Hmangaihna

Kan hmangaihna hi eng ang chiah nge maw a nih le? Ngaihtuah zui atan.

Hmangaihnaah chuan hlauhna reng a awm lo: hmangaihna famkimin hlauhna a hnawt chhuak zawk thin a ni, hlauhnaah chuan hremna a awm si a; a hlautu chu hmangaihnaah a la famkim lo a ni. John 4: 18.

Nghilh Zai Ka Rel Thei Lo

Chhiartute hnena hriat thiam dilna: Mi tam takin an nun zin kawng chanchin ngaihnawm tak tak leh ropui tak tak an ziak laiin kei zawng thu lungchhiat thlak leh lusunna ka ziah a tul ta si a, chhiar a hreawmin rilrute a tihnawm loh phah chuan in mi hriatthiamna ka dil e.

Ka lenrual lungduhten min sel lo se, thlafam ngaia ka tah hril ve imaw zaleng tawnah:

Ka hmangaihna zawng nen lungchimtea ka lawm lai chein,

Min liamsan a tul si maw!!

A va rei lo em bawihte tia ka lawmlai nite;

Tuanna tlang dan vanga lunglen pawh a nat vei nen,

fam ngaih vanga lunglen ka tuar zo dawn nem maw...

Mittui bual hnu i chunnemi lehkha a lo thleng a, tihian a ti:

Lenrualten nemten zai an vawr e.. kan run chhungah,

An sawidial e zingtian bawar a pau hma loh!!

Kei ka tiam lo ve zingtian bawar zai ri hriat zawng;

Ka thlir ning lo'ng a sakhmel piallei thima lawi tur chu.

I tana ni hnuhnung ber kha koh kir theih changse,

Chhingkhual tuan zai rel lo vin ka awi ang che ka tanglai-ah!!

I hmui phun chuan a spell maw ka sakhming "Pa pa" tiin;

Ka tuara'n a na lua e, i ka ka chhawn lohva fam i chan.

Ka thlir nin loh ka dawn tuaite,

La pawlh nut loh i hriatna thinlung thianghlim mawi tak chu;

Petrol-in a chiah zawp ta..!!

Sappa sen mei laitha chakna, i tan famkhua lawitirtu.

Lo tho leh la ka tulh nang che Fiara tui,

I chhia leh tha hriatna mawl thianghlim tak chuan;

A thliar thiam mawlh hrih si lo, Siktui leh Petrol!!

Lalpa Isua iangin i hnuk chah ni chuan,

'Ka tui a hal,' tiin dangro vin famkhua i lawi an ti.

Dawnkir chang hian kei ka tuara'n a na a sin,

Lairilah min fan ka dang zo lo chhing mittui;

Hnemtu ka tawng lo ka tuanna chhingkhualah!!

Famkhua i lawi ni khan ka au che zan varin.

Ka thlir reng e chungtiang si-ar zawngkhi,

Tahkhian a leng an ti ka lawm lai Dorothy Lalramthari;

I lo hmu em Lalpa ka hmangaih kha!?

Lo tulh nang che lunglohtui chatuana kang lo tur chu.

Hun inherin kum sul a vei,

Kan nun a dang lo, nang ngaih ban zai rel a hnehin;

A zual zel si thin laiah nghilh ni i awm lo!!

I chun leh zua min tiriang sei thlawn mange.

***

Chung khuanu ruat dan rual awm si lo, i chungah tlin lohna kan neih emaw, i nunna kan chelhdin theih loh a chungah min hre thiam ang che aw "Mate", mihring kan theihna a tlem lua e. Mahse amah ringtu a kohva te tan chuan an thatna turin engkimin a thawh sak thin. Tunah he thu hi hrethiam hrih lo mah ila, min la hriat fiahtir ang, Lalpa zawng rinhlelh rual a ni lo ve.

Nang zawng Lal Immanuela ang chhungah tuihal natna rengin a chimphak tawh lohnaah i him reng ang chatuanin.

Min lo biak la kan then takte, Hlimtea kan intawh leh nan ka Lalpa ke bulah chuan min lo kun sak ve ang che aw. Ka rawn zawng zel ang che Angel var rual zingah. Min lo hmuak la famkhua ka lawi hunin Van ram kawt chhuahah chuan Beram no chu fak dunin.

(He thu hi ka fanu a boralna champha vawi khatna kum 2006 nov. 20-a ka ziah, Huivalenthiam group mail-a ka post a ni).

Ka hla phuah, la siam rem tura ka tih a nia (thianpa Dinga'n a sa chhin a nih hi)

Hmangaihna hi

Dar chu tum rik a nih hma chuan dar nih a tling zo lo va. Hla pawh hi sak a nih hma chuan hla nih a tling zo lova. Chhan let a ni emaw ni lo emaw hmangaihna chu a danglam chuang lo, mihringte thinlung erawh a dang lam thin.

Chutichuan I Kor. 13-ina a sawi ang hian..

Nuihza

Lunglen leh khawharnain min bawm lai te hian nuihna tur zawng ila, min chhawk zangkhai deuh mahna maw!

Nula inti sap pawh khan buh a thlei a..
Nula: Maaa... a buhkem hi ka delete dawn em?

(A nu lah duai bik lo) Nu: Mami... thlengkumah khan install ta che.

