhiat thu a hriatin a thu hnawk a, Pathian hmaah, ‘Lalpa kei leh ka pa chhungten thil kan tihsual a ni,” a tih ang hian ngaihdam dil hi a tawk viau a ni.

Thangtharten heng thute hi kan hriata kal dan kan thiam theih nan Pa Vanmawia ziak,
“Kawlrama Cheng Lusei Hnam Nihna Dinhmun
Leh
Hmasawn Chhoh Zel Dan Tur Thlirna”

hi tlem te tein rawn tarlan ka tum dawn a ni.
A hmasa in Pu Vanmawia hi khawtlangah te hruaitu din hmun lo chelh hrep tawh, chinchang hre tak a ni a, a thu sawite hi a rinawm tawk hle ang tih a rin theih a ni.

Kawngtha Zawnna

2010-09-23T12:21:00.000+08:00

Ni 3, 6, 2010 ni-a Pu Lalbiakthang (HLCA President)-in Kalay Township Immigration (Lah. Wah. Kah) Office-a a lehkha thehluh kha kei chuan heknaah ka ngaia, uar deuhin ka ziak a, kha kha keima mimal ngaihdana ka ziah a ni, ram leh hnam tana ka rawngbawlpui Hualngo unaute in lo hriatthiam ka beisei. Kha ka article pawh kha ka blog atang ka la thla tawh a ni.

HLIMNA

2010-09-02T16:31:00.000+08:00

Hlimna hi pawnlam thil awm dan atang ni lovin, rilru lamin a pai thiam dan a zirin a lo awm an tih si chuan; Rilru leh ngaihtuahna thunun theih hi hlimna neih theihna hnar a ni ngei ang.
Chu rilru leh ngaihtuahna thunun thei tur chuan enge pawimawh ta ang le? Chhiartute chhan atan ni rawh se.

The Beginning of Newspaper (Chanchinbu)

2010-08-27T22:33:00.000+08:00

Chanchin kimchang, hmanlaia an lakkhawm dan leh an tarlan dan chu; sumdawng then khat hnen atang emaw, sorkar emaw chanchin hriat theina hnen atangin an lakhawm a, chu chu an ziak a, lehkha tarna hmunah an tar mai thin.
Chanchinbu printed hmasa ber chu China ramah kum zabi 7 (A.D)-naah an printed a, mipui tan sorkarin a tichhuak ta a ni. Kum zabi 18-na a lo thlen meuh chuan dan pangngaiin a hun dik takah hralh sum atan tihchhuah a lo ni ta.
Kum 1663-ah London-ah “The Intelligencer” tih chu chhuah tan a ni. American newspaper hmasa ber “Publick Occurrences” chu kum 1690 khan Boston atang tihchhuah a ni. The Times of London chu kum 1782 atang vawiin thlengin chanchinbu lar berte zing ami a ni.
(Vawiin chu, thangkhat lian zet kal taa ka Annals Book siam ka hai chhuak a, he thu hi ka rawn thur chhuak ta a ni. A source ka lo ziak lo va, khawi atanga ka record nge ka hre mai thei ta lo, a pawi khawp mai. A headingah chuan Newspaper tih chauh vin ka ziak a, hetah hian the beginning of newspaper tiin ka dah a, dik ve thei tho tak ang maw!)

Pasaltha Vanapa Tawngkam

2010-08-18T14:28:00.000+08:00

Mizo Pasaltha hmingthang Vanapa hi Mizoten kan chhuangin kan ngaisang em em a. A huaisenna leh tlawmngaihna piahlamah hian khawvel miropui dangte ang bawkin a ni pawh hian tawngkam ropui tak tak a chher chhuakin a lo tawngchhuak tawh thin a. Chung a tawngkam thenkhatte chu i han thlir ho teh ang u.
Hmanlai chuan in do reng reng thin an ni a, rawlralin an che bawk thin a. Feh kal tla fal deuh chu hmeichhia pawh nise an thah loh vek pawhin sal atan an man thin a. Thlawhhma hla ber neitu tan chuan a ralmuang lo va, chu bakah buh seng hunin a kawng a thui bika, hei ringawt pawh hi khaw lian deuhah chuan huphurhawm tham a tling a ni. Chutiang bawkin vengtawp bera in chu zanah a ral muang lo em em a, Sapui (Sakei etc) a hlauhawm a. Tin engtik lai pawhin ral lo kal thut sela insaseng ve hman lova tawng hmasa ber tur an ni a, a ral muang duh lo khawp ang, tunlai ang hian electric te an lo nei ve si lo. A tlangpui thuin michhe veng a ni bawk a vengtawpa awm ai chuan mi zawng zawngin Lal mual kil phaa awm theih chu an duh em em vek a, Zawlbuk pawh Lal mualah hian an sa thin a, a bul hnai a mi te tan a thlamuan thlak hle a ni.
Heng neuh neuh ka ngaihtuah hian, “Keiin thlawhhma tawp berah sadai ka theu ang a, hmeithaiten dai hnai neiin lal leh upaten a laiah thlawh hma la rawh se. In pawh veng tawp berah ka sa ang a, dai ka do ang e. Lalin a lai takah in a sa ang a, upaten lum rawh se,” ti a Vanapa thu sawi hi a lo ril raih raih hle mai. A rilru hi a va lo ropui tak em tih loh rual a ni lo. Kan mizo pasaltha ho ten an khua leh tui chhan nan an nun an ui loh zia leh huaisen zia ngaihtuah hi chuan tunlai kan politician tam zawkte nen hi chuan an va in ang lo tak em!!

