Khampat Bung Chanchin Thar

(Group mail a mi ka paste a ni)

From: kola computing <kolalacomputing@gmail.com>
To: huivalenthiam <huivalenthiam@yahoogroups.com>
Sent: Friday, 17 February 2012 10:48 PM
Subject: [huivalenthiam] Khampat Bungpui avangin buaina chhuak mek

Dear Hui huite,
in lo dam em..? hei tunlai chanchin;

Mizo khawvelah a hria a piangin pawi kan tih em em tur tunlai a
Khampat leh a chheh vela thu leng vel chuan mi a barahkhaih hle a ni.

Chu thil chu; Date 2/2/2012 ni a Tamu District office a Thlangkawl
khaw lehkha thleng chuan buaina a lo siam chhuak ta a ni. Khampat
Bungpui chu kawlho ( A kianga a awm kawl ho) Thlangkawl khaw mipui te
chuan ..." he Bungpui awmna hi kan pathian hmun hma a ni a kan ram a
ni. Khampat mizo te hiann Bungpui hmunah Biakin an rawn sa hi kan
phalna tel lo leh kan hriatpuina tel lovin kan pathian hmunhmaa
hetianga an ti hi kan duh lova thu neitu ten min khap sak rawh u,"....
tiin an lo va theh lut a.

Kabaw MWO te chuan he buaina hi chinfel tumin an bei mek a. A awlai lo
hle a ni. Buaina hi a la kal zel a. District levela chinfel pawh a
theih loh mai theih a ni.

Kan mizo hnam history-a kan mizo pipute phun bungpui hetianga min chuh
takah chuan
he bungpui hian kan mizote hnam nunah eng chenin nge zung a lo kaih a,
a lo din tih chu he buaina lo chhuak hian a ti lang chiang ngei ang.

Bungpui hmunah hian a sirah Biakin ni lovin chawlhbuk a dung feet 36
avang feet 18 a seia sak mek a ni a. Chuthil chu Biakinah ngaiin he
buaina hi a lo chhuak ta a ni. ...."Kan hmun hmaah in rawn leng thei,
in rawn tlawh thei, mahse kan ram, kan pathian hmum hma sang atangin a
lo ni a, kan ta a ni. Engmah kan thu lovin in ti thei lo ang. Eng
pawh ti dawn u la kan hmunhma a nih tlat avangin kan phalna inrawn la
hmasa tur a ni,"... tiin kan palai kal te chu an lo chhang a ni.

Hei buaina hian kan hnam nun a dai pha a, kan lairil a khawih pha hle
a ni. Engtin nge hma lak zel dan tur tih erawh thuneitute thu ngai
changin bengchhit reng a nih thu hriat a ni.
Dear zawng zawngte, tawngtainaah i hre theuh ang u.

### In thian
Kolala ###

______________________

2012/2/17 Lal remruata <lalremruata05@gmail.com>
Pu Lala
i thu rawn tarlan chuan mi abarakhaih hle mai.
engtiang taka han tih chi ngeni ang aw.
buaina sosang lova tihfel theih nihramse avaduh awm em.
pakhatna ah chuan, biakin anih loh thu hriat tir nisela.
pahnihna ah chuan, tun hma atang tawhin hehmuna picnic leh thil eng emaw
tih ho changin
in pathian chung ah hian buaina kan siam ngailo.he kan in sak pawh hi
thil tih ho a awm changtea chawlh hahdamnan mai a sak ani tiin hrilh nibawkse.
(he kan insak avang hian buaina min siam biklo ula a that kan ring tih
nibawksela. )
( rin loh taka thu hla a sosang hle anih palh chuan kan dinhmunte pawhin
atul mai theia chutiang thilte a thleng palh anih chuan,
*KHAMPAT* tih hming pawh hi *Shan hnam* ho phuah an tawng anga sawi mai
atha lovang. mizo tawng ani a* KHAMPANG khua* tih ania kawl hoin awlsam zawngin
tihian anti khampatta mai ani, tih hi athat ka ring.
kan mizo zing ah ngei ngei pawh Shan ho tawng leh phuah *Rangkachak
khua*tihna anga ngai hi an awm nual maia.takzet ani. chutianga kan ring dawn anih chuan chhuichian a that arinawm. han inzawt dawn teh ang?
khampat ah hian* Rakachak* alochhuak tawh thin reng em??khampata seilian
kania, keini pianve hnu ah chuan ah rakachak achhuak tih thawm reng reng ka lahrelova.*
rakachak*hmel hmuhtur a awm awmpawh ka hrelo.
rakachak pawh chhuak silo chu engvangin nge rakachak khua anphuah rikngawt ang??
hei vang hian mizote hian fin dan kan thiam ahuna.khampat hi kan ta anihna kan zawnchhuah ahun tawha thil tul anibawk ani.
*KHAMPANG *khua anih theihna chu tun hma atangpawhin bungpui kianga
(tuna bungpui hrut chim tep tawh tu hi) hi bungpui nen ainrual
theilo hrim hrima.
kan pi leh pute kha bungpui nena inrual hmun sang ah an chenga. an
tuitlan ber chu kham hnuai ami ania.
vang hian Khampang khua tih anithei ani. Eng hnam pawhin kan tawnga
tang chutiang hming chawia sak ani pawh rawntise kan lo
pawmzam mai tur anilo vang. mizo hminga phuah anihna hi kan pholanve hi