Tualte vanglaia khawvawh lai tak tak chuan Naupang tahbelhho mittui pawh, rial angin a tla ri keuh2.
Tui chhuanso pawh kha a khal-lum-pup chauh. Antam tlak tuihang te kha a keihin an keih vel.

An vawihte pawh kha a khal veka, vawih ngah deuh chuan an tham chhuak tawk tawk mai.

Thal khua a han lum leh tak tak chiah mai chu khawvawh laia an vawih kha a rawn puak keh tan a, an khawtlang chu a bengchhengin, a uih hmun mai, an ti.

A lum lutuka kawr pawh an ha peih lova, nula pakhat inkhawm kal pawh a kekawrte a chhipchhuan a, a thianten "i va inchei ve" an lo ti vel.

Ka jung pet pet

Tun hnai chanchin lawrkhawm

Thian thenkhatten news chhiar an chaka, lakhawm leh zawr mai ang.

US President thar tur, Barack Obama chuan Iraq rama an sipaite hnuh kir a tiam a, Afghanistan rama Al Qaeda chhut chimih leh Cuba rama US lung in, Guantanamo Bay khar a tiam bawk. US sum leh pai dinhmun tlahniam tun din leh chu a hna hmasa ber tur a ni a ti. A tan hnathawh tur a tam em avangin chawlh hahdam hman a ni dawn lo tih a sawi bawk. ---..Xxxxx..

Peoples Right to Information and Development Implementing Society of Mizoram (PRISM) chuan kar kal ta khan Political Party lian 3te, Election Manifesto chu mi thiamte ruaiin chik takin an bihchiang a, PRISM hian he inthlanna atanga sorkar siamten an Party Manifesto tihlawhtling turin sorkar thar chu a nawr zui zel dawn a ni. He Manifesto bih chhianna inkhawmah hian mithiam thlan chhuah - Prof. Tlanglawma, Prof. Laltluangliana Khiangte, IAS officer hlui, SL Sailova, Prof. C.Lalkima leh SOSA hotu dangten manifesto hi an bih chiang a ni.
———-

Kumin hi Russian Federation leh India ramin ‘Year of Russia in India-a an puan zulzuiin Russia rama Ryazan State I.P. Pavlov Medical University-a doctor zir tur, mi 8 leh Dagestan-a Technical Engineer zir tur 1 thlan chhuahte chu thlah an ni. He deptt. Director, Dr.H.L. Malsawma chuan Russia sorkarin Mizoram atangin zirlai 200 thawn phalsak mahse, heti zat zirlai hi an hmu zo lo tih a saawi. Heng zirlaite hi India ram an chhuahsan hma zawngin EDURUSSIA-in an buaipui ang a, Russia ram an thlen hnuah chuan Russian Education Department RACUS-in a buaipui ve thung dawn niin sorkar thuchhuahin a sawi.
—————-

UNICEF, NRHM leh MSACS-te tang tlangin Mizorama Integrated Counseling & Testing Centre (ICTC) hnathawh an thlir let a, ICTC kalpuitu District Hospital leh CHC-a Medical Officer-te leh Private Hospital-a Director te an tel a ni. UNICEF Consultant, Pu Lallianzuala chuan Mizoramah kum 2007-08 chhung khan nu, nau pai 50 chuang, HIV positive ni saten an fa lo piangte chhanhimna atana damdawi an ei lo chu thil pawi tak a nih thu a sawi. Mizorama kum tin mi 22,000 chuang nau pai awm te zingah - naupai 1,000 zela 9 chu HIV kai ang an nih avangin hei hi titlem tura tan lak a ngaih thu a sawi bawk.

Khawvel puma sum leh pai lama tlakhniamna leh harsatna chungchang sawi ho tura Washington-a kal khawm, ram hrang hrang hruaitute chu President George W Bush-a’n a lo lawm hlawm a, harsatna hi a thlen tawh loh nan a chin fel dan tur, hun rei zawk deuh daih tur an ruahman theih beisei a ni. Mahse hruaitu thenkhat chuan, thla hnih emaw hnu lekah Obama hi khawvela dinhmun pawimawh bera ngaih luahtu tur a nih avangin, tuna an relte pawh hi a taka chantirtu tur ber a ni turah an ngai. German Finance Minister, Peer Steinbrueck chuan khawvelin sum leh pai lama harsatna a tawh chu khirh hle mah se, a siam thatna hun remchang leh zau, tun anga tha hi a la awm ngai lo, a ti a, Japan, China leh South Korea Finance Minister-te pawhin hemi kawngah hian beiseina sang tak an neih thu an sawi bawk. France President, Nicolas Sarkozy pawhin siam that ngai siam tha tur chuan dan ding lai siam that a tul tur thu a sawi. German Chancellor, Angela Merkel, British Prime Minister Gordon Brown, PM Dr.Manmohan Singh leh mi pawimawh dangte pawh he sawihonaah hian an tel a, heng ram 20 te hian khawvel pum sum leh pai vir vel zaa 85 an thunun a ni.

Chiahpuam buaipuitu leh lu bera ngaih, Pi C. Lalmuanpuii thurualpui, Joseph Paritos chu nimin zing khan Silchar Police-te'n Silchar-ah an man a, a kut atangin cheng nuai 36 zet an man tel a; Aizawl atangin nimin khan zuk la turin Mizoram Police-te an kal nghal.

