Kum hlui mangtha, kum thar chibai!

Kum 2009 kum thar, ni thar duhawm tak chu kan hmaah rawn inpharh duai turin tunah kawlkilah a inhung ta ruih mai le. He hun thar tuma la zawh ngai loh hi Pathian zarah kan zawh ho leh dawn a ni a, kum tawp dam tlang takin kan thleng kim ang em le?
Hun kalta leh kum 2008-a kan thiltihte chuan min rawn um zui leh bawk ang a, lunglenna leh inchhirnaah te, lawmna leh tahnaah te min hnuh luh tumin, mahse haw u hma lam hun thar duhawm chu thlir tlatin kan zin kawng hi i zawh ang u.


He kum 2009 hun thar kan zawhna turah hian taksa, rilru leh thlarau inbuatsaih ila, ruahmanna duhawm leh beiseina thar i insiam ang u. I la zawh ngai loh leh tawn ngai reng reng loh hun thar leh thil thar i paltlangna turah hian tuna i rilru inbuatsaihna leh ruahmanna te, beiseina nung i neih te kha he kum i zawh chhunga chakna leh hlawhtlinna pe theitu tur che a ni. Tunah inbuatsaih nghal ta che, he kum tawp kotlang atang hian kum thar, i hmalam hun tur chu han thlir vang vang teh le. Tichuan he lei kum i zawh chhuah hunah pawh i chatuan hmun tur hruai thlengtu tur che chu a ni dawn si a.
Hmanni lawkah khaw chhak mifingte angin nausen Lal Isua chibai bukin Kristmas kan hmanga, tunah mifingte ang bawkin kawng thar i zawh ve ang u. Anni pawh Heroda hnenah kir leh lo turin an manga hrilha an awm avangin, anmahni khaw lamah kawng dangah an haw ta a. Mat.2:12.
Thubelh: New Year Resolution siam hi mi tam tak chuan an tangkai pui em em a ni. Keipawh kuhva ka lo nghei phah ve tawh a, ka thiannu pawhin Bible pumpui a lo chhiar chhuah phah ve tawh bawk a. Nangnipawhin inhlawkpui ve thin lawm ni?

Christmas chibai

Ka bloga lo leng lut thin zawng zawngte in zain Chrismas Chibai ka buk a che u!!!! Amite chhandam tura lo kal Lal Krista chu in thinlung bethlehemah a thara lo piang nawnin remna leh muanna; hlimna thuruk chu in hnenah tihpunin awm rawh se.

Khawiahnge in awm ka lenrualte

Khawsik leh natna tam tak chu a nat dan dinhmun engang chiah nge a nih teh theih a ni a. Lunglen hi teh theih ni ta sela a sen pel rawk khawpa lungleng te pawh kan awm mai thei Lol! Ha na leh pum na hi hreawm hlein an sawi thin a, a nat vang lai tak tak chuan minute 10 chhung lek pawh hi a rei lua a ni an ti. Kan hlim leh lawmlai chuan hunte hi hriat loh chhungin a lo kal duak duak a. Kan thil tawn leh hun hman dan a thuin kan ni hman tawh then khat chu theih nghilh zai kan rel thei lo.

Krismas ni pawh hi ni dang ang bawkin dar kar 24 tho mah ni se, sakhuana avanga kan ngaih thupuina leh culture ang hiala kan neih kan Kut ropui ber a lo ni ta a. He ni hi chhungkua leh thiante nen, khawtlang leh kohhrana kan lo hman tawh dan te chu a hun a lo hre chhuah leh meuh chuan kan hre chhuak leh thin a, panlai nun te pawh mitthlaah a lang hial thin. Kum pui lingleta kan nghah chhungin kan nunah thil tam tak kan lo tawng hmana, kan thian leh lungduhte tuan tul vangin tlang dang an lo kai a, a thenin mual min liam san a, hmanah suihlung rualtea kan lawm Krismas ni lawmawm kha tunah a lo thleng ta si. Suihlung zawng a leng a nih hi...tuanna tlang dang mai pawh ni lo, ram dang atang hian Khawnge in awm ka lenrualte? tiin ka rawn dawn vawng vawng che u a sin tih mai ka nuam.

Mahse he ni hi kan tana pek a lo nih dan hi a ropui a, a hlutna hre reng chunga hlu taka hmang tur kan ni zawk e. Miin a thian tana a nun a pek aliama hmangaihna nasa a awm lo ve tia Lal Isua kan tan inpe tura a lo kalna ni a ni si . Chutiang bawkin kan hmangaih kan thiante leh lungduhten hlimtea an hman ve theih nan "Khawnge in awm ka lenrualte, ka rawn tawngtai sak ve che u a sin," kan ti zawk dawn lawm ni.

