Chi (Salt)

Chi hi chaw hmeh tui takah leh tui vak lova pawh thlak ila a hna thawh dan a thulh chuang lo; a al reng a ni.

Chi hian fak a hlawh ve vak lo; sa te hi chi tel lo chuan a tui tur angin a tui lo a. Chi kan thlaka a lo tui tasawt a, in chi hi a va tui ve ti lovin in sa chu a va tui ve kan ti hlauh zel.

Chi angin awm rawh u, min ti lova. "Lei chi in ni e," min ti zawk a (Mat. 5;13), hei hi kan nihna a lo ni a, kan nihna chu chaw hmeh tui emaw tui lo emawah pawh ni se, hlim ni leh lungngaih niah te, ringtu zingah leh ringlo mite zingah pawh, i lan tir ang u.

Khawi hmunah pawh awm ila/ tel ila kan nihna (ringtu) hi a nihna ang tak hian a lang chhuak tur a ni. Ringtu kan nihna hi a che chhuak anga kan bul amiten fak leh that an lo hlawh thei dawn a ni.

Matt. 5:13

Nghah Nei

A nghaktu tan chuan dar kar khat mai pawh hi a rei thin mange! Beiseina sang tak nen kan han nghaka, kan thil nghah tam zawk lah chu kan control theihna piah lam ami a ni lehnghal a, kan control-na hnuai ami tak ngial pawh hi tihfuh loh leh tihsual chang chuan beisei huna nghah chhuah theih reng a ni lo.

Dik tak chuan sorkar atang emaw kan mihringpuite atang ngat phei hi chuan kan thil nghah chu 100% a hun takah a rawn thleng dawn a ni tih chu beisei ngam si lo beisei bawk siin kan nghak thin a. Tin nature hi kan thu neihna piah lam thil a ni a, kan buh leh bal te pawh zuva mai thei a ni tih te hi kan hre tha duh lo, a thar hun chu rilru zawng zawng nen nghakhlel taka kan thlir thin vang pawh a ni ang.

Veng pakhatah hian Nu-valai tak pakhat hian a fa sen pawm lai chu duat takin a lo puitling hun tur thlirin a enkawl a. Kum 20 zet a vei meuh chuan, a vanglai hun tha zawng zawng a lo liama, a tha a lo thum tana, a hmai a lo zur tan ta bawk a. Chutah a fa chu ruih theih thil tiin over does-in naupangtein a boral a. A tawpah chuan Lalpa chauh lo chu innghahna tur a nei ta reng reng lo a ni.

Sorkar ropui tak tak te pawh a inlet thawk thawk a, mihring rilru pawh a inthlakthleng zung zung thin a. Kan khawvel leilung (nature) pawh lirnghing avangte, thlipui leh tui fawn avang tein chhiatna rap thlak tak a thleng tih hre reng mah ila hengte hi kan inghahna ber a ni fo si a.

Min tanpuina tur chu Lalpa lei leh vansiamtu hnen ata a lo thleng ang tia mihring ban tha chakna aia Pathian ring zawk thin leh Sakhi lui te tui chaka thaw huam huam ang maia Lalpa ngaitu leh innghah nana hmang thintu Lal Davida chuan,
"Lalpa chu ka nghak reng a, ka nunna hian a nghak reng a,
A thu pawh ka beisei a ni.
Vengtuten khawvar an thlir aia nasain,
A ni, vengtuten khawvar an thlir aia nasa mahin,
Ka nunna hian Lalpa chu a thlir reng thin a ni." a ti.
Ps. 130: 5, 6.
..

Nitin hun hman dan min zirtir ang che

Kan thenawm pitar chu kum 72 mi a ni a, a tar tawh hle mai a, a mit pawh a fiah vak tawh lo. Amah pawhin dam rei chu a inring tawh lova, ram dang kala han inhlawh fak chu a ngaihtuah ngai lo. Ka thian kawmngeih em em chuan min lo boral san tawh a, thlalak vel han thlir chang hian lung aleng, la dam ve sela chuan Malaysia nge, US ah emaw hman hmanah khan a kal anga, a intlawh rum ve vat vat ngei ang. Kan dam chhung ni leh kum te hi engtia rei nge le, a then hma takah an liama, a then kum upa takah an thi a. Mahse an vaiin he khawvel ata lak bo an ni, an awm tawh lo, hlimthla ang lekin an ral ta si.

