Rawngbawlna Report Tawi

Pathian kaihhruaina a zarah Champhaiah leh Aizawla School hrang hrang 26-ah Naupang rawngbawlna April 30 – Oct.3.2013 thleng khan kan nei a. Naupang zawng zawng mi 3078 an ni a. School pakhatah hian ni 3 deuh zel hun hman a ni a. Inhlannate buatsaih thin a ni a. Naupangte mittui tla zawih zawiha Isua hnena tawngtainaa tih tak zeta an inhlan han hmuh meuh chuan lawm avangin biangah mittui a luang a. Pathianin hetiang hmu thei tura ka mit min mentir hi ka lawm tak zet a ni. Tin, zirtirtu thenkhatte pawh an lawm avangin an mittui an hru ve mawlh mawlh a, chungte chuan ka lawmna an belhchhah nasa hle a ni.

Tin Kohhran 6-ah rawngbawlna hun Lalpan min buatsaih saka a lawmawm tak zet a ni. Tin, Champhai venglai community hall te pawh hawhin inrin leh chawlhniah inkhawmna te pawh kan buatsaih a, naupang an thahnemin kan hlim thin hle a ni.

Kan kal tawhna zawng zawngte kha an va ngaihawm tak em! Naupangte an zirnaah mark tha tak an hmuh ka duhsak tak zet a. Ka rawn kal leh hun chuan "Mark engzat nge in hmuh ka zawt dawn che u a ni" tiin ka thiam tawkin ka fuih ve a, naupangte tan a sawt ve ngei pawh Lalpaah ka beisei tlat a ni. Zirtirtu, naupangte hmangaihtu zawng zawng chungah khan ka lawm tak zet a ni.

Sawi nuam vak lo mah se thahnem ngaihna avangin han sawi tel hram ila. Kan Zorama naupangte dinhmun eng emaw chin chu ka hriat chian phah ve a. Tan lak a ngai hle mai, nu leh pate kan tan a ngai tak zet niin ka hria. High school leh higher-ah chuan drugs ti an inphum teuh mai a. Thil mak deuh chu mi pa aiin hmeichhia an tam zawk hi a ni. MSACS hma lakna survey atanga ka thu dawn danin ruihhloah leh sex-ah kan nasa hle a, a lungchhiat thlak ka ti tak zet a ni.

Primary school naupang atangin Denrite hnim nachang an hre tawh a. Ban kan inphartir a; Nula tlangval drugs tilai hmu an tam em em bawk. Hei hian: kan khawlaiah ruihtheih thil a ualau hle tih a tilang a. In thup lo takin naupangte hmuh theihin an ti nasaa chu chuan Naupangte nun a kangkai mek niin ka hria.

Kan rawngbawlnaah tawngtaipui kan ngai tak meuh meuh a, kan Zoram naupangte tan mi zawng zawng min tawngtaipui turin kan sawm a ni.

Nearer, my God, to Thee

V 4 -Dam chhung mi hmuak apiang, I tirh ni se,

       A nuam nge a hreawm, engpawh ni se;

       Hei ngawt hi ka dil ang, I lam lo hnaih zel hi,

       I lamah min hip rawh, Lalpa Pathian.

Pathian fa dik takte tan chuan:

Kan tawh mek leh kan la tawh turte hi kan Pa Pathian tirh a ni. A nuam emaw nuam lo emaw kan thil tawn mek atang hian enge Pathianin zirlai min pek a tum, tiin ngaihtuah thin ang u.

He hla thu a, 'engpawh nise' tih hi a ropui hle mai. A zawng zawngin a inhuam tih a ti lang chiang hle. Chuvangin a nuam emaw nuam lo emawah a buai pha tawh lo a ni.

Dil tur hi kan tawngtai hian kan ngah thin hle a. Thenkhat phei chu kan dil hnem lutuka kan dil ber pawh kan chiang lova, dawng turin kan inbuatsaih tha tawk hek lo. Tin kan thil dilte hi Amah hnaih nan nge kan hman, amah hlat phah nan???