Ka suihlungruk dawn reng a sei thin,
Kumpuisul an lo vei zel hian;
Lungrual zaten hlimzai vawra,
Krismas ni kan lo lawm thin kha;
A lo her chhuak leh dawn ta maw,
Khawnge in awm ka lenrualte.

Damten len la khuanu zarah,
Krismas ni lawmawmah;
Chutin chibai ka buk a che,
Kumthar lo thleng leh zel tur nen.

Kan tuanna tlang zawng dang mah se,
Min nghilh bik lo la thinlaiah;
Min hual zel se khuanu leng hian,
Khawiah pawh lo tuan ta ila;
Kan tana nau lo pianga chu,
Neih chhun zawng nen i lo lawm ang.

I dawnlungrukah dawn ve la,
Kan vannei em e keini zawng;
Awmlai vei leh lusun faten,
Tapin an lo hmuak dawn a sin;
I theih chhun leh i neih zawng nen,
Hnemin hlimten hman tir ang che.

Rev. Dr. Zairema (1917 - 2008) Chanchin:

Mizofa piang tawhte zinga ngaihsanawm ber pawl ami Rev. Dr. Zairema ka ui zia lantirnan a chanchin an ziah hi ka blog-ah ka dah ve a ni e.

Rev. Dr. Zairema (kum 91) hi March 4, 1917-ah Hmunhmeltha khuaah a piang a. A pa chu Doliana a ni a, a nu chu Aibuani a ni. Unau pathum mipa hlir an ni. 1931-ah Middle a pass a, 1936-ah Matric a pass leh a. 1940-ah B.Sc. (Hons) pass lehin 1945-ah B.D a zo leh a ni. A nupui Pi Thangdailovi nen ni March 4, 1943 ah an innei a, fapa 3 leh fanu 4 an nei.

A naupan tet atanga Kristian chhungkuaa seilian a ni a. B.Sc. a zir lai atanga Pathian rawngbawl tura inpumpek tum a ni a. Kum 1940-ah B.Sc (Hons.) a zawh hian ME School Headmaster-ah a tang phawt a, Pathian thu zir a duh avanin a bansan leh a. 1943-ah BD zir turin Serampore College-ah a lut a. College Stipend tlem a hmuh bakah Rualkhuma (a patea) leh a nau Thanseia sipaia tang ten an chawm a. 1945-ah BD chu first class-ah a zo va, Synod hnuaiah a thawk nghal a, a hun chanve chu Mizo High School ding hlimah a hmang a. Hetih lai hian Mizo tawng Bible bu kim a la awm loh avangin Baptist Kohhran nena thawk tlangin Presbyterian Kohhran lam atangin Rev. Zairema, Rev. Saiaithanga leh Rev. Thanga te nen telin 1959-ah Bible bu kim chu an peih fel ta a ni.

September 23, 1945 Special Assembly-ah nemngheh a ni ta a. High School lam indaih lohna avangin kum hnih chhung a thawh hnuah Assembly Secretary hna a thawk zui a, Cachar phaia ringtute enkawl an ngaih avangin 1959 -1967 chhung a zuk awm leh a. 1966 Synod-in General Secretary (full time) neih a rawt a. Rev. Zairema thlan a niin August 1968-ah a thawk tan a ni. Kohhran thang zel mamawhna avangin Executive Secretary pathum neih thaa hriatna a lo awm a, ani hian 1974 -1981 chhungin Senior Executive Secretary hna a chelh zui ta a ni.

1963-ah Mizo Bible enthat rawt a nih khan Rev. Zairema chu a buaipuitu berah ruat a ni leh a. Hna tul dang avangin a enthatute hian an thawk sawt thei lo hle a. 1993 kum bulah khawla chhut tura peih fel a ni a, 1996-ah chhut zawh a ni ta a. Kum 30 chhung zet lehlin hna hi thawh a ni. Amaherawhchu, chhut dik loh a tam em avangin hralh chhuah a ni ta lo a ni.

Ram buai lai khan Baptist Kohhran hruaitute nen theihtawpin remna kawng an zawng a, rinhlelh pawh an kaiin lung inah pawh a tan phah hial a. Buai zualpui a reh khan sawrkar committee hrang hrang – Planning Board, Land Tenure, Boundary, Mizotawng leh Dan lam ngaihtuahtu pawlah te hian a tel thin a. Tin, Calcutta leh Guwahati University te chuan Mizo tawng Matric leh BA exam zawhna siamtu leh endiktuah kum 30 chuang zet an chhawr bawk.

