Zawhna

Mizo/Chin hnam chungchanga zawhna mawl te te:

Chin tih hian Mizoram ami te hi a huam ve em?

Mizo tih hian Myanmar, Bangladesh ami te hi a huam ve em?

Zohnahthlak hmun dang amite hi: Chin nih duh loh vanga  Chin ni lo nge, Chin nih loh hrim hrim vanga Chin ni lo zawk?

Hmun dang amite hi: Mizo an nih loh hrim hrim vanga Mizo ni lo nge, Mizo nih an duh loh vanga Mizo ni lo zawk?

Mi min kohna ang ang hi kan nihna a ni mai em?

Burmaah Chin tia min koh avangin Chin kan ni ta mai nge?

Indiaah Mizo tia min koh avangin Mizo kan ni ta mai nge?

Min koh dan ang anga lungawi mai nge tha ang, kan lungawi tlanna tur anga inkohtir?

Kan awmna a danglam avang maiin kan (hnam) hming hi danglam ve zel tur a ni em?

Engang pawn min ko se kan nihna  a danglam lo kan tih si chuan 'Hming' hian engang chiahin kan nihna (identity) a sawifiah?

Kan nihna ang taka inkohtir turin a hming putu'n duhthlanna leh mawhphurhna kan nei em?

Anihleh kan nihna (identity) tak chu kan hming nen engtin nge kan sawizawm tak ang?

Hnam khat kan nih si chuan heng zawhnate hi 'Chhanna' inang mitin hnen atang kan phut ngam ang em?

Chhannate chu  kawr khata an luan za theih nan engtianga rei nge nghah ngai ang?

Nghah rei a ngaih loh nan engtia hma lak tur nge ni ang?

Euro 2012

World Cup tluk thawthanga an ngaih, Khawvel footall thiam tamna ber leh ngaisangtu ber Europe khawmual ram hrang hrangte in elna, UEFA-in a buatsaih European Football Championship hi kum 4 dana neih thin a ni a. Tun tum hi a vawi 14na a ni. Poland leh Ukraine ram 2in an inthlen tawm a, Poland rama Stadium 4-ah leh Ukraine rama Stadium 4-ah an khelh mek a ni. Euro 2012-ah hian ram 51-in qualifying round an khela, chuta a thiam thiam ram 16 te chuan European Championship Final hi an khel ta a ni. Kum 2016 atang chuan he championship final hi ram 24in an khel tawh ang. Tun tuma pakhatna latu chu kum 2013 FIFA Confederations Cup, Brazil-a neih turah automatic-in a tling nghal ang.

Euro 2012 chu ni 8.6.2012 khan Poland khawpui Warsaw, National Stadium-ah hawnna inkhawm ropui taka buatsaih a ni. He Stadium hi changkang taka sak a ni a, ruah a sur pawhin a chung hi khuh theiha siam a ni a, mipui leh inkhelte an hul phak thei dawn a ni.

 July 1, 2012 khian Ukraine khawpui zinga mihring tamna ber Kiev, Olympic Stadium-ah Final an khel ang. He Stadium hi kum 1923a sak zawh tawh chei that leh a ni. Football team khatah hian infiammi 23 an awm a, chung zinga 3 te chu goal vengtu an ni

.

Tun tum Euro 2012-ah hian thil mak tak mai a thleng a, Champion tura khawvel rinkai FIFA ranking-a 3na ni mek Netherland chuan First round a paltlang zo ta lo hi a ni.

Sweden khan quarter final thleng ta se eng thil ropui tak thleng ang maw? France 2-0 ngawta an hneh thei kha a ropui thlawt a ni. An defense line khauh zia pawh a lang. First round-a tla zingah chuan an tlat dan kha a nawm hmel tlat. Hlim takin an fan te an bye bye a. Chak reng chungin an chak ta lo si a

.

Champion tur han rinkual vel hi a nuam ve a. Germany leh Spain hian Final khelin, Germany hi an champion mai kan ring. England pawh hi an defense line an tha a, tin Walcott hian tluang taka a khelh theih zel chuan Semi-ah Germany pawh hi hnehin an champion lo an tih sawi a har khawp mai.

Euro 2012 Fixture

Quarter Final                                           Semi Final                             

A.    Czech Rep. Vs Portugal                      A Winner Vs C Winner

B.     Germany Vs Greece                            B Winner Vs D Winner

C.     Spain Vs France

D.    England Vs Italy

RUKRU / KUTKEM NEI

Bruma ramri depa awm Shew Ly (China ram) hi Burma ram sumdawng ho thuamhnaw indawrna hmun ber pakhat a ni a.  March thlaa ka kal tum khan ka thian sumdawng hoin min hrilh ngun ber pakhat chu "I bag kha i hma lamah ak rawh, bike chuang chunga mi bag pawh thlak sak an ching a nia" tih hi a ni.