hun tawh ani.
kani tihtawh phawt chuan he thu hla hi kan ngaizam mai tur anilo
vang engtianga han tih chi nge tih hi kan ngaihtuah tlana hriatna(kan tawn
hriat, tih dan tur a tan atha) kan in hrilh tawn a tul hmel khawp mai.
pathianin engkim atitheia mizote hi pathian ringtute kan nia kan tana
tha
turin romin relfel sak hram tehse.
kan inhriat tir zel dawn ania.
______________

On Sat, Feb 18, 2012 at 3:07 PM, Hrang Thuama <bthuama@gmail.com> wrote:
Thian pa lala rawn tarlan chuan thin a khei hle mai,,,kawlram sawrkarin
dang zawng2(hel pawl)te
ram siam that nan remna leh muanna an siam lai meka,heng kei ni
zofate hlut em em mai ka pi leh puten ram an lo sahna hum kawl hoin min chuha min han ti buai hian ka thin an ti na em a ni,,
Chutiang chawlh hmun tura sak mai mai an phal lo hi,an sakhaw dan leh an in zirtirna nen hian a in kalh hle a ni,,Kawl ho chuan hmun tinah hian "za yet"(chawlh hmun)in an sa
fo thin a,kei ni poh hian
chawlh hmun kan sa ve mai a ni hian ka hria a,sawi buai tur poh a awm lo
hian ka hria,,,,Chu "Za Yet"ah
chuan a duh duh a chawlh hahdam theih a,inkhawm nanpon a hman nghal theih
bawk a ni.
Tun hma zawng zawng khan thlangkawl ho hian he bungpui hmun hi
hmun an ti vek a ni.
Kei nge poh hi khampat khua k ni a,khampata ka awm lai poh kha thlangkawl
putar ho tam tak nen hian
kan sawi dun thin a,an ni poh hian helai hmun hi chuh chi reng rengah an
lo.Mizote hmun a ni an ti vek.
Tunataka hetiang thil lo thleng ta hi sakhuana politic a lut a ni ngei
ang tih k ring tlat a ni... Chuvang chuan sawrkar thu nei tu hnenah poh hei hi biak in a
ni lo "Za Yet"zawk a ni e,,tiin lo sawi mai zawk i la ,a tha mai hian ka ring,Hnam thu hla a nih avangin ka zofa zawng2te insuihkhawmna hun tha tak
lo piang chhuak thei hram se a duhawm hle,keini pohin theihpatawp
chhuahin kan lo tawngtai dawn a nia...
In thian
.B Thuama