He a tawngkam atang hian Vanapa hian hmeithai te pawh a lo ngaihsak hle a ni tih a hriat theih a, Lal leh upate a zahin a duhsak hle tih a lan tira, ram leh mipuite tan a huaisenna leh tlawmngaihna pawh a lang chiang hle a ni.
Lal leh khawnbawl ho nupuiten zu in an chinga chu chu pa ho chuan tha an ti lo va, Lal nu leh Pasaltha Vanapa nupui te chu a phusa ber an ni bawk sia, hauhngam chi mai an ni bik si lo va, a tawpah chuan Vanapa an han rawn ta a, tichuan “Chawngkhum dan tlang huat loh” tih tawngkam mawi tak hi a lo chher chhuak ta a. Lal leh khawnbawl upate nupui, chhungpui nu berin zu an in fo chuan hnam chawm leh hmeichhe dang pawhin an ching ve mai anga Mizo nun kal chho zel tur kha ngaihtuah awm tak a ni dawn a, a tihreh nan Vanapa hian a nupui pawnfen chu lo hlim sak turin upa pakhat chu a tir ta tawp mai a ni. Helaia a chet duh dan hi a mak ang reng hle a, mahse a hlawhtlin zia hmuh hian Vanapa hi a lo fing hle tih loh chi rual a ni lo. Pasaltha Vanapa nupui meuh pawh a pawnfen an hlim sak ngam chuan tiin hmeichhe dang phei chuan an hlau ta em em a, an zu inho thin pawh an sim ta a ni. Hei hian hnam nun siam thatnaah pawh Vanapa duai loh zia leh thawhhlawk zia a lantir a ni.
Hmanlai kan mizo pasaltha te kha tlawmngai tak tak vek leh huaisen em em mai an ni vek a. Vanapa a chungchuanna bikna erawh chu; ral rel a thiamna leh a finna hi a ni a. Rammut nikhua a ral rel mai pawh ni lo vin Lal leh khawnbawl ho rorelnaah pawh Vanapa a tawng ve hma chuan Lalin thu tawp a sawi mai mai ngai lo hle a ni an ti, a thu chhuak hi a fing tlat thin a vangin.
A nunah insum theihna leh mahni inthunun theihna a neih hi a ropui thlawt a. Hei ringawt pawh hi ha hipa sawi tham a tling reng a ni. Mi thinchhe tawp thanga an sawi kha mi zaidam berah a rawn chhuak thei hi chu thil mak tak a tling a ni. Pasaltha Title a hmuh hma reng a tangin hei ringawt pawh hi a chanchin hmalamah a hunlaia mite mak tih a tling reng a. Mi pakhat tak zawng a la ni ang tih kha rin pawh a harsa lo viau ta ve ang.
(He thu hi hmanah ka post tawh a, mahse ka edit tha a, ka han upload tha leh a ni e.)

