T. Melody ho hla atanga ka fan ram

(chhiar pahin han ngaithla vang vang teh le)

Hmanah chuan thenrualte nen hlim tea tual chaiin he khawvel pangpar mawi tak tak te leh thilsiam dangte thlira hlim pui em em thin, engmah enghelh nei lo leh ngaihtuah hah lo va, rilru hlim tak leh zalen taka hun hmangin, he ka taksa peng hrang hrangte leh kimtlangte chu darthlalang hmaah lungawi taka thlira hun rei tak tak khawhralin, mahni tawktea ka nihna ang anga induh tawk ve em em thin kha tunah chuan thil a lo dang lam zo ta!

Hlimnate chuan mual min liam san a, thlarau nun hial pawh a chau zo ta, mangangna ruamah chuan senlai nau anga ka tah tak hi. Sual leh thil bawlhhlawh tak vanga heng thil hi lo thleng chu ni se la sawi thu a cheng lo tur. Mahse ka chunga heng thil zawng zawng lo thlenna chhan hi Hmangaihna vang a ni tlat mai si hi a makin hriat thiam a va har tak em!! Theih ni sela aw chatuan atan thlam thimah ka hnawl liam tur.

*He ka taksa bung hrang hrangte lawmna leh hlimnaa hrui lut thintu ka Thinlung hi tunah zet chuan Juliet-i leh Romeo-a te tur chak tak chuan a fan zo ta! He tur hian thunun zawh rual loh vin mi a fan a, engti kawng mahin ka chelh zo mawlh si lo. Ka rilru mangangin a rum tak zet a, hlim lai ni zawngte pawh zamual an liam zo ta. Nang a hmangaih tlat che a vang hian ka duh tak he ka Thinlung hi tunah chuan ka tan hmelma hlauhawm berah a lo chang zo ta.

Chhungrilah ka tap tak zet a, nausen ang maiin ban zai ka rel thei mawlh lo. Lungchimtea ka thlir thin ka sakruang leh kimtlangte pawh chhawl ang an uai zo va, ka thlarau nun hial pawh chauvin a ngui zo ta. A hmangaih luat a vang che hian, thunun zawh loh he ka Thinlung hi ka tan hmelma nunrawng ber a lo ni ta si.

Tunah zet chuan he ka taksa lairil ber a luah fo pawh hi rem ka ti thlawt tawh lo. Ka tan hmelma hlauhawm ber leh nun rawng ber a lo ni ta si a. Ka rilru leh ngaihtuahna zawng zawng chu sawm khawmin, he ka hmelma chungah hian hnam len (chem hman) ka lo duh ta hial a. Tichuan ka rilru leh ngaihtuahna zawng zawng chuan he ka thinlung hi phawrh chhuakin khandaih hriam hmanga hreawm tinreng tuartirin hmelma hnawk sak ber chu thlan thiam hnuaiah zal turin a nawr liam ta. Aw.. ngaihtuahna ram hi a takah chantir theih ni mai teh se la aw…

Rilru leh suangtuahna ramah chuan ka thinlung chu famkhua ka lawitir ta ngei a. Ka duhthusam ber pawh tho leh tawh lo va chatuana chawlh hlentir vang vang chu a ni. Mahse maw,,, hmangaihna hi a va lo mak ngai em!!! Heti khawpa ka taksa pengtin leh thlarau nun hial pawhin a tuar hnu hian, Kei (thinlung putu) ngei pawh hi min zah zo lovin, a hmangaih em che a vangin i kephah hmaah kun turin a rawn vahchhuah leh tak hi, a va han chimawm tak em! “He ka Thinlung hi.”

THINLUNG THAWNTHU

1. He ka thinlung hmangaihtu che vang hian,

Aw ka rilru mangang a rum thin;

Nang hmangaih che vang hian, hlimlai zawngte’n..aw zamual min liam san ta,

Hmelma hlauhawm ber a lo ni..he ka thinlung hi!!

2. He ka thinlung hmangaihtu che vang hian,

Aw ka thlarau, chauvin a ngui thin.

Nang hmangaih che vang hian, sen lai nau vanga tah lai ban zai rel a har ngei…

Hmelma nun rawng ber a lo ni he ka thinlung hi!!

Bridge

Tanglaia run rem tir ka phal nem maw hmelma tan,

Khandaih hriamin aw ka hmelma chu fam ka chantir a;

Hreawm tin tawrhtirin, thlan thim hnuaiah zal turin ka hnawl liam ta,

Hmelma hnawksak ber a lo ni he ka thinlung hi!!

3. Chu ka thinlung famkhaw lawi hnu ngei chu,

Thawh leh zai rel renga'n a mawi lo;

Nang hmangaih che vang hian thawh zai relin i kephah hmaa'n a kun leh si/maw,

Hmelma chimawm ber a lo ni he ka thinlung hi!!

*Repeat Bridge & 3*