Ka naupan lai chuan school bang in ka han thleng hi, ka nu ka kova, ani chuan min lo chhang var a. Ka ril atam ka tih leh ei turte min siam sak thin a, min hmangaih em em a, a fate tan hian a hun zawng zawng, a chakna thahrui zawng zawng leh hmangaihna mittui hial pawh a luan tir thin. Tunah in han haw ila, aw rawl tawp pawhin ko ila min chhang tur a awm tawh si lo, a thi tawha, a reh vawng vawng mai a ni. Kan then takte kha he khawvelah hian vawi khatmah kan hmu leh ngai tawh dawn lo, an rawn kir leh ngai tawh reng reng lo, an reh vang vang a, an reh hlen thin.

Tichuan thangkhat lian a lo ral a, keimahni ngei pawh chuan kan thih hun tur kan lo hnaih ta deuh deuh thin. Tichuan, ral leh mai thin khawvela ka cham chhung rei lo teah hian enge ti ve ila tha ang tih ka ngaihtuah ta a. He khawvela ka hun neih chhun rei lo te hi, ral leh mai mai tur atana hman zawng a pamhmai em mai tiin, ral tawh ngai lo chatuan daih hna thawh chu ka thlang ta zawk a. Kan thawhrim rah zawng zawng pawh vanah kan hmuh hun chuan chung thlarau bo chhandamte nena Lalpa fak ho chu a va nuam dawn em!!

"Teach me Lord, how to count the days of my life, and I will understand how short it is."

Lem mawi tak atang

Zing thawh veleha nuih hi a tha an tih kha maw, khaw nge han nui dawn teh ang. Eng fiamthuin nge ka nuih tiza thin deuh kha aw....
Hm.. Tlangval pakhat dawizep lutuk pawh hi mi vengah a va lenga, "zawnga" an lo ti a, a zawng kal nghal awt awt mai a ni awm sin maw le.
Tualte vanglai thli tleh na lutuk pawh luikawra pa pakhat daikal lai a mawng a chhem faifuk anti..

Thlalak leh lem ziak mawi tak en hian nun a tihlim ve riau thin a, ka hmuh tawh zinga mawi ka tih ber pakhat chu hei hi a ni-

Sang taka a ban theih nan thutthleng a dawha, chutah pheikhawk sang nen pha leh pha lo vin a kut ding lamin a han bana, chu chu enin a han dak deuh ngei bawk a. A kut veilam dah dan mawlh sawn he lem design-tu idea that zia a lantir. Chhimbal color pawh a bei nalh fu, a hnuaia rawng bur a han dahte sawn he lem hi a tinung riau. Ral hla taka ni eng zung zam lo lang sawn a hun leh boruak an puang chhuak a. He lem ka thlir hian kan Pu Nova hun laia tui let kha min hriat chhuahtir a. Nova'n Pathian a rinna kha a va nghet tak em! Kan hnam nunah hian ze ngelnghet hi kan mamawh hle.

Tui chu a let mai si lo, khawthiang tak leh ni sa hnuaia lawng han tuk tluk tluk mai chu a hun laia mite tan chuan at thlak a tling awm e. An tia lawm, an nula rimna leh hnatawhnaah tlangval thenkhat chuan chhaih nawmnah nan hmangin, "Sema i pain enge a tih?" an han tia, kil khat atangin pakhatin "Lawng a tuk" an lo tifiamthu vel thin.