Mizo Synod bakah North East India Christian Council (NEICC), Presbyterian Assembly, National Council of Churches in India (NCCI) ah te hian mawhphurhna pawimawh tak tak a lo chelh tawh a, Bible Translator Committee-ah member a ni tawh bawk a. World Reformed Churches Conference, Brazil-ah United Church of North India aiawhin a palai a. Tribal Consultation, Philippines-ah a tel tawh bawk. Synod Moderator-ah a tang tawh a, committee pawimawhah a tel zel bawk a ni.

Synod Office, Bookroom, Press, Thingsulthliah biak In leh Sunrise Flour Mill te hi a hova sak an ni a. 1982-ah kum 65 mi nia a pension hnuah mi thenkatte nen hlemhletna do turin Vigilance Council an din a, Mizoram Guardians an din leh bawk.

1988 khan Serampore University chuan chawimawina sang Doctor of Divinity (Hon. Causa) a pe a, 1991 khan North Eastern Hill University (NEHU) chuan Doctor of Literature (Hon. Causa) a rawn pe bawk. Heng chawimawina te hi Kohhran leh vantlang tana a rawngbawlna hriatpuina a ni.

A Lehkhabu ziah pawimawh zualte chu:

1. Chanchin Tha Marka (Hrilhfiahna)

2. Chanchin Tha Johana (Hrilhfiahna)

3. Uar bik nei Pawlte

4. Khati khan kan hril thin a

5. Bilat lei

6. God’s Miracles in Mizoram

7. Apokrifa (Lehlin)

Rev. Dr. Zairema hi a pension hnu pawhin Mizoram leh Presbyterian Church of India tana mi tangkai, finchhuahtu leh uaplumtu a ni reng a. Hun enge chen atang khan taksa chak lohna hrang hrangin a tlakbuak a, a pawn chhuak peih meuh ta lo va. Kohhran programme pawimawh hrang hrangah pawh min telpui peih meuh ta lo va. Synod Inkhawmpui vawi 85-na, Ramhlun North-a kan neih zawk takah pawh khan Pastor nemngheh tharte chibai buktu (Moderator lo ni tawhte) zingah beisei a ni a, amaherawhchu taksa chak lohna avangin min telpui thei ta lo va. Tukin zing dar 6:00-ah lungna avanga a thih thuin min rawn deng zui leh ta mai hian Kohhran hote pawh min barakhaih hle a ni. Kan Synod hotute hmun hrang hranga awmte kan inhriattir nghal a, zau zawka zualko hna lo thawk turin Synod Information & Publicity lamte hriattir an ni bawk a. Hun rei lote chhungin Rev. Dr. Zairema thih thu hian India ram chhung leh ram pawn lam a deng nghal a, amah uina leh tuarpuina thu te kan dawng nghal bawk a ni.

‘Mizoram Synod Pa’ tih hiala chhal ngam Rev. Dr. Zaireman chatuan ram min lo pansan ta hi Mizoram Synod leh a thawhpui Kohhran leh Pawl hrang hrangte tan channa nasa tak a ni a. Engkim chunga roreltu leh remruattu chuan a kalsan tak a chhungte a thlamuan zel ang tih hi kan ring a, kan tawngtaipui bawk a ni.

Condolences: Moderator/ Senior Executive Secretary,

The news of the death of Rev. Dr. Zairema around 6 am this morning comes as a very sad news to all of us in the family of Serampore College. Rev. Dr. Zairema was a BD student at Serampore College in the early forties, during the Second World War. He was one of the leading students. He was known for his hard work and brilliant academic performance.

Rev. Dr. Zairema was the first among the Mizos whom Serampore College awarded Doctor of Divinity degree for his outstanding contributions to the Church and Society. His death is a great loss not only to the Mizo Church but also to the whole Christian society and the community of theological education in India.

I, on behalf of Serampore College, the Council and Senate of Serampore College, hereby convey our condolences to his family members and the Mizoram Presbyterian Church.

Rev. Dr. Lalchungnunga
Principal, Serampore College
Secretary, Council of Serampore College
Convener, Senate of Serampore College

-----xxxxx--------xxxxxxx------------xxxxxx----

Mizoram Presbyterian Kohhran hruaitu min leh zahawm tak Rev. Dr. Zairema'n he leia a rawngbawlna chawlhsana chatuan ram min pansan thu zualko mail kan dawng a, pawi kan tiin kan ui hle. A kalsan tak a fate leh a tute, Kohhrana a rawngbawlpui zawng zawngte kan tawrhpui a, Pathian awmpuina leh thlamuanna an chungah a tharin thleng mawlh rawh se tiin kan tawngtai a ni.

