Jun 30, 2014

Worship

To worship Go!d is to serve and proclaim Him. To serve God is to proclaim and worship Him. To proclaim God is to worship and serve Him.

Jun 24, 2014

Hrilh Rawh

Naupang chu:- 1. Aia upate nel dan tur tawk zirtir la, mi mal chungah thu lo turin hrilh rawh. 2. Tawngkam mawi lova an biak phal lo la, hawihhawm takin mite biak tur tih hrilh rawh. 3. An serh leh kap bawr sil fai dan zirtir la, tumah khawihtir lo turin hrilh rawh. 4. Ka bial nu ka bial pa tiin an fiam phal suh la, chutianga fiamtute lakah chuan inthiar fihlim turin hrilh rawh. 5. An infiamna en dik la, sex rim nan thei zawnga infiamnaah tel lo turin hrilh rawh. 6. Zawhna hlimawm tak tak zawt thin la, harsatna leh lung nih lohna an neih chuan i hnenah sawi thin turin hrilh rawh. 7. Mi pindanah lut mai mai lo turin zrtir la, dress an inthlak laiin lo inthiar fihlim thin turin hrilh rawh. 8. A tawk tein sex hlutna, zahawmna zirtir la, anih loh chuan khawtlang atang a dik lo zawnga zirtirna a dawng tho ang tih hriain film tha lo en lo turin hrilh rawh. 9. Engkim hi an tan thurawn petu an ni a, an entur awm cartoon leh lehkhabu tha hmangin khawsak dan tur hrilh rawh. 10. Puitling hnenah kal / visit turin tirlui suh la, puitlingte ngainat dan tawk hrilh rawh. 11. Rilru taksa lama an hrisel thianghlimna tichhe thei thil te (music, video, eiin, infiam dan tha lo, etc.) hriattir la, chung lakah chuan inthiar fihlim thin turin hrilh rawh. 12. Tu emaw chunga lung nih lohna a neihin ngawih bo pui mai suh la, a chhan zawng chhuakin Bible kal tlanga chhan let dan tur hrilh rawh. 13. Huaisen turin zirtir la, mipui hmaa din chhuah ngam a pawimawh zia hrilh rawh. 14. Nu leh pain a chunga hmangaihna an lantir dan hriattir la, nu leh pate hmangaih ve thung dan hrilh rawh. 15. Pathian chu engkim chunga roreltu a ni tih zirtir la, a chungah beiseina nghat tlat turin hrilh rawh. * An harsatna, buaina hriat sak la, chuta ta chu i chhan him thei a ni tih lantir rawh. Han thawh belh ve teh. Regards, Puibawiha.

Jun 23, 2014

Edward Snowden Chawimawina Pe

21.6.2014 Inrinni khan German rama chawimawina sang Fritz Bauer Prize chu Tlangval kum 30 mi Edward Snowdena hnenah a hlan. US whistleblower an tih mai Snowden USA chuan ramphat santu misual tiin man a chak em ema chutih laiin chawimawina a dawng ta zel a. Tunah pawh hian Civic Courage tiin German in a chawimawi a. Amah hi Russia-in an ramah awm phalna a pe a ni. German rama civil mite hnena chawimawina sang ber "Fritz Bauer Prize" hi kum 1968a din a ni. CIA mi chhawr Snowden hian America National Security Agensy thuruk maktaduai (1.77) tel a khawvel hriarah a puang chhuak a ni. An chairman Warner Koep Kerstein chuan, "Edward Snowden hian rilru huaisen takin US- in dan lova mi a enthlakna (illegal surveillance) cungchang do vin khawvel hriatah a puang chhuak hi a ropui a, chawimawi tlak a ni," a ti. He prize hi 'humanization, liberalization, leh democratilization of the judiciary' lama mi hmingtha leh hnathawk thate hnena pek thin a ni. NSA hian khawvel hmun hrang hranga mite inbiak pawhna phone leh email..etc. an lo ngaithla ru a, enthlak hna nasa tak in a thawk thin a. Hei hi mimal dikna, chanvo leh himna a tiderthawng a ni. German Chancellor Angela Merkel-i phone hmanga midang a biakna te pawh a tel. Heng thuruk document 300 hi chu puan chhuah tawh a ni a, 200,000 zet hi a thiante leh media lam kutah a pe tawhin an ring a. Maktaduai 1.5, documents hi chu khawiah nge: a thuhruk, a download hnuah tu kutah nge a pek? tih an la hre thei lo. Comment-tu pakhat Michael Walsh-a chuan he ti hian a ti, "There, telling the truth is a crime." Source: http://voiceofrussia.com/news/2014_06_22/273799145/