Tum khat chu kan thalai member zing pakhatin hna a hmuh theih nan min dilpui rawh u tiin tawngtai thupui a rawn theh lut a. A hnuah hna chu a hmu ta ngei a, chuta chinah chuan a rawn inkhawm hman ngai ta lo a ni……

A lam hnaih zel hi kan chak em? Mi chengvawng leh thianghlim tak bula awm te hi then khat chuan nuam an ti lo fo nia. Pathian hnaih deuh deuh tur chuan thianghlimna nuna kan than len len deuh deuh a pawimawh a. "Chutih hunah chuan inhma tawnin a ni tawh ang."

In enfiah ve teh! Van ramah chuan inhmatawnin a ni tawh dawn si a.

A saw raltiang tlangah

He thlalak hi Khaw Zimpuia naupang rawngbawlna kan neih tuma ka lak a ni.

New Haimual a tang kan kal a, kei chu vanneih thlak takin Pu Rolunga fapain Bike-in min thlah a, ka team member dangte chu kein an kala, vangvat te an kai nual a. An hah ve hle ni tur a ni. Heng hengah te tuin nge khua lo sat a le? an ti hial a!!
A hmun kan han thlen chuan a lo nuam em em mai a. A tlang a sang nuam bawk a. August thlaah pawh a vawt deuh vur mai a, chhumin a bawh deuh chiai bawk a, vanram te pawh hnaih deuh ta riauvin a hriat nghe nghe a ni.
Naupang Camp leh Nu leh pa te tan naupang enkawl dan Mizo context takin zirhona kan nei bawk a. Kan hlimin hlawk thlak kan titlang hle a ni.
Mikual rawngbawltute min lo duat thiam hle a, an chungah kan lawm tak meuh meuh a, EFC pastor quarters-ah kan innghat a (EFC Pastor hi pastor awm chhun a ni a, kohhran dangin pastor thutchilhtu an nei lo), hun pawh tlang takin kan hmang ho va kan hlim hle a ni.
Kan haw dawn tuk zing dar 3:30 velah Pastor ten naute an nei a. a hmingah Samuela tiin ka sa nghe nghe a, Lalpan naute leh a nu damna chakna pe zel rawh se.
Nu leh pa, thalai, naupang zawng zawngte Lalpan awmpuiin chakna thar pe zel rawh se.
Khaw Zimpui hi in 30 bawr vel an ni a. Thal khawlum lai a hun hman nan duh thu sam niin ka hria.

This is the place

This is the place where there is no corruption, hate, and pride.

This is the place where peoples love each other and they are friendly with creatures. 

Thlalak hi Hmunluah khuaa naupang rawngbawlna kan neih tuma ka lak a ni. He khua hi in 30 vel an ni a, an inlungrual hle. He khua atang hian Buannel pawh a hla lo va, an ram chhunga awm niin an sawi. Buannel kawng hi feh kawng ang lek a zim a ni a. An khaw upa thenkhatte hnenah engvangin nge kawng hi in laih zau lova, Bike kal theihna tur talin siam ula, tun ai hian tlawhtu an tamin in khua pawh a lun phah dawn a sin ka ti a. Ka rilrua ka lo ngaihtuah loh dan daihin min chhang a; Kawng hi tha taka kan siam chuan kan kawl ram sorkar hian Buannel-ah hian an Pagoda an rawn sa anga, sorkar han tilet tur chuan keinin sawitheih kan nei leh mang si lo vang a. An Pagoda te an rawn sak tawh tawh chuan an rawn ta neih leh emaw a nia ang. An sakhaw theh darhna hmunah an hmang mai ang, tiin min chhang a.