He leia thahnemngai tak leh taima taka Lalpa tana a inpekna leh a thawhrimna rah chu Zoram dung leh vang leh Zoram pawna Mizo hnahthlak Kohhranho zingah par angin vul reng se tiin chawimawina leh duhsakna sang ber kan hlan a ni.

Rev. Lalsawichhunga
Moderator, PC, Myanmar

-------xxxxxx----------xxxx---

Chanchin kan lo hre ngal vat a, a lawmawm e.

Thil danga a pawimawhna pawh a tam ang, Bible zirna huanga atang chuan Mizo te Biblical Criticism( chik taka Bible zirna) Pa kan chan ta a nih chu.

Tin mipui vantlang nuna tihdan tur dik ( social ethics) leh ram leh hnam (Nationalism) leh Rinna inkar thua tihdan tur dikah pawh Mizo te tan chauh ni lo, hnam dang te leh India Sorkar tan pawh zirtur a awm ngei ang.

Lalpan a kalsan tak a chhungte leh Kohhran hote awmpuiin thlamuan rawh se.

Rev. P.R.Hmuaka

Tuebingen,

Germany.

------------xxxxxx-----------xxxxx-----

Birmingham Dear Friends, I must write this in English so that I can express myself properly.

It was with sadness that I received the news of Pu Zairema's death. He was always there for us missionaries, and his wisdom kept us from too much follishness many a time. In my time he was at Silchar, and even when I returned there in 2005 to go to the Cachar Hill Tribes Synod, it was as Pu Zairema's house that I thought of the top bungalo. Whenever we travelled, he was there with his welcome and care for us.

His leadership and his scholarship will be greatly missed. Even last year when I attended the ATC Centenary he was busy writing an important book. I greatly cherish the long conversation I had with him in his house at that time.

Please give my condolences to his family, and assure them and the Mizo Church of my prayers. I will inform Rev Alwyn Roberts immediately.

Yours in Christ

Angharad Roberts/Zopari

---------xxxxx----------------xxxxxx------

Source: mizoramsynod.org

Saitea ka tuarpui ve nan

Saitea hi Tahan khaw bul lawk Tuivar khaw chhuak a ni a. A naupan lai leh a tunhma nun chu hre lo mah ila, Rangona Bible school a kal lai leh chu mihnua Bible schoola lecture hna a thawh chhung hian kan in hi inpui berah neiin ipte pui bannan a rawn hmang a. Kan venga an kohhran pakhat Karen ho zingah thu sawi tura a rawn kal changte leh hun awl a neih changte hian kan inah a rawn riak ve thin a. Heng atang hian kan inhre chiangin kan innel em em a. Tin amah hi ka nupuia chhungte a ni a, khatih lai khan kum 20 a tling awrh chauh va, a kum phu lovin a nungchang leh chetzia a puitling ka ti rilru hle thin.

Unau pianpui mipa pakhat a nei a, a unaupa hi pianphunga rual ban lo a ni hlauh mai, tichuan a nu hian an unau hi theih tawp chhuahin a tulpui ta thak a ni. kawlphai eizawn harsa tak karah bazarah anhnahte zuarin leh chhangte kangin Saitea te unau chu a finna leh a theihna zawng zawng nen a enkawl seilian a. Saitea B.Th a kal chhung zawng pawhin a school kalna turte thawk chhuakin nu mawlte mah nise, a fapa lo inzirchhuahna tur chu ngaihpawimawh berah a nei a. Hetianga a nuin a enkawlna zawng zawnghi Saitea pawh hian a ngaihlu thiam em em a.
Saitea chuan B.Th a zawh hnu chuan zir chhunzawm chu chak hle mahse, a nu hah taka amah enkawl nana a thim a var thlu lova rim taka thawk thin chu chhawk zang khai theihna a ngaihtuah hmasak a lo ngai ve ta a. Tichuan Bible school zirtir hna chu thawk nghalin kum 2 a hun a hmanga, mahse Bible school zirtirtu hlawh chu a bei tham em a vangin a zir leh zelna tur chu sawi loh a nu pawh duh angin a enkawl thei lova. Engpawh nise ram dangah inhlawhin intuak ve phawt ila Pathianin a zirchhunzawmna tur chu tul a tih chuan a la ngaihtuah mai ang tiin duh thlang thei ni pawha inhre lovin, Gatar lamah inhlawh tur chuan a kal ta a.

