Ka Patea Ka Thlahna

.

I Chanchin Sawi Mai Hi Ka Tihtheih Tawk A Ni Ta Si A:

Ka pa chanchin tlem han sawi ila. An inah lehkha zirin rei tak ka awm a, fa an neih loh avangin an fapa ang chiahin min en a, min hmangaih a, min ngaihtuah em em thin a, an rilru luahtu ber pawh ka ni ve hialin ka hria. Ka tan engmah ui an nei lo. Mahse, an lakah hian fa mawhphurhna ka luah zo lo hle a, hreawm ka ti rilru hle thin. Rawngbawlin Burma-ah ka awm san leh daih si a. An hnena awm tur hian min duh tih ka hria, mahse Lalpa rawng ka bawl ve hi min duhsak a, an lawm em em tho a ni. Keipawhin an hnena awm hi ka duh a, ka bat ni pawhin ka hria. Mahse Krista min kohna chu dah lal a ngai miau si a, an tan tawngtai kha ka tih theih tawk a ni a, ka tawngtaisak fo thin a ni. An nupaa min hmangaihna leh enkawlna zawng zawngah ka lawm em em a ni. Fa nei lo mah se la, Pathian leh a kohhran hmaa an inneihna thu tiam chu thih thlengin a hlen chhuak a. Hetiang ang nupa rinawm min enkawltu Lalpan min pe hi ka va lawm tak em!

Ka pa (Chawnglianchhinga) nunah hian Thufingte 3:1-10 thu hi a thleng dikin ka hria.

Thifingte 3:1,2, Dam ni leh kum, thlamuanna pek belhchhah tih hi ka pa chungah hian a lo thleng dik a ni. A sipai tan lai hian nikhaw hre lovin ni 15 a awm a. Tichuan, sipai damdawi inah kum khat leh thla sarih a awm. Pathian tih tlat mi, a dan thute zawm tlat mi a ni a. A sipai tan lai hian tum khat chu an chhuti (leave) chhung zawng haw lovin a thiante 3 nen chanchin tha hril nan an hmang a. Chu chu Police- in manin tan inah an khung a, ni 47 lai an tang. Mahse, an battalion hotuten an la chhuak a case engmah an file lo. Lalpan a dam ni leh kumte chu belhchhahin ni 25.6.2019-a min boralsan khan kum 85-a upa a ni.

Thufingte 3:3-4 Khawngaihna leh thu tak chuan hnuchhawn che suh se... Tichuan pathian leh mihring mithmuhah Duhsakna leh hming thâtna i hlawh dawn nia: Mite chunga thatna kan lantir hi khawngaihna hnathawh a ni. Ka pa hian electric bill leh tui bill hi thenawmte ta a peksak thin a, an tan hun khawral a buaithlak si tiin a tanpui thin a ni. Kohhran chanchinbu;- Ramthar chanchinbu, kohhran beng, Lalpa grape huan te hi a sem thin a. Hei hi ka rawngbawl ve theihna a ni a ti thin. Khawlaia bawlhhlawhte hi kalpahin a chharfai thin a, kei tleirawl rilru pu chu a bula kalte kha ka zak ru deuh thin a. Keini an tu leh fate tan an in hi kan zirna hmun atan an phal em em a, min duhsak em em thin a ni. An ina rawn leng lutte hi thingpui a lo thlit sak vat thin. 
Kan mikhualten thingpui an lum ve changte hian khawia mi nge thingpui fe kha i thlak? Kha chu kohhran thingpui fe bawm a nih kha, tham eng zat nge i thlak? Kan taa mi hi dah let leh rawh a ti thin.

Amahah hian thu tak; dikna leh takna a awm tlat a. Sipai a penson hnuah Biak in Chowkidar hna mission vengthlangah (kum 24 leh thla ruk) a thawh lai pawh khan kohhran upa zahawm tak takte pawh hian a thu hi an ngai pawimawh tlat niin ka hria. Dik takin pehhel kual vak lovin thil hi a sawi mai thin a, a chungah tuman thinrimin an la ngai lo. Heng zawng zawngah hian Pathian leh mite duhsak a hlawh nasa em em a, hmingthatna pawh a hlawh ve niin ka hria.