A chhuanawm loh viau a chu

Kan nitin nunte han chhui kir neuh neuh hi chuan, thihna kotlangah hian kan ding reng mai hi a lo ni. Kan hnung deuh khan kan thenawm hmeichhe naupang kum 6 mi lek chu a thiante nen kawngsira an kal dial dial kha Bike chak taka rawn tlan chuan a su a, a ka pawh chhawnhman lovin chawplehchilhin a boral. Amah (Nicole-i) hi kan sunday school naupang zinga ka ngainat deuh mai, ka fiam ka fiam thin, nungchang zawi tak mai leh thuawi tak a ni a, a lainatawm tak zet a ni.

Thang awk ang phut hian kan chungah thihna hi a thleng thei reng a, tuisik lem sual vang leh chaw mal khat lem sual vang ngawt pawhin thih mai theih a ni tih hriatna atang chuan vawiin ni thlenga Nungdama kan la awm ve te hi Lalpa zahngaihna a va ni tak em!

Ka zak chem chem

Ka thianpa ball pen ka hawhsak mi kha a hmang ve duh tawh a, mi rawn dil a. Kei lah chuan ka tihbo thu leh thil man tam pawh a nih lem loh thu te sawiin ka lo namnul kual vel mai mai a. Chutah ka thianpa chuan "E..thiana, ka ball-pen kha Ks.100/- man chauh mah ni se, khatia nam-nul kual vel mai mai i tumna avanga ka rin tawh lohna che hi chu sumin i lei thei tawh dawn hauh lo a nia aw, i zahawmna i hloh nghal tih hria ang che," tiin min zilh zak chem chem mai. Ka thinlungah ka thianpa thu sawi kha rial angin a dai mai mai tawh ngai lo vang. Ka zah-zia kha aw....tun thleng hian ka la zak zuk nia.....

Source: www.chhaktiangzirlaite.info

He thuziak tawite hi a tha reuh khawp mai; Keini mizo te hi thil inhawh kual sak mai mai kan ching a, thenawmte hman rua tuboh ara thlengin, a awlsamna leh a nawmna tam tak awm mahse mahnia neih ve tum hram hi a tha khawp nia.

Tun hnai chanchin lawrkhawm

YZTP chuan Nov. 29, 08 (1:00-5:00pm) hian Stand Hotel-ah Sweet December a hmang leh dawn a; fashion show, concert, fiamthu ( nu thau deuh deuh thlan khawm, pi Moly te ho an show ang), naupang fashion show te nen hlimawm taka program hman tum a ni. Ticket man: Ks. 10,000; 5000, 2000, 500 te a ni.

League Cup: (Chelsea leh Liverpool an tlawm)

Nilai zana League Cup fourth round inkhelah Championship (second division) team Burnley chuan Chelsea hi penalty-ah an hneh a, Liverpool hian Tottenham Hotspur bawk an hneh lo leh ta - inkhel dangah Blackburn Rovers-in Sunderland an hneh bawk

Music Award

Tun Pathian ni khan Monaco khawpuiah 2008 World Music Awards sem a ni a, American ten Bristish mite an khum hle.

Leona Lewis hian prize pahnih ngawt dawngin Best New Artist leh Pop Female-ah thlan a ni a, Coldplay-ho album 'Viva la Vida' chu kumin chhunga album hralh hnem ber a ni, Best Rock Group-a thlan an nih bakah Best Act from Great Britain-a thlan an ni bawk. Amy Winehouse hi Best Pop/Rock Female-a thlan a ni.

Beatles member thin Ringo Starr chu Diamond Award an hlan bawk a. He award hi 2001 atang chauha siam tan niin, artist album maktaduai 100 chuang hralhte hnenah an pe thin a ni. 'American Boy' singer Estelle chu Best New R&B Act-a thlan a ni.

American lam atang, Beyonce Knowles chuan Outstanding Contribution to the Art a dawng a, R&B Male-ah Chris Brown a chungnung a, Alicia Keys, Mariah Carey, Akon, Kid Rock, Enrique Iglesias leh producer L.A. Reid te an che tha hle bawk a ni.

Chiahpuam:
Tunlai Aizawl ti ti ber, kar khat Bank (chiahpuam) an tih mai, cheng Maktaduai tam tak inbumna, Chiahpuam avang hian police-te chuan mi 28 leh pawisa fai Rs.2,68,85,840 an man tawh a; an mi man zinga 21 chu Central Jail-ah dah an ni. Pass Book/Cheque/ATM Card an manah Rs.2,46,18,573.46 a awm a; LSC 18, bus 3, LMV 18 leh two wheeler 5 an man tawh bawk.

Nizan khan Mizoram Police-ten Ramhlun South-ah Chiahpuam sum, cheng nuai 44, sing 9, sang 2 leh 500 an man leh. He chiahpuam sum hi Vaivakawna awm thin, nu pakhatin Ramhlun South-a a thiannute Almira-ah thuhruk mi a ni. A chunga pic khi chiahpuam hotu Muanpuii a ni a, a hnuai ami (kawr pawl ha) hi collector zing ami pakhat Zapi an tih chu a ni. Zapi ringawt pawhina a pawisa collect zat chu cheng nuai 10,887 (vaibelchhia 108 leh maktaduai 8 leh nuai 7 tihna a ni). video clip > http://www.youtube.com/watch?v=MnUiWjfJOJE

He chiahpuam (kar khat bank)ah hian Burma lam sumdawng then khat pawhin Rs. nuai 500 vel chu dah ve niin an sawi.