Gatar-ah chuan construction hna thawkin ni sensa hnuaiah pawh rim takin a thawk a, engemaw chang chuan khawlum nen an hna hau tak nen haw mai a duh thute, an hlawh lah a chu ti teh lua bawk si loh thute pawh min hrilh thin a. Mahse a haw ringawt chuan ram dang kal chhuahlehna turin sum tam tak sen that leh a ngai dawn si tiin chhel takin a awm ta zawk a. Kum 2 lai a vei hnu chuan hotute duhsakna dawngin a hnaah pawh nihna sang leh nuam zawk a luah chho ve ta a. A hlawh pawh tlemin a hma aiin a lo zia awm chho ve tan thute hi sawi nuam a ti ve em em thin a.
Tichuan Rangon khawpui fem deuhah inhmun pakhat tal suan ve theih ngei tumin a theih ang angin a inkhawl ve bek bek a. A nuin mamawh tul a sawi reng reng hi chu a theih ang tawka tihhlawhtlin sak a tum tlat a, a nu lo enkawlna zawng zawng hi a theihnghilh ngai lo. “Ka nu hi ka tan chuan ka pa a ni bawk a, he khawvela ka lei rohlu, ka neih chhun a ni tak meuh meuh a ni,” a ti thin.

Tichuan kum 2009 kum thar hian kawl ram lamah mimal pawimawh leh chhungkaw pawimawh te titurin haw turin a inpuahchaha, chutia mahni pianna khua leh a hmangaih em em a nu hmu tura nghakhlel taka kum lo thar mai tur a thlir mek laiin chanchin lungchhiat thlak tak mai chuan a rawn deng ta a ni. A ngaihsan em em leh a hmangaih, ram danga hah taka hna a thawh phah hialna chhan; a chun nu duh tak mai chuan kum khuaa he khawvela inhmu leh ngai tawh lo turin chatuan ram a lo pan san ta thut mai a ni.

Saitea nu Pi Hrangsungi hi kum upa lam a ni ve tawh a, tin thisen sang natna nei a ni a, a thih chhan chiah hi hemi ka ziah lai hian ka hre lova, ka thu hriat dan chuan, a thiannu an ina va leng chuan inbual ina tlu renga a lo awm chu a hmu a, kaihthawh tuma a va kal hnaih chuan kaihthawh tur a lo awm tawh lo a ni.

Pi Hrangsungi (Tuivar khua) boral thu hi Dec. 15, 2008 khan ka nupuiin min rawn mail a, ka hriat veleh Saitea chu email ka thawn nghal a. Ka nupuiin, “Saitea chuan a nu ruang ni hian hna a thawk a sin, a hre si lova,” tih thu min hrilh chuan ka lainat lutuk hi ka mittui a tla zawih zawih a. Theih nisela chuan kan hmangaih leh mahni pianna nu ngatte hi chu mahni ngeia dawmhlum kan duh thin nen.

Tuanna tlang dang vang ngawt pawha lunglen a nat vei nen, fam ngaih lunglen meuh zawng lairil a fan thleng tak meuh meuh a ni. Kan zonunmawi leh khawhar hla hmanga min awihpuitutur awm lohna hmunah phei chuan kan mal ngawih ngawiha, kan riang ngawih ngawih hian a hriat a, thenrual min hnemtutur kan mamawh tak zet zet a ni. Keipawh ka fanu min boral san lai te kha ka hre chhuak rum rum mai. Kan ram mi leh kan hnam tumah an awm si lo, mahni chauhva, prayer roomah khawhar taka ka tah tlaivar zan kha, a changing khawhar hla ka thiam lai lai zawi te tein ka saa, ka tawngtai reng bawk a.

Saitea tuar nat dan tur zia te ka ngaihtuahin thlamuanna thu nena han hnem theih ka duh hle a, vanneih thlaktakin kan inbe pawp thei hlauh mai a. A tuarna hle tih chu ka hai lo mahse, patling takin a awm a ni tih ka hriatin ka lawm khawp mai. Chutah a nuin a lo enkawl tawh dan te min hrilh a, a sawi zelnaah, “Ka nu hian khawvela a tih tur kim tak leh fel takin a hlen a, ama hrehawmna pawh sawi phal lovin kan unau vin min enkawlin min tuamhlawm a, ka ngaisangin, ka lawm tak tak a ni. Mahse ka u hi rual ban lo a ni si a, zing a han tho anga, ka nu lo awm tawh lo tur leh unau dang awm bawk si lo chu a mang ang dawn em hian ka hria a…” tiin lungchhe takin min hrilh a. “Tin, ka nu min boral san chungchangah hian lawmna ropui tak mai ka neia, kan fahrahna lang miah lova kan khawtlang leh thenrual tha ten min bawisawma, tuarpuina thu nen min hnemna zozai hi ka phu lovin, a ropui tak tak a ni,” tiin khawtlang leh thenrualte chunga a lawm zia chu a sawi mawlh mawlh bawk a ni.