Jun 21, 2014

America Ka Hmuh Dan

America hi khawvela ram ropui ber a ni a, a thlirtu a zir leh a thlirna tukverh a z irin lan dan chi hrang hrang a nei thei a. Kei pawhin thlirna tukverh hrang hrang ka nei a. Chung zinga pakhat atanga ka thlirna chu hei hi a ni Burma rama kohhran tam tak hi Founder (Isua ni si lo) nei, chung founder te chuan foreign support $ dawngin kohhrana an thu neihna poh a dictatorship phah hle a. A chang chuan America n thil tih dan hi mak ka ti thin. 1980s cold war lai khan; Soviet Union (Russia)-in Afghanistan a run lai khan USA-in Bin Ladena Alqaeda (terrorist) kha sipai chakna leh sumpai ($ 3 billion meuh)-in a tanpui a. A hnuah nasa takin a sawisa leh a. http:/www.theinsider.org/news/articl/e.as/p?id=0228 Mimal thuneihna a tih len saka chung mite chu an hnar hrui-ah a hling a, a duh duhna lamah a pawt her thin. Entirnan kan kohhran hi lo hmang ta ila; Kan sawi tu.m a fiah zawk theih nani Kan kohhran pawh hi a chang chuan ti hian ka ngaihtuah thian; International, one family tiin kan sawi thin a, a theory hi chu a pui mahse NMI Nazarene World Mission International pawh hi en ila a bikin Asia hi en ila, kan hotute chu American mi hlir an indah (thlang) a. Philippines ka awm lai khan NYI Coordinator atan pawh American mi tho, mi thar deuh pawh ni se an ruat hram a. An aia senior leh ruat awm tak tak pawh an awm. Hei hian Asia mite min hmuh dan chu a hril vein ka hre thin. Hei hi American ho thluak a ni tih hi ka hre chiang. Politically leh Christianity zawng pawhin an kal phung a ni a. Chu chuan an concept a fana individualism tak pawhin an ngaihdan a ni. Heng avang hian an sual bik kan ti thei ngawt lo vang nga. Mahse anmahni nen kan indawr taw,nna kawngah kan fimkhur a ngai a ni. Engpawh ti ila contact person pakhat chauh inruat lo vin email leh sum receivedna te, project te, report dawn leh thawn chhuah ang chi reng rengah hretu (copy attach) mi 2 tal lo inruat thin ila, kan zinga Setana chettlat theih loh nan kan lo inhmakhua sa ve tawh tur a ni. Thlemna tam tak hi keimahni ngeiin kan siam chawp, kan finkhur loh vangte, kan kalna tur kawng kan thian fai lo va, inven lokna lam kan ngaihthah vangte a ni. Lalpa rawngbawl kan ni tih hre rengin kan indawr tawnnaah te,Report kan siamah te he bible thu hi i vawng reng ang u: 1Thess. 1:3,4 Kan thuhril hi dawta chhuak a ni lo va, bawlhhlawha chhuak a ni hek lo va, verveknaa chhuak a ni hek lo; Chanchin tha kawltira awm turin Pathian tha tih mi kan nih ang ngeiin, mihring tilawm tur ang ni lovin, kan thinlung fiahtu Pathian tilawm zawkin thu kan sawi thin a ni. ,

Jun 18, 2014

Zotawng Bible Dictionary

Zotawng Bible Dictionary
Nikum atang lei tuma ka lo hel 2 chu ka tawng fuh ta hram e. Ka hlim rilru ang reng khop mai!!
Rev. Chuauthuama buatsaih a ni a. Pages 1203 a ni a. Thuhma leh lamtawi hrilhfiahna leh lehkhabu hmante tarlanna tel lovin pages 1189 a ni. Rs. 1000 man a ni.

