Rev. Jubilee Thanga
Khawvel hi varak tui anga bial mum, degree 23 leh a chanvea awnin darkar 24 danah vawikhat amaha vir chhuak a ni a. Tin, ni hi ding lam zawngin a hel map map maia. Ni vawikhat hel chhuak tur hian ni 365 a rei a, chu chu kum khat tiin kan ko ta mai thin a. Chutiang chuan nuna nei chi tam tak kan chenna khawvel hian chawlh lai reng nei miah lovin a her mup mup mai a. A pian tirh ata a her dan pangngaiin a her zela, a letling zawngin vawikhat mah a la her kir ngai lo a ni. Chuvangin, kan chenna khawvel hian hun thar zel a her chhuahpuia, hun kal ta lamah a lung a len lo hle. Hei hian khawvela cheng leh roreltu ber mihringte khawsak dan leh nun dan tur pawh min zirtir niin ka hria. Pathianin Evi leh Adama a siam ni ata kha mihringte hi hun tharah kan chuang kai zela, hun kal taah tumah kan let thei lo. Chuvangin Pathian ruat dana chawlh zai rel miah lova kal mek hun hi kan hriat thiam a tha. Hun hi tui luang ang hi a nia, chumi mila kan nun khawsak thiam loh chuan lungawina reng reng ka nei lo tih hi kan hring nun hman ral dan tur a ni mai. Mithiamte chuan, “hun kal tawh chuan thil tha lo min hriat fiah tira, tun hun hian insiam thatna hun min pe a, hun lo la kal tur chuan a rah min seng tir dawn a ni,” an ti bawk.
Chutiang chuan mi hring chanchin (Human History) kan tihte pawh hi thil dang chiam a ni lova, hun kal tawha mi awm dan leh khaw sak dan mai a ni. Chutiang chuan mi tin, chhungkua tin, chi tin, hnam tin, leh ram te hian chanchin (history) kan lo nei vek a. Chu history chu a tha zawnga hmang thiamte tan chuan finna leh hlawkna a ni bawk. Hun kal taa thil lo thlengte en let thiam chuan chhiatna lakah te, buaina lakah te, sualna lakah te an inveng him thei a. Chutiang mi chu Baibul chuan mi fel, mi fing tiin a sawi. Nimahsela, history hi a ni lo zawnga kan hman erawh chuan harsatna, buaina, leh sualna kawngah hruai bovin a awm theih bawk. Chutiang mi chu Baibul chuan mi a, mi sual tiin a sawi. Chutianga mi fing (fel) nihna leh mi a (sual) nihna thlentu chu mitin tana Pathian thilthlawn pek HUN hi a ni tlat mai.
Tunlaia Myanmar Mizo Kristiante khawvel ka thlir hian chung pikna-in min zel a. Myanmar Mizote harsatna kan tawh rei ber chu hnam nihnaa kan buaina (identity crisis) hi a ni. Tawng khat hmang leh inti Kristian (thlarau mi) ni si hian kan insuihkhawm thei tlat lo mai. Chu bakah kohhran/pawl inlak hranna a lian lu tukte hian buaina min thlen mek bawk a ni. Chuchuan unaute zingah inpum khat theih lohna te, inrel chhiatna te, inelna thiang lo te, sawrkara inkhingna te, leh inmawhchhiatna te a thleng a. Heng zawng zawng hi Setana mizia, Pathian dan pawn lama awm mizia sual vek a ni. Hetianga harsatna kan tawhte hi Pathian thilthlawn pek kan HUN chan theuh kan hriat thiam loh vang leh kan hman thiam loh vangte ni hian ka hria. Chuvangin tunlai khawvelina hun a rawn her chhuah dante hi Mizo Kristiante khawvel thlir fiah nan hman kan tum dawn nia.