A tawpah chuan ka thiam tawka Pathian thu nen ka hnemna chu he ti hian min chhang a, “Isawi hi tunhma atangin ka lo ngaituah fo tawh a, kan nun hi keini thu a ni lova, Pathian thu a ni tih hi ka ring tlat a, chu chuan min tithlamuang khawp mai,” a ti a. Ni e keini ringtu tan chuan thihna hi kan tawp hlenna a ni lova, chatuan hmunah kan la inhmu leh dawn a ni tih kan ring tlat a, hei hian nasa takin min hnem fo thin a ni.

Khawhar chhungte Lalpa’n thlamaun zel rawh se.

CZZ Concert Ropui

Tahan Youth Icon 2008 (Pic)

December 30, 2008 khian Chhaktiang Zofa Zirlaite chuan Concert ropui tak Kanan schoolah buatsaih an tum a. Burma ram chhunga awm CZZ member leh Mizo Student Fellowship (MSF) memberte he Concert atan hian thawk hovin an inpuahchah mup mup thu Nl. Mahlimi hnen atang kan dawng. An nghahna hmun tur hi Kawl phai mizote khuaah chuan khaw nuam ber pawla ka ngaih Kanan khuaah a ni leh nghal. He Concertah hian Tunlai Tahan zaithiam lar tak takte leh hranghlui lampawh an zai dawn.

A hun: Chhun dar 12, 30 December, 2008
A hmun : Kanan School
He Concerta zaitur kan hriat mai theihte chu: TCYF Icon Stars 2008, J.Malsawmtluanga, Lalrinzuali, Joseph-s, Zodithangi, Rebecca Lalnunpuii, Vuana, Pi Lalhlunmawii,
te leh zaithiam dangte…

Ni 21 December Sunday chawhnu dar 2:00 hian Nl. Mahlimi (d/o Rev. Dr. Dengthuama) te in, Tahan D group-ah CZZ memberte Concert lo awm tur atan thu pawimawh relhona leh Zaia inpawlhoa tawngtai rualna te neih tum a ni.

CZZ memberten Concert lo awm tur atan hian cheng ks.1000 aia tlem lo thawh khawm tur a ni a. Hetianga kan member khuaa awmte thahnemngaihna leh inpekna hi a ropui tak zet a ni. Ram dang atang thawh thei kan awm chuan Nl. Mahlimi hnenah emaw kan sum khawntute hnenah pek theih reng a ni. Sum khawntu atan Nl.Dingtei leh Tv. Mahlimtea te ruat an ni.

He Concert hi hlim hlawpna atan mai ni lovin CZZ thiltum tihpuitlinnan a ni a. Zofaten inpawhtawnna tha leh lungrualna kan neih zel theih pawh beisei a ni.

Tunah hian he hun hmangturin CZZ-a kan hnarkaitu then khat pawh Kawl ram lam panin an hnathawhna hmun leh zirna hmun atangin an haw mek tih kan hria a, hlim tak leh tluang taka an hman theih nan mimal tak pawhin duhsakna ka hlan e. Ram danga awm member zawng zawngte pawhin Kan Concert lo awm tur atan hian kan tawngtainaah i hre reng ang u.

Source: www.chhaktiangzirlaite.info

Kan Nghah Kristmas II

Zan dang ang lo takin khum lu chungah Thleng a lo awm a, naupang tan chuan Mas putar hnen atangin eng nge an dawh thlak dawn tih chu thil hriat nghahhlel awm ber a ni thin. Zan tlaiah van lam han hawi chho ila thlasikkawng paw chuk mai leh boruak vawt var mai te chuan enge maw titakin rilru a khawih a, Kristmas a hnai tawh a ni tih chu hai rual a ni lo. Chhungkaw din hmun la hmufiah thiam ve lo naupang pakhat chuan, “Papi Mas kawrmawi ka duh ve,” a ti a, chutah a pi chuan a pawnfen chhung ipte chu a han zena, cheng 20 tlang pakhat leh pin hi a rawn phawrh chhuak a. Naupangin cheng 20 a hmuh chuan a lawm em em a, khawdang pawh hawi lovin a pi kuta cheng 20 chu a thlir renga, mahse a pi mit atang chuan mittui a rawn far chhuak ta zawih zawih mai a. a tupa naupangte chu kuahin, “Mamte, i nu leh pa kha la dam sela chuan i duh zawng tak Mas kawrmawi an lei sak ve tur che a nia,” a ti khur dar dar mai a.

