Philippines Zofa Fellowship

Philippines-ah hian Zo hnahthlak kan awm ve nial a, a tam zawk chu kan unau Hakha, Falam, Tedim te hi an ni a. Keini enga tawng hmang hi tlemte kan awm ve bawk a. Heng kan unaute hian anmahni pualin fellowship an nei hrang thliah a, chhiat ni that niah a tangkaiin, heng hunpui (eg. Christmas)-ah te hian hlim takin an hmang ho thin a, zofa fellowship kan din ve hma chuan kei pawh an zingah min sawma, khawhar lo takin ka hmanpui ve thin.

Keini pawh mi 10 tha lai kan lo awm ve takah chuan Nl. Sangpuii'n Mizo fellowship din ve chu a rawt ta a. Tichuan kum 2007 March, 18 (sunday) khan hmun nuam leh mawi tak mai Seven day adventist Seminary(AIIAS), Cavite-ah, Ptr. Lalrawngbawla apartment-ah a vawi khatna atan inkhawmna kan nei tan a, tah chuan hruaitu thlanna te neih nghal a ni a. President atan min thlang a, Secretary- Nl. Sangpuii, Treasurer- Nl. Lalfakzeli, convener- Pu Lalthangmawia te thlan an ni bawk. Annual membership fee mi pakhatah cheng P100 kan inkhawn nghal bawk. Tichuan chawhlui kilho a ni a, thlate kan la a kan hlim tlang ve hle a ni. Tichuan kan kal zel dan tur tlangpui pawh rel nghal a ni a, inkhawm hun tur pawh thla 2ah vawikhat neih thin ni sela a hun leh hmun tur program duan chu President leh secretary kutah dah a ni. Mahse inkhawm hun hi a hnu lawkah thlak dang lam a ni a, thla 3ah inkhawm vawikhat neih ni se kan ti leh ta zawk a ni. A tam zawk hi zirlai kan ni a, kan awmna hmun te a in karki em em a, bus leh rel a kal vang vang ngai te a nih avangin.

Tichuan he kum 2 chhung hian Pathian kaihhruaina a zarah inkhawmna chu a rem chan dan ang zelin kan memberte awmna hmun hrang hrangah nghah kual a ni a, ram dangah mahni tawng ngei hmanga fakna hla kan han sa ho ve dal dal chu nuam dang dai ve tak a ni. Mizo tawng ngei maia Lalbiakna han chham mawlh mai kha a dang zar mai, mahni khua leh biak inah ka cheng ta emaw tih mai tur a ni a, thla amuang sarh a, tawngtai thuchham pawh a tak bik ngaih hian a hriat a ni.

A hnuaia pic hi Pastor. Lawma chenna hmuna kan inkhawm tum a mi a ni. Ptr. Lawma hian D.Min a zirlaiin hetah hian kohhran (Tent of Praise) a din a, atan tirah chuan puan in te takte kaihin Bible study leh music te naupang ho a zirtir a tunah chuan member thahnem tawk tak an tling ve ta.
A tua te pawh hman lo tak tak vek kan nih avangin activity pawh neih tam a har hle a. Mahse heti chung hian keimahni ho erawh kan inngainat phahin kan inhriatchian phah a. Mi ramah hetiang taka kan inthlamuan tawn thei hi a ropuina leh a hlutna tak niin ka hmu.

Kum 2 chhung tha tak leh tluang taka president nihna ka chelh theih avangin Pathian hnenah leh memberte hnenah lawmthu ka sawi a. Tihawm ka tih loh emaw tih loh tur nia inhriat ka tihpalh a awm a nih chuan inhriatthiamna ka dil a. Kumin kumthar hruaitu thar leh member zawng zawngte Lalpan min kaihruaiin mal min sawm leh zel rawh se.

Kum Thar Prayer Mountain-ah
Keini PZF te chu Dec. 30 tlai atang Prayer mountain, Antippolo-ah zan hnih riakin Pu Mawia motorin kan thawk chhuak a, Jan. 1, 2009 tlaiah mahni chenna hmun lam panin kan haw leh ta a ni. Hemi tum hian Baguio (summer city of Philippines)-a kan mizo zirlai 2; Tv. Lalpeklawma (Yangon) leh Pu Moses-a (Mizoram) ten min rawn hman pui theia kan lawm hle a ni. Chutih laiin kan member rawn kal remchang lo an awm bawk.


He prayer mountain-ah hian; a tlang pangperah hian in an sa thluah a, Chapel te, Seminar hall te, prayer cell tam tawk tak, leh mi 20 vel te te thut bial theihna tur Bible study emaw thian za ho devotion neih nan rem chang tak an sa nual bawk a. Tin, Riahna hmun leh khum nuam tak te, eirawngbawlna hmun a awm bawk a, swiming pool a awm bawk a, thlan tla barh barhin tawngtai lem lo mah ila tui chen chu a nuam tho mai.

Dec 31 midnight inkhawm nei ila tiin kan rel uk tawh a, mahse zan dar 11 vel atang halpuah leh halmawi chi hrang hrang chuan kan mit leh beng a verh ta zawk a, midnight service chu kan nei thei ta lo va, halpuah (rocket) te kan hal ve ta zawk a. Kum thar chibaite kan inbuk zawh chuan zing lam dar 1-ah ei leh in kan ei a, inkawm hlimna te kan nei a, kum chu kan thar ve ta der mai a ni. Kum thar damtea min hruai thlengtu chu Pathian chauh hi a ni.

Kumin Philippines Zofa Fellowship min hruaitu turte chu: President- Lalthangmawia, Vice- Ptr. George Lalnuntluanga, Secretary- Nl. Lalfakzeli, Treasurer- Nl. Vanlalhliapi, tichuan Advisor atan keimah min ruat bawk.

Pu Lalthangmawia (Mawia) hi kum thuah chuan naupang te mahnise Philippines-ah hian kum 10 chuang awm tawhin an tawng pawh anmahni ang chiahin a thiam a. Tunah hian Company pawh ama pual liau liau vin a din a, Philippines ho mi enge maw zat a chhawr a ni. Philippines-a rawn zin zofa u leh naute tan pawh hrait chi tak a ni. A ni hi Rangon-a seilian a ni a, mahse mizo te hi kan duai lo a ni tiin mizo a nihna hi hnam dang karah pawh a chhuang em em thin a ni. A kaihhruaina hnuaiah Philippines Zofa Fellowship pawh tlung takin kal sela tih hi ka tawngtaina a ni.

Philippines-a awm zofate hi a tam zawk hi zirlaite kan ni a, a then chu eizawnna leh rawngbawlna neia awm an ni.