Ka Thlalakin Thu Min Hrilh

Eng emaw chang chuan thlalak hlui deuh deuh thlir hi nuam ka ti thin a. Hun kal tawhte pawh chiang takin suangtuahna mitthla nen min hmuhtir thin a, ka lo chawrchhuahna leh tobul pawh min hriat nawntir a, ram dang, hnam dang culture chak takin min dawlh zawh mai loh nan. He ka thlalak chhuan awm lo tak takte atang hian tlem a zawng tala Tahan leh a chhevel min hmuhfiah pui a, a chhunga chengte (keimah) rilru put zia pawh min hmuhpui theih ka ring.

Tahan nature mawina

Biah thu hlan che ka nuam Han khawpui liai luai, i chhunga lanu val rual hlim nui ri leh parmawi rimtui a leng van boruak thiang karah khian. Ngaih i zual ngei e, i chhung naufa zaleng zawng leh tlawmngaihna parmawi. (He pic hi May, 2006-a Tahan khaw piah Zonuama ka lak a ni.)

Thlir changin hmanlai min tingai mange, Tahan mission veng biak in compound hnung, lui ral ( tunah nurse training center lo ni ta)-a leipuia ka nu nen kan feh laite, Naupan laia saihlum hruala, sava veh hun laite min tihrechhuak. Kawl phai leh ‘Turnipui sensa hnuaiah’ tih hi inhmeh bik riauvin ka hre thin. Chhawl hal lai tak maia fanghma tuaitir han ei kha manhla ve tak chu a ni. Ngaihtuahnain vaivutah thu a, Thiamthainumawngtawlh zawnga kan ni len thin lai te min chhuichhuahtir hial mai. Hmanlai kha aww… naupan lai kha kan ti ve ta vawng vawng mai a nih hi. (Pic hi Tahan khua atang mel 10 vela hla Tuingo khaw dai-a ka lak a ni)

Han khawpui chung vanzawlah turnipui a hrang lua em ni? Thing hnah nem lo til, lanu val rual awmni kham e chhun pachangah, Hauhuk kah thlak ang chhuat laiah phar duai daui. Zo thlifim ngaih leh ar dawk dawk lak (kok kok dak) riin khawtlang lunglen a na e, tiin biahthu min hlan. (He pic hi May 13, 2006-a Khampat leh Hmuntha khaw inkara ka kal a ni.)

Tu’n min sel lo se, kei ka tan kan sumtual leh run nuam, thlipui ruahpui laka ka bikna, thlir changin chhungkim dar ang len lai min ngaihtir. Lo tho leh se ka chun nu leh zua pa hlim ten lawmthu hrilh ka nuam e. (Kan in hi Tahan bazar bul maia awm a ni a. Ka hriat sual loh chuan kan inpui “a rawn hnai zawk hi” kum 1966-67 vela sak a ni a, a hla zawk khi chu kum 1996-a sak a ni) (Pic hi kum 2006 thal khawlum lai taka uluk vak lem lova ka lak a ni)

"Lengi te nen luiah leng ngha kan chhai lai." Sangha thliar thin lai kha chu nuam ve thei tak a ni, tui thehkang hma kha chu tumah sangha dap hmasak bik awih loh te kan han ti a. Naupan lai chuan Nghachik pawh ala tam asin le, tunah zawng an rem zo ta. Luia inbual te kha a nuam a ni. Bahkuana- kai (Tlangzawl khaw chhak)-ah tui cheng tur ringawta kan kal laite, a zuanthlakna ko pang kha a sang thaa nuam kan ti theih zia kha, meizial zuk ruk hun lai a ni bawk nen. Tahan dumveng school bul luiah inbual laiin Vawkte thi (puar pung mai) a rawn len thla leh nawlh thin..ha ha.
Heng luikawrte leh lo tui lakna kawngte hi leilet pa tan chuan hlu tak a ni. (Pic hi Fur tui a tlak tak tak hmaa ka lak a ni.)

(Pic hi Dec. 18, 2007-a Philippines-a ka lak a ni)

Turnipui thlang lenkawl a liam turin a chhun eng no ngei e, ka chhak thingro ding khi.

Sik ni eng mawi thlir ve che maw?

Suihlung a leng zual mange tlang ka chuan a,

A lang si lo zobawm chhawkhlei leh ka senhri pari;

Sik ni eng a her liam lai hian liam ve mai se aw ka suihlunglen.

Zan khua a lo tlai a,

Thangvan sangah chhawrthlapui a en chang leh siar zawngte mawiten an en chang hian,

Kan chhingmit leng hmun tak ang maw ti hian ka dawn thin che.

Thlir dun ila tuanna tlang dang mahse;

Thinlung thuhmun biahthu Di ruahtham loh i hril dun ang.

Tawn leh ni atan rinawm takin aw.. bawihte.