Pu Rokunga’n “awmlai vei leh lungsun fate chan tawk hi dawn ve teh, hnutiang mual liam hnu ngaiin an tap e..” a lo ti a. Thlalak hlui te kan han thlira an hmel leh kimtlangte chu a la ngai reng a, mahse hmuh phakah an awm si lo. Damdawi inah han kal ila, dam lo balhla leh buhhawp ringa mahnia zun ek pawh thiar thei lo, Kristmas ruai leh a boruak hlimawm takte, zanlai inkhawma tel chak ve ngawih ngawih damlo khuma taksa chau tak maia mu chunga; damin Kristmas te hi ka la hmang ve leh thei ang em aw… tia rilru ngui taka inngaihtuah mekte chan hi a na a ni. Nakum Kristmas chu kan hmang ho ngei ngei dawn a nia aw ti a, min chah lawm lawmtuten mual min liam san leh ta si te hi, he Kristmas a lo thleng hian a hrilhhai thlak leh zual thin. Chhung leh kua te nen Kristmas hlim leh lawm taka hman ve theih nan tia sum zawngtuten vanduaina tawka thlanthim an han pan leh ta mai thinte hi an nupui fanaute leh chhungte tan chuan a va han na duh dawn em. He kristmas a lo thlen hian hnutiang mual liam hnu ngaia an tah hi dawnpui ve tur leh mahni hma chauh sial lo turin Pu Rokunga chuan min sawm a ni.

Fakna Hla Thar

Fakna hla thar Rangon mizo ten an rawn release ve ta e. Mizote kan thlenna apiangah hma kan sawn thu hriat hi a nuam a ni.

Tv L.T. Puia, tuna Rangon-a khawsa mek nen van neih thlak takin internet hmangin kan inkawm thei hlauh mai a. A vision leh passion te min share a; Zofate rimawi lamah hma kan sawna, kan thenawm hnam dangte hnenah rawngbawlna zau zawk kan neih theih nan, zai lama talent nei tha ten eizawnna kawnga hma an lak theihna turin theih tawp chhuahin hma a la mek a. Tunah hian missionary leh zirlai chawm nan tiin Fakna hla VCD (Ta Kar Loh Hmiar) hi tlangzarh theiha buatsaih a ni ta hi a lawmawm tat zet a. Market zau zawka lak a nih theih nan leh kawl ho zinga Fakna hla hmanga rawngbawlna tha a nih beiseina nen heng Kawl hla hi buatsaih a ni.
He VCD (Ta Kar Loh Hmiar)-a zai te hi Edeni, Pantei, Lalremruata (Sawbwa), Samson etc etc. an ni. Tawngtaina nena he VCD min lei saktu leh ngaithlatu zawng zawngte Lalpa malsawmna kan dil sak ve a che u.

Kan Nghah Kristmas

Ui ke bai ka hmuh hian kan thenawm putar tiang hawla kal boh boh kha ka hrechhuak thin. A ni lahtaka kan thiltawn leh hriatte hi a chhan tha tak a lo awm hian kan nunah a rawn inlar nawn leh chawk thin a. Thenkhat tan chuan chung chhawrthalpui a lo en chang hian nun hlui liam ta te kha a rawn inlar chhuak leh zut zut thin. Chul ram an han feh a ‘Thlam ram’ an hmuh ringawt pawhin lunglenna tham an nunah sawi tur an hre thin. Sa-um bur ka hmuh ringawt pawh hian ka nu behlawibai tui tak kha ka hre chhuak ve fo thin a. Tual thattu pa pakhat erawh chu daidep (Tahan lamah chuan in-hrik hi daidep kan ti a, Mizoram lama daidep an tih hi Piteng kan ti) hram ri a hriat tawh chuan a muhil thei tawh ngai lo, mi a thah laia daidep lo hram kha a hriatchhuah leh thin a vangin, an ti. Keima mimal nunah chuan, “A saw raltiang tlangah Kros hlun tak chu a ding,” tih hla ka hriat hi chuan, Krista min tuar sakna hi chiang takin ka hre nawn fo thin.