Revd Chuauthuama hian lehkhabu 50 a ziak tawh a. A lehkha ziak hi chhiar a nuam riau va a Thu ziakah hian confidence a nei tha hlein ka hria.

Pu J.F. Laldailova khan English mizo dictionary a lo buatsaih a, vawiina mizorama sap tawng thiam tak tak te lo inzirchhuahna tangkai tak a ni.
Nu leh pa tam takin an fate Pathian thu an zirpuina atan he Bible Dictionary pawh hi hmangkai theuh ila. Kan hnam tan hian a hlu leh zual ngei ang.

Jun 16, 2014

2014 World Cup Lamtluang

Brazil Khawpui
1. Salvador: Portuguese miten 1549ah Salvador chu Brazil-a an ram awp khawpui atan an hmang a. An plantation-a thawk turin Africa atangin sal tam tak an la lut. Khan hun lai atang deih tawh khan Africa mi an lut teuh a nih chu.

2. Brasilia: 1956 khan khawpui changkang tak neih nise tiin ro an rel a. Brasilia khawpui chu a din ta a. Hnathawktute, bungraw chi hrang hrangte, ei tur tam tak an phur lut nguah nguah a. Chumi hnu kum 4ah building changkang tak tak leh kawngpui zau takte chu an din zo hman vek a ni. Brasilia hi khawvela khawpui mawiber pawl a ni a. Building tunlai tak tak a tam hle a ni.

Mizoram hian khawpui felfai tak din a mamawh tak zet a ni. Tun hnu kum 50 mipuite thlirpui thei mi tum ruh hruaitu a mamawh a ni.

Burma ram hian hman ni lawk khan khawpui thar felfai takin a din a. A hming chu NyipyDaw a ni. Rangon hi a capital city a ni tawh lo. Engkim peihfel a nih hnuah sorkar pisa leh a hnathawktute zawi zawiin a suan lut zel a. Mahse Rangon hi a thawl phah chuang lo. Kum 2012 atang khan motor company hrang hrang siam dan anga lakluh phal a ni Car showroom hmun tinah a awm a. Rangon khawpui ah car hlui hmuh tur a awm tawh lova. Traffic a tawt tawh khawp mai. Tun hmaa minute 45 tlanna kha dar 1:45 vel hun sen a ngai. Khawpui kha lo sawn lo phei sela aw... Tuna NyipyDaw- a motor zawng zawng saw Rangonah ron sawn vek se a tawt tur zia hi.
Aw zoram tho la ngaihtuah rawh.

3. Rio de Janeiro: He khawpui hian tourist/ khual zin mi a hip ve hle a. Beach var mawi leh nuam tak a awm a. Ram ngawin a khuh tlang mawi tak tak a awm bawk a. Sugar Loaf mountain hi a lar hle a. Tin lawng chawlhna hmuna lung mum pul mai feet 1300 asang a awm bawk a. Rio- ah hian khawvela party hming thang ber Carnival kumtin an hmang thin, hetah hian music, lam, leh parade ropui tak takte entir thin a ni.

4. Sau Paulo: World Cup opening match an khelhna hmun a ni a. He khawpui hi khawvel chhim lam pumpuia khawpui lian ber a ni. Mi maktaduai 20 an cheng. Italy leh Japan atanga pem lut an tam hle. Traffic a tawt avangin he khawpuia world cup i en don chuan hma taka i chhuah thin a ngai ang.

Khawvelah hian Roman Catholic ram leh Muslim ram te hi mihring an pung chak chho ta zel bik a ni. Family planning leh sakhuana an hmuh dan hi a dang tlat a.
Mizorama mizo diktak te aiin he khawpuia mihringte hi a letin an tam.