__________________

On 2/19/12, lala chunga <lalakanan@gmail.com> wrote:
> Dearte,
>
> Bungpui hmuna Chawlhbuk an sak chu; Biakin a ni lo tih hrilh fiah an
> nih mai chu sawi loh
> Sakhuana lam thil nen inkumkaihna a nei love an tih pawhin a eng pawh
> chu ni sela, hei hi kan pathiam ram ( pagoda Area) tun hma atangin a
> lo ni reng reng a... tih hi an chhanna chu a ni a.
>
> Kawlramah Rih Rihkhawdar a mi leh Bungpui Khampat Bungpui hi kan
> pipute sulhnu kan neih chhun a ni a, bungpui hian tlawhtu hi nitin in
> hmun hrang hrang atang hian a nei reng thin a ni.
> Tunah pawh an la tlawh mek zel bawk a. Chawlhbuk sak erawh chawlh rih a ni.
>
> Kan hruaituten hma an la mek zel a, inrem dan kawng tha tak zawn mek zel a
> ni.
> Hnuai lamah a inrem mai theih tak loh avangin chunglamah lawn a ni
> tawh a. Inrem puina chu neih pui tumin hna thawh chhun zawm zel a ni
> tih...chanchin hriat a ni.
>

Mama Thlalak

Ka fapa upa zawk mit hmul hi nula ho hian an awt thei khawp mai a.
'Khaw-nge nakin zelah pawh amah ngeiin a la rawn en duh ve ang, hmel te pawh hi a inthlak ve zel si a. Naupan hmel te, tleirawl hmel te, tar hmel tein kan thang danglam zel a nih si hi tirilru chungin ka fapa thla chu ka la ta pawp pawp mai a ni

Fapa Pahnih Ka Nei Ta

Ni 18 Feb. 2012 (Sat), 6:00 pm a ni a Insein damdawi in Yangon-ah ka fapa pahnihna chu a piang a. A rih lam 7.2 pounds a ni. A piang hlim chu a hmai a paw phiau a, a duhawm reuh khawp mai. A sam a sei thain, a hmai a hlai a, a bial deuh ker mai a ni.

Damdawi inah hian tlai dar 4:00-ah kan lut a. Kei leh kan thenawm nu (Pi Chersiampuii) nen kan buaipui. Nau neih ni hian cheng sing thum tha vel chauh kan seng. Damdawi man (damdawi, inchiu-na, Doctor kutbun tur, Spirit, lapua, etc leina cheng sing hnih tha leh damdawi inah duty ho (mantang ei sayama ho) hnenah cheng 9000 vel kan seng.

Zovi hi zing dar 9:00 vel atang a pum a nuam lo tan a. Tlai lam dar 3:00 velah thi tlem a chhuak a, tichuan damdawi inah lut turin kan insiam a, a inbual fel zawhin Taxi-in damdawi in kan pan ta a ni. Pi Chersiampuii'n a luhpui a, rilru tawngtainate nei mawlh mawlh chungin keiin pawnah ka lo nghak a. Kan tawngtainate chu Lalpan min chhanga tluang takin naute chu kan nei ta a ni.

Ka fapa piang hlim chu khumah kan muta, ka en reng a; zawn nei niawm tak hian a mit chu a meng kal ve relh relh a. Engmah chu a la hmu theiin ka ring lova. Chutih lai chuan kan mutna khum piaha naute pianghlim ve tho chu a rawn tap ngek ngek a. Chu tap ri chu hre ve niawm tak hian, a hmui chu a rawn tinur deuh va, tah tum ni awm tak hian a awm a, rei vak lova chuan vawi hnih a rawn ngek ve a. Pum chhunga a awm laia a nu Bible chhiar thinte chu hre ve niawm tak hian, "tapte chu i tahpui…" ve em ni chu aw, ka tirilru rauh rauh a. Ka ngaihtuah chhhunzawm zel a.

I khawvel pakhatna I nu pum chhunga I awm laiin eng ang hmel pu nge I nih, I ruhrel engtin nge a than ka hre lo, mahse I tan Pathian hnenah kan tawngtai thin a, Ani chuan a hre reng che a ni. I chenna hmun ata rawn chhuah chak niawm taka i nu pum I rawn tihchet laite khan duat takin I nu leh kei I pa hian kan lo chul thin che a sin. Hun leh nite inherin khuanu zarah I lo than lian ve ang a, chutih huna I chhiar atan tunah hian ka lo ziak a. I rawn chhiar hunah pawh hei mawlh hi rawn hre reng ang che, "I nu pum chhunga I awm lai atang tawh rengin kei, I pa hian, Lalpa chawimawia Pathian rawngbawl turin Pathian hnenah ka hlan mawlh mawlh thin che a ni," tih hi.