1. Globalization khawvel thara cheng kan ni tih I hria ang u.
Tuna kan hun hman mek hi Globalization hun a ni. Globalization tih hi hrilhfiah dan hrang hrang a awma, mawl taka sawifiahnaah chuan khawvel ram hrang hrang hi khaw te pakhata siamna a ni ber. A awmzia chu khawvel hi tuifinriat leh khawmual zau takin a inthen a, chutah chuan ram hrang hrang ramri inthenna a awm leh a. Chutianga inthenna zawng zawng chu awm tawh lova khawvel pumpuia ram leh mipuite hi khaw te pakhata cheng anga siamna a ni. Chuchu tuna kan khawvel hman mek a ni a. Tehkhin nan, America rama New York leh Los Angel khu khawvel khawpui nia ngaih a ni. A chhan chu khawvela hnam tin, chi tin awm khawmna a ni bera, American kalchar lalna ram a ni tawh lo. Chutiang bawk chuan American eiin, silhfen, music, leh hmanrua tam tak hi America kal miah lo tan pawh Yangonah hian kan tem thei tawh. Tun hma chuan China chaw dawr (China Restaurant) hi Yangonah awm chhun a lo nia, tunah chuan Europe, American, Thailand, Japan, Korea, Vietnam, India, etc.. a awm vek tawh. An rama kal ngai miah lovin an eiin kan tem ve thei tawh. Chutiang zel chuan ram pawh hi mahniin a ding thei lova, ama region chhunga ram dang nen thawhho a ngai angin khawvel pum huapa UN nen pawh thawho a ngai vek tawh. Chuvang chuan ram tinah Embassy indahin palai an nei vek a. Chutianga tel duh lova, in la hrang ramte erawh chuan retheih leh thlak hniam chiah kan hma bak.
Hei hian khawvela mihringte min chawhchawrawi zo vek tawh a. Mi pakhat tan ram pakhat mi (citizen) nih aiin ram tam tak mi nih a tha tawh zawk. Ram 2, 3 mi nih chu mi ropui leh hlawhtlingte in elna a ni tawh zawk. Mizote zingah pawh ram dang mi nupui, pasala nei kan awm ve ta nual maia, a lawmawm khaw mai. Chutiang zel chuan ram pakhat chhungah pawh hnam leh chi te tea ramri neihin (state, division, province,etc..) awmzia a nei tam vak ta lo. Chi 2, 3 nih theih chu a tha zawk tawh. Chuvangin, hnam, chi leh kuang inlakbingna hi Globalization nen a inmil tawh lo. Chutiang rilru chu khawvel huap pha lo khaw te rilru a ni tawh zawk.
Tin, tunlaia mipui tam zawkin khawpui lam kan pan vek tawh. Globalization hian mihringte hi a huhova cheng turin a hruai tlat avangin, khaw hmun nuam leh changkang zawkah mi kan tla fun tam tawh zawk. Mithiamte chhut danin kum 2025-ah chuan khawvel mipui 80% hi khawpuiah kan la awm vek ang an ti. Mizo khawpui tur atan hian Kualalampur (Malaysia) te, Meryland (US) te, Singapore te pawh rei lovah kan la hmang zawk mai thei a ni. Tin, Khawpui nunin a ken tel chu inchiahpiah nun a ni a. Hnam, chi leh kuang-in awmzia a nei tlem telh telh a, kan chi leh kuang te, thenawm te ai mahin kan hna thawhna lama mite nen kan inhre chiang zawk thin. Chuvangin hnam dang nena inneih pawlhte hi sual lutukah kan ngai mai tur a ni lo. Amaherawh chu sakhua inang (Krsitian) ni thei se. Hnam inneih pawlh hi Globalization-in a rawn her chhuahpui a ni miau si a.
Chutiang khawvela cheng kan nih avangin chi leh kuang lama inlak bing emaw, khua leh tui zawnga inkhawm bik emaw hi hnam puitling nun zia a ni lo. Kan khua leh tui, hnam, chi leh kuang tana thahnem ngai tak tak kan nih chuan kan hna thawh leh zirna lamahte mi hlawhtling nih tum hi a fuh zawk. Chuchu hnam leh khua hming chawimawina a ni, hmangaihtu dik tak awm dan pawh a ni. Tichuan, hnam leh khua hmasawnna leh changkanna turin kan inpe thei chauh vang. Chuti ni lova, mi pawi sawi zawng leh mi dangte diriam/ hmusit zawnga kan inlakbing a, mahni engkawngah mah hlawh tling taka thawh nei si lo tan chuan mi hnawksak nihna mai a ni.