Thufingte 3:5-6 I thinlung zawng zawngin LALPA ring la, Nangma hriatnaah innghat suh; I kawng zawng zawngah amah hre reng la, I kawngte chu a kawhhmuh zel ang che. 
Lalpa ring tlattu a ni: Mizia nghet tak nei a ni a, chutiang bawkin Isua a rinna hi a nghing ve mai mai ngai lo niin ka hria. Kum rei tak an hnena ka awm chhung khan Harsatna a sawi hi ka hre ngai lo. Chhung inkhawm a ngaipawimawh a, sawma pakhat a ngaipawimawh em em a ni. Pathianin a kawng pawh a hruai zel a ni.

Thufingte 3:7-8 Mahni ngaihin intifing suh la; LALPA chu tih la, sual kalsan rawh. I lai atân hriselna a ni ang a, I ruh atân thling a ni ang. 
Sual kalsan thintu a ni. A tleirawl chhuah chhoh atangin Sunday school-ah inhmangin Tleirawl sual kan tih pawh hi a nei ve lo. Zuk leh hmuam ti lo. A sipai tan lai pawhin army rum an dawnte hi a dahkhawl a, sumah a chantir thin. Mahni intifinga infakmawi chi a ni lo. A tan heng zawng zawng hi hriselna a lo ni e. Sipai a tan laia dam lo na tak, thi mai tura ngaih, medical pension hmu kha a ni a, mahse bible-in mihring dam chen a sawi pel thei hialin Lalpan a nun a kaihruai zel thin.

Thufingte 3:9-10, I sumin LALPA chawimawi la. i thil lo pung hmasa ber zawng zawngte nên; Tichuan i buh in chu a lo khat liam ang a, i sawrkhur uain tharin a luang liam ang.
Mite angin sum leh pai tam tak tak pek tur nei lo mahse sela, sawma pakhat dik taka pe thin a ni a. Chhung inkhawmnaah a hlan sa thlap thin. Hengte avang pawh hi a ni ang an fairel bel a ruak ngai lova. An lawmna hi a luang liam reng zawk a ni.

Sipai ration card hmanga zu (army rum) lakte kha a duh ve ngai lo. Lalpa duh loh zawng tih hi a hlau hle niin ka hria.

Ni 17.5.2019 (Fri.) khan an kai tho zo lawk lo va, a kal mai dawn emaw an ti a. In lam pawh thalai hovin an thiar chhuaka an singsa fel vek a. Chutah a rawn harh leh chuan "Nuam zawng zawng kimnaah Isua kan faka a nawm teh reng nen, nangni lah chuan min lo kai tho a, ka han harah a, kei lah chu hei, kal pawh ka kal thei si lo va," a rawn ti a. "Van kanaan chawin min chawma kan puar leh mai thin," tiin a sawi. A kalna tur hi a thlamuan thlak hle a ni.

Tun tum a dam loh zual chhunga ka awmpui laia a hnen atanga ka dam chhunga ka zirtur min hnut chhiah chu hei hi a ni.

1. "Ka va han lawm tak em" a ti thei reng mai kha a ropui ka ti. Dam lo khum bet a ni chung khan a lawm zel thin a ni.

2. "Pathian hi chu a va tha tak em" a ti reng mai a, a chunga thil thlengah hian Pathian a fak zel mai a ni.

A eng zawnga thil thlir thin mi a ni tih a chiang hlein ka hria.

3. Pathian ram sawma pakhat pek a ngaipawimawh em em mai hi a ropui ka ti.

Ka pa mangtha, thlamuang takin kal la, i chak em em thin nuam zawng zawng kimnaah chuan Lal Isua chu i fak kum khua tawh dawn nia.

I fapa Rev. C. Lalawmpuia


Note: Chawnglianchhinga hi mizo pasal tha hmingthang Vana pa (Thangzachhinga) tuchhuan 3na a ni.

Thangzachhinga (Vanapa) hian fapa 3 a nei. Chungte chu: 1. Vana, 2. Lianchungnunga, 3. Ralduha.

1. Vana hian Hranghleia a hring a. Hranghleia hian Zumura leh Aikila (pastor) a hring a.

Zumura fapa naupang ber chu Chawnglianchhinga hi a ni.

(Ka patea hi a nihna takah chuan ka cousin a ni a. kan in upat hlei em a, ka patea tiin kan ko ta a ni. Tin, Ka pa (Lalauva) hi ka pu Chhuahzovan a boralsan hma avangin Zumura teinah a sei lian a. Tichuan ka patea te nen hian unau ang chiahin an sei lian ho a ni. 

Kei pawh hi Vanapa (Thangzachhinga) tuchhuan 3-na ka ni.
Thangzachhinga (Vanapa) fapa tlum ber Ralduha'n Chhuahzova a hring a. Chhuahzova'n Lalauva a hring a. Lalauva chu ka pa a ni.)