Kristmas hun a lo thlen hian ngaih tur a pui leh hriatchhuah tur kan nunah a lo inlar zut zut mai zawng a nih hi. Dik tak chuan khuang te leh khuang pui ri ringawt pawh hriat thlakhlelna hmun a tang hian, kan vangkhua leh zonun ngaih a zual ngei e. A hnam pum huapin keini zofate nunah “khuang” hian nasa takin hmun a chang a. Kan khawhar inah pawh a lailum luahtu ber chu khuang hi a ni. Biak ina mihlim muthlu kaitho thintu pawh khuang hi a ni a. Nu leh pate pawhin he hun hlimawmah hian, Bethlehem dai nghawr nghing dup dup khawpa khuang pui leh khuang te chumchilh an thlahlel fo thin.

Kristmas tree, in cheimawina chi hrang hrang leh electric eng chi hrang mawi tak tak han hmuh hian kan nghah Kristmas chu a lo thleng mek a ni tih min hriattir a. Dawr hmun han kal ila thawmhnaw mawi chi tin reng leh an hla mawi ri te chuan Kristmas chu a lo thleng mek a ni tih min hriattir a. Biak ina kan fak hlate leh thu hrilhtu sermon te pawhin Bethlehem lam min hawi pui a. A taka kan hmuh phak loh pawh rinna mitin kan thlira Bethlehem dai phullenga berampute ram tuannaah van Angel var lung kan rualpui a. Khawlai han leng ila naupang incheina kawrmawite chuan Kristmas ni ropui an puang chhuak lo vem ni. Zan dang ang lo takin khum lu chungah Thleng a lo awm a, naupang tan chuan Mas putar hnen atangin eng nge an dawh thlak dawn tih chu thil hriat nghahhlel awm ber a ni thin. Kual zin leh zirlai, hmun danga hnathawk mahni in lam pana insulpel zung zungte chuan Kristmas hnaih tawh zia an sawi mawlh mawlh a. Zan tlaiah van lam han hawi chho ila thlasikkawng paw chuk mai te chuan Kristmas a hnai tawh a ni tih min hrilh ve bawk a. Chu, ralkhata zai ri chu Carol thawm a ni lawm ni? Kristmas min ngaihtirtu leh min hriatchhuah tirtu thil mawi chitin reng leh thilsiam zawngte hi an va han hlu tak em. Heng lo pawh hi kan nunah Kristmas min hriat chhuahtirtu sawi tur tam tak kan nei theuhin a rinawm.

Keipawh maw, lungchhiaa tahna tur em chu ni lo mah se, Kristmas min hriatchhuahtir thintu kha; khawpui laili-ah leh bazarah te, dawr hmun ropuiahte ka han zawnga ka hmu lo. Pangpar huan mawi tak takte pawh ka han fanga a tan hmun reng a lo awm ve lo. Biak in leh in ropui tak tak an cheimawina hmun ka han thlir a chutah pawh chuan hnawlin a lo awm leh si. Khawiah riah run rem ve tak ang che maw? Heng hmun ropui tak takah te hian i tan hmun a awm ve lo em ni tichung zelin beidawng taka khawpui chu chhuahsanin daiah ka han kala, tahchuan ka tawngta chhandamtu pian thu min hrilhtu chu; in satuten an duh loh a kila lung tangkai tak ang mai kha. A riah run remna hmun chu tlawmin vuikhuten bawh chik chek mah se kei ka tan Krista inngaihtlawm zia min hriat chhuahtirtu a lo ni a. Khawpuia lutchhuak a piangte hnenah leh Zofaleng zawngte hnenah Krista pian thu chu ngawi rengin a puang chhuak mawlh mawlh mai si a ni.

Hnam dang tan chuan daia hnimhnah to ang lek mah nise Zofate nun chhungrilah erawh Kristmas nen inkungkaihna thuk tak nei, kan hmuh ringawt pawha Kristmas min hriat chhuahtirtu chu, “Tlangsam par” hi zuk ni ve tlat a. Rose par iangin hringfate hnarah rimtui a chhuah ve lo a nih pawhin Zofate nun chhungril thuk takah erawh hmun a khuar ve tlat si. Khual buk chang lo ran chaw pekna thlenga lo piang Lal Isua ang maiin a hmel enin a tlawm naa khawvel hnenah Krista pian thu puangtu ropui Zofate tan a lo ni e.

Krista thisen chuan kan sual hliam tuar a tidam a. Chutiang bawkin a ni pawh hian kan pem/hliama thi chhuak te min tihdam sak thin. A hnah tui sawr hi pem thar damdawiah a tha em em si a.

Dai ka chuana samtlang mawiten lo par vul siau ve,

Hmanah Bethlehem daiah van Angel zai mawi lo ri;

Tunah erawh kan dai ngeiah mawiten par chhing chheng e,

Zofate thinlungah nausen Isua pian thu puang chhuak ve in