Burma Lusei/Mizo Chungchang II

2010-08-16T21:06:00.000+08:00

Kum 2004 khan kan biak inah Japanese pain (A nupui chu Thai mi) thu a sawi a, chuta a thusawi hmasak ber chu.” A hmasaberin in ngaihdamna ka dil duh a, a chhan chu kan nu leh pa, kan sipaite khan in ram leh in u leh naute an sawisa a, khang kan nu leh pate thil tihsual avang khan in mi ngaihdamna ka dil hmasa a che u,” tiin. He thu hi ka sawi duh tak chu a ni a, ka thu ziak hmasa (Burma Lusei/Mizo Chungchang) ka ziah lai pawh khan ka rilru-ah a awmsa reng a, a chhunzawmnaah sawi atan ka dah a ni. Chumi chhungin in comment-na duhawm tak te hian a rawn hmakhalh ta si a, pawi ka ti khawp mai. Mahse a la tlai lova ngai ila.
Tichuan khatiang ang tun hma boruak ti ti tawp thei lo lak ata kha i inngaidam tawn ang u, tia sawi luh tum hi ka ni reng a. Ka thu sawi tum hi a fiah theih nan tunhma boruakte kha rawn thailang hmasa ka ni a. Hetiang lak ata hi thangtharte chu i fihlim ang u, tunah pawh hian a rawn inmung leh tan mek a ni si a, tirilru chungin “Kawhhmuhna” atan khang thu kha ka rawn ziak a ni. (Tun hma boruak lak ata i fihlim ang u ka tih ringawt chuan thangthar tam takin tun hma boruak hi an hre si lova ni). Tin ka lehkha hmuhte khan ka rilru a tina ve bawk a, ka ziak na ve deuh pawh a nia nge.
Tunlai thangtharte hian heng buainaah hian tihsual leh inhnamhnawihna pawh kan nei na hek lo. Amaherawh chu ram mi nihna chungchangah te tuna kan awm ang ang hi tha kan ti tlang a nih chuan tumah intihluih theihna pawh a awm lo. Dem emaw sawichhiat eawm enhran eawm thah hial pawh hlawh dawn mah ila kan duhna zawn taka kan awm chuan a enga pawh hi kan hlawhngam tur a ni a. Tin, chutiang chu lo ni pawh nise a lungawi thlak tho awm e. Chu chu ka ngaihdan a ni.
Hei hi a bik takin ka thalaipui te hnena ka sawi duh chu a ni a. Kan putar ho hmanlai buaina tem pha leh la hre chiang em emtute tan chuan insiam that a harsa a nih pawhin keini thalai zawk te hi chuan kan nu leh pa, pi leh pu (LWO an ni emaw HLCA an ni emaw)-te mawl lai thil, an tih dik lohna kha ngaihdam indil tawnin i inngaidam zawk ila hma kan sawn zawk ngei ang.
LWO hi ka hriat chinah chuan tha ka ti a, chu mi dinhmun atang chuan a hnuaia point 2 chauh hi han thlir ila:
1. Sorkarin LWO a lo pawm tawh anga kal pui mai hi tlangmi unau dangte tan pawh huphurhtur a awm chuang lova. In ram mi nihna kha a rawn paih bo sak thei ngawt hek lo. A duh lo kan awm a nih pawhin thu hi veivir kualkawi vel lo ila. Tlang takin i awm ang u. Tihian han ti nek nek phawt sela tih pawh a hun lo. Tun hi kan hnam tan hun inherdanglam theihna pawimawh tak pawh a ni thei a ni.
2. Chin hill tan a (Khansa khuian) hamthatna hi keini kawlphai amite tan awmzia a awm thei chuang lova, hetia LWO-in hma a la hi Enga tawng min hmanpuitu zawng zawngte tan phei chuan kan nihlawhna tur zel a lo ni dawn a ni. Sagain Division-ah hian mahnia State pawh nei ve lo hnam tenau chi 3 kan awm a (Ka Naa, Ka Du, Lushai), sorkar a lo tha zel ang a, heng hnam tenaute tan Sorkar atanga hamthatna, hmasawnna tur chi hrang hrang rawn kal te chu mahni ngeiin kan lo kengkawh ve thei tawh dawn a ni. Entirnan, Mizoram state pawh India Central atang state tenau leh hnam hnufual zawkte humhalhna kawng hrang hrangin an dawng thin angin. Doctor zirtur pawhin Central-ah quato an nei a, Aizawlah college ka kal ve lai pawhin Pi Ghiran Beti (IGP) fanu-in Mizoram quata atang a chuh ve ngawta, zirlai hoin nasa takin kan dodala, kan hlawhtling nghe nghe a ni.
Dik tak chuan Chin state khi chu kan pem chhuahsan zel zawng a nih hi maw!
Unity in Diversity pawh hi kan zirchian a ngai ta niin ka hria.
Nang i hmunah kei ka hmunah; Mizo takin aw.