Khuanu ruat ang zelin a ni bi a lo kim chuan khawvela thilsiam mawi ber leh hlu ber mai kan tana Pathian min pek Rohlu tak chu kan chawi ta che a ni. "He kan neih rohlu tak hi I mawina tizualtu atan Lalpa I hnenah kan rawn hlan e."

Ka nu pui hian; nau vei a, han hrin hi a nat zia hi a hrilhfak a tling ve a. Chutah mi kal vel te chu kan han thlir a, he khawvelah hian mi tam tak kan lo awm a. Nu pakhat hmangaihna emaw tuarna nasa tak avangin kan lo piang a. "Hmeichhiate u, khawvel nu in lo ni e, ka nu ka lawm e" ka tirilru ta vawng vawng mai a ni.

Kan awmna Ward piah building pakhatah mi ruang ni awm tak hi an rawn zawn a. He khawvelah mi thar an pian mek laiin thenkhatte erawh chuan he khawvel hi an lo chhuah san ve mek bawk a ni maw!! He khawvelah hian kan lut chhuak zut mai a lo nih hi maw!!

Mambawiha, I khawvel pakhatna chu chhuahsanin he khawvelah hian I rawn lut a, engkim mai hi I tan chuan thil thar an ni vek si a. He khawvel ram zau takah hian zir tur chu I va ngah dawn tak em! Zum leh hriam, hreawmna leh nawmna inpawlh, kal penna tur tam tak, kawngpengthuama I din lai hian, kei I pa hian I kalna tur zawng zawngah ka zirtirin ka kai reng thei dawn lo che hi min ngaidam la, mahse kawng engkima I rintlak tur Pathian Thlarau Thianghlim hnenah ka hlan a che, Ani chuan I kawng tinrengah a kaihruai zel ang che, a thu I awi tlak zel dawn a nia.

Zan lamah chuan Nl. Thangtei'n a riahpui a, mipa chu a chhungah awm an phal ve loh avangin in lamah ka haw san ta a ni. Thangtei chungah hian lawm thu sawi kan chhungkua hian kan basa hle a ni. Ka fapa upa zawk Mama a lo pian pawh khan a ni hian engkimah min buaipui vek a ni.

Mama a lo pian khan a Til a uai nasa em mai fa in neih leh hunah pawh mipa in nei leh ngei ngei ang an ti a, hei an sawi ang ngeiin mipa chu kan nei ta a. Tuna mi pawh hi a til a uai nasa leh ang reng si a, fa nei leh ula mipa in nei leh tho ang min ti a. Keipawhin fiamthu deuh reuhin Football Team khat daih law lawin maw le, ka lo ti a.

Ka pa kha pa mal tak mai a ni a. Farnu pianpui unau pakhat chiah a nei a, a nu leh pain hma takah an boral san a. Tlangval senior tak a nih hnu, in leh pawh mahnia a din vek hnua nupui nei a ni a. Keini unau hi mi 6; mipa 4 leh hmeichhia 2 kan ni a. A tupa hmasa ber a hmuh khan a hlim hle a, pa mal tak a nit a bik lo. Tunah a fapa te 4 hian fapa kan nei ta theuh bawk a. A chithlahte chu Pathian zarah kan lo pung ve ta zel a, ka lawm khawp mai.

Ka fapa upa zawk a lo pian khan mi tam tak chuan fanu leh fapa in nei tawh a, a tawk viau lawm ni, min ti a. A theih phawt chuan fa neih tlem ai chuan fa neih tam hi kei chuan ka duh zawk a ni. Mizo kan la tlem zia te hi ka ngaihtuah thin. Israela (Jakoba) leh a fate kha Aigupa rama (Josepha hnenah) an luh lai khan mi 70 chauh an la ni a, hnam anga chhiar tham pawh an ni lo. Hnam anga chhiar tham pawh an ni lo tih hian ka rilru a la fo thin.