Tirhkoh Paula'n "Kraws thu chu ka zahpui si lo va" a lo ti a. Lal Isua ngei chuan keimahni avangin nuihzabur leh diriamna chu a lo tuar a. Thianghlim taka nung tura min kohnaah hian, khawvel mite tan chuan at thlak nihna pawh a ni mai thei e. Engpawh nise ngaihtuah chian chuan mitin hian mahni tan leh chhungkaw tan chhandamna lawng chu kan tuka. Thlipui leh ruahpui anga harsatna leh natna hri a lo len hunah mamawh leina tur kan neih theih nan leh nuamsa taka awm theihna turin nitin lawng kan tuk, Nova hunlaia mipuite ang tho khan. Mahse Nova chuan Pathian thu a ngaipawimawh hmasa. Engkim thlentir theitu chu Pathian a ni si.

Tin, hei hi thu dik tak a ni; "Pathian chu a thutiamah a rinawm." Ni an han en a, tui let theiin an ring lo, mahse Pathian thu chuan tui a let dawna lawng tuk rawh tih chu a sawi miau si. Engvang nge Nova khan hah taka lawng a tuk le? Pathian pawh chuan awlsam tein an tan tuilet dawnah lawng chu rawn pe mai se ni awm a nia. Mahse rim taka thawkin lawng chu a khawr puma, ruahpui a sura tuiletin lawng chu a vawrh sang ta zel mai han hriat chuan rinna nena a thawh rim rah chu a seng ta. Lalpa tana rim taka kan thawhna te hian thlipui leh ruahpui anga harsatnain min nuai hunah pawh min humhimtu leh min vawrh sangtu, kan lawmna tizualtu an lo ni ve ngei ang.

Rei deuh mahse nghak rawh phunnawi lovin, Lalpa thutiam chu a thlawn lovang.

Lalpa dan ngaihsan

Nizan chu mu miah lovin, he ka blog hi ka buaipuia, a template hi ka thlaka, computer zir ve lo nafam chu ka khal rei hle a, ka mitte hi a kham urh mai, a vai deuh reuh lehnghal. Tun hi khua a lo var taa, chawngzawng an rawn hram leh ta nak nak mai. Zing ni chhuak eng mawi leh boruak thiang tak min petu ka Pathian hming chu fakin awm rawh se.

Ka ril pawh a rawn tam ta hle mai a, mahse ka Bible chu ka keu va, Sam 119: 57-64 ka chhiar a, chang 59na "ka awm dante ka ngaihtuah a, i thuhriattir lamah chuan ka ke ka pen ta a," he lai chang hi a tha hle mai. Tin hei hi ka din hmun chiah a ni ve bawk a ni. Naktuk lo awm zelah hian he thu hi ka nihna a nih reng theih nan thlarau thianghlimin min kaihruai sela, a mi hruainaah chuan keiin zui ila.

Israel hnam hruaitute zinga Pathian tihtute khan Lalpa an tih a ni tih kan hmuh theihna awlsam chu 'a dan thu an ngaisang' tihah hian a ni. He kan Bible chang tarlan hi, Lal Davida'n Pathian dan a ngaihsan thu sawina a ni ber a. Sam kan chhiar hian Lal Davida nun chiang takin a hriat theiha, mi suaksual leh a hmelma te chunga Lalpa hnena a tawngtaina a tam hle a. Chang 61-naah, "Mi suaksualho hruihrualte chuan mi zem hlawm reng a; Nimahsela i dan chu ka theihnghilh lo," a ti. Hei tak hi keini pawh thlemna leh harsatna laka hnehna kan chan theihna tur chu a ni tia ka rilru ka hmin zan hnuah ti hian ka rawn type chhuak ta a. Ka post zawh veleh hian breakfast ka ei ve chauh dawn a ni.