Mother's Day Letter

Mothers´ Day Letter

Ka nupui duh tak, ka fate nu,

Kan run chhung mawiin dam reng la,
I fate leh ka tan Nu tha, kan hmangaih em em lo ni reng la;
I anka nem leh hmangaihna kan tan rimtui tak a ni a,
I kutte hi van lal fanu kut ang a ni.

I ngaihtuahna bawm chhungah chuan him takin i fate nen min chentir a,
I hmangaihna chuan kulh bing sang angin min hual tlat a;
I rem hriatna chu kan tan thim hnuaia khonvar eng ang a ni a,
I inhlanna chu kan tan nunna a ni.

I tisa mawina leh thatnate chuan tuar phah hial mah sela,
I hlimna belhchhahtuah i la chhiar fan hi;
Rulh zawh sen loh i inpumpekna,
Kan chhungkaw tana Nu i nihna ropui tak chu a ni.

Hmangaihna chungchuang ka hlan a che,
I phu e chawimawina zawng pawh;
Hlim la, kumkhuain nung reng ang che, Ka hmangaih Z.......
Mothers´ day chibai le.

(Ka nu tia koh tur nei ve ta lo chu ti hian ka ziak ta mai a ni)

Pathianin A Ko Che

Ni 14.4.2019 (Sun)-a ka sermon. Chhiar duh tan.

Pathianin A Ko Che
Rom.11:29; 1Kor. 7:20; 2Pet. 1:10

1 Thuhma:
Ka fapa hi TV a en tui thei khop a, tum khat chu hnaite atangin ka ko a, a eih duh miah lo va. Ka va sawichet hnuah chuan engnge tiin min chhang a. Ka koh che kha i hre lo em ni ka ti a, hria e chu a ti bawk si. Min chhang hman lo a ni ber mai. A thil en lai kha a tuipui em a tin a ni. Thenkhatte chuan Pathian min kohna hi chu kan hre kur a ni lawm ni? Kan thil tih lai kalsan hi kan harsat em thin avangin koh eih mai theih lovin kan awm thin.
Tin, min koh lohna lama kal daih kan ching bawk (Jona). A chhan chu kan ngaihdan mil tawk leh duh dan tawka kal kan chin vang a ni. Naupang Samuela khan Pathian kohna aw chu a hria a lawm mahse a puin a ko turah a ngai a, a pu hnen lamah a kal daih mai. Mahse Pathianin a kohna chu a lam let ngai si lova (Rom 11:29), vawiin thleng hian tunah pawh hian min la ko reng a nih hi. Samuela chuan Pathian kohna chu ngaithla tura a inpeih a, "Lalpa thu sawi rawh" tia a chhan veleh Lalpan a hnenah thu a sawi ta a ni.
2. Kohna Ching Hrang Hrang Hrilhfiahna:
a) General calling: Jn.3:16, Krista Kross a mi zawng zawng min kohna (Johana 12:32). ITim. 2:4 Mi zawng zawng chhandama awmah leh thu tak hriaah a duh.
b) Effectual calling: Pathianin misualte a lama a hnuh hnaihna hi a ni. Misual a lo pianthar phahna chhan tak hi a ni. Phil. 2:13; Jn. 6:44; Lydiai thinlung a hawnsak (Tirht.16:14). Isuan sawmte chu tam tak an ni thlante erawh chu tlemte an ni a ti. General calling ah chuan mi tupawh chanchin tha leh thil siam (Rom.1:20) hmangin koh an ni. Effectual calling kan tih tak chu chhandamnaa hruai luha an awmna hi a ni.
c) Technical calling: Hna bik atana koh; piantharna changte a kohna a ni.

3. Lalpa Kohna Ni Thei Thilte:
a). Thlarau thilpek engnge i dawn?
I Pet.4:10 "mi tinin thilpek in hmuh ang zelin.... chung chuan rawng inbawl tawn theuh rawh u." I dawn loh chu tihtir kher che a tum lo. Thil tha atan i thil hmuh leh hriatin i thinlung chhungril a chhuntui chuan chu chu Lalpa kohna che a ni thei bawk. Koha kan awmnaah hian rinawm tak leh taima taka awm tlat turin min duh (Rom.12:6-8).

b) Thiamna bik (skill):
Mistiri, zai, huaihawt thiamna, sumpaia rawngbawl etc. Hengte hi rawngbawlnaah a tangkai thei vek.
c) Kohhranah:
Kohhrana kan inhman hian kan thilpek dawn min hriatchiantir thei a, kan thiam zawng (talent) min nemnghehsak a. Duhna leh chakna kan neih a tithanglian a, lainatna, dichimna (passion) kan neihna zawn min hmuhfiahtir thei a ni.
Illustration: Nehemia chu a thu hriat (Jerusalem chhiat thu) hmangin a ko.