Myanmar hi mihring 60 million vel awm anga chhut a ni a. Kuminah chhiarpui a nei a, result ka la hre lo va.
Brazil erawh mihring 203.4 million an ni, an tam hle a ni. Tun hnu kum 30 velah chuan khawvela mihring tam ber an la ni thei ang. China leh India hi chuan family planning an ti nasa si a.

Regards,
Puibawiha 

Jun 15, 2014

Father's Day

Father's Day a Wish tur Pa ka nei tawh si lova, he thu ziak tha tak hi ka rawn dah chhuak ang e.

Heichhe naupang kum 5 mi hian thilpek tuam mawi nan a pa lehkha mawi dahthat chu a lo hmang zo vek a. A pa thinrim chuan a hau hrep a. A tuk khua a lo var chuan lehkha mawia tuam ngei mai chu kengin, "A pa, hei hi i ta tur a nih hi," tiin a pa chu a rawn pe a. A pa chuan inthiam lo rilru tak chungin a thilpek dawn chu a hawng a. Mahse a chhungah engmah a lo awm si lo va. A pa thin a thawk thar leh a, "Mi thil i pekin bawm ruak ringawt an pe ngai lo," tiin a hau ta hrep mai a.

A fanu chuan mittui tla chung leh insut feih feih chungin, "A pa, a ruak hleinem, nangmah ka duhsakna leh hmangaihnain ka chhung khat a lawm," a ti chuai ta raih a. A pa chuan mittui tla zawih zawihin a fanu chu a awmah a pawmbet ta vawng vawng a.

2014 World Cup Lamtluang

Spanish tlangvalin Holland tlangval an dang zo ta lo.

Kum 2014 World Cup first round match zinga en chakawm ber Spanish leh Holland inkhel chuan thlirtu mipui tam zawk a barakhai hle!
Inkhel an tan phat atangin Spanish tlangvalte an che tha hle a. An kein ball an chelh tlat a. Tun hma ang thoin short passing rang takin an kalpuia khawvela midfielder tha berte zing ami Ineista leh athian Xavi leh Silva te chuan field laiah chuan lam an thai a ni ringawt mai a.

Tichuan Spanish hma tlan Dieco Costa chuan Ineista ball siam chu box -ah tlan luhpuiin penalty a hmu ta hlau mai le! TV ah slow motion in an rawn tilang leh a, Dieco Costa hian Holland defender De Vrij-a ke chu a va rap luia thai tluk angin trick a hai a, a tlu ta a, penalty a hmu ta a ni. Footballer te ropuina em em pakhat chu a hun (timimg) tak maia an han tlu der vel thin hi a ni.

Tichuan 2014 World Cup-a Spanish goal hmasa ber ni turin penalty chu an khelh atanga minute 27naah Alonso an a pet goal ta a ni. Netherland pawh khel chhe tak chu an ni chuang lo, tum khat chu Robbena'n nal takin Sneijder a pass a box chhungah khalh lutin mawi tak maia a shut chu khawvel goal vengthiam hming thang Casillas chuan a save hlauh mai a. Nertherland tan beiseina a sang lo half time hmain an siphur an pe let leh hman ang em tiin thinlung a phu det det mai le.

Half time a hnai telh telh, Minute 42 a ri ta. A chan tha lam Spain thiampuipa Ineista chuan Silva a pass a, Silva chuan hnai set sawtah goal veng pet khum tumin a chip a, Netherland keeper chuan a lo beng per thei hlauh va. Half time dawn tep minute 44ah Netherland thinlung hlauthawng phu dep dep chhawk zang khai turin Daley Blind chuan Spain ho defenderte thlawh khumin hla tak atangin Van Persie chu a ron pass a. Van Persie chuan chak taka tlanin ball kang sang lai chu thlawk chungin a head a, a head-na a hla ang renga Spain keeper pawh goal atanga hlam 2 vel zetin a rawn tawlh chhuak a. Tichuan mawi lutuk tak maiin keeper ban phak lovin a head lut ta zeih mai a. Netherland fans te au thawm chuan field mai ni lovin ka thutna pawh a luah khat vek a, ka thut hmun atang chuan phur takin ka kut ka lo beng ve a.