He kar khat bank an tih mai hi a pung a tha em em a, hetianga mipui an bum dan chu hetiang hi a ni: India pawisa hian Burma pawisa an thlenga chu chu US dollar-ah an chantir leh a, tichuan dollar chuan India pawisa an thleng ve leh a, hetianga tih kual hian a hlawk em em a, chuvangin a pung tha takin kan pe thei che u a ni tiin mipuite hi bumin an awm ta a ni.

Mister Mizoram Lalhmuakpuia







Headphone Hman hi:
iPods leh music player dangte headphone hmanga ngaihthlak beng tan a tha lo an ti a, chumi hnu lawka an zirchaina dangah lung tan pawh a hlauhawm thei a ni tih an hriat belh leh tawh.

Obama'n White House-a a chhawm tur em ni?

Thlasik rim a nam a, lung a leng em mai nun tihhlim nan heng pic hi thlir mai mai teh ang.

Tihluihna avang ni lem lo, a huhoa thil tih hi chu a nuam viau zel mai, heng ho pawh hian a hreawmna lam hre chang lovin nuam an ti phian mai thei a ni.

Ka Fanu Tan Lehkhathawn

Ka fanu Angeline Lalhmangaihi hi kum li mi a nih atang thawnthu hi ka hrilh thin a, a tana zirtir nei thei tur nia ka rin angin ka phuahchawpte ka hrilh thin a. Tin Bible thawnthute pawh ka hrilh thin a, ngaihthlak nuam a ti thei em em mai a. A chang chuan inthlahrung tak hian a mittui hi a hru leh kauh kauh thin a, a zah lohna tur tawkin ka han fiam zui ngei bawk a. Puitlingin ho te anga kan ngaih hi naupang tan chuan ngaihnawm tak leh pui tak hi a lo ni reng thin.

Tunah chuan a ni pawh kum 8 a lo pumhlum ve ta der mai a, kum 3 zet thawnthu hrilh phak lova ka awm hnuah ka fanu tan tiin hei hi tukin zing khan ka mail ve ta a ni.

Pathianin khawvel a hmangaih em em a, nang leh kei pawh min hmangaiha maw. Chutichuan, kan sualna zawng zawng min ngaihdamna turin a fapa a rawn tir a, a hming chu Isua Krista a ni a. Tichuan Isua chu he khawvelah a rawn kal a, piangsual te hi a khawingaih em em a, an tan a tawngtai saka an dam zel a. Nakinah chuan Gethsemane huan a lo thlenga tah chuan a tawngtai a. A thih hun tur a thleng dawn tawh tih a hriaa, a lungngai em em a. Aw Lalpa khawngaih takin he thihna hi min lak kian sak thei lul lawm ni, mahse i thu thu ni rawhse a ti a. thih chu hreh hle mah se a pa thu chu a awi tlat a, keini pawh pate thu kan awih theihna turin.

Tichuan Isua chu Rome sipaite chuan an rawn man ta a. Mipui karah chuan an nam kat dawr dawr a. Rukruk hmang leh misual an sawisak ai nasa mahin an sawisa a, chilte an chhak khuma, a hmaiah te chuan an beng sawk sawk a, an vaw hrepa, a hnungzangte chu a thi nasa em em a, ran sa pawh khatiang ang khan sawisa sela mi pangai tan chuan em ema tihna tur a hi a ni. Kan kut chemtea kan inzai palh hlek pawhin na kan ti a, nu leh pa te leh zirtirtuten hmawlh te taktea vawi hnih khat min vuak pawhin na kan ti a. Mi karah miin min rel hlek pawhin kan thin a rim em em a, Isua chu an vaw hrep a, dawt chitin rengin an puh a, an sawi chhia, chhia zawng zawng hi a chungah an burbuna, leiah pawh thi tlak lo misual ber thihna Kross-ah ban phara han khai kan lawp mai kha an chak em em mai si a. Kha aia inhremna nasa leh indeuhsawnna nasa kha awm sela chuan a mualpho thei ang bera, khawngaih miah lova hrem kha an duhdan a nia.

Kan ui leh kan ar te pawh an dam lo emaw, hlim an tuar palha an thih pawhin kan lainat a, kan khawngaihin kan ui em em thina, Lal Isua erawh chuan chutiang reng renga lainatna chu a mite leh vawiin nia mi sang tam tak hnen atang hian a dawng ve mawlh si lo va. An sawisak nasat em avang leh a thisen chhuah nasat em a vang te, khawlaiah Kross puttira duh tawka an chaih chauh hrep hnua Korss-a khen beh a nih vang nge, Korss-ah pawh chuan rei pawh a dam ta lo.