Pathian kan chawimawi ve theihna tur nia kan hriat hi min kohna a ni thei. Hetia ka tih hian Lalpa chawimawiin a awm ang em aw? tiin. Kohhranho pawh a nawlpui ngaihtuahin hetia kan kal hian Lalpa thu nen a inmil em, Lalpa chawimawiin a awm ang em, Lalpa a hlawk ang em? ti zelin. A thu nena inmil lohna hmunah kan nunah Lalpa chawimawiin a awm ngai lo.

4. Pathianin A Ko Che:
Pathianin a ko che, chhanna chu i mawhphurhna a ni.
I tan ruahman a nei, sual ata chhandam che a duh. A hmang duh che (A hman apiang chu a tling mai thin. Mosia tiang pawh tuipui sen tihchah nan a hmang. Hmawlh mai ai chuan Pathian ngaiha hlu tak i ni.
Lawmna leh thlamuanna famkim chang turin a ko che. Chatuan nunna chang turin buatsaih che a duh. A hming ropui chawimawi turin a duh che. A hmangaih che. A tanpui duh che.

5. Engtin Nge Pathianin A Ko Che Tih I Hriat?:
a) Ringtu tha tak i hmu a, chu nun chu chan ve i duh a ni lawm ni.
b) Bible i chhiara, engemaw beiseina a siam sak che a ni lawm ni.
c) Nun kawng tha zawk chan ve i duh a ni lawm ni.
d) I beidawng duh bik lo a ni lawm ni. Thil tha nia i hriatte i ti ve a. A chang chuan i bei a dawng dawn dawn a. Insum theih i duh a i insum zo lo leh thin a. Mahse beidawng mai suh Pathian lamah hnuh hnaihin i awm mek a sin. I theih lohnaah khan rawn chuankai a duh a sin. Amah chu sawma tawngtai turin a ko che a sin. I tawngtai tur leh tur loh chu i mawhphurhna a ni e.
e) A fapa Isua Krista hmingin a ko che (Heb.1:2). "Ngai rawh, kawngkhar bula dingin ka kik hi, tupawhin kawng mi hawn chuan ka lut ang a, a hnenah zanriah ka ei ang" a ti. Lalpan chu i nunah kawng i hawnsak dawn em? Kaihhruai che a duh a, tihchak che a duh a ni.

I hlawkna tur leh i thatna tur nia i hriat danin, mahni hmasial takin, i tana nun i tum thin a ti raw? Mahse, Lal Isuan a ko che a sin. A hmangaihna chhangleta atana nung turin. I thinlung kawngkhar lo hawnsak turin a ko che. I hawnsak dawn em? Lalpa i ta ka ni e, i duh angin min hmang rawh, i thu ka zawm zel ang tih mai hi kawngkhar hawnsakna chu a ni.

6. Hmangaihtura Koh I Ni:
Mei si a awm chuan alh chhuak tura chhawm nun a ngai a. Thlai chi a awm chuan thangliana rah chhuak thei tura chawm a ngai thin. Anin min hmangaiha, amah hmangaih let ve tura koh kan ni. Chu hmangaihna chu tithang liana khawvelah rahchhuah turin a duh. A rawngbawlna hna eng pawh thawk la ( i tihtheih zawng leh tihtura i ngaih, a kohna che nia i hriat kha), amah i hmangaihna tihlan nan thawk turin a ko che. Mahni hmingthatna tura thawh mai hi a awl duh khop mai. Mahse Lal Isua kan hmangaihna tihlan nana thawk tur zawk kan ni.
Aw le, Pathian kohna bik che hre turin i zawng thin ti raw. A hmasa bera kan hriat tur chu Hna lam ni lovin nung chang lam hi a ni. A duh zawnga nung turin a ko che.