Second half an tan leh ta. In hneh tawk chiah an nih avangin player mai bakah mipui lam pawh an phur zualin thawm a tha hle a. An khelh dan tactics erawh a ngai reng niin a lang. Mahse Dutch tlangval hovin an zia an rawn chhuah ta. Spanish defender te chelh zawh rual lovin Robben leh Van Persie te chu an rawn che tan ta.
Minute riat an khelh hnu chuan Robben chu Spain defender 2; Pique leh Oranje te inkarah a kangin an ron pass-a a ke veilamin a la thla a, vei lamah Pique chu bum kualin mawi lutuk takin net puar popin an goal 2 na chu a chhuih lut ta. Hnehna au thawm a ring ngei e. Ka thutna atang ka ding zawt mai a ni.
Minute rei lo te hnuah chak taka Robbena'n ball a han khalh kha chu a ropui a ni. Chutah Van Persie a pass a, hnai set sawt atanga goal cross bar a pet per dawt mai kha chu uihawm ang reng tak ani.

Minute 63naah Sneijdera'n free kick nalh tawka a ron thlawh chu goal ban hnung zawk bul atang De Vrij chuan an goal 3na atan a ti goal a. Minute 72naah Spain goal keeper, khawvela keeper tha ber pawla ngaih Casillas a che sual ve ta tlat mai le. An rawn back pass chu duh aiin a dang per na ta hrat a, chu veleh Van Persie chu chak deuhin a rawn tlan thut a. A ron chilh a, tichuan goal 4na atan a pet goal ta der mai a ni.
Tunah chuan Netherland hotute pawh an thla a muang ta a niang Van Persie chu an chawlhtir ta a.

Spain lam pawh tan rawn la thar lehin an si phurte sut let leh turin Torres leh Fabrigasa te an rawn luh tir a. Torresan vawi khat chance a nei. Chutia minute 8 chhung theih tawp chhuaha tan an lak laiin Robbena hming thatna belhchhahna tur thil a lo thleng ta. Sneijdera'n a lira through ball a ron pass chu Ramos-a nen an um tlanga mahse Dutch tlangval chan a tha ta, a chak hret zawk niin a lang. Chutah keeper (Casillas) ron up chhuak chu lo bumin veilamah na la tein a chhuih lir a, keeper chuan bungbu chungin ball dan tumin a vak phei ruak ruak a. Robbena.chuan chhuih lut nghal mai loin a khalh phei leh hret a, a chhan chu a hmaah Ramosa leh defender pakhatin an lo chang a. Mahse goal veng a bum hmin der tawh avangin minute 80naah chuan dan rual lohvin a ke vei lam chuan net puar popin a chhuih lut ta ni.

Spain tantute rilru pawh kha tih lai tak kha chuan a hnim ruihin a hriat a ni. Goal an sut let leh beiseina zawng zawng chu intawn leh hun atan a ni tawh ang.

Tichuan hun pangaiah 5-1 in Netherland an chak ta a ni.
Spain leh Netherland hi vawi 11 lo intum tawhin 5 ve ve inchak chhawkin vawi 1 an in draw tawh a ni. 2010 World Cup ah khan semifinal-ah Spain hian an lo hnawt haw tawh a ni.
Netherland chuan phuba an lak let lehna hi lungawi thlak an ti viau ang le.
FIFA ranking world no 1 (Spain) chu world no 15 (Netherland)-nain an hneh ta!!

* Argentina khel hi uluk takin in lo en don a nia.

Regards!
Puibawiha.


Jun 13, 2014

World Cup 2014, Brazil

Brazil ram chanchin:
Brazil hi South America khawmualpuia awm a ni a. Khawvela football khel thiam hming thang Pele-a te, Jico te, Ronaldo te, Carlos te, Kaka te, Neymar te chenna ram a ni.