Ka ngaihtuah chet chetin an mi chhanna chu a fin thlak ang reng hlein ka hria a, han sawi leh ngaihna vak pawh ka hre lo. Kan hriat angin kawl ram sorkar hi Buddhist sorkar a ni miau si a. An duhna zawnah chuan a mihring chengte hi an pawisa vak duh si lo va. Sorkar that hun a nghahhlelh awm hle mai. Chutih hunah chuan kawng tha takin an la lai anga Zofa nula tlangval Picnic-na hmun nuam leh mawi tak niin, tuipui ral tourist mikhual hial te pawh hiptu lo ni teh se aw!!

Friends Don't Let Friends Go To Hell

 He T. Shirt hi M.Div ka zirlaia ka roommate Kenji Goto (Japanese) min pek a ni a. Ka computer-ah he thlalak hi ka haichhuak hlawl mai a. Room zau vak lova kan chendun lai te kha min hriat chhuahtir a. Atirah chuan a individualism lutuk kha hriat thiam har ka ti a. Kei ai a naupang zawk khan min control kha a tum riauvin ka hria a. Mahse a duh ang kha sawisel lem lovin ka aw liam thei zel a, nasa taka dawhthei chungin.

Khata tang khan Japan ho hi western ho ang maiin  an lo privacy ve hle a nih dawn hi ka tihial a. Kei mizopa Social taka khawsak ngaina thin khan hriathiam har tihchang ka ngah a. A thlum a al ei zaa, in bantawn dawr dawr nuam ti, mahni chenpuite ballpen leh lehkhabute leh thirfian chena in enhranna awm lova inbantawn nawk nawk kha a zalen nuam riau va hre thin ka lo ni vei nen. 

Hetiang mizia hrep hi ka vawi khat chenpuina a ni si a. Pathian thu zir kan ni a, thinrim anga lante kha thil tihchi a ni mawlh bawk si lo. A tawpah chuan he ka thian Japanese pa lak atang hian zirtur, zirlai ka va ngah hrep ve aw... ka ti ta ringawt a. Chutia mahni tawka rilru inphah hniam ve tak maia ka harsatna chu Zirlai thar anga ka en hnu atang chiah chuan ka rilru putzia a lo danglama ka zang ta huaiin ka inhria a ni. A hnuah Dormitory Assistant-ah hlankai ka ni a, private room min pekah awm tura ka thianpa Kenji-a ka chhuahsan dawn meuh chuan tih tak te hian min ui a, roommate dang neih a hreh thu leh ka bula awm nuam a tih thu min hrilh ta hial a

.

Kan zirna runpuiina a motto chu "Bridging Cultures For Christ" tih a lo ni vei nen. Tichuan culture inzahsaka inhriatthiampui tawnna te chuan hnam hrang hrang pawh thiam takin min khawsakhotir a. Mimal tinte sadai inthiahsak chu kan tum lem lo a ni. Krista hmangaihna Kross Culutre-ah chuan hnam ze hrang hrangte chuan mawina, hlutna a lo nei a. Pathian hmangaihna zau zia leh fin zia zirtur tamtak a lo inphum ru teuh mai hi a lo ni. Hnam zia leh tawng, nunphung inan lohna chuan Pathian thu famkim zia leh ril zia te a hailang a. Tichuan Pathian thu mal thenkhat kan hnam nunphunga kan hmelhriat ngai loh leh kan tawnga fiah vak lo, hriatthiam har tak anga lang pawh kha hnam thenkhat tan chuan an nunphunga an lo hmelhriat an tawng thu malah pawh an fiah em em a lo ni thei a. Chung atangte chuan- kan context-ah engtin nge "he thu hi" hmang ve ila a fiah zawk theiha, a that zawk theih ang, tia ngaihtuahna thar tha a lo piang chhuak thei thin a ni.