Mahse, a mah sawisatute kha a en a, a khawngaih em em a, theih leh thei lovin chau tak chungin an tan ngaihdamna dilin a tawngtai sak a. Rome sipaite leh mipuite khan an thuhnuiah daha duh tawka sawisaa, rapbeta an inngaih laiin, a rilru leh a ngaihtuahna, a hmangaihna leh a thlarau chu an khawih phak der si lo va, anmahni chu a lehkhawngaih em em zawk a. Tuarna rap thlak ber a tuar lai pawh khan mihring te nakin hun tur; meidilah kal lova vanramah kan kal theihna tur chu min thlirpui tlat a. Mitthi te pawh kai tho thei, thil tihtheihna nasa taka thuam a nih pawh inhre reng mah sela, Kross ata chhuka intidam tura an chona pawh chu nang leh keimah a vangin a ngawihsan ta zawk a. Kan nu leh kan pa ten ka eiin turte ngaihtuaha an hun leh tha leh zung zawng zawng senga, kan hriselna tur leh kan nun khawnawmna tura an inpekna nasa tak ang hian kan thlarau nun chhandama a awm theihna turin a tuar a, "miin a nun a pek aliama hmangaihna nasa a awm lo ve" tiin a vanglai hun a hman velai takin Nang leh kei kan nun vena turin a ni chu a lo thi ta a ni (Johana 3:16).

An school-ah lawmman 2na a rawn dawng ve a

Chhinlung Chhuak

Thawnthua an sawi dan chuan Mizo te hi Chhinlung atanga lo chhuak kan ni an ti a. Mihring chanchin zirmi (anthropologist) te chhutna atang chuan kan pianzia, pumrua leh vun rawng atang tea chhutin Mongoloid thlah an tih mai vun eng deuh, lu chid deuh, hmui pan tak, hmui hmul ngah vak lo pumrua te deuh an tih zinga chhiar tel kan ni a. Mongoloid thlahte hi Asia chhim chhak lama chengte kan ni a. Keini pawh thawnthua an sawi ang sawn China ram chhinlung (lungpuk) a tanga lo chhuak kan ni a (Mizo Israel intite chhui dan erawh ka hre lem lo). Chu chhinlung (lungpuk) atang chuan a chi bing te tein an rawn chhuak a, nakinah chuan Ralte hnam hi an rawn chhuaka an bengchhen em avang chuan; e khai mi an tam tawk tawh a nia nge tiin chhinlung chu an chhin phui leh ta a, chuti ni lo sela chuan tun ai hian mizote hi kan tam fe mai awm e.

Kan tawng pawh hian China tawng a ang teh reng emaw ni, heta ka thiante nen mizo tawnga kan inbiak hian hnam dang ho hian China tawng a mi an ti zel mai hi a mak ang reng khawp mai. China tawng nen te chuan a in ang lo ropui hian ka hre si a, an bengah chuan a in ang tlat mai a ni. Amaherawh chu tawng lam chhui mite'n an sawi angin Mizo tawng pawh Tibeto Burman tawng hlawm li zinga hlawm khat Assam-Burmese zinga chhiar tel a ni a. Tichuan kan tawng atanga chhut pawhin China ram (tibet) atanga lo chhuak kan ni tih chu kan thawnthu chhinlung te nen pawh a inzul em em a ni.

Tichuan inhnaih taka cheng ho na na na chu tawng pawh kan inla chhawng ve zel a, Pastor Liangkhaia'n a sawi angin kan number koh dan te pawh heng Tibetan, Burmese, Kachin, Meitei leh Mizo te hi an in ang tlang hle a. keinin (pa) hnih (2)kan tih hi kawl tawng chuan 'hnit' an ti a, (pa)thum 3 chu thon, li 4 chu le, nga 5 chu nga, kua 9 chu ko, sawm chu se an ti. Tin hnam changkang zawk India ram rawn dailut hmasa te tawng an lo lak chhawn mizo pawhin kan hman zui ve mai te chu: Portuguse atang chabi, pistol; French atang kartut (cartouch), coupon; Dutch atangin playing card, te a ni.

Kan historian te chuan Chindwin lui leh Irrawady inkar vela an awm lai hi chuan an hman rua pawh sazuk ki tih vel mai mai a la nih an ring. Tichuan chuta ta chu rawn kal zelin kum 1200 AD bawr vel khan Kalay Kabaw phai Khampat hmun chu an rawn thlenga, he tah hian rei tawk fang an in bengbel a, nakinah chuta ta chu tlangram lamah lawn chhovin lentlang velah rei tawk an inkhuar leh a.
Mizoin pum (thir hmanrua chherna) kan neih tanna hi thlang kan tlak hnua, an sal man hnam dang thir chher thiam te atanga kan neih chhoh niin an sawi a. Tin thiam hnang hi khampat an chhuahsan hnu lama an thiam thar niin an sawi bawk. Mahse han ngaihtuah mai chuan hnam dang heng kawl, shan, kachin te nena inhnaih taka lo khawsa ho tawngte pawh inla chhawng thei kan nih si chuan hmanrua te pawh lak chhawn a mual mual chu awm ve awm tak a ni.