Burma Lusei/Mizo Thattlanna Pawl leh Ka Hmathlir

2010-08-15T18:43:00.000+08:00

He thu “Burma Lusei/Mizo Chungchang” ka ziak avangin unauten CZZ leh Zonun group mail lamah min chhalna ka dawng nasa hle a, pawi ka tikhawp mai. Tu rilru mah tihna ka tum lova, mahse anni pawhin an lo hriat ve em em (groupmails a min chhanletna atang a hriat theih) Lusei (LWO) leh Hualngo (HLCA) politics kha ka rawn sawi lang ve mai a ni a. A chhan chu tunah LWO-in hma a rawn la leh chiah a, chutahchuan dodalna hmasa chu Kalay & Kabaw lamah (Tahan hi Kalay bial chhunga awm a ni a, Khampat hi Kabaw bial chhunga awm a ni) atang a rawn lut a, Rangon lamah pawh lehkha an thlawhtir a, chuchuan hun kal tawha LWO hmalakna dodala lo awm thin kha min ngaihtuahtir a ni.
LWO hian kawlphaia cheng Mizote tan Pa nihna dinhmun lain kum 1961 atang khan kan hnam chhutbala a awm loh nan sorkarah hnam aiawhtu tur kan mamawh chu hriain hma a la.
Ka duh ber chu kan hnam Mizo tana thahnem ngaitaka thawh ho a ni a. Keini mizote tan chuan tuna kan ram inthlanpui lo awm tur hi a pawimawh hle a, tan lak hun lai tak pawh a ni a, a hmuna awm lo tan pawh kan thu kal vel ringawt atang pawh khan Lusei/Mizo ten tan lak a ngaihzia chu in hmufiah thei ngei ang. Mizote hian tan lak kan va ngai nasa tak em! kan thlen chi hi heti hi a la ni si a!! Nakinah chuan inthlante a zo anga thil a nih ang turin a ni tawh ang a, tuna kan hrasatna neuh neuhte hian mual min liam san thuai anga a va han lawmawm dawn tak em, sawi buai kan tawk fo tawh bik lo vang a, lungrualna tlangah kan lawn za thei tawh ang.
Kan nauten Kalay college-a an harsat tawh thin te; Hmalakna hrang hrangah Kawl zinga han tel dawn tak takin culture inan lohna te etc. avangin harsatna neuh neuh a awm bawk si. Falam unaute lama bet turin neuh neuh a lo awm ve tho bawk a. Chutah Lusei leh Hualngo kan la inlahrang leh nghal si an tih thinte kha aw!! Zofa unaute hi inhmelhaih tawh lova kan harh chhuah chu a hun ta hle a ni lawm ni?
Ka Mizo-pui zawng zawngte kan hnam tan kan Pathian hnenah tawngtai zel ila, LWO hian tha takin hma a la chho zel anga, nakinah chuan kawlphaia awm mizo intih duh zawng zawngte chuan min la rawn zawm anga, anni zarah kan thate chu tihchakin a awm ang a, chutih hunah chuan chak takin kawlphaia awmten Mizo hnam hmingin hma kan la ho thei ang a, Chin state-a awmte chuan Chin hmingin tha takin hma an la ve bawk ang a, chutih hunah chuan kan zohnahthlak pumpui tan khuavel chhin ni a la awm ve ngei ang.
Kum 2004 khan kan biak inah Japanese pain (A nupui chu Thai mi) thu a sawi a, chuta a thusawi hmasak ber chu.” A hmasaberin in ngaihdamna ka dil duh a, a chhan chu kan nu leh pa, kan sipaite khan in ram leh in u leh naute an sawisa a, khang kan nu leh pate thil tihsual avang khan in mi ngaihdamna ka dil hmasa a che u,” tiin.

Burma Lusei/Mizo Chungchang

2010-08-07T23:08:00.003+08:00

He thu ziak hian unaute rilru a tina hle mai tih ka hriatin pawi ka ti a. Hetia dah reng chuan unaute rilru tina rengtu ka lo ni palh ange tiin he thu hi ka hlip thla ta a ni.

Thil pakhat chiang zet mai chu he thu rawn chhanglettu (groupmails a mi) zawng zawngte khan he thu hi in lo veitlang hle tih a langa, in rawn inbunruak niin ka hria.

Ka blog tlawha rawn lenglut zawng zawngte (hming thailang lo te pawh) heta tang hian chibai ka buk a che u. Ka blog tlawm taka in rawn lenluh avangin ka lawm a, in rawn leng fo dawn a nia.
In comment-nate tawitein ka han chang ang e: Tunge ka nih ka inhria. (Kan pasal thate khan tunge annih an inhre chiang hle a, mipa chu ar-hluisen ang maiin an insawi thin. Engtik lai pawhin an mi leh sate tan inthawi nan an inphal reng tihna a ni).

Hringnun Tips

2010-06-05T18:16:00.000+08:00

Hringnun chu:
1. Tuarna a ni, tuar chhuak rawh.
2. Hmangaihna a ni, lantir rawh.
3. Thinurna a ni, insum rawh.
4. Mumang a ni, harh chhuak rawh.
5. Chona a ni, hmachhawn rawh.
6. Zalenna a ni, hmang thiam rawh.
7. Lungngaihna a ni, hlipkiang rawh.
8. Lawmna a ni, puntir rawh.
9. Natna a ni, beisei rawh.
10. Thihna a ni, nung rawh.

* Start a new day with a clean heart.