7. Bible Atangin.
a). Nova nun atang en ila. Nova chu kum 500 a nihin lawng tuk turin Pathianin a ko. Kha kum 500 chhung zawng khan Noa chu tunge a nih tih i ngaihtuah ngai em? Mi dik, Pathian hmaa awm thin a ni (Gen.6:9). Pathianin eng hna bik atan nge min koh tih kan hriat duh chuan A duh zawnga nung tur kan ni hmasa tur a ni. A duh zawnga nung turin min ko hmasa a ni.
b) Abrahama: Hna bik thawk turin a hrilh lo. A awm hmun sawn turin a ti. Thil titura min koh hma hian thil kalsan turin min ko hmasa fo thin a ni. Tichuan a nun dan chuan Pathian rinchhanna leh chawimawi turin a duh a ni.
c) Jona: Tihtur bik a hrilh. Pathian tirhnaah a kal duh lo phawt a. Mahse Pathianin a thu awih turin a tilui tlat mai. Hna bik atan min kova tihtur bik min pek hian a thu awih turin min duh. Thuawihna atang chuan kohna a dawn chu tihfamkimin a awm. Ninevi khaw mite chu chhandam an ni.
d) Paula: Puan in siam kawnga talent nei tha a ni. Mahse Pathianin a kohna chu nun dan kawng dika nung turin a ko zawk a ni. Mi dangte pawh nun dan dik zirtirtu a lo ni ta.
Mihlim mi huan thlai lak mai ching, phunchiar em em, kohhran hnatlan nikhuaa awl tum tlat, hnathawh leh ngaihthlak chuh lova tawng tam zawk, mite nuna mawina aia chak lohna leh sawiselna tur hre thei riaute hian nun dan kawngdika nung tura koh an nihna hi hre chhuak thei teh sela aw. Rawngbawltu leh kohhran upa leh member- hlep ruk ching, mite chan aia chan tam tum, eiruk hreh lo, kohhran sum thianghlim ren lo taka hmang duh mai. Pastor leh an nupui, kohhranah ruai leh thiltih a lo awmin a bang neih tuma lo melh ran ching. Rawngbawltu vir lutukte hian nun dan kawngdik zawka nung tura koh kan nih hi in hre thar leh teh sela aw...
Aw le, Pathianin tihtur bik (specific job) neiin a ko che a nih chuan chu chu thuawih takin ti mai rawh. Thenkhat chuan chu chu kan hre mai thin lova, kan hun kan khawhral thlawn mai a. Um.. nang leh kei hi Noa te, Abrahama te, Paula te ang hian Pathian nen nung dun turin min ko a ni. Hna bik, kohna bik zawngbuai khawtlai lova, Pathian nena leng dun tura koh i nih chu i kalpui zel chuan Lalpan a thu i awih zia a hmu anga, Amah zawkin engemaw bik thawk turin a hrilh mai ang che. Lalpan hna bik thilropui tak tihhlawhtlin  a duh chu nangmah kal tlangin a tihlawhtling mai dawn a ni.

Tlipna:
Pathianin a ko che.
Amah nen inpawla leng dun turin a ko che (Enoka leh Noa angin).
Kalsan nei turin a ko che (Abrahama angin)
Thuawih taka hna bik thawk turin a ko che (Jona angin)
Nun kawng dik zawh a, mi dangte pawh zirtir turin a ko che. A rulh lehna lawmman tam tak dawng turin a ko che a ni. Lalpan malsawm che rawh se.

I Piang Thar Tur A Ni

"I piang thar tur a ni." Isuan Nikodema hnenah " i sakhaw mi nihna te, i dan hriatna te, i thiltih thatte hmangin Pathian ram i lut thei lova, i piang thar ngei tur a ni tiin a hrilh. Lal Isuan a zirtirte hnenah pawh Pathian ram luh a harsat zia sawiin Pathian chauhvin a ti thei tiin a hrilh (Mk. 10:24).
Juda mifing, dan hre mi leh sakhaw mi Nikodema hian Pathian ram luhna tura a lo innghahna leh a lo beihhahna; dan zawm dik leh thil tha tih chu Pathian ram luh nan a tling zo lo a ni tih Isuan a hrilh. Paula pawhin Phil.3:8,9 ah a sawi kha.. thiam chantirna chu Pathian hnen ata rinnaa kan chan a ni.
Chang 5: 'mi tupawh tuiah leh thlarauva an pian loh chuan Pathian ram an lo thei lo vang'. Hrilhfiahtu then khat chuan 'tuiah leh thlarauah' tih hi mihring pian dan phung pangaia pianna leh thlaraua pianna tiin an hrilhfiah a. Tuia pianna chu nuin nau a neih dawna tuiphul lo keh thin hi entir nan an hmang a. Mahse hei hi hmanlai Bible hun laia mihring lo pian dan hmang sawifiahna atan an hmang ngai lo. Kan hriat tur chu Tuiah leh thlaraua piang tih hi "piangthar (born again) sawi nan a hmang mai zawk a ni. Pianna pakhat chauh sawina a ni a, tuia pian phawta tthlarauva piang leh anga sawi tur a ni hran lo vang.
Mi thenkhat chuan tuia piang tih hi baptisma chang sawi nan an hmang bawk a. Chu chu Johana baptisma emaw Kristiante baptistma emaw sawina a ni. Mahse, hetih hun lai hian Nikodema hian Kristiante baptistma awmzia hi a hriatfiah a rinawm loh ( hetih hun lai hian Kristiante baptisma hi hman a la ni lo). Tin, baptistma chan hi chhandamna atan a pawimawh chuan Isua pawh khan mite baptisma chantir ve awm tak chu a ni. Engpawh ni se, tuiah leh thlarauva tih hi thil chi hniha lak hran tur ni lovin born again (piangthar) sawifiah nan Nikodema hnenah a hriatfiah theihna turin a sawi mai zawk a ni.