Min thlahtu ka pa chhungte hi fa ngah lo tak an ni a, ka pa hian Pathian malsawmna dawngin fa a ngah ta hram a. Vana pa khan fapa 3 a nei a, a naupang ber chu Ralduha a ni a. Ani chuan fapa 1 Chhuahzova (ka pu) a nei a, Chhuahzova chuan fapa 1 Lalauva (ka pa) a nei ve leh a ni. Ka pa chuan fapa 4; Chawngthanmawia, Tharzuala, Lawmkima, leh Lalawmpuia (keimah) leh fanu 2; Zarliani leh Lalromawii te a nei a. Ka U Chawnga'n fapa 2; Thawngchhuahzova, Lalhmachhuana. Ka u Tharzuala'n (Sena) fapa 1 Rodinliana. Ku Kima'n fapa 3 Lalhunthara, Hmingthansanga, leh Lalremruata. Keiin fapa 2 Morgan Chawngchhingpuia Lalau leh tun ami hi (a hming la sak loh) ka nei.

Fapa Thar Ka Nei

Feb.18.2012 (Sat), 6:00 pm khan Yangon Insein damdawi inpuiah tluang takin naute kan nei.
Ka blog-ah Record atan Thlalakte hi a indawtin ka'n tarlang ve a ni.
Tawngtaina chhang thintu Pathian hming chu fakin awm rawh se.
Bible chuan he khawvel sum leh pai, in leh lo te hi Ro tiin a sawi ngai lova, Fanaute erawh hi chu Lalpa laka kan rochan an ni.





Nau a vei tanDar kar 13-a upa a ni ve ta.

Nau nei hote
He damdawi ina Nurse pakhat ka zawta, he damdawi ina nau piang hi chawhrualin nitin mi 2 vel ang a ni ang a ti. A chang chuan mi 5 te, 3 te nikhatah an piang a ti.

Myanmar Academy Award

2010 Best Actress Award goes to Miss Thet Mon Myint (Zung Cer Mawi).

Lawmman sem ni hian Mizo puanchei nen inthuamin dawhsanah a lawn a, lawmpuitu pawh a ngah hle a ni. Kan Chin mizinga he din hmun luah hmasa bertu a ni awm e.
Kan ram pawh hi Fashion lamah kan sang chak hle a. Mizo puan pawh a lar ve sawt hle a ni.

Graduation

Students

My family and Hlutea
Welcome speech ka sawi ve a.


their friends & family
Graduating students
all together


2012 Feb. 12 (Sun), zing 9:30 am hian kan Bible school "Southeast Asia Nazarene Bible College of Myanmar" 9th Commencement Exercises chu tluang takin kan hmang.
Graduate students mi 9 kan nei; mipa 6 leh hmeichhia 3 an ni.
Graduation speaker hi Rev. Dr. Melvin K. Rigsby, Regional Education Director a ni a. Graduating students tan tawngtaina hlantu Rev. Kent Pelton, Field Education Chancellor a ni.
Vawk kan talha, ruai kan theh.
Chaw ei kham hnu chhun dar 1:00 pm-ah inpawl hona neih a ni a, Drama short play kan nei a, hlim takin kan hunte kan hmang.

Ruai Chaw

Ruai buatsaih nikhua hian chaw chhum fuh leh fuh loh inkar hi a thui hle a.
Chaw phawk, urh, kang, nem etc. te hi a awm leh zauh thin. Chawhmeh (sa) chu tui fu mah se chaw chhum a fuh loh chuan fatute hian sawisel an hlawh chawk thin.
Rangon lamah chuan a hnuaia thlalak tarlang ang hian kan chhum (awm) mai thin a, chhum sual a awm ve lo (chhum lovin kan 'awm' a ni zawk mah awm e).

A hnuai ber (bel)-ah hian tui kan dah a, chawhtawlh-ah hian buhfai silfai sa (no 12) tui a mamawh tawk tur nen kan dah a, tichuan a chhin lianpui kan khaikan mi hian kan chhina, a hnuai bera tui awmna belah hian a va innghat a, tachuan a hu a chhuah lohna puan chhiain kan hnawh phui zei zei a (zui thlawr ho tih dan ang deuhin, tiin hrilhfiah ila then khat tan chuan a fiah deuh mahna).