Lentlang thlen hnuah chauh thiam hnangte, thir hriam hmanrua te nei kan nih hi chu ka ring lo deuh. Ngaw durpui mai tumah la vah en loh karah chuan thir hmuhtur pawh a vang awm si a.
Tin thenkhat sawi dan chuan Chin tih hming pawh hi sap ho vin heng mite hi tute nge an nih tia an zawh khan, kawl ho chuan em phur thin kan nih a vangin Chin an nih hi an ti a, tichuan an lehkhabuah te chuan Chin tiin min lo ziak ta a ni an ti a (kawl tawngin em chu chîn an ti). Chutiang chu lo ni ta sela, kawlphaia an awm lai pawhin em chu an lo nei tawh tihna a ni ngei ang. Tin buh zaina bera kan neih favah te hi kawlphai atanga an chhawm anih ka ring deuh tlat a ni. A pian zia reng hi phai leileta buh zaina tur atan renga siam ni awm tak a ni. Leiletah chuan buh kung kha an han hmer trawka chu chu favah khan an han at chhum a, vawi khat at chhumah pawh buh kung tam tak a zai chhum theih a, favah kual nalh tak mai hi chutiang atan chuan a rem chang em em a ni. Tlangramah chuan buh hi a lawr in kan lawr si a, chemte pawh hman mai theih a ni.
Ka rilruah zawhna pakhat awm chu engvang nge hmeichhe pasal neiin favah a chhawm thian loh tlat mai le? Thildang tam tak, pawnpui chenin a chhawm ngei si a. Hnam dang hmanrua a nih vang leh an roh em avang te a ni thei ang em?

Khampat an chhuahsan dawn khan Bung an phuna he bung an phuah chhanna hla pakhat chu; "Ka phun bungpui dawi ai ka sanna, Mi khawih loh sa khawih loh tein; Thangin lian la khuanu leng hualin, I tang zar piallei a zam tikah; Seifate'n vang khua rawn din leh na'ng e." tiin. He hla thu hi en chuan a tawngkam te hi a tunlai ang reng hle mai a, ka rin dan mai mai chuan Khampat an chhuah san hnu, (Kristian kan nih hma; seipui tlang atang pawh a ni mahna) khampat lama kir leh mai pawh chaka an lung lengin an phuah ni ngei tur a ni.

Ka thu ziak hi Pu Rongenga ziak Zofate lo khawsak chhoh dan tih bu rin chhana ka ngaihdan tlem ka ziah ve mai mai a ni e.

Tahan Youth Icon Thlanna

A tum hnihna atan Tahan youth Icon thlanna chu buatsaih mek a ni. Nov. 6 khan contestant thlitfimna neih a ni a, list-a tarlan mi 93 te hi tel thei turte chu an ni. Tahan Christian Youth Fellowship (TCYF) buatsaih Tahan Icon thlanna hi Nov. 12-15 chhung hian zawh fel tum a ni. Fakna hla thlan chhuahsa 25 hmanga he intihsiakna hi neih tur a ni a. He intihsiaknaa telte hi Tahan leh a chhehvel khaw hrang hrang a mite an ni. (hming List hi i en duh chuan click mai tur).
Nikum Youth Icon thlannaa top 3 te chu . 1.Tv.R.Lalbiakmuan (TCYF Icon 2007) 2. Nl.Lalthangliani 3. Nl.Lalmuanpuii te an ni. Nikum Icon contestant-te khan tawngtaina nen theih tawpa tanlain an inbuatsaiha, top ten-a tling pha chin ten kohhran hrang hrangah zaia rawngbawlna pawh an nei a ni awm e.

Source: Huivalenthiam group mail.

No. 13

1. I suangtuahnate tihhlawhtlina a awm i duh chuan mut heh luluk suh ang che.
2. Mahni duh ber leh tha tih ber chauh thlanchhuah atan thu sawm pekte hi pek a ni lo.
3. Ngaihtuahna tha takte pawh hi thawhchhuahpui a nih hma chuan boruak ang lek a ni.
4. Bul tan nghal chawt mai hi dawizepna um bona tha a ni.
5. Tumna sang tak ringawt ai chuan thiltih te tak te pawh a ropui zawk.
6. Satel chuan a pen chhuah dawnin a ring fanin a lu a tilawr hmasa thin.
7. Thil pakhat i kohkir leh theih tawh loh chu hun hi a ni.
8. Thil pakhat i pek chhuah theih leh i vawn reng theih chu i tawngkam.
9. Thiltih tawhah inchhir lova, tih zawhfel a nih avanga lawm hi miropuite zia a ni.
10. I chanpona leh induhna avanga i hmangiah tak i chan ai chuan chaponna leh induhna chan chu a tha zawk.
11. Mipa chu a mit kal tlangin hmangaihnaah a uai a, hmeichhia erawh a beng kaltlangin.
12. I ta neih tur atan maiin hmangaih lo la, a neih let ve che pawh inphal rawh.
13. Hmeichhe tan: Nula dangin i bialpa a chhuh/ruk sak che a nih chuan ngawi renga kalsan kha phuba lakna tha ber a ni e, a chhan chu mipa dik tak, fel leh tha chu ruk mai mai theihin an awm ngai si lo va.

Obama's Family Tree Pics

Obama leh a chhungte thlalak

USA President Atan Barrak Obama, leh White House.

Nov. 5, 2008: Khawvel awm chhung zawng pawha a hming dai tawh lo tur Barak Obama chu USA-in, President atan mi hang an neih hmasak ber a lo ni ta. "President Obama" tih a ni zel tawh mai dawn a ni.