Thuthlung hluiah thlarau lam tihthianghlimna leh tihthar lehna entirna atan tui leh thlarau hi hman thin a ni. (Cf. Num.19:17-19; Isa 4:4;32:15;44:3;55:1; Joela 2:28-29; Zak.13:1). Hei hi Nikodema pawhin a hriat chian dawn avangin Isua hian tuiah leh thlarauah tih hi a hmang kawp mai a ni.
Israelte siam thar lehna tur thuLalpa thuthlung chu Eze. 36:24-27 ah chiang takin kan hmu. Nikodema hnenah Isuan thu a sawi hian heng thute hi a rilruah a awm ngei ang. Nikodema ngei pawhin a hriat chian em em tur chu Deut. 30:6; Jer.31:31-34; Ezek. 11:18-20).
Tihthianghlimna  chu Thlarau thianghlim hnathawh a ni a (Tita 3:5), Pathian thu-in (Eph.5:26), he mi tel lo leh chang lo chuan tumah van ram an lut thei lo. Piantharna hi Pathian hna thawh a ni a, Pathian tanpuina tel lo mihring thawhrimnaa neih theih ngawt a ni lo (Rom.3:25).
I piang thar tur a ni. Van ram luh i duh chuan.
Meidil leh vanram awm thu chu Isua ngeiin 'mi hausa leh Lazara chanchinah min hrilh kha.
'Ka piang thar tur a ni' tih la piang thar lote sawi tur tha tak chu a ni.
Van ram i kai dawn em??

Inpumkhatna Kawng

Duh dan thuhmun, ngaihdan thuhmun, hmuh dan thuhmun, kal dan thuhmun leh tum thuhmunte chu an inpumkhat bik riauva.

Mite nihna (personality) hriatthiampui leh pawmsak, kan common ground lentlak rualna zawn hriata chumi kawnga kal dan siam. Mahni lam insiam rem thin. Mite dikna chanvo zahsak. Tanpui duhna rilru put. Hmangaihna hmangaihna... etc

The Disciple

Kum 2015 Sept. thla khan ka kohhran memberte tan 'the Disciple' thla tin chhuak News letter ka tichhuak ve a. Pathian thu zirhona atan leh rawngbawlna inhriatpawh tawnna atan buatsaih ka ni.

Editorial

Lal Isua thupek ropui “Kal ula, hnam tina mi zirtirahte siam ula..Mat. 28:19,” tih hi vawiin ni thlengin a la nung reng a. Hei hi thupek a nih miau avangin duh thlan tur kan nei lo. Ka talent a ni ve lo, ka thiam ve lo tiin kan pha thei hek lo, thupek a nih ang hian ringtute tih makmawh, pawimawh tak a ni.

Piangtharna kan changa, nun ka nei tawh tiin kan lungawi em em a ni mai thei. Mahse, kan Lalpa hi a la lungawi famkim lovang, a thupek hi kan zawm si loh chuan. Amah ngeiin, “Miin mi hmangaih chuan ka thupekte a zawm thin,” a ti si a.

Miin piantharna a lo chan hian, nun ka nei tawh bawka tiin a duh duhin a awm mai tur a ni lova, amah chhandamtu hmangaihnaah chuan a thang lianin a thuk deuh deuh tur a ni zawk. Rawngbawl tura chhandam kan ni a, chumi rawngbawlna tur chu engnge kan tih chuan a thupekte zawm hi a ni a. Chu chu Zirtira siam hna thawh hi a ni.