Lusei Welfare Organization (Rangon Branch)

2010-05-25T00:26:00.002+08:00

Kan ram pawh inthlan a hnai ve tan ta a, pawlitic lam pawhin bengvar a hlawh ve tan deuh.
Keini mizo te pawhin ram thang chho zelah hian pheichheh kan rem chho ve hret hret a ngai a.
Chin state-a awm te hi chu Chin tiin an ding thei mai a, Kalay Kabaw valley hi chu Sagain division chhung a ni deih a. Kalay Kabaw vela cheng zofate chuan nakin zelah pawh sokar atanga hamthatna awm thei thil te kan inhai vur ve zel theih nan tiin tan an la thar zela.
Kan chenna hmun Sagain Division-ah hian hnam tlem/tenau deuh 3 kan awm a, sorkar atanga duhsakna awm thei ang chiah pawh mahni Quata neia hamthatna chang thei tur kan ni. Tin, kan population-in a phak chuan MP neih ve theih dan turte lamin hmathlir a inchhawp tan ruih tawh mai a ni. Tunah hian hming list te pawh in lak mek zel a ni, Rangon lamah pawh hming list kan inla mek a.
Kan sorkar hian Lusei tiin min hria/ register niin an sawi a. Tunah hian ram thlalak ID ah pawh lusei tia ziah zel theih a ni a (Kei hi chu Ka ID kan siam lai khan 'Chin' tiin min lo ziak a, rem chang a awm hunah ka la siam tha ve ang). Tin Lusei tih pawh hi sorkarah zawi zawiin Mizo tia la thlak leh pawh thil harsa a ni lem lo tiin kan hotu then khatte chuan an sawi. Kan ram hming leh khaw hming te pawh tam tak thlak a nih tawh hi.
Heti thleng hi ni phawt teh se.

