Luke 2:25-32; John 20:29.
“Hmana miten hmuh an chak ni lawmawm hi, hmu lovin sang tam tak an liam ta”
Israel ten tihduhdahnaleh harsatna an tawh apianga an rilrua rawn thar leh thin, Zawlneiten an lo puan lawk, an beisei innghahna, an hrehawmna leh an phurrit zawng zawng ata chhanchhuaktu tur, dingdihlipa an lo thlir thin Krista chu hmu lova sang tam tak an liam hnuah, an lo rin dan ang lo tak mai leh an chan loh ‘khan’ atangin Pathianin a fapa Messiah ngei chu, Sualbawia tangte chhanchhuak turin a rawn tir ta a. Kristian sakhua a ropui bikna chu Pathian zawkin mihringte min rawn zawnna hi a ni a. Bo zawngtu leh mibo an inhmuhnaah chuan lawmna a thleng a. Mibo chu hruai hawn a nihin an in leh lo a rochan turte a hmuhin a lawmna a zual a, a ro te humhima enkawl turin mawhphurhna duhawm tak a kovah nghah a lo ni ta.
Bo zawngtu, nausen Krista hmutute nun atangin:
Sumeon-a: Pathian ngaihsak mi, Krista beisei tlattu, Krista chu a hmuh hma loh a thi lovang tia Thlarau Thianghlim hriattirna dawng a ni. Temple-ah a kal a, nausen isua chu a hmu a, lawm takin a pawm a. Hmangaih Pathian chuan amah beiseia kotute chu a ti beidawng dawn lo. Pathian ngaihsak lo, Biank in pawh kal ngai lo te nun ai chuan, Pathian ngaihsak, sakhaw mitha inkhawm thinte nun chu a awhawm tho tho. Kohhran hi A chenna atana din a ni a. he kristmasah hian sumeon-a angin Biak inah kal ve ila, Krista i beisei ang u. Campingna hmun chauhah Krista beiseia pianthar tum kan tam ta. Thlarau Thianghlim hriattirna leh tanpuina tel lo chuan ringtu a nih theih loh va, eng hriattirna te nge kan dawn ve tawh? Chu kan thil hriat (Pathian thu) chu keimahniah tihlan leh tihhlawhtlin a ni zel em? Mahni inzawh fo tur a ni.
Anni: Hmeithai pitar a ni a, Pathian biak in ngaina em emtu a ni. Tawngtai peih tak a ni bawk. Sumeon-a rual hian nausen Isua chu a hmu ve a ni. Pitar, Putar tawngtai peih takte chhungkua chu an nihlawh a ni. Biak in kal taihmakah thalai zawkte pawhin kan tluk loh an tam mai. An chak tawh lova mahni aiin mi dang chak/tha zawkah an ruat thei a, inkhawm leh tawngtai chu an rawngbawl ve theih tawkah ngaiin rinawm takin an hlen thin. Mawhphurhna hlen hi rinawmna a ni. Pitar putar zangkul khinkhente inkhawmna biak in chu inkhawm a nuam bik riau hian ka hre thin. Thalaite hian an ni hi kan hre chiang vak lo va, chak tak takin kan kalpel fua fua thin a, an hnen atang Pathian malsawmna tam tak chhiarchhuah tur kan nei a ni. Dam rei hi Pathian malsawmna a ni a, Lalpa tha tihzawng anga nu leh pa thuawihtute chan tur a ni.
Aw le, Sumeon-a leh Anni hian Isua an hmuh hnu chuan Pathian fakin lawmthu an sawi a, Isua chanchin (chanchintha) chu an puang chhuak. Keini Isua hmu tawhtute hian fakna, lawmthu sawina leh chanchin tha puanna kawng tam tak kan nei ngei ang; chung zinga ropui ber leh he Kristmas-a ka inchah duh ber chu “Pathian thu awih zel” hi a ni.
Beram pute: “Lalpan thu min hrilh lo thleng chu i en ang u an ti a. Tichuan an kal thuai thuai a.” Thu awihna hi a va pawimawh em!! keini zawng kan ringhlel thin a, kan muangchang thin. Setana chuan “nakinah le” tiin min thlem thin a ni. Thu hmanga inpuang thin Pathian chu tunah i hnenah a inpuang leh ta. Pathian Biak inah Krista chibai buk turin va kal ve rawh le. An hnena Pathian thu lo thleng awih turin an Beram venlaite kha an kalsan phal a ni tih hi hre reng bawk ila. Beram pute ang hian, a thu awihtute nun chu Lalpa chawimawina leh faknain a luang liam thin. He thuawihna hian, a thu kan awih ate (hotu) hnena inpekna a thlen thin angin, he Kristmasa hian inpekna nunah min hruai thei hram teh sela aw!!
Mifingte: An hruaitu arsi en lova an kal veleh mi tam tak (nausen) nunnain a tuar. An thil tihsual hi a va rapthlak em! Krista hruaina anga kal lo te nunah buaina te, inrem lohna te, hremhmun te a thleng thin. Kristmas hi pekna nun puan chhuahna hun a ni. Pathianin a fapa min pe, mifingten robawm hawngin thilpek an pe. Tunah i hun a thleng ve ta.
Thoma: Isuan, Thoma hnenah, “ I hmuh avangin I ring a, mita hmu lo va, ringtu chu a vannei a ni” a ti. Nang leh kei hian Krista chu mitin hmu lo mah ila, rinnain kan hmu thei a, chu chu Lalpa duh zawng tak a ni. Pathian chu fakin awm rawh se.
Lal Isua nen kan la intawk lo a nih chuan kumin Kristmas-ah hian Sumeona angin Krista beiseiin Biak in i pan ang u. Rinnaa Krista hmutute hian Krista chanchin chu hril zelin, lawm chungin Krista hnenah intulut thar leh ila, chu thuawihna (intulut) atang chuan inpekna nun chu I rahchilh ang u.
“Lal lungawi kum hun lawmawm chhandamna hi,
Keini zawng kan chan bik hi kan vannei hle…”
No comments:
Post a Comment