" Ni khat atan ni khat hreawm a tawk"

Kan la ngai ve mahna

Sept. 18, 2008 zing dar 10: 30 a ni a, hmanhmawh takin inkhawmna chapel-ah chuan ka luta, thiante ho chu an lo kim thap tawh a. Thianpa Dinga pawh dawhsanah dingin kan culture day welcome speech neiin hun a lo hmang chiah a. Nizan lamah ka sermon tur ziah sa chu computerah chhu lutin, rilru helhhawlh nen mutmu pawh tuah tha hman lo ka nih a vangin mit siai deuh sun sun chung chuan biak inah ka computer ak hnawk deuh rap chung chuan ka lut a, tichuan ka awmna tur lam (stage)-ah chuan thut hmun ka rem fel ta nghal a.

He mi nia ka sermon hi ka tui bawk a, ka sawi rei ta deuh va, ka inthlahrung ang reng viau a. Mahse thahnem kha ka ngai ve tum hrang si a. Mi tam tak chuan i sawi tha khawp mai, fiam thute i thawha kan nui dar dara min ti a. Tirhkoh Paula'n, "keiin ka phuna, Appolova'n tuiin a chawma, a thantirtu chu Pathian ani," a tih hi a dik a ni. Tinungtu chu thlarau a nih avangin kan thu sawite pawh chu Thlarauvin a thawh dan ang zelin unaute tan malsawmna a ni thei chauh a ni.

He ni hi ka tan chuan theih nghilh a har viau tawh ang. Chutiang bawkin ka thiante tan pawh hian theih nghilh mai chi zawng a ni bik hauh lovang. A chhan chu he mi ni hian zaipawl mawi fahran mai kan rem tlat a ni. Chuta kan hlasak chu tuna ka rawn post mi "The heart of worship" tih hi a ni a. I ngaihthlak a tan ka han theh chhuak a ni e.

Lawmna

Lalpa chunga lawmna chu in chakna a ni si a (Neh. 8: 10).

Engvangin nge rim taka hna kan thawha, ni leng lenga hah taka hun kan hman thin le? He khawvelah hian mamawh leh duh apui kan va ngah tak em! Mihringin a dam chhung hun te hi engtia hman nge a thlakhlelh ber ni? Mihring thinlung pawh hian enge a zawn ber chu ni ta ang?
In leh lo, silhfen tha neih hi a ni mai lo em ni?

Kawtthlerah te kalin han zawt vel ta la eng tin lo chhang hlawm ang che maw. A nih loh pawhin natna khuma mu te leh tan ina tang te chuan engtin nge an chhan che. Damna leh zalenna pawh chu lo nei ta teh reng sela a tawk tawh e an tih mai i ring em?

Duh tin reng thing thei mi nei nung te hi an va nihlawh tak em! Chutiang ang hlawhtlinna chu neih ve tumin kan hmanhlel ve bawk a ni lawm ni. Nang leh kei hian chutiang ang hlawhtlinna chu tunah hian nei ve ta ila, ka duh tin reng ka nei taa thih ka hman ta e, kan ti duh maiin i ring em? Mahni hlawhtlinna leh thawhrimna pawh chenhman lova thih mai chu a va pamhmai dawn em ti raw.

Kan hlawhtlinna te chuan hming thangna min pe sela, a ber nihna te nen. Chung hlawhtlinna te chuan nawmsakna min pe bawk sela. Chung nawm sakna chungah chuan a aia nawm leh zualna pawh kan zawng leh zela. Aw... mihring thilung hi hriat thiam a va har thin em!

Mahse hei hi erawh ka hria, tawpin-tai nei lo mihring thinlung hian he khawvelah lawmna a zawnga, khawvel thil hian lawmna famkim a lehpek awm tawh chuang lo, a thinlung duh tawk tling zo a pe thei lo. He khawlvel thila lawmna hmua inngaite chuan an khawvel thilte a boral rualin an lawmna pawh a boral ve nghal anga, chu mai pawh a la ni lo, chutia an lawmna ber a bo tawh chuan lawm lohna chu an chanpual lo niin chu chuan thinrimna leh tahnaah hruai lutin mihring thilungin a mamawh ber a zawn a zawn chu hmuh phak a ni tawh lo vang.

Lalpa chunga lawmna hi mihring thinlung mamawh chhanna awm chhun chu a ni.