US President inthlanna result chu puan fel a in a. Barack Obama chuan a khingpui Republican Candidate John McMain-a chu Electoral College Member vote 538-ah vote 338 hmuin hnehna lallukhum a khum ta a ni. Tin, McMain-a hian ECM vote 538-ah vote 155 chauh a hmu thung a, a tan inthlan leh hun nghah chu dam rei nghal thil tak meuh meuh a ni ta. Mihang Kenya thisen kai Obama kum 47 mi chuan USA president chenna White House chu, chi inthliarna dova civil right thlipui nawr chhuaktu Martin Luther King hriat rengna nipah fawmin, nakum 2009 January 20-khian an chhungkuain an luahlum ve dawn ta a ni.

Massachusetts senator thu sawi hi a mawi em a, a ngai a ngaiin tar lang ila. "They understood his vision of a fairer and more just America and embraced it. They heard his call for a new generation of Americans to participate in government and were inspired. They believed that change is possible and voted to be part of America's future."

US history-ah chuan presidential campaign neih tawh zawng zawngah tun tum hi a rei ber a ni a thla 21 chhung a awh a ni.

White house-ah mihang an cheng ve dawn ta: America president chenna in hi in var (white house) tia koh a ni a. He in hi kum 1792-1800 khan sak a ni a, rawng vara chei ni mah sela he tih lai hian White house tia koh a ni lem lo. He in luah hmasa bertu America president pahnihna John Adams (1797-1801) atang vawiin ni thlengin USA Presidentte chenna in a ni.

He in hi Pennsylvania Avenue NW, Washington DC a awm a ni a. A tantir chuan President’s Palace emaw, Presidential mansion, emaw President’s house a tana sak a nih anga koh mai tur ni awm tak a ni a. Mahse kum 1812-ah Anglo-American war a chhuak a, tichuan Kum 1814 ah indo laiin British sipai ten vantlang in leh sorkar bungrua an hal sak khan a kang tel ve a. Thawnthua an sawi dan chuan he in an sak that leh lai hian kangmei a vanga a bang then khat kang dum ngeinguai chu rawng var an hnawih a, chu chu a hming put chhan a lo ni ta a ni, an ti. Mahse, President Theodore Roosevelt-a hun (1901) thleng khan official thilah chuan “Executive Mansion” tia chhinchhiah a ni.

White house tih a nih avang hian mingo ho in tihna a ni lo va, tunah chuan Obama (mihang) chu President atan thlan tlin a lo ni ta a. Pu Gandhi-an India chu pangpar chi hrang hrang parna hmun pangpar huan mawi tak angin a chhuah a. Chutiang deuh bawk chuan White House pawh rawngvar leh rawngdum mawi taka a luanna hmun a lo ni dawn ta a ni.

Obama was a change candidate in a change election. Heng chanchin vel ka chhiar laia ka mit leh ka rilru fukna ber chu he thu hi a ni "The change has come" tih hi, hun neih deuh va han thlur zui a chak awm hle mai. Engvang nge kan ram riangteah pawh hian a lo thlen ve loh ang??

S.Africa mihang president hmasa ber Pu Nelson Mandela lawpuina thu sawi mawi tak hian kan thu ziak i han tlip teh ang. "Your victory has demonstrated that no person anywhere in the world should not dare to dream of wanting to change the world for a better place."

Voting Machines : (primary school building vela box-a vote thlak mai kha sam khai zawk mai lo maw le hehe)





(Edited by blogger on Nov. 7, 08)
Obama naupan lai leh thlahtute chanchin chu October thla khan tlem ka tarlang tawh a (Thupui khaidiat: October tih kha en la). A puitlin hnu chanchin lengzem-a an ziak hi han tarlang chhawng ve leh ila a tha awm e.

Pian Hun : August 4, 1961 (kum 46)
Pianna Khua : Honolulu, Hawaii, U.S.
Hnam : American
Political Party : Democratic
Nupui : Michelle Obama (1992 – tun)
School Kalna Hlui : Columbia University, Harvard Law School
Sakhua : Christian (United Church of Christ)

Rawlthar lungmawl a nih laiin, thlah-pawlh a nihna chuan a rilru a tibuai hle a. A rilru hah avangin zu, ganja leh cocaine te a tih phah a. Mahse a tawpah rilru fim puin hma lam a pan a, mi pangngai mai ni lovin, mi pangngai chung lamah a invawrh ta hial zawk.

High school a zawh hnuah Hawaii chhuahsanin Los Angeles-ah a pem a, Occidental College-a kum hnih a zir hnuah Columbia University, New York-ah a insawn leh a, kum 1983 khan BA-a zo. Kum 1988-ah Harvard Law School-ah dân a zir zawm a. Kum 1990-ah an college zirlai pawl Preisident a thlan a ni ta hial a. Harvard Law School chanchinah an college a din atanga kum 104 chhunga mihang president thlan tlin hmasa ber a ni. Kum 1991 a Law degree a neih hnuah hna hrang hrang a thawk a. Kum 1993 atangin University of Chicago Law School-ah constitutional law zirtirin a thawk leh a, kum 2004 a US Senate inthlanah Illinois state atanga thlan a nih khan zirtirna hna chu a chawlhsan ta a ni.