Mei hi a mamawh tawkin kan chhawm nung reng a, a tui thlit a ngai lova, chawh a ngai lo bawk a, a hmin hun awm chu Sana atang an en mai thin, minute 40/45 velah chuan a hmin thin.
Chaw pawh a hang tui bik em em a ni. A hna khat em em bawk si a.


Mizo te hi Ruai theh hi kan uar ang reng si a, hetiang hi siam ve mai a chi khawp mai. Keini pawh kan siamna a rei ve ta khawp mai kum 10 dawn lai chu a ni tawh ang, vawiin ni thlengin kan la hmang a, a tlo ang renga a man hla khawp mai.

Tuarpuii Tahan-ah

Ni zan (8.Feb.12) khan Tahan atangin ka tupa (Lengthiam Magazine editor)-in min rawn phone-a, Tuarpuii ten Tahan-ah Show ropui tak an neih thu min rawn hrilh a. Ka rilru-ah thil tam tak a rawn lut a, chung zawng zawng khaikhawmna chu, "a van lawmawm tak em!"
He show-a an sum hmuhte hi tar chak lote tanpui nan an hmang dawn tih min hrilh bawk. Tuarpuii nen an inkawm thu leh kawm a nawmzia hahipin min hrilh bawk.


Zoram lama kan unaute nen inpawhna tha kan neih chho thei ta zeuh zeuh a, hmanni lawk khan Vanlalsailova te an rawn kal tawh bawk a. Hman kum lawk khan Dr. P.C Biaksiama te, Liandingpuii te, Evan. Vanlalnghaka, Lalchungnunga, Lalengzauva te nupa (Thangkura pu, a hming hi ka ziak dik em aw!) te, etc. an rawn kal tawh bawk a. Hetianga min rawn tlawhtu zawng zawngte hian boruak tha an rawn keng tel zel bawk a.

Heng tiang hun kan nei thei hi khawvel zawng zawnga thil hlu leh pawimawh takah kei chuan ka chhiar a. Mi dang tan hriat tham loh pawh a ni mai thei e, Chhak leh thlanga kan mizo te tan erawh a hlu tak meuh meuh a ni.

Hetianga program hman tawhna zawng zawngah hian ka tel kim vek lem lova, mahse ka tel venaah te chuan kan inthlakhlelh tawn zia te, kan inngainat ruk zia te, kan induhsak tawn zia te, kan hlim ho zia te hi ka chhiar chhuak thin.

Tunah chuan kan ram sorkar pawh a inhawng zau ve tial tiala, ka lo hriat danin Mizoram lam atanga Tahan leh a chhehvela ni rei lo te cham tur hian Visa pawh lak kher ngailem lova tih dan te pawh a awm ni awm takin ka lo hria a, mahse ka chiang chiah lo. Ngaihventu tan chuan a hriat theih mai awm e.

Hetia kan inpawhtawnnaah hian fimkhur taka program te duangin leh kan in unauna te tinghet tur zawnga kan fimkhur tlan a tha zel dawn a ni. Chung zawng zawngah chuan Ringtu kan nihna hian nghet takin min phuar se la, "Mizo tak zelin aw le!" i ti zel ang u.

Chi (Salt)

Chi hi chaw hmeh tui takah leh tui vak lova pawh thlak ila a hna thawh dan a thulh chuang lo; a al reng a ni.

Chi hian fak a hlawh ve vak lo; sa te hi chi tel lo chuan a tui tur angin a tui lo a. Chi kan thlaka a lo tui tasawt a, in chi hi a va tui ve ti lovin in sa chu a va tui ve kan ti hlauh zel.

Chi angin awm rawh u, min ti lova. "Lei chi in ni e," min ti zawk a (Mat. 5;13), hei hi kan nihna a lo ni a, kan nihna chu chaw hmeh tui emaw tui lo emawah pawh ni se, hlim ni leh lungngaih niah te, ringtu zingah leh ringlo mite zingah pawh, i lan tir ang u.

Khawi hmunah pawh awm ila/ tel ila kan nihna (ringtu) hi a nihna ang tak hian a lang chhuak tur a ni. Ringtu kan nihna hi a che chhuak anga kan bul amiten fak leh that an lo hlawh thei dawn a ni.

Matt. 5:13