Mi pakhat zirtira siam tur hian hun leh tha, thil tam tak a mamawh a. Lal Isua zuitute ngei pawh kha a zirtirte ni turin kum 3 chhung lai a kaihruai a. Vana a lawn chhoh hnuah pawh a Thlarau Thianghlimin a kaihruai chhunzawm zel a nih kha. Hmangaihte tana hun pek hi kan Lalpa mizia a ni.

Hei hi hre reng ila: Lal Isua-ang zirtir ni tura pawimawh ber mai pakhat chu a thupek zawm hi a ni.

He chanchinbu “the DISCIPLE” tih pawh hi a lo pianchhuahna chhan chu Lal Isua thupek zawma mite zirtira siam hi a ni.

First Kids Ministry in Varpui

Varpui khuaah hian pastor turin ni 17.6.2015 hian kan chhungin Rangon atang kan lut a. Kohhran hoten min lawm hle a. Ka hlim khawp mai.
 Vawiin 19.6.2015 , 5:00pm hian naupang then khat lo lengin ka fate infiamna toys hmangin kan inah an ron infiam a, tichuan an infiam laklawh lai takin ka thut khawmtira, Pathian thu ka zirtir ta a. Sam 23:1 ka byheart tira, ka hrilhfiah a, ka tawngtai sak a, tichuan ka infiamtir leh a. Ni dangah pawh in ron infiam leh don a nia, ball pette pawh ka zirtir thei che u a nia ka ti a an phur khop mai. Keipawh ka hlim. Engtin nge he khaw pumpui tan hian rawng ka bawl theih ang tih hi ka rilru tawngtaina, Lalpa hnen ata finna ka dil ber pakhat chu a ni.  

Rawngbawltu / Pastor Tan Hlauhawm 10 ()Part 1

1. Mahni Thlarau Nun Thanlenna Hlamchhiah :
Rawngbawl turin kan thawk chhuak a, kan zir thiamna leh tawn hriatte nen mite tana pawimawh tur leh tangkaipui turte ngaihtuahin kan inbuatsaih a. A sawitu leh zirtirtu thlarau zawk hi ril tam tui halin a lo chau reng thei si a.
Pastor / rawngbawltu tan Lalpa nen inhmachhawnna thar zel leh a thutak hmanga thlarau thinlung tihthar zelna neih si loh hi mahni thlarau nun hlamchhiahna hlauhawm tak chu a ni.

2. Chhungkaw Ngaihthah :
Chhungkaw enkawl hi kan hna a ni satliah mai lova, Pathian min kohna pawh a ni. Rawngbawlpuitu mamawha mal taka kan awm lai pawhin chhungkua chu min tawngtaipuitu leh Pathian min fakpuitu an ni tur a ni a. Kan rawngbawlna leh a hmunte inthlak danglam thin mahse chhungkua erawh kan danglam chuang lo, chuvangin ngaihthah chi a ni lo.
Chutih laiin chhungkaw memberte hi rawngbawlna tihnufualtuah an tang fo thei a ni. An chhungte ngaihsan hlawh lo rawngbawltu an awm, in enfiah ngai tak chu a ni. An fanu/ fapa kohhran thil tiha tel ve peih / duh lo an awm. Chutiang tluka rawngbawltu tana hlauhawm leh rilru tina theitu dang a awm chuang lo ve. Chuvangin chhungkaw memberte ngaihthah hi rawngbawltu/ pastor tan hlauh tur chu a ni. I chhungte chu i kohhran member zing ami an ni a, i member dangte ang bawkin an rawngbawl sak thin ang che.

3. A Number Zata Buai :
Number tam lam hi kan ngaihpawimawh ber fo chuan kan bei a dawng fo ang. Kan duh tawka tam an awm reng thei chuang lo. A tam lam tuktu chu Pathian a ni zawk. Min dahna hmuna thawh tur min pekte thawh mai chu kan mawhphurhna a ni. Number tam lam a ni ber fo lo ve. Kan ngaih pawimawh tur dik tak zawk chu mite zirtira (disciple) siam hi a ni. Tichuan, number tam lam chu amahin a ron inhring pung ve mai ang.
Buaina tur dik tak zawka buai lova, tehna dang dang hman pawh hi kan rawngbawlna hna tithuanawptu, vuivaina thlentu lek an ni thei. Lalpa chhiarkawpah chuan hmeithainu kha thawhlawm thawh hnemtu ber a ni.