Brazil offial Name: Federative Republic of Brazil tih a ni a.
Ram zau zawng: 8,514,877 sq. km.
Population (mihring zat): 203,429,773. hei hi July 2011 (cencus) chhiarpuia mihring zat a ni. A ram a zau ang bawkin mihring pawh an thahnem hle a ni.
Khawpui:Brasilia
Official language (tawng hman): Portuguese. *Tun hma khan Portuguese leh Spanish hi tuipui kaltlangin khawvel dai darh hmasatu niin ram tamtak an lo awp bet tawh a ni.
Pawisa hman: Real.
Sik leh sa: Tropical (khaw lum hnawng).
Agriculture product (thlai thar chhuah): Coffee, soybeans, wheat, rice..
Industries (thilsiam chhuah): Textiles, shoes, chemicals, cement, etc.

History:-
9000 BC: Amazon luipui chhehvelah mihring an cheng ho tan.
1500 AD: Portuguese explorer (ram thar zawngtu) Pedro Alvares Cabral-a chuan Brazil a thleng a, Portugal ram atan a hauh ta a ni.
1555 AD: France sipaiten Rio de Janeiro lawngchawlhna an la. A hnu kum 2 hnuah Portugal-in an chang let leh.
1822 Brazil-in Portugal hnen atang zalenna an hmu.
1888 Brazil ram pumpui-ah sal tihtawp a ni a ni. (Burma ramah pawh No 8 hian awm zia a nei; dt 8.8.'88)

1889 Sipai rorelna tih tawp a ni a,mipui rorelnaa president thar thlan nghal a ni.
1960 Brasilia chu Brazil ram khawpui berah thlan a ni, Rio de Jeneiro a thlak a ni. (Burma ram khawpui pawh Rangon ni tawh lovin Nyipy-Daw a ni)
2006 President Luiz Inacio Lula da Silva chu thlan nawn leh a ni.

2010 Dilma Rousseff chu Brazil rama hmeichhe President hmasa ber atan thlan tlin a ni.

Aw le, a hmuna va en ve duhte kan awm takin an Tawng tlem i han zir lok teh ang:
Chibai, i dam em? = Oi, tudo bem (beh-in)?
Ka lawm lutuk = Muito obrigado.
Anih leh aw (bye) = Tchau.
Kan lawm a che = De nada.
A tha lutuk = Muito bem.

KHAWVEL THILMAK

Brazil-ah hian khawvela thil mak pasarih (7 wonders of the modern world) zinga pakhat "Christ the Redeemer" an tih hi a awm a. Isua ban phar lai lim lian sang tak a rih zawng 635 tons, a san lam 120 ft. a dinna hmun zau zawng 98 ft. a ni.

A dinna hmun Corcovado tlang hi 2300 ft. a sang a ni a. A kut hmawr atanga a kut hmawr leh lam inkar hlat lam hi 28 mt. a ni a. A kut hmawr ding lamin Rio de Jeneiro khawpui chhim lam a kawk a. He Isua lim hi kum 1920 atang an siam tan a, kum 1931ah an zo a, kum 9 chhung a awh a ni.
Khualzin miten an tlawh nasa em em a, kum tin mi 18,00,000 in an tlawh thin. Kum 1931 Oct.12 ni khan officially-a hawn (open) a ni a. A siam nan hian US $250,000 sen a ni. Tunlaia a tlukpui chu $ 3.2 million vel a ni. Brazil mite hian Isua lim hi an Kristianna chhinchhiahna/ a lem nena entirna atan an hmang.

He Isua limin a entir chu Isuan mi zawng zawng a hmangaih a, a hnen rawn pan apiangte chu a lo kuangkuah thin.

Lal Isuan ban pharin a welcome reng che a, a kohna che hi a la sawhsawn lova, a la pangngai reng a ni. Kan haidera kan tukhum chhah kan chhawn a, mahse fapa tlan bo pawh kha a pain banpharin a lo hmuak reng ang khan he Isua lim pawh hian min "Welcome" reng tih min hriat nawntir leh a ni.

Jun 4, 2014

Zoram Naupang Thenkhatte

Intih hmuh ching kan ni si a. Thang leh thar lo kal tur pawh hi ngaihtuah awm tak an ni. Primari naupang te pawhin Denrite hnim ruih nachang an hre tawh a nia. Ruihtheih thil tih nan chuan an la naupang lu deuh lo maw.. Sual lamah hian kan va harhvang tak em!!