Hmeichhe pakhat pawisa bag pawh Bike chuang mi 2-in an pawh sak a, mahse chu nu chuan a bag chu a lo vuan nghet hram a, a thalh duh bik lova, bike hnunga chuang chuan chemte a phawrh a, a banah te a sat hliama, mahse a chemte a thlauh hlauh mai a, tichuan hmeichhe nu pawh chu a tal chhuak thei a, misual te pawh an tlan chhe ta a." Hei hi chhun en lai, kawngpui kama thil thleng a ni a. Hmeichhe nu pawh hi tanpuitu beiseiin a au nasa hle a. Dawr atang leh kawngsir atangin miin an thlir tuau a, mahse tuman an tanpui lo!!! Tih thu min hrilh lai chuan ka rilru a kal thui nasa khawp mai.

Kan Mizo khawtlangah chuan chutiang chu a thlen ka hre ngai lo. An khawtlang chu a va thlamuan awm loh awm ve aw…

Keini Mizo te hi inpawh tak, a chhia leh a thaah pawh intanpuitawn a, intuarpuitawn thin kan ni. Khawtlang muanna leh venhimna chungchangah pawh sorkar thuneitute (Police etc) pawh nghak muang-chang chuang lova a tul anga che chhuak mai thin. Khawtlang himna pawh mahni kova dah tlat thintu kan niin ka hria. Hengte avang hian sorkar dan lo anga chet chang pawh a awm thin. Engemaw avanga zanah Duty a tul pawhin sorkar thuneitute lam atanga an rawn ruatna pawh nghak khawmuang lovin, khawtlang thalaite Duty turin an rawn in-volunteer mai thin.

Kan naupan lai khan misual/ rukruk hmang an mante hi veng lalin ke kawl an buntir a, zanah vaw nek thin a, kan enru thin. Chutiang chuan veng chhunga buaina tenau deuhte hi chu anmahnin an chingfel ve mai thin niin ka hria. Ka nu hian misual/rukruk hmangte hi kut lo thlak ve reng reng suh u, tiin min hrilh thin.

Hman zan lawk khan Tahana ka tupa Zotea chu a inkhawm hlanin a Bike an lo ruk sak a, kan thenawm tlangvalin Bike an chhutchhiat lai chu a lo hmu a. Zotea Bike bo thu an hriat chuan an ni chu an zawng ta a. Zan reh tawh takah an zinga pakhat (M.S.a) chu anmahni in ngei ah an va man ta a. A mantute chuan kut an thlak a. A thurualpui a thiante 2 erawh a tuk lamah Police-in an man a, an vaiin lung inah an tantir tihthu internet (groupmail) atangin ka lo hria a.

Heng rukruk hmang 3te hi mizo tlangval naupang te te an ni awm e. kum 16, 17, 18 bawrvel an ni. Tahah-ah hian rukruk hmang an man hi ka lo hmu ve zeuh zeuh tawh thin a, chung zingah chuan Mizo hi ka la hmu ngai ve lo va, he thu ka hriat hiah mak ka ti em em a, khaw dang atanga rawn pem emni an nih? eng ang chhungkuaa seilian nge an nih, Drug tih hmang emni an nih? engvangin nge ruk an ruk tak mai le?

MSa kut an thlak chungchang hi Internet (groupmail) lamah sawi zui a hlawh ang reng hle mai a. A then a zar tarlang ila,  "Kut thlaktute pawh hi Lung inah khung ve tlak an ni. Kut kan thlak hian awmzia a nei lo a. Burma mi Zu chhuang a ni tih mai vanga thi lek leka mi an sawi sa te, mi a pawngsual tih vanga thi khawp hiala an lo sawisa ve ngawtte. Tu tih dan nge an zir ang le?? Vangtlang Rorel/Nunho dan hawi zawnga kan Sakhuana hi luhchilh a siamthatna lam ngaihtuah a ngai. Dan chuan mi tute pawh an nihna ang tawkin a hum vek a, thiam loh a chantir hnuah erawh chuan dan angin a chhungah hremna a chelek chauh thei a ni. Kei ni mizote hi dawizep viau e ti lo hian kan kut lah  hi a rang phian mai si a. MSa hian a inchhir thu leh ka vawikhatnaa hetiang a tawng hi pawi a tih em em thu te, a chhungte hnenah ngaihdam dil a duh thu te min hrilh bwk. Nun bul tan that leh a tum thu pawh a sawi. Police tel lova kan thiltihnaah kan tihduh dan hi kan rilru lanchhuahna a ni chiang kher mai, etc.” 

Mizo khawtlang nun chungchangah hian inzirtirtur tamtak kan nei ngei ang. Mahse Shew Ly Khawtlang nun ai chuan kan la that tlanpui zawkin kan la thlamuanpui zawk chu a ni lawm ni??

Kan pipute hunah khan an nupui pasal turte chu eng ang chhungkua nge tih an chhui nasa thin. Kutkem nei chhung a mi te chuan nupui pasal an hnawn phah te an ti thin.