Chelh Din Zawh Loh Hun

Tunlai naupangte chu aircon hnuaiah video game hmangin in do lem an zir a. Kan naupan ve lai chuan ek vung kan lai a, sephung (chep) kan lai chhuak a, ram hnuaiah sai rawkherh nen kan in do fiam thin a. Tunah chuan in tam takah sephung laihna hmanrua ‘Tuthlawh’ hmuh tur pawh a awm ta lo. Kan sitting room-a kan hun kan fate infiamna te hi a va changkang tawh tak em! Kum tam pawh a la vei lo, Ipte-pui nen chemtum huma ram hnuai lam pana feh chhuak thinte khan tunah chuan Computer (laptop) ak-in an vei ta ther ther mai le! Kan vanglai huna mawi titaka kan lo hak leh inchei duh dan te, biak in inkhawm dan hmang te chu a hmanlai min tihsak zo ta. He khawvel inher danglam chak tak, thil thar pawh rei thar hman lova an hlui zung zungnaah hian; Hun inher danglam zel chuan thil hlui ang maiin minher liampui ruai ruai mai a nih hi. Thang tharte hian an vanglai hunte hi kohkir leh theih an la chak ve ngei ang. Mahse, panlai hun te, vanglai hun te chuan zamual an liam san ang a. Rilru leh mitthlaah erawh a cham reng ang a, a taka chantir leh theih tawh lohvin thawnthu angin boruakah an tham ral ve riai riai dawn a ni. Kum hlui liam mai turte sawn lung a va tileng tak em! Kan hun tha leh hlim lai ni te hi,,, aw!! Joshua’n ni a au ding ang khan chelh ding theih ila aw!! Mahse, mahse, chelh din zawh rual loh hun hlu tak chuan min liampui mek a nih hi.

Hmanah chuan thiante nen hlim takin, khawlaiahte pawntovin kan chai thin a, thawmhnaw balh leh fai lam pawh ka ngaihtuah lo. Hlim taka hun ka hman theihna tur chauh ka ngaihtuah thin. Thlaksik rim a rawn nam a, zing tlan (PT) pahin zawngtah bilbolawk kan zawnga, daia kan vai thang kam kan va en a, Zuchang a pa tiltawlh dul var huar mai a lo awh changte khan kan va hlim thin tak em! Kawr thar nei zen zen lo kan nih vang nge Kristmas kawr thar te kha a mawi chungchuang bik hian ka hre thin!!! Balloon ringawt pawh kha kan hlimpui em em zawng a nih kha maw. Zan lamah kan pontova “pang aw inzial inzial,” te, “kha laia thing tu bo bo kha tu ni maw?” te, “indutbur chhuih” te a tawpah “tin dialah tin dialah….mahni in lam hawi theuh va,” tia hlim taka kan han inmangtha sang sang mai te kha, her chhuak leh tak ang maw? Teuh lo mai, a her chhuak leh tawh ngai lo vang. Khang hunte khan tunah zamual min liam san zo ta. Dawnkir chang hian lung zawng a leng mang e.
Kawlpui (kalay myo) Cinema hall-ah Cinema en uar lai a ni a, an chhuah tur hi motor-in Tahan lamah an rawn puang (Chaw-ngia) advertise thin a, an motor atang hian an chaw-ngia (advertisement)- na lehkha phek hi an rawn vawrh thla a, kan lo um chai chai thin a. Tum khat chu ka thianpa nen hian 007 James Bond-a film (Ha thira channa kha) an chhuah a, ke hlirin kawlpui cinema hall chu kan tlan thleng a. Cinema kan en zo chu zan dar 9 lai a ni tawh a, hawna tur nei lo chuan kan hawi hai ta der mai,. kan va han a mai mai tak em! vanneih thlak takin RTC motor haw tur hi chuan ve kan dil tawp a, RTC lane thleng kan chuang ve ta hlauh va. Kan thanglian chho zela Tahan-ah Video hall te an rawn uar tana, zan lama video hall tawt tak maiah nihawichi (nichiasih) chip chungin thlantla phungin film kan han en a, vai film sei tak tak kan han en a. Thosi leh khumfa tan chuan a man hla thei viau ang le. Khang hunte kha ka va ui tak em! Tun atan hian tangkaina an va nei tlem lawi si ve le. Thian kawm ringawta hun hman zawng, hmasawn a har dawn a lo ni. Tuna ka hun hman hi nakin lawka ka awm dan tur hriltu a lo nih hi.
Kan khual zinna khawvelah hian kan hun hi kham lo takin kan hmang theuh dawn si a. Engkim tan hun ruat a ni a, chu hun ruat chu ka tan a tlem emaw, a tam emaw ka tihdanglam theih a awm lo. Mahse, ka hman dan tur erawh ka kutah pek a ni. Chuvangin, midangte chhiar theih leh rah tlan theih turin ka hun hi thatna tirengin ziah khah ka tum dawn a ni.
Hun ka lo hman liam tak zawngte kha chilh khah leh duh mah ila, boruak chhilh khah tum ang lek fang ka ni anga ka buai thlawn dah ang e. Hun kal tawh chu thuam mawi tum lovin ka dah than ang a, hun lo kal tur chu tuna ka hun hman mek nen hian lo hmachhawnin ka chibai dawn a ni. Nakin hun atan tunah hian theihtawpin ka hunte ka hmang tawh ang. Tuna ka hun hman mekte hian hlawhtlinna din hmunah min hruai thleng dawn si a.
Tichuan nakinah ngaihtuah hahna rilru te chawlin, Krista leh ka then takte nen hlim takin kan lengza dial dial ang a, lungngaihna mittuite a luang tawh lo vang a, duhamna leh hmalam hun ngaihtuah hahnate chu virthli lengin a len bo vawn vawn tawh ang.
He khawvela kan hun tawi zia te, kan thiltih zawng zawng leh kan neih zawngte pawh rei lote atan mai an ni si a, kumhlun tur reng a awm lo. Chutiang, reilote atan maia kan hun sen ral zawng a pamhmai em mai, ral ve mai mai tawh lo tur atan kan hun hi i pe ang u. Hlu taka kan hman theihna awm chhun chu Lalpa tana hman hi a ni. Chu chu chatuan daih a ni. Tichuan chelh din zawh loh hun chu kan thlawh khum delh delh tawh ang.