Ka thupui, ka sawi tum tak chu: He T. Shirt ka en hian tun laia Naupang rawngbawlna ka kalpui mek nen hian inkungkaihna  a nei a, ka rawngbawlnaah hian naupang infiampuina te, leh item hrang hrang hmanga Champhai school hrang hrangah rawngbawlna kan neihnaah; infiamna chikhat (a hnuaia pic hi) "Island" kan tihah chuan Naupangte chu group-ah thenin rin bial (Island) chhungah an vaia ding turin kan ti a. Tichuan rinbial chu kan ti te zel a. Rinbial pawn lam zawng kha tuipui a nih avangin an thiante tumah tuipuiah an tlak loh nan an theih ang anga intanpui tawn tur an ni a. Lema kan hmuh ang hian an inpawmin an inkokichhuan a ni.

Kan sunday school-ah te pawh hian naupangte hlimpui tur item chi hrang hrang, zirtir nei tha kan ngaihtuah chhuah a, kan hman thiam a pawimawh tak zet a ni. kan inchhung bungrua leh pawnlama kan thil hmuh hmanrua te a changkang tawh a. He kan IT hunah hian kan biak in leh sunday school-ah pawh hian naupangte hip zawng leh nuam tihzawng Kristianna nena inmil kan lakluh thiam a ngai ta hle a ni. Biak in ai pawn lamah nuam an tih zawk a, biak in chu lung in ang maia an ngaih hma hian naupang rawngbawlna kawngah kan inzir a, kan insiam that a hun tawh tak zet a ni.

Ringtute chu intanpui tawn tur kan ni.

Mizo Bible Hmasa Ber Chanchin III

THUTHLUNG HLUI LEHLIN HNA

Thuthlung Hlui lehlin an tan dawn chuan Thuthlung Thar lehlinnaa an lo kalpui tawh dan angin Chhim lam leh Hmar lam chan an insem a. An insiam rem dan ang chuan Hmar lamin Zawlnei te ho an chang ang a, a dang zawng Chhim lamin an chang ang tih a ni. Amah erwhchu, lehlin hna an hna thawh tak tak chuan hetianga an insem ang diak diak hi chuan an kalpui vek ta lo a ni. Thuthlung Hlui lehlin hna an thawh atang hi chuan Bible Society lam pawhin a lehlinna lamah kut an thlak ve ta a. Letlingtu pahnih senso atan thlatin Rs. 100-in an rawn tang ve a. lehlin hna zawh a nih hma chu hetiang hian an rawn tang zui ve ta el  ni. Thuthlung hlui lehlinnaah hi chuan Zosapte leh Mizote pawh mi an inhmang tam ta deuh a ni.

Indopui Pakhatna hunlai (1914-1918) khan Zosap chambang awmchhun chu Pu Dial eh Sap Upa chauh an ni a. Pu Dia khan thuthlung Hlui lehlin hna a lo thawk ve zel a.Kum 1918 khan Hosea, Joela, amosa, leh Obadia te a letling zo hman a. Heng bute hi  Bible Society remtihnain Loch Printing Press, Aizawl-ah an chhu a. Pu Dia khan kum 1926-a a thih hmain Zawlnei Mika, Nahuma, Habakkuka leh Zephania te a letling bawk. Hmar lamah chuan Senior Missionary, Pu Mena kaihhruaina hnuaiah Bible lehlin lama mawhphurtu Committee an din a, memberte chu heng mite hi an ni: Rev. Chhuahkhama, Rev. Saiaithanga, Rev. Thanga, Pu Muka, Upa Ch. Pasena, Upa Vanchuanga leh leh Rev. Liangkhaia. A remchan angin Zosap dang Rev. Samuel Davies (Pu Samuela) leh Rev. B.E. Jones (Pu Zawna) ten an pui thin bawk. Anni hian Pu Mena hovin Pu Dian Zawlnei te lehkhabu a lehlin tawhte kha an entha leh vek a. Hun kal zelah pawh Bible lehlin hna hi Senior Missionary-in a ho ta zel a ni.