Kum 1992 ah Michelle Robinson nen an innei a, fanu pahnih Malia Ann (1998) leh Natasha (2001) an nei. Lehkhabu pahnih a ziak tawh a, a hmasa zawk chu Dreams from My Father: A Story of Race and Inheritance (1995 a chhuah) a ni a. He lehkhabu chhuah hnu lawk thla reiloteah a nu Ann Dunham chu chhûl cancer natna vangin a thi a ni. He lehkhabu hi Grammy Award for Best Spoken Word Album (2006) a ni a. A lehkhabu pahnihna chu The Audacity of Hope: Thoughts on Reclaiming the American Dream (October 2006) a ni a, 2008 Grammy Award for Best Spoken Word Album a la leh bawk. Obama lehkhabu lei tura mi tamtak lokalte lehkhabu leiah chuan a hming a sign sak a. A lehkhabu review-tu Michael Tomasky chuan, “Mipui lo pungkhawm chuan Obama thinlungah US President nih duhna a siam a, heta tang hian a tum ta a ni,” a ti hial.

He mihang tlangval hi US president ni mai thei dinhmunah a ding ta. Ni ta se engtinnge hma a lâk ang? George Bush-a khawvel chawhbuai hi a siamtha thei ang em?

Ka Hmangaih Che A Sin.

(www.zoin.info lama ka thu ziak a ni a, he hla hi ka thian nuin a lo ngaithla veng veng thin a, ka blog update nan hmang ve hmiah teh ang.)

Hmangaihtu nei ve lova inngaihna leh mal ngawih ngawiha inhriatna hi thil tawrh hreawm tak a ni ngei ang, a chhan chu mahni hial intihhlum duhnate pawh miin an lo neih phah chawk reng hi. Tin min duh vetu leh hmangaihtu neih kan thlakhlelh zia leh a nuam zia ngaihtuah ringawt pawh hian hmangaihtu tawng lova nun chu thil hreawm tak tur chu a ni. He khawvelah tuma hmangaih tlaka inngai lo leh sual ngawih ngawiha inhriaten hmangaihtu an nei a ni tih an hriat theih nan “Lal Isuan a hmangaih che” tih hi ziakin hmuh tur tam tak a awm a ni.

A bik takin nula leh tlangval inkarah, kan tih mi takten “ka hmangaih che a sin,” tia biahthu min hlan hnap tluka hriat nuam leh thlum hi he khawvelah hian a awm awm lo ve. Vawiin niah hian khual khuaah kan awm a ni emaw, mahni in chhungah kan awm pawh ani thei e. Tin mahni hnathawhna hmunah emaw, rawngbawlna hmunah kan awm a nih pawhin i bula mite hnenah emaw, I ngaihzawng hnenah emaw, i pasal/nupui fanau hnenah “Ka hmangaih che a sin” tih hi i hlan ve dawn lawm ni? Chutiang bawkin i duh tak khan vawiin niah hian (khual khua atang pawh nise) “Ka duh ber che, ka hmangaih ber che,” tiin a thinlung chuan a rawn chhanglet ve ngei ang che tih i zuk hriatna mai pawh hian tuma hriatpui hauh silova lawm veng vengna leh ngaihthat hliah hliahna a pe thei hial ang che ti raw.

Ram tina leng zo hnahthlak u leh nau zawng zawngte he hmangaihna hlu hi inhlan tawnin, kut insuiha pheikhai vawrin han leng siau siau mai ila a va nuam dawn em! Chhungkua pawh inhauh leh innghirnghoa awm ai chuan inhmangaih dial diala awm chu nuam tak a ni a. Tichuan, kan awmna hmun theuhah zofate khawvel chu a lo parvul leh anga, rethei leh thawkmawh chhungten thlamuanna leh hlimna an lo chang anga, nei nung zawkte lawmna chu tihpunin a lo awm bawk dawn si. Zonunmawi chu kan thinlung chhungah lo par vul lehin hring nun khawvelah hian hnam vannei ber kan ni ngei ang.

Keizawng min hmangaihtu leh hmangaihtur pawh ka nei ve lo tiin i lo inngaihtuah buai a nih chuan khawngaih takin hei hi min lo hriat sak ang che, “I hnam (mizo/chin)-in a hmangaih che,” tih hi.

Source: http://www.zoin.info/editorial-hla-thlan/

Dawn la

Music lamah hi chuan a ri ring leh a ri zawi chiah thliar hrang ve thiam mah ila, dik tak chuan mawi tih zawng leh duh zawngte chu ka nei ve chiang bawk si. Tute tawngkam emaw han hawh ve ila, Dawl rai pawh ham ri thiam lo leh kel pui ai pawha aw rawl nei chhe fe zawk, kei tilpawr aw reh thei lo tan hian han tuihnih ve ngial pawh tum mah ila ka tlak mawlh lo. Ka te chem chem awiiiiii ka tui ral dawn a farin ka far, ka dir zeih zeih.
T Melody album "Thinlung thawnthu"-ah chuan he hla hi ka bengah chuan a music a fuh ber, a bass te drum te, lead te a mal theuh hian a nalh vek maiin ka hria. Sap ho kut hnute pawh a ang ti ila chu chu ka sawi thiam ve dan a ni mai awm e. A music kha uluk takin han ngaihthla ve chhin teh, kei ai chuan sawi tur i hre teuh ang.
Hman ni lawk khan an drummer thiam tak Zama hian min boralsan tih ka lo hriatin pawi ka tiin kawlphai zofaten kan chan ropui tak zet a ni. Zama hriat reng nan, leh Chiangmai lama thian ten ngaihthlak an chak bawk nen ka han post ve tawp.