Globalization hian mi puitlinga a ngaih chu mahni thiltih kawnga mi thiam tak (professionalism) leh mi hlawhtling (success) a nia, mitin an thawh rah ena hna pek leh hlawh pek an ni. Mi thiam lo leh taima lo tan chuan hna hmuh a har sa. Chuchu tuna khawvel inrel bawl dan a ni miau si a. Kan duh emaw, duh lo emaw kan zawm a tul tlat mai. Chutiang khawvela cheng kan nih tlat avangin Mizo Kristiante chuan kan hnam nihna te, kan khua leh tui te chhuanga inlak hranna rilru neih a hun tawh lo. Mitin, chitin tana that chhuah leh mi rilru hneh zawnga kan hna taima leh rim taka kan thawh a hun tawh. Khawvela hruaitu ropui nih tling pha John Maxwell pawhin hlawhtlinna thuruk a sawinaah, mitin chunga ang khata zahderna rilru dah theihna leh mahni tih tur huai tak leh taima taka thawh niin a sawi. Chu chu mi rilru hneh theihna bul ber niin a sawi bawk. Chuvangin Mizo Kristian thangthar ten rilru zau tak neiin kan tuina zawnah theuh thiamnna leh taimakna kan chhuah a tul. Chutichuan, Globalization lawngpuiah hian khawvel tuipui fawn vela kan him theih nan kan chuang thei chauh vang.
2. IT khawvel hmanrua hmang kan ni tih I hria ang u.
Tuna Globalization khawvela kan nun khawsakna atana hmanrua tangkai ber chu IT (information & Technology) hi a ni. Information hian chanchin leh thu hla lam inhriattirna lam a kawk a. Chutianga inhriattirna hmanrua tha ber chu technology atanga siam chhuah computer leh mobile hi a ni ber awm e. Chu bakah electronic thil tam tak pawh technology nen kawpin engkim siam thar vek a ni tawh a. Tunlaia Mobile ho phei chu computer ang chiah hian engkim a tih theih tawh leh nghala, computer aia hmang an tam tawh a ni.
Hetianga IT hmanrua tha tak tak rawn chhuak hian khawvel hi a ti zim tawh em em maia. Baibul thu ang khan, lang lo tura thuhruk a awm thei lo a ni ber tawh. Ram khat chanchin chu sawi loh mimal chanchin pawh hi a chhia emaw a tha emaw khawvelah second khat chhungin a darh vek thei tawh a ni. Chuti chuan internet lama inbiak pawhna hi a chakin a zalen ber tawh a. Email chu sawi loh, group mail te, website te, news te, leh etc.. hi a zalen em em mai a. Ramri tiam chin awm lova mahni duh duh sawi leh ziahna a ni deuh ber tawh a ni. Chuvangin website-a thu leh hla hi a chhia emaw a tha emaw feeling pui vak chi a ni lo. Internet hian kalchar leh literature hran a nei tlat maia, a luh chilh ve lo tan chuan mual bova bo awl tak pawh a ni. Internetah chuan serh leh sang pawh hi a awm lo emaw tih hial theih a ni. Chutianga a zalenna chu kan duh lova, kan pawm thei lo a nih chuan keimahni kan inti hah thlawn mai mai a ni ang.
Mizo tawngah chuan “zawnga hmai mah zah a na” tih a ni a. Mahse IT hunah hian chuan hmel pawh inhmu ngai lo, khua pawh inhre lo, chhungkhua background pawh inhre si lovin internetah kan inkawm a ni ber mai a. Kan tual lenna khawvel a sang lu tuk hi a mangan thlak zawk thin a ni. Kan duh tlan pawh ni lovin, Facebook-a thian pakhat kan siam tawh chuan a thian chhawng engemaw zatin min lo hre ve nghal maia. Thiante inkhawmna pawh private takin a tih theih lova, a duh apiangin an lo chhiar thei vek ta mai si. Hetiang ang ema inkawm dan zalen hi mizo khawvelah tun hmain a la awm ngai lo. Hmai chhanah chuan pi, pu, u, pa tia inzah derna tawngkam mawite a awm a, internetah erawh chuan a awm thei tawh lo. Chutianga zalenna chu hre thiam lova khaw khat, hmun khata inkawm dan anga inkawm kan tum phawt chuan internet khawvela cheng ve loh mai tur a ni. Interneta mi tawng kam kan tuar thiam loh fo dawn chuan en loh mai, ziah ve loh mai hi kan tan a him zawk. Kan duh emaw, duh lo emaw IT khawvel hian min hruaina a ni tlat si a.
