Ka Fanu Tan Lehkha Thawn (First Letter To My Daughter)

Ka Fanu Duhtak - Angeline Lalhmangaihi

GGi, Chhandamtu Lal Isua hmingin chibai ka buk a che.

Pathian zara i dam thute, lehkha pawh tha tak i zir thute i nu hnen atang ka lo hriaa ka lawm hle mai.

Ka fa hmuh hmasak ber ka duat em em i ni a, i tet laia thawnthu ka hrilh thin che leh Mu-chu (nau awmna) i kal laia thirsakawra ka thlah thin che kha ka la hre reng a. C. Nuni nen ka phur che u a, Mu-chu gate kan thlen veleh ka tawngtai sak thin che u kha Lalpan a hre renga lehkha pawh i thiam thei em em a ni. Tunah chuan i lo tleirawl ve tan ta a. Nangmahin engkim i inngaihtuah ve thei tawh a, school i kal pawhin thlah i ngai tawh bik lova. In lamah i nu pawh i pui ve thei tawh tihte ka lo hriatin ka hlim em em a ni.

Pathian rawng ka bawlna atan hian min lo tawngtaipui ve thin turin ka sawm che a. Keini chhungkua chu Pathian rawngbawl turin kan inhlana. I nu nen kan inneih zan hian Kristian chhungkaw tha tak din turin kan tawngtaia, Pathian hnenah kan inhlan a, chak loh changte chu nei ve thin mah ila, Lalpan kan tawngtaina a hre renga heti hian vawiin ni thlengin a rawng kan bawl thei hi i nu leh i pa chu kan lawm em em a ni.

Lalpa rawng kan bawl avangin khawvel thilah kan tlan ve thei lova, hemi avang hian rual awhna tam tak pawh i nei mai thei e. Mahse lei lam thil leh van lam thil hi kan khaikhin dawn chuan van lam thil hi a ropui fe zawk a. Vawiin nia dam leh hriselna kan neih te, ei leh bar tur kan neihte hi van lam malsawmna kan dawn a ni a. Lalpa Pathian hi kan fak fo tur a ni.

Mate, ka lo enkawl danah che tlin tawk lohna tam tak ka nei a, ka vin thin te, ka thinchhe thin te kha min ngaidam rawh aw. Tunah chuan nangpawh i tleirawl ve tan tawh a, thinchhe taka vin che ka duh tawh lo a ni. Nangpawh nula zaidam tak nih i rawn tum hram hram dawn a nia. I nu nen hian kan inhmangaih em em a, nangni fanu leh fapate kan nei che u hi kan hlim em em a ni. Heng hlimna kan neih zawng zawng hi Pathian min hmangaih vang a ni a. Pathian hi chu a va han tha tak em!

Mate, Pathian rawngbawla ka vah chhuah hlan hian i nu lo pui tur hian ka ring em em che a ni. Kan fanu neih chhun i ni a. I lo lian ve tawh hi ka lawm tak tak a ni. Hei i puan bih tur 1 ka rawn thawn che a. I puan neih hmasak ber tur ka lei sak thei che hi ka va han hlim tak em! Malsawmna min petu Pathian hnenah lawmthu i lo sawi ve dawn a nia.

Hun i neih chuan lehkha tawi te talin min rawn thawn vela, ka lawm ngawt ang.

I nu leh i naute kha lo duat la, an tan leh ka tan min lo tawngtai sak thin ang che aw.

Van lam khi thlir tlat thin ang che.

Nangmah hmangaihtu,

I Pa.