Chhim lamah chuan Pu Buanga, Rev. Zathanga, Rev. Challiana leh Rev. Chuautera te'n Thuthlung Hlui bu thahnem tak (Genesis, Exodus, Leveticus, Nembers, Deuteronomy, Joshua, Roreltute, Ruthi, Samuela I&II, Chronicles I&II, Ezra, Nehemia, Estheri, leh Sam) lehlin draft an buatsaih a. Pu Buanga hawn hnuah Missionary Senior, Rev. W.A.R. Wenger, Rev> F.T.Raper leh Rev. H.W. Carter te khan Bible lehlin hna chu an ho ta zel a. Missionary-te an hawn hnu chuan Rev. C.L. Hminga hovin Mizoten an thawk chhunzawm ta zel a ni.

Indopui 2-na (1939-1945) avang khan Bible lehlin hna kal mek chu hun eng emaw chen a khaihlak a. Ino a lo reh khan Chhim leh Hmar lamte Translation Committee an tilina a. Hmar lamah chuan Rev. Liangkhaia chu 'Literature leh Bible Translation' lama mawh phur bik turin Saitual atangin Aizawlah an sawn lut ta nghe nghe a. Ani hian Thuthlung Hlui bu la lehlin loh apiangte kha draft a siam ta char char a. Chung chu a endiktu pawl thuma thenten an lo enchhuak leh vek thin. Endiktu pawl thum an dinte chu: (1) Rev. J.M.Lloyd hovin, Pu Muka leh Rev. Chhuahkhama; (2) Rev. B.E. Jones hovin, Rev. Liangkhaia, Upa Ch. Pasena leh Upa Vanchuanga; (3) Rev. Saiaithanga, Rev. Thanga leh Rev. Zairema.

Thuthlung Hlui bu lehlin hmasa apaing hi a bu mal te a kawp tein an chhuah thin a. Ngawrh taka an bun leh ngar ngar hnu chuan kum 1956 khan a lehlin hna chu an zo thei ta a. Tichuan, Bible Society hmalaknain Thuthlung Hlui bute chu Thuthlung Thar 6^th Edition (1950) nen chilh kawpin Mizo Bible bu pum hmasa ber chu kum 1959 khan chhut chhuah a lo ni ta a. September ni 6,1959 khan Mission Veng Biak In, Aizawl-ah tlangzarh a lo ni ta a ni. A bu hming chu PATHIAN LEHKHABU THIANGHLIM THUTHLUNG hLUI LEH THUTHLUNG THAR BU tih a ni a, a phek lehlamah The Holy Bible In Lushai tih a inziak thung. Mizo Bible hmasa ber hi a dung 21 cms, a vang 13 cms leh a chhah zawng 5 cms a ni a. Thuthlung Hlui phek 913 leh Thuthlung Thar phek 419 niin, Baptist Mission Press (41A Lower Circular Road, Calcutta 16)-a chhut a ni a, bu khat man Rs. 5 a ni. A chhuah tan kum hian copy 5,000 an chhu a, Chhim lam Zosap Pu Kara leh Pu Reia te an rama hawng ta khan Sap Ramah ana chhuttir ve bawk a, India ramah pawh kum 1963 khan copu 5,000 an chhut belh leh a ni. Tichuan, Pu Buanga te hova Bible lehlin hna an thawh tan atanga kum 64 haah Zosap 14 leh Mizo 20, an vaiin mi 34 zetin rim taka an thawh rah chu sengin Mizoten Bible bu pum kan lo nei ta a ni.