Hei hian tunlai Mizo Kristiante khawvel tharah min hruai a ni ber mai. A tha zawnga kan hman thiam erawh a tul. Hetianga zalenna hi kan thlarau nun leh khawsak dana hma sawnpuina atana kan hman thiam a tha. Tin, khawvel ram hrang hranga Mizo Kristiante inpumkhatna leh inunauna tha zawk kan neih theih nan hmang thiam ila chuan a hlawk thlak hle ang. Chumai ni lovin, chawimawi tlak leh entawn tlak kan hnam zinga mite inhriattirna leh infuih tawnna hnamrua atan IT hi I hmang thiam bawk ang u. Chutiang chuan thangthar ten hman ngei pawh tum ila Lalpa malsawmna pawh Myanmar Mizo Kristian ten kan dawng ngei ang.
3. Khawvel tharah hian thil dang zawng aiin kan Kristianna hi I hria ang u.
Myanmar Mizo Kristiante hi khawvela hnam tlemte zinga thurin leh kohhran/pawl inthen tam ber kan ni mai awm e. Hei hi kan hnam chak lohna leh kohhran hmasawn loh phahna pakhat niin ka ring. Heng hi ngaihtuah chian chuan mahni theuhvah kan dik vek a, mahse mi tana hnawksak leh pawisawi zawnga thusawi leh zirtir a tha kher lo. Tuna khawvelin a kalpui mek Pathian thu chu thuam thar lehna (Transformation/restoration) a ni. Tun hma ang khan mi chal delh zawng leh do zawngin kan uar bik Pathian thu (doctrine) sawi vak vak a hun tawh lo. Pathian thu mawl leh fiah taka mite nun Krista anna kawnga siam puitlin hi world evangelization thu ken chu a ni. Chuti lova mahni duh zawng zawnga Pathian thu her pui vaka, mite awi tura zirtir chiam chiam hi kal sualna pakhat a ni tawh zawk. Chuvangin kan Pathian thu sawi leh zirtir dan te hi kohhran vangtlang leh Kristian khawtlang tana rah seng tur zawngin kan sawi a hun. Doctrine inang lo mah ila, Kristian nun vangthlang thatna tura lentlang rual taka Pathian thu sawi leh zirtir kan uar a tul. Chutilo chuan Pathian mi kan chhuah tamna apiangah kohhran leh pawl kan keh tam mai dawn a ni.
Tunlai hian Myanmar Mizo Kristian ten Krista leh a kohhran thianghlim mission rawngbawlna buaipui aiin chi leh kuang thu kan buaipui tam zawk em aw ka ti. Kan hnam, chi leh kuang, leh kohhran hi Krista atanga chhuak hmangaihna dik tak nena kan enkawl a ngai. Chumi piah lamah chuan Krista Chanchin Tha la hre ve lote hnenah mission rawngbawl hna kan buaipui a ngai bawk. Chuchu ram leh hnam hmangaihtu Kristian dik takte awm dan tur pawh a ni. Khawvela mi te ber pawh ang khata hmangaihtu Pathian nung betute kan nia, engah nge Kristian unaute zingah pawh hmangaihna leh remna hi a len theih loh? Rawngbawltute leh kohhran hruaitu tam takte hian Pathian rawng bawl lovin, hnam, chi leh kuang rawng kan bawl zawk a ni lo maw? Baibul chuan, “Lalpa rawng bawl duh lo ram leh hnam chu an la boral ang” a ti a (Isaia 60:12). Chuvangin hnam, chi leh kuanga buai chi rawngbawltu, pastor, evangelist, leh upa/ hruaitu kan nih chuan inchhira Pathian hnena ngaihdam dila, sim vat a tha. Chutianga kan tih theih loh chuan rawngbawlna atanga ban vat a tha. Pathian rawng bawl lova khawvel rawng bawl kan nih chuan Pathian thin urna chhungkua, kohhran leh khawtlangin kan tuar phah dawn. Lalpa thin urna chu tuma thelh theih a ni dawn si lo.