4. Rawngbawlna Khaikhin :
Rawngbawna chi hrang hrangah hian rawngbawlna lian zawk kan tih pawh a awm zel ang. Mi tu emaw chuan Sermon tha zawk pawh a sermon ang, thilpek tam zawk pawh a pe a ni thei, thu ziak tha zawk pawh a ziak ang. Kan inkhaikhin a, kan inteh fo chuan chuchuan kan rawngbawlnaah rilru lama harsatna min thlen a, mahni rawngbawlna sitin mi kara awm pawh nuam ti lovin kan awm phah thei.
Pathianin rawngbawlna kan kova a nghah hi rilru leh tih tak zeta thawk a, tihpuitlin hi a pawimawh ber zawk chu. Rawngbawlna hrang hrang khaikhin kual chiam hi rawngbawltu tan thil hlauhawm takah a chang thei a, Pathianin danglam theuhin min siam a, thlarau thilpek kan dawn pawh a dang a, Nang i hmunah kei ka hmunah. Tirhkoh Paulan Timothea hnenah "i rawngbawlna kha hlen rawh," a ti (2 Tim. 4:5).

Rev. Chuautera Kha

Zoramah kan mission sapte Pu Buanga leh Sap Upa an rawn luh hma kum 1889 khan aithur khuaah a piang.
Lehkha a thiam theih avangin duhsakna pawh a dawnga kum 1907 khan Sap upa chuan hruaitu atan buatsaih tumin Calcutta sap sikulah a luhtir a mahse khaw lum a ngeih lova rei awm lovin a haw leh a. He mi kum vek hian sap ramah Challiana nen an hruai a, kum khat an awm. Sap upa nupuiin tonic solfa mizoten hla zir nan kan mamawh dawn tih hriain an lo zirtir a. Chuautera hian an rawn haw hnuin nula tlangvalte a zirtir thin a ni.

Zoram Baptist kohhran pastor hmasa ber niin kum 1914ah nemngheh a ni.
Presbyteryah chairman leh secretary a chelh thin a. Hetih lai huna mithiam hmasa a ni a, ram pawnlamah pawh palai hnathawkin committe hrang hrangah pawh a tel thin.

A thluak that zia a hna a tlin zia hi zosapte pawhin mak an ti a. Secretary hna a chelh laia record a vawn thatzia leh minute a hriat theihzia chu "A bu ang thlap a ni," an ti thin.

Bible lehlinna kawngah pawh a thawh hlawk khop mai. Lev., Num., Deu., I&II Sam., Ezra, Neh., Thuf., leh Estheri te hi Rev. Chuautera kutchhuak a ni. Lehkhabu pawh bu 6 lai a ziak. Tin John Banyana ziak 'the pilgrim's progress' tih hi letlingin 'Kristian vanram kawng zawh' tiin, ngaihnawm takin a letling.

Rev. Chuautera hi Mizo tawng leh sap tawng thiam tha tak a ni a, zosapte tawng zirtirtu ber a ni. Rev. A.W Cartera pawhin a rinber a ni a. A sermonte hi zotawngin a lehlintir thin.

A finna leh talent neih thatzia chu C.S. Zawna chuan tihian a sawi, "A zir finna bakah pianpui finna tha tak nei, tawngkam thiam, hriatna leh finna zawng zawng a tul hun taka hmanga sawi chhuak thei; Mizo upaten 'finna chuangtlai nei' an tih ang mi hi a ni," a ti.
A hla lehlin zinga ka duh ber chu 'Khawvel hi bo mahse Isua ka nei' tih hi a ni.

Mi chhuanawm leh mi hlu kan neihte chanchin chhiar hian thahnem ngaihna thar min neihtira an hlutzia leh tangkai taka an hunte an lo hman bik zia min chhiar chhuahtir a. Rilru leh thinlung zawngin chawimawina nopui ka dawmtir a. Heng mite avanga an rawngbawlpui zosapten samkhai phahna an neih nasat turzia leh kohhran leh ram leh hnamin a tangkaipui zia te. Tunlai hun amite pawn direct-in tangkaipui pha tawh lovin inngai mah ila indirect-a kan la tangkaipui thozia te hi ka ngaihtuah zawm neuh neuh thin.

"Rev. Chuautera, i hnathawh leh i hun lo hman zawng zawngte khan tunge i nih min hrilh a, chawimawina nopui thinlung atangin ka hlan a che. Zofate Icon i ni e." Puibawiha.

1. Source : Kirirum