Pu Tlangliana (87) Pinkhung Khua Kawmna

2010-05-18T23:16:00.001+08:00

Pinkhung khua hi Tahan leh a chheh vel Mizo khuaah chuan khaw upa tak a ni. Ni 25. 4. 2010 khan Pinkhung khuaah ka lenga, kum 87 laia upa putar pakhat hi an inhnuaiah a lo thu a. A bulah chuan ka va thu ve a, pa kawm nuam tak mai leh ti ti duh tak mai hi a ni a. A beng hraitna chu a la tha hle a, ring taka au ngai lo vin kan inkawm thei a, mahse a khaw hmuh erawh a fiah vak tawh lo. An in upat tawh zia leh tuna Pinkhung khuaa in dingah chuan a upa ber a nih tawh thute min hrilh a. Pingkhung khua a pem luh lai chanchin te pawh min hrilh a. Tichuan keipawh ka mi hmuh duhte ka hmuh hnuah chuan Bike-in ka tlan haw ve ta a.
In ka thlen hnu chuan ka putar kawm kha ka rilruah a awm reng a. Kan pi leh pu kum upa tak tak ten mual min liam san zel a. An thu leh hla thangtharte hriat tur tha tak takte hi phawrh chhuah lova a tham ral mai thin hi a pamhmai thin hle hian ka hria a. Hei hi keini thangthar zawkte hian kan mawhphurhna lian tak niin ka hre ve tlat mai a. Tichuan ka ballpen leh lehkhapuan ka la sawk sawk a, Pinkhung lam pan chuan ka inkhalh chhuak leh a, hetiang hian interview-na ang reng chu ka neihpui ve ta rawih mai a ni.
P: Ka pu I hming min hrilh theih an gem?
T: Ka hming chu Tlangliana a ni.
P: Kum engzat nge i nih?
T: Kum 87 ka ni.
P: Kum 1923 velah i piang tihna a ni maw?
T: A nia nge, kum sang khat zakua zawng hi chuan pian kum hi kan lo chhut ve ngai lova.
P: Ka pu, khawi khaw chhuak nge i nih?
T: Leisen khaw chhuak ka ni. Champhai atang ni khat kal.
P: Kawl phaia I pem hian kum engzat nge I nih?
T: Kan pem kum chiah hi 1948 kum January thla a ni.
P: Chuti chu kum 25 vela upa i nih dawn chu maw (“A ni ang,” tiin min chhang a). In rawn pemin nupui i nei tawh em?
T: Aw, tleirawl tein ka nuin a nau fanu min neihtir a. Nu leh pate nen chhungkuain ka pem lut.
P: Eng rilru puin nge kawlphaiah in pem luh?
T: Ei in a awlsam an ti a, Leilet hi kan pem chhan a ni deuh ber mai.
P: Kawlphaia in pem luhin khawiah nge in innghah hmasak ber?
T: Tahan-ah kan innghat phawt a. Chunglai chuan Tahan bazaar chhak lamah hian in a la awm lova.
P: Pinkhung khuaa i pem luh dan min hrilh thei em?
T: Tahan atang ‘Te Kung Nan’ chu pem nan ka va en a, Pu Chawnthlenga te chauh an la awm a, Pu Chawnthlenga chuan Te Kung Nan pawh ka tiphal hlei nem “Kung Te Nan” asin ka tih, a ti a. Chumi tum chuan kawl hovin luiah bomb an lo vawm a. Vaphai tlangval pemna tur zawng nen chuan kawl ho bomb vawmah chuan sangha kan man ve a, tuiah chuan ka liluh a, chhung tlei chu ka man ve a. Chu chu Pinkhung khuaah ka khai luta, kan u Kamliana te inah ka khai luta tichuan Tahan atang kan inthiar thla nghal a, tichuan Pinkhungah chuan kan inbengbel ve ta a ni.
P: Chutihlai chuan in engzat vel nge innih? In khaw lal tunge ni?
T: Chutihlai chuan in 30 vel kan ni. Kan khaw Lal chu Lalbuaia a ni.
P: In in hi eng tik kuma i sak nge ni?
T: Kum 1954-a ka sak a ni a, tunah chuan kan khuaa in dingah chuan a upa ber a ni ta.
P: Eizawnna lam engtin nge hma i lak?
T: Leilet hi a ni mai.
P: Leileh chu i thiam ve nghal mai em ni?
T: A hmuh pawh ka la hmu ngai lova, Chaung Htaik kawng thlangah mi pakhatin hal a lo chhun a, ka lo ti ve chhin ka ti a. Ka thiam lo khawp mai, a neitupain min rawn hmu a, bang rawh ka lo i tibawk zo dawn e min ti a. Lei ka leh tantirh chuan Thruan atang an chhuk thin tih pawh ka hre lova, Bawng hrui vawn a ngai bawk nen kut a indaih lo duh khawp mai, tin bial chhung tui an sah thin tih pawh ka hre lo, a li luau mai thin a. Bawng ka barh a, a hrui a mar tlat mai a, an vir an vir kual mai a ni.
P: Sumdawnna lam hi i ti ve em? Eng bungruate nge i ken deu h ber thin?
T: Ti ve e. India cheng 1000 hi Burma cheng 1400-in ka lei a, Rangon leh Aizawl kan kar a, tarmit frame te kan zuar thin. He ta tang hian ko ngatin Aizawl thleng ka phur a, a hau tak thin khawp mai. Motor hi Tedim thleng a tlan tawha mahse inman a tam em avangin kekawngah ka kal ngat ngat thin. Letpanchaung khawlu tlang chhip kan tan tlanga, Aizawl thleng ke ngatin kan phur ngat ngat thin a ni. Tin, darthlalang te, Chalung (chawhtawlh) beng nei te, lehkhapuan te ka keng deuh ber thin a. Lehkhapuan ken chang hi chuan kuli tam deuh lak a ngai a, kuli hian min daih thin lo.
P: Kawlphaia i pem tirh hian tlangram lama unaute hi kawlphaiah lo pem lut ve se tiin duhsakna i nei em?
T: Nei e, lo pem ve zel se ka tithin khawp a. Indo zawh 1946 atang khan kan pem nasa a. Tunah chuan pem pawh kan tam ve narawh e.
P: In buhbalte ramsain an suasam ngai em?
T: Sanghal a tam em em mai a, ven ngun a ngai thin hle a ni. Tlang silai hi 2 a awm a, hei hi sorkar hriat lohva a ruka kan neih a ni. Rifle a barrel tawi chi a ni.
P: “Kawl lal a lal” tih leh “Mizo lal a lal” tih hi enge a awm zia?
T: Kawl lal a lal te hnenah hi chuan Fathang leh sachhiah pek a ngai ve lo va, Mizo lal a lal te hnenah chuan pek a ngai ve thung a ni. Mipui te hi chuan kan lal te hi kawl lal a lal tir kan duh zawk a ni.
P: Fathang leh sachhiah tih hi tunlai thangthar tam takin an hre lo va, min hrilhfiah sak thei em?
T: Khua leh tuiten an lal hnenah kum tin buh an chhun thin hi Fathang a ni a. Hei hi an ram man a ni a. Keini hunah chuan in tinin buh tin 6 kan lal kan pe thin. Sachhiah hi chu sa kap leh awk ten lal hnena sa dar an pek thin hi a ni. Thirdengin sa ngum an hlauh ve thin.
Tum khat chu Varpui khua Kimchhuna leh Dosuta ten sa an awk-a an lalpa Kaphleia hnenah sa dar an pe lova, Pu Kaphleia chuan a khua atang a hnawt chhuak a, Kimchhuna chu Pinkhung khuaah a rawn pem. Khawtlangin sa dar pek tawh loh va, kawl lal a lal tir nise an tih vanga sadar hi pe lo a ni, mahse a hnawt chhuak ta tho a ni.
P: In lal leh mipui te inkar a tha em?
T: Lal leh mipui inkar a tha. Kan lal hi a hming chu Lalbuaia a ni, a sual lova ka chungah phei chuan a tha khawp mai. Tum khat chu a inah nula tlangval an pen thum lam chiam a, nula hnute lo ban tawkte an awm a niang, ka inah khatiang ka duh lo chhuak vek ru a ti.
P: Tunah hian in eng zat vel nge in nih a?
T: In 250 vel kan niin ka hria.
P: Tlawmngaihna chungchang hian sawi duh i nei em?
T: Kan thalaite hi an tha viau e. Khawhar in riah leh lenkhawm chungchangahte inkhawmna te hmangin zan thum an bithliah a, an tithiam khawp mai. Keini hun ve lai chuan kan riak rei thin khawp mai. Kei phei chu ka riak ngar ngar thin. Tunah chuan phone te a awm a, zualko a awlsam ta. Tun hmain darthlalanga inphet ‘dot-das’ an hmang a, zanah chuan sihdet an hmang a. Union hunah vaiin an khap ta a ni.
Union-ah khan kan tui khawp mai a. Nang hi ka that ang che nga Union hi ding rawh se, ti sela kan ngam vek a ni, kan ruihchilh tak zet a ni. Fathang leh sachhiah ka pe a ngem kan ti a, Pu Khuangkhala (Pu Hmawrliana pa) hovin kan lam a, kan lawm a. Hetiang hian hlate kan sa a:
*Bai thak arva, artui khawn leh lal hnung zui reng ka ning tawh,
Kawltu chawina daltu a ni; (kawltu- tih hi hlo thlawhna, tuthlawh tihna a ni awm e)
Sazai lian pui pui a ni.
Zalen ramhual a ngai tawh lo,
Union-in kawng dal a ti che ( ‘Kawng zau taka hawnin a awm’ tih thluka sak a ni).
** Zalen muhil tho rawh u, ni a chhuak sang tawh em mai,
In kawmawl lal ho reng hi a lum lua e ka ti;
Union puanthuah a lum tawk tunah hian lo sin ve la,
Leng zawng zawng val lungrual hi i do zo hlei lawng e.
Tin, U Nu-a hoah pawh ka tui ve hle thin.
P: I chanchin dang min hrilh duh I nei em?
T: Ka sawi tawh ang khan ka zin ve thin a, kan khuaah hian nei nung ber nih ka tum a. Ni a en chhung hi chuan hna thawh reng mai hi ka duh thin a. Tum khat chu ka sumdawnnaah man ka tawk a, tin ka pa hi kum 50 mi lek niin a boral a. Chuta tang chuan ka sumdawnna ka ti tawp a, rei tak dam tur ka ni bik si lo va tangka zawng reng renga awm chu tiin ka sumdawnna chu ka ti tawp a, leileh lam erawh chu ka bei zel tho va. Ka naute ho zawng zawng pawh lo ka pe thei vek a, malsawmna ka dawng nasa a ni. Hetiang chen chen hi ka dam dawn th hria ila chuan tun ai hian ka thawk nasain kan khuaah hian ka hausa ber ngei ang. Kan khuaah hian mi pakhatin sangha manna len a sa a, kar khat chhungin a sa zo thei a, rang hi an ti khawp a. Len chu ka sa ve a, a ni li niah chuan ka deng hman der a ni. Chu len chu tawng thum len a ni. Hreawm hian a tuar zawk che a ni an tih hial khawpa hreawm tawrh chhel ka ni. (Thihna a pumpelh dan chi thum lai ngaihnawm tak pawh a sawi a, mahse a sei deuh ema ka ziak ta vek lo a ni, P).
P: In khaw thalaite tan thuchah sawi duh I nei em?
T: (Inngaitlawm takin; “keini angte chuan thu chah sawi tur kan nei ve lo ve,” a ti a. A fanuin, “ka pa sum zawnna lama i sawi thin i thahnem ngaihna te kha sawi la,” a lo ti a.). Tun lai thalaite hi sumdawng an tlemin tha hnem ngaihna an tla chham, hausak tumin hna hi thawk nasa se tih hi ka chah duh a ni.
Pu Tlangliana hi hnathawh lama thahnem ngai tak leh a hun hlu taka hman duh mi a ni a, "Ni hi a tla thlawn tur a ni lo va, zanah mei a eng thlawn tur a ni lo" a ti thin.