Chuvangin kohhran mipuite pawh hian rawngbawltu leh kan upate khawvel thila an inhmang lutuk a nih chuan an chungchang rel fel vat mai tur. Mihring thin urna aiin Lalpa thin urna hi kan hlau zawk tur a ni. Hnam kam dinna leh hmasawnna bul ber chu Krista Isua hi a ni tih kan hriat a tha. Kan hnam zinga Krista hnung tih tak zeta zuitu kan tam chuan Lalpan min chawimawi anga, hnam dangte tih leh zah kan hlawh zawk dawn a ni. Chuti ni lova, hnam leh kohhran hi Lalpa tel lova politic zawng taka kan buaipui chuan kan la boral vek ang tih a phan awm hle.
Mizo pipute sulhnu kan neih ropui berte chu Khampat Bungpui leh Rih Dil hi a ni a. Ka naupang laia sava veh nuam ka tihna ber chu Khampat Bungpui hi a nia, ka puitlin hnua ka khual zin kawnga hmun nuam leh mawi ka tih ber chu Rih Lipui hi a ni bawk. Pathian khawngaihna zarah Europe, UK, US, Asiaa ram 12 vel ka thleng ve tawha, ka rilru min la hneh ber hmun chu Khampat Bungpui leh Rih Lipui hi a ni. A chhan chu keimahah hian pipute rauvin thu a sawi thuk tlat mai. Ka fiah ve dan chuan Khampat Bungpui hi pipute insuihkhawm tura thu thlunna hmun niin, Rih Dil hi pipute thlarau intawhkhawmna pialral kal kawng a ni. He hmunpui pahnih hian mizo cultural value (kalchar puithuna) a ti famkim thei chauh niin ka hria.
Pathian khawngaihna zarah ka pa Lusei leh ka nu Zahau atanga piang ka ni a. Lalpan nupui Hualngo nu fel tak min pe chu Lalpaah ka lawmna a zualin ka thlamuang thin hle. Ka nihna hi ka ngai hlu vek bawk. Nimahsela, chung zawng zawng aia ka ngaihlut zual zawk chu Kristian, Pathian fa duh tak, van khua leh tui mi ka nihna hi a ni. He khawvela ka nihna zawng zawng hi chu kum rei lovah mual ka liam san mai dawna, Kristaa ka nihna erawh chuan chatuan thlengin min tinung dawn tih ka fiah chiang si a. Chumi hre fiahtu tan chuan Kristian ka nihna aia chhuan tur hlu leh tha ka hre lo. Ram hrang hranga ka zinna mi ka zawh apiangin Muslimte chuan an hnam, chi leh kuang nihna an sawi tawh lova, an Islam nihna chauh an sawi thin hi an en tawn tlak a ni. Keini Pathian nung neitute phei chuan kan Kristianna hi kan chhuan ber tur a ni. Chuvangin, Myanmar Mizo Kristiante hian thil danga kan nihna zawng aiin Kristian kan nihna hi chhuangin Lalpa rawng chauh I bawl ang u. Chuchu kan hnam tan damna leh hmuingilna bul a ni.
Tlipna
Myanmar Mizo Kristian ten kan ram leh hnam kan hmangaih tak tak a nih chuan Pathian hun ruat dan hi hre thiamin, pakhat leh pakhat chungah inhriat thiamna leh inleinatna I nei ang u. Globalization khawvela IT a tha zawnga hman thiam I tum bawk ang u. Tin, kan hnam lungphum hi thil dangah zawng lovin Lalpa leh a dan pekah I zawng zawk ang u. Tichuan, kan awmna hmun apiangah Ama rawng bawl tlat ila, kan ram leh hnam hi Lalpan a la chawimawi ngei dawn a ni.
No comments:
Post a Comment