Fel tak tak lehkha thiam thei deuhte pawh an awm. Mahse, kan society inpawh tlanna nunhona zalen tak leh nuam tak hi hmang thiam lovin, drugsz te leh ruih theihthil dangte pawh awlsam takin kan inkai chhawnga. Naupanh fel tak ni thin khan an school leh boarder awmna atangin thil tha lo an kai a. Tleirawl an ron ni a. Khawiah nge naupang fel kha tleirawl fel tih tur an va khat ta pharh pharh ta em!

Jun 3, 2014

International Children's Day

June 1: Naupangte ni hi khawvel ram tam takah hman a ni a. He ni hi naupangte dikna chanvo, humhalh leh an chungah hmangaihna, ngaihsakna leh zahna lantirna hun a tan hman thin a ni a. Kum 1925 August khan ram 54 te chuan Geneva, Switzerlandah a vawi khatna atan "Naupangte Nunkhua" ngaihtuah ho a ni a. Naupangte sa himna tur lamte ngaihtuah a ni a. An thlarau lam leh retheihna, chhawrluihna lakah te venhim leh zirna lam leh naupangte ham thatna kawnga chhawmdawlna lamte ngaihtuah a ni a. He conference zawh atang hian ram tamtak chuan an mahni rem chan niah naupangte ni hi ruatin an hmang a.Naupangte niah hian naupangte fuihna leh tihhlimna te leh naupangte ngaihpawimawhna khawtlang mipuite hnena hriattie te hi a tum bulpui a ni.
Ram thenkhatte hman ni lo tar lang ila :
Taiwan chuan Apr.4 ah an hmang. Janpan hian hman lai atang tawhin mipa naupangte ni leh hmeichhe naupangte a hranin an hmang thin a. Mipa naupangte kut ni chu May 5 hi a ni a. Hmeichhe naupangte kut ni chu March 3 a ni. Tunah chuan an rampum huapin May 5 ah an hmang.
India chuan Jawaharlal Nerhu a birth day Nov. 14 hi naupangte ni atan an hmang. Turkey chuan Apr. 23 hi ' National Sovereignty leh Children's Day an hmang. The Father of Republic of Turkey Mustafa Kemal Aataturk khan naupang a ngaina em em a ni. Naupangte niah hian sorkar hmun pawimawhte an fanpui thin.
USA chuan second sunday of June hi naupangte ni atan an hmang. Brazil-in Oct. 12, he niah hian an fate thilpek (present) an hlan thin.
Malaysia leh Auatralia ten Fourth saturday of Oct. ah an hmang. Australia hian 1977 atang tawh khan naupang care leh zirna lamah hma an lo la deih tawh. Nov. 20 hi Israel, Egypt leh Canada - in an hmanga a. Egypt ramah chuan naupangte infiamna games an neihpui thin. China ramah holiday atan hman niin camping trips te free movies ta leh activity hrang hrangte an nei thin. Burma ramah pawh June 1ah an hmang a.
Turkey ramah naupangte sorkar hmunte an tlawhpui thin hi tha ka ti khop mai.

Jun 2, 2014

Hrik Thih

Pathian Hmanrua Pi SawiEthangpuii Zimpui

Ni 26.Jan.2014 hian Zimpui khuaah Pu Thiangtea leh Pi Sawithangpuii ten hriak min thiha min tawngtai saka ka mittui a tla zawih zawih a, hmanah ka nuin min boral san lai khan ka lu chungah kut nghatin mal min sawm sela, a thu hril thiamna let 2 nei turin min tawngtai sak se ka ti rilru em em a, chutih lai chuan ka nu chu a hnuk a chat mek a ni si.
Hetia hriak min thih hian ka lawm em em a. Ka dawn chak em em ka nu malsawmna kha dawngah hial ka inngai a, ka lawm em em a ka biangah mittui a luang zawih zawih mai a ni.