P = Puibawiha
T = Tlangliana

Zawngtah Bawr

2010-04-21T12:54:00.003+08:00

A tui em a, a bawr a tha bawk sia, chaw ei titui atan le.
Heng Zawngtahte hi Mizoram leh Manipur (Mo Reh) lamah an phur lut zut zut mai nia, sumdawnna atan tlak lo pawh a awm ta lo ve.

Tuihnapui (Khampat Bung thlen hmalawk a mi)

2010-04-20T00:44:00.008+08:00

Japan ral hun laia an siam a ni thei ang em?
He "tui hna-pui" tia an koh mai hi Khampat Bungpui thlen hma lawk kawl khawte (Khampat leh Bungpui inkar)-a awm a ni. Thir pipe (Bomb niin ka hria) lian pui mai chu kopangah a insawh bura, chu ta tang chuan tui vawt tui tak mai thal va ek char lai pawhin a lo chhuak reng mai a ni. He lai kawl khua mipui te pawh hian he tui avang hian an khua hi an chhuah san thei lo a ni, an ti.
He tui pipe awmna chung zawnah hian Tlangsam kung ro a ding teuh va. A chhak lawk hi kal kawng a ni. He tui hi khawi atangin nge/ eng tiangin nge an lak tih hi hriat a chakawm hle mai.
Thlalak hi March 12, 2010-a ka lak a ni.
He tui hi a fimin a vawt tui hle a ni.
He tui luan chhuahna (a thli) thlang lawkah hian Sangha dil lian tak pahnih a awm a, he sangha dil hi he tuihnapui hian a chawm a ni.

Pipe-ah chuan tihian a inziak..

Khampat Bungpui Ka Tlawh Ve

2010-04-19T23:17:00.008+08:00

Khampat Bungpui, kan history-a hmun pawimawh tak luahtu chu ka tlawh ve leh hlauh mai a. Khampat Bungpui humhalhna chungchang website hrang hranga kan sawi ho thin kha hre rengin leh hmuh ve chak em emin March 12, 2010 khan van neih thlak takin Inkhawmpui hmangin Khampatah ka kal a. Khampat ka thlen ni la lain ka han en a.
Bungpui humhalhna atana tuiluang dalna lungrem emaw tuikhuah emaw hmuh tumin ka hawi vel ruai a, mahse ka beisei chu ka hmu ta hauh lo mai a. Thal lai a nih avangin tui pawh a lo tlem hle a. Ka camera chu phawrhin ka hmet kual ve zawt zawt a. Tichuan ka han thlir vel vang vanga tuiluang chu tun hma ang lo vin tlema hruai pen a ni tih chu ka hmu thiam ve tawk tawk a. Ka hmuh tum tak lungrem erawh ka hmu lo va, ka zuk chhuk thla ta lo a ni.
Zan lamah ka thlen in Pu Renga nen kan ti ti a. He Bungpui humhalhna atana lungrem te hi tui lianin a len chhe leh vek nghal a ni tiin min hrilh a. Hei hi kan lo rin lawk ang chiah a ni, tui lian han dal zo turin foundation tha tawkin lung kan rem thei lo va, tiau vut chunga rem ang lek a ni si a, tiin min hrilh a. A ni hi a phusa nasa pawl tak pawh a ni awm e. Mahse thil tha tak mai pakhat chu tui luang hruai peng tura tui luankawr Bulldozar nen an nawr kha a ni. Hei hian tui lianin Bungpui zawn tak a zuk sutna thin kha tidanglamin a thlang hretah a zuk sawh ta a, a zia awm hmel deuh e. Mahse tuilian hian Bungpui dinna zawn chu a la rawn khawih pha reng tho va, enkawl chhunzawm theih ni sela, sum tam tak senga tha an lo thawh tawhna khan lukhawng pawh a nei ngei ang.

Pic. 1, Ka enna zawn ka hma takah hian bungpui a dinga, ka hnung chiah hi ko sang tak mai luikam a ni. Tun hma chuan ka dinna zawn tak hi tuiin a rawn sawh chiah a ni. Tunah chuan lui luang hi lak mar deuh a ni a, mahse tui lian chu Bungpui tan hian a la hlauhawm tho a ni.

Pic.2, Ka dinna thlang ko pang a ni. Tui zang khauh hian Bungpui thlang hret a zuk sawh ta a ni.
Pic. 3, Khampat Bungpui.

Naupang Rawngbawlna

2010-04-11T09:36:00.008+08:00

Biak in bathlarah chuan an slipper an phelh a.
An nuih ruala nuih kha sum tam takin a lei zo awm lo ve.

March 4 to April 2, 2010 thleng Tahan leh a chhehvelah naupang rawngbawlna hun hlim takin Lalpan min hmantir a. He mi chhung hian hmun ruk laiah Day Camp kan buatsaih a, naupang mi 500 chuangin Krista chanchin tha hriain mittui nen kan han tawngtai ho chu rilru leh thinlung a khawi kher mai. ka pianthar atanga ka chak ber mai Lalpa ke bula thlarau bo tam tak hruai hi a ni a, Lalpaa ka lawmna hi a nasa em a, kan rawngbawlna thlalak tlawm tak hi ka han pho lang ve reng reng teh ang.
Ka rawngbawlpui te hi kan bible college-a ka student te an ni.

Naupang te te ka hnenah han kal tir ula hnar suh u. Isuan min sawm a ni.

Burma ramah effective taka rawngbawl tur hian enge tha ber ang tih hi ka ngaihtuah ve fo thin a, Kawl Buddhist puitling tawhte tih pianthar an har zia hi missionary te hla thunawn a ni a. Chuvangin naupangtea tan hi thil tih awlsam leh rawngbawlna hlawk ber tur niin ka ngai. Tin mithiamte chuan Kristian piangthar 80% te hi naupan laia piangthar vek an ni an tih thute hriat phei chuan Naupang rawngbawlna hi a va han hlu tak em. "Nuapang chu a kalna awm kawngah chuan zirtirla a puitlin hnu pawh a thlah lovang."