Mizo Bible buatsaihnaah hian Saptawng Bible zinga mi Revised Version (1885) chu innghahna pui berah hman a ni a, a duh tan King James Version (1611) pawh hman theih a ni. A bung, chang leh paragraoh thenna atan chuan Revised Version zui tur tih a ni. Kan Bible lehlingtu hmasate hian theih tawp takmeuha ulukin an bei a, an lehlinnaah hian a theih chin chinah Bible tawng bul (Greek leh Hebrai) te pawh an thlir tel thin tih a hriat theih. Bible Society lam duh dan zul zuiin Bible lehlinna leh chhut tura buatsaihnaah hian Zorama kohhrante (Welsh Mission leh Baptist Mission) tangkawpin a huhovin an thawk thin a. Lehlin tawh sa (draft) chu lo en ve tur leh siam that ngai laite sawihova siam tha turin Chhim lam leh Hmar lamah vawi hnih vawi thum te an thawn tawn thin. A lehlinna telve Rev. Dr. Zairema chuan Mizo Bible lehlin chungchang hi heti hian a sawi, "An thu tawp chu tu lehlin nge tih sawi theih a ni tawh lo, a draft siamtu kutchhuak kha chu a ni tawh lo tih tur a ni. A let hmasatute an nih avangin a drafttu chu an chhuanawm hle, mahse hna an zawh hnu chuan a drafttu lehlin tih theih a ni tawh," tiin (kan Bible Hi ,175).

Chuvangin Mizo Bible hi mi mal kut chhuak ni lovin Pathian rawngbawltu mi tham leh thahnemngaite inpekna leh thawhhona atanga lo piang chhuak a ni.

Mizo Bible bu pum hmasa ber kan neih theihna atana lehlin hna thawktu kan hriat theihte chu:

Chhim Lam: Missionary te: 1. Rev. J.H. Lorrain (Pu Buanga)

2. Rev. F.W.Savidge (Sapa Upa)

3. Rev. W.J.Wenger (Zomawii pa)

4. rev. F.J. Carter (Pu Kara)

5. Rev. F.J.Raper (Pu Reia)

6. Miss E.M. Chapman (Pi Zirtiri)

Mizote:

1. Pu Darrama

2. Pu Darchhunga

3. Pu Thala

4. Rev. Challiana

5. Rev. Chuautera

6. Rev. Zathanga

7. Rev. Dr. C.L Hminga

8. Rev. H.S. Luaia

Hmar Lam Zosapte:

1. Rev. D.E. Jones (Zosaphluia)

2. Rev. E. Rowland (Zosapthara)

3. Rev. F.J Sandy (Pu Dia)

4. Rev. Peter Fraser (Pu Daka)

5. Rev. E.L. Mendus (Pu Mena)

6. Rev. Samuel Davies (Pu Samuela)

7. Rev. B.E Jones (Pu Zawna)

8. Rev. J.M. Lloyd (Pu Lloyda)

Mizote:

1. Pu Suaka

2. Pu Thangphunga

3. Rev. R. Dala

4. Rev. Chhunruma

5. Pu Muka

6. Rev. Vanchhunga

7. Rev. Liangkhaia

8. Rev. Thanga

9. Upa Ch. Pasena

10. Rev. Saiaithanga

11. Upa Vanchhunga

12. Rev. Zairema

Mizo Bible Hmasa Ber Chanchin Kal Zel

Mizo Bible chhuak hmasa ber hi theih tawpa uluka buatsaih ni mah sela chhut sual te, lehlin tha tawk lo anga lang te leh, Chhim leh Hmar tualtawng in ang lo eng emaw zat a lo awm avangin enthat a tul a ni tih hriat a ni a. Tichuan, Bible Society phalnain ennawn thuak a ni ta a. Hetah hian a bu tin chhiartu hran ruatten an ngaihmawh zawngte an thawn khawm a, chung atang chuan item 900 chuang tihdanglam a ni ta a ni. He ennawnna hi revised ni lovin re0edited tih a ni. Synod Press-ah kum 1982 khan chhut a ni a, Pulpit Bible-a tihchhuah phawt a ni. Heta tang hian hman tlanglawn ber tiat (standard size) a siam a ni leh a. Heta tang vek hian Thuthlung Thar leