Zopui tlang leh Selesih: Aw Bethlehem!!

Nunhlui ngaih a sawt lo hmatiang i thlir ang u tichung zelin khawpui chhung han lut ila, khawilam a mi nge mipui chhiar sen loh an lo pungkhawm, hawina lam apiangah eng chi hrang mawi tak leh thawmhnaw tharin dawr hmunte chu a lo luah khat tlat mai. Nitlak hmaa khawbung ban hman loh hlau ni awm tak, mipui che vel ka tlir reng lai chuan ka hriat fo tawh thin rimawi chuan ka beng a luah khat ta tlat mai le. Ni lo, ka beng mai a ni lo, ka ngaihtuahna zawng pawh a luah khat zo ta vek mai a ni. A hun leh boruak nen lam hian chu hla chu a inchawih em lah tak a. He kumpui sul inher liam mek hian hmanah kan tuanna tlang leh mual zawngte, sikni eng lawma kan hlim laini min hriat chhuhtir lo thei lo a ni. Tichuan rilru ngaihtuahna ding tak nen keima hriat tawk lekin he hla hi ka sa ta ret ret a.

“kum sul liam hnu kan nun ngaih lai tho leh thin, Remna Lal pian hun Champha hmatianga kan thlir, SIK NI ENG mawi leh zan boruak thiang leng vel, ngaih lai ti zual tur reng an maw”! tiin

Rinna thla ni lo, ngaihtuahna mit-thla ka han zara, kan vangkuah leh sumtual ka han fang a. A dang lo chhing mitthla’n hmana kan tuanna leh hlim lainite. An nui ri leh fak zai ri thinlaia’n a cham reng si.

Daiah Tlangsamte an par vul leh anga, Sikni eng min lawmpui ve ni awm tak sirvate’n dai rawn chuanin; Lailen leh Chip, Tukhumvilik leh Tlaiberh hram rimawiin Bethlehem dai ni lo vin, kan vangkhaw dai ngei kha an thual leh hian ka ring thin.

Khatia kan zo culture leh mim kutte, kan mizo nula tlangvalte hlimna thin chawngchente‘n kan missionaryte hmaisa tuar lova daiah min relhruk san mek lai leh, a ram pum anga Kristiana chhal kan lo nih tak hnu phei chuan kan kut pui ber Kristmas chuan fanna ngaih loh bethlehem tlangpui leh a parmawi min thlirtir a. Zai ngaina mi mizo thinlungah hla thuin hmun a chan san em thin a vang chuan Tan tlang leh Lurh tlang atang pawh ni lo, Kalvary tlang atangin fanna ngaih loh ram min chuanpui a. Tlangsam leh Chhawkhlei parte thlawhkhumin bethlehem par thliah kan chak ta zawk si a. A tak rama kan hmuh leh kan chante en khum mai lova luhchilh zai rel hi thiam ve tawh teh ila aw. Ruahtham loh fak zai kan vawr pawhin chhingmitthla nen a tang kawp anga, zofate thinlung chu a nghawrnghing nasa zawk ngein ka ring. Hla tak ami, hmuh ngai loh mah kan kurpui theih chuan kan tlangsam par leh chhawkhlei par te leh par dang zawng pawh hi zofa ringtute tan pawh bethlehem par mawi takah an chang ve zawk tur.

Thanlai a chul tawh hnu Zopui tlang leh Selesih,

Bethlehem tlangpui ianga zofate thinlung tihnim vea’n;

Engan vala’n i sakhming reng chawia biahzai a vawr loh,

I sakhming chawi nan lelte a kiu lo em ni le?

Hmana lalawithangpa fam chang hnu kohkir ka nuam e,

Bungpui zara lelte mah a kiu pui si chuan;

Aw.. Selesih sangsarih vawi sang sarih kiupui ka nuam che!

Fanna ngai loh Bethlehem tlangpui;

Ngaia zofate min kurpui si chuan,

Hruaikhawmna hmun sangsarih tlangpui leh mual zawng pawh ;

Min kurpui leh la aw.. hla kungpui.

Zopui tlang leh selesih sangsarih chawia chawmkhuang chum ka nuam mange!

Hmmm...“Kumpui sul a lo vei chang hian lunglen a tho leh thin”

(Edited by blogger)

Pu Zorun (puia) comment ngaihnawm zet leh bengvarthlak tak hi heta pholan hi tul leh tha ka ti tlat mai. Hmanlai kohhran chanchin leh world history ropui tak tak zirin research te kan bei thina. Lunghlu chu vawkpui tan a hlu lo a nih pawhin, heng Zopui, Selesih leh kan chinchhuak hriat hi zofate tan lunghlu; kan ram, kan in kan lo tia chhal tur kan lo neih vena chanchin pawimawh tak a ni si.

"Hraite kal chhet chhet artui hlawh hlawh" tia tluk leh kaih fawma harsa ti taka chemsen lena luchhum ban chhum huama kan piputen an lo sah en dan hriat mai bakah, mi, mahni kea dinga, tlana, kal dem dem thei alo nih thlenga a inhriat chianna chu ama tan a pawimawh tluk zetin, kan piputen keipui sahauha an lo hauh; kan ram, mipui kal mek dan leh tlan zel dan turte leh fimkhur taka a kal dem dem hunturte min thlirtirtu leh chuta tana kan lung tilengtu pawh lo ni rawh se.

Pu Zorun (puia) comment: Zopui khaw chanchin hi Mizo history ah chuan sawi tur nei hmasa ber pawl leh pawimawh ber pawl niin ka hmu a. L.Keivom lehkhabu Bawktlang Thawnthu nen pawh khan a inzawm viau a ni a. Mizo Lal ropui ber zinga sawi Zopui khaw lal Lallula history ah nghet takin Zopui khua hi a bei tel tlat bawk a. Zopui zai an tih te pawh hi hmanlai zawk chuan Lallula zai ti pawh an awm thin reng a ni.

Zopui khua a chhuahsan hnu hian Bawk Tlang lamah awmhmun a khuar a, hei pawh hi hmanlai zawng kha chuan Lallula Bawk Tlang an ti deuh kher thin a. Awmhmun khuar hi inbawk an ti ve bawk thin a ni.

Thlanrawn ho a run hnu rei vak loah hian Zopui khua hi zawi zawiin an rauh san a. Chul ram a han ni mai tur chu an ui em em mai a. A pem tlai deuh phei chu an lung hi a leng lawk em em a, pangpar an hmuh tam ber te chu an zam ta emaw tih mai turin an vuai a, an ro a, chung an hmuh te chuan kan pangpar zam zo e, tiin an koh phah a, chu pangpar chu tuna Zamzo pangpar kan tih tak hming hi a lo chhuah phah ta a ni a. Ka pu khan a dam laiin a sawi nasa thin a. Amah hi Lallula tuchhuan 5-na a ni a. Ziaka kan lo dah thin lo kha chu a pawi ngawt mai.