Rev. Chanchinmawia thih dan chhui

Rev. Chanchinmawia kha a thih hlim chhawn leh a hnu rei fe chhung kha mite rilru luahtu ber leh zoram khawvel ti ti ber a ni a. Police special investigation lam chuan abul atang reng khan mahni intihlum tiin a chhui lut tlat mai si kha, mipui mak tih a tlinga, mahni intihlum an tihna chhan finfiahna mumal tak mipui hrilh tur an nei lo khan mipui rilruah zawhna tam tak a siam a. Website hrang hrangah comment han chhiar ila, hliam a tuar dan leh an awmpuinu leh a nupui fanau te tawngkamte leh thil awm dan atang mahni ngaihdan leh chhui dawnna atanga ngaihdan tlangpuiah chuan mi kut tuara thi ngei niin an ngai si a.
Kohhran pawhin mahni inthat a nih an rin loh a vangin kohhran danin mawi hnai taka vui a ni a. A chhuitu kan uisa thiam te hi kawng an bo nge, mipui leh kohhran hi Police aiin hnuichhui an lo thiam zawk? Kan bo tlang vek zawk em ni. Police te tan a harsatna an sawi chu an thlen hmaa hnuichhui theihna tur hmanrua leh hnu hma rem hre taka silfai vek mai ani kha a ni a. An tlai deuh a ni. A hlimchhawnah mipui au hla chu CBI koh kha a ni a, hei kum khat hnuah CBI chu koh an ni ta a, anni pawh hi an tlai deuh tho ang em?

Naupang inlarna te pawh a lo chhuak a, mahse mipuiin eng ualah an ngai hran lem lo va. Tunah phei chuan thawm a dai duk a, mipuite hian an theihnghilh zo ta emaw ni tih mai tur a ni. CBI hnuchhui dan pawh ngihven peih kan awm vak tawh chuang lo ni berin a lang. CBI hnuchhuina hi Police special investigation ho kaihhruaina hnuai atanga neih tho em ni? An awmpuinu leh a nupui fanau leh mi dang dang interview an neih te thu sawi hi a hmaa an sawi nen a la in ang reng em? CBI ho hian zalen takin anmahni thuin thil an ti em le? An interview tur te hi Police ho hian an lo va thawt lawk hmasa fo em? Nimin khan CBI ho chu mizoram atang an haw leh ta a. An thil hmuh chhuah an rawn puan hun hi lo thlir thap mai ila. Mikut tuara thi emaw mahni intihlum a ni e tih ang vel chauh ni lovin. Mipui tan pawha hriatfiah theih turin a prove na an nei thei turah beisei ila. He puithiam thih dan hi hriat chhuah a nih hma chuan zoram mipui te rilruah hian a daiin ka ring lo.