Jun 1, 2014

Ka Rawngbawl Hna

Ka Rawngbawl Hna - Saya PuiaChhandamna in lo chana, nun tha nei tura nangmahnia thawktu Krista Thlarau avangin keini pawh kan hlim a. Tuna kan tuarsaknaah che u hian kan lawm si a. "Lalpa awmpuina changa, a thiltih ropui tak; hmuh theih, khawih theih, hriat theiha kan zinga a thleng hi ka tawngtai chhanna a ni tih ka hriat avangin Lalpa chungah ka lawm tak zet a ni.

Pathian thu hril kima a awmna tur; naupangte (a bikin Zo hnahthlak naupang zawng zawngte) hnena chanchin tha hril tura Pathianin he rawngbawl hna mi pek ang zelin in tan rawngbawltua siam ka ni.
Tun hma zawnga an (naupangte) tana thupa awm "zahderna leh ropuina" pek ve chu puitling zawkten naupangte hnena kan tihtur a nih zia zirtirtuah siam ka ni a. Rinna leh Thianghlimnaa thang zel tur Kristian nun tha chu naupangte hnenah tuh a, zirtirna hna chu kawltirin ka awm si a. Chu hna tihlawhtling tura nun min phalsaktu ka Pathian hnenah chuan lawmthu sawiin a tanpuina ka dil fo thin.

Nangmahniah Krista avanga chhuan tur ka neih ve theih nan ka hak lai thenkhat te, ka nupui hak lai then khat te, ka fanu hak lai thenkhat te leh naupang zual hak tur second hand te lei chawpin in tan rawng ka bawl a. In hnen ka rawn thlen theih nan kawng bumboh karah ka bike ka rawn khalh a. Ka nupui fanaute hnen Rangon-ah awm thlahlel tak chung si a in tana ka hun ka hman zawk zia te hi inhriata min tirtu Lalpa chu infak zawkna turin in tan heng thu hi ka ziak a ni. A chhuang apiangin Lalpa chu chhuang rawh se.

Krista chhandamna thu chu mi zawng zawng hnena hril kima a awm hi kan Pathian duh zawng a ni a. Chu Thu chu "Uite rim in nam," an tih thin nangni naupangte hnen ngeiah pawh hriattirin a lo awm tak hi. Kristaah chuan tha famkima kan dintir theihna tur che u- in, kan zilhin, finna tin renga zirtirin Krista chanchin kan hrilh che u hi.
Heng zawng zawng hi mahni chaknaa ti ka ni lo, mi tirtu Krista chakna leh finna, keimaha thawk thin chu hmangin ka bei talh talh a, ka hun te chu a lo thlawna hmang mai ka nih loh nan rim takin ka thawk thin a ni.

Krista tana palai hna ka thawhna kawnga min hriatpuitu leh min tawngtai saktu, ka nupui fanaute leh ka nghawngkawl bahpuite leh nangni Naupang sang tam tak ka neih che u avang hian Kristaah chuan ka huai a ni.
Kristaa beiseina nei tlat a, thianghlimna nuna thang lian zel turin ka Pathian chuan tanpui che u-in, Thlarau Thianghlim chuan kaihruai zel che u rawh se.

Ka vawiin Nun hi in tan ka dahkham a, chumi lo pung tur; nun tha leh rah tha chu beiseinain ka thlir reng a. Nun tam tak nei a, rah tha in rawn chhuah hunah in tana ka dahkham he ka nunna tlawm tak hi a lo pung ve taah ngaiin hlimin ka Lalpa hmel ka hmu ve ang.

He rawngbawl hna min kawltirtu Lalpa duh tak Isua Krista hmingin duhsakna ka hlan a che u.

Saya Puia (C. Lalawmpuia)
Naupangte Thian,
Rangon.
(Kol. 1:24-29)

NB. He thu hi Tuibual-a kan rawngbawl lai, ni 25. 5. 2014 (8:00 am) a ka ziah a ni.

Today's Memory Verse

Sam 105:1-4
Lawm turin a malsawmna a mal malin chhiar la, i nuna Pathian hna thawh ti ti la, A Hming Thianghlim i fak tihna a lo ni ang a, i nunna atan hlimna i hmu ang.