He thil mak tak chungchangah amah leh a nu an kawmna mi pakhatin min rawn forward-a, a mak ang reng em mai a, ka blog-ah hian ka rawn post tawp mai a ni.
Hmeichhe naupang kum 13 mi chunga thil thleng mak tak mai hian ngaihven a hlawh hle mai a. Interview-na Halkha tawnga an ziak chu mi tam zawk tan hriatfiah awlsam zawk nan Mizo tawnga lehlin a ni:
A hming: Far Sung Hniang (Kum 13)
Pianna : Hakha
Tawng : Hakha, Falam, English
Awmna : Frederick, Mary Land
A nu : Biak Thluai
A pa : Ywe Han
(A nu hi thu zawh hmasak a ni)
Q: Engtik atanga hetiang thil hi lo thleng nge a nih?
A nu: August thlaa Saya Liliana camping tawp zana thil thleng a ni.
Q: Engtiang chiahin nge a thlen?
A nu: Camping tawp zan khan amah chauhin Isua lem a chang a, I fanu chu chutichuan a awm e tia min hrilh avangin ka va kal a. Ka va thlen chuan a lo zo fel tawh a. A thiltih hmutute chuan mak an ti a, a then an lo tap a. A lem chan lai chuan a rilru hi chiang lo hian an hre theuh a. Video te leh Cameraa thlalak an tum pawhin a lem hi a lang thei lo.
Q: Isua a taka i hmu an tih chu engtin a lan?
A nu: Naupang chu a tawng lo va, a rilru pawh a chiang lo va, Isua kros a an khenbeh lai ang chiah hian a awm a. A ban a phar a. Isua kros an khenbeha a ke a dah ang chiahin a dah a, chutih lai tak chuan pa hoin dah sawn an tum pawhin an dahsawn thei lo.
Q: A kuta lehkha inziak hi engtik atang khan nge a lan?
A nu: Chawlhkar hnih liam ta vel kha niin ka hria. Zing kan thawh veleh ka nu ka kut hi en mah teh, ka kutphahah hian lehkha a rawn inziak a ti a. A kut chu ka'n en thuai a. Mak ka tih em avangin kohhran upa 4 ka ko nghal a.
Q: Engtinnge a inziah?
A nu: A kutphahah chuan " I AM CAMING SOON, TELL THE GOSPEL, I AM REAL, PEACE, WISDOM" tih te ka chhinchhiah a. A dang chu ka chhinchhiah seng ta lo.
Q: I kuta lehkha inziak chu a awm ta lo em ni, kan va hmu lo ve?
Naupang: A duh hunah a rawn langa a duh hunah a bo leh mai thin a lawm.
Q: Lehkha ziak a rawn lan dawnin hriatna i nei em? Engtin nge i awm?
Naupang: A thak a, nat pawh a na deuh hlek thin.
Q: I taksa dangah te eng emaw thleng a awm em?
Naupang: Kar kalta khan ka nak a na a, chu a natna hmunah chuan ser hi a rawn awm ringawt a. A nat lai chuan thi a rawn chhuak a. A ser chu a chang leh a a bo leh thin. Ka keah pawh chutiang chiah chuan a awm thin bawk. (A nu chhanna) Nizanah khan a thiannu (Tedim) nen an inkawm laiin a kutah hian thi a rawn chhuak a. A thi hulna tur chuan ka lo bawisawm a, a thiannu chu a thisenin a far a, a tap chiam a, a pa hnenah a tlan haw nghe nghe.
Q: Engvangnge i thiannu chu thinsenin a far veleh a tah a?
Naupang: Ka thisen a ni lo va Pathian thisen a ni. Nimahsela, kan hmu thei a, kan dek thei lo. Kan deh chuan mi a kang thei a ni.
Q: Nute, engvangnge i kuta lehkha a rawn inziah dawn hian mi hmuh lohna hmunah I kal thin?
Naupang: Pathian hmel chu kan hmu thei lo. A hmutu chu an mit a del ang.
Q: A inziak lai chu i hmu em? Pen nge a hman a, i thahrui?
Naupang: A ziaktu kut chauh ka hmu. Vawi tam chu ka hmu bik lo. A ziahlai chuan ka mit hi ka meng thei bik lo.
Q: Eng tawngin nge a inziah?
Naupang: Greek tawng te, Israel tawng te, leh China hawrawp ang deuh te in a inziak thin a. Ka hriat thiam loh avangin ka tawngtai a, Sap tawngin a rawn inlet leh vek thin.
Q: Thil dang hmuh emaw, hriat emaw te I nei em?
Naupang: "Nangmah ang hi khawvelah hian an piang ngai tawh lo vang. Nang hi a tawpna I ni. Tunah hian mi tlemtein an hria a, nimahsela tun hnuah chuan mi tam takin an zawng che ang a, hmuh che an la rawn tum ang" min ti.
Darkar khat chuang zet kan inzawh hnuin hawn kan tum a. Chutih lai tak chuan a kuta lehkha inziak chu a rawn lang leh a. Fiah lo reiruai hian a lang a, a fiah telh telh a. Kan han en chuan " TELL THE GOODNEWS" tih hi a rawn lang ta kuau a. Keini thu zawttu te pawh mangang leh mak ti tak chungin kan tin ta dial a.
Engpawhnise, sawi tur tam tak a awm a, ti zawng hi ni rih phawt mai teh se.
Van T Cung
Maryland, USA
Kan Lalpa hian lo kal a tum hnai te pawh a ni ang e. Pathian thu ngaihsak hman lo ten i ngaih ven tan ang u.
2 comments:
Hmm.. amak angreng hle tak maia ! Hetia a changtuten chiang taka an sawi hi chuan han awih loh ngawt theih ani bawk si lova.
Engpawhnise, kan Pathian hian engtik hun ah pawh, tute kaltlang pawn ' miracle' hi chu a lantir thei reng tih chu phat rual ani lo !
A ropuina puanchhuah nan hmang mawlh te se !
Thil mak tak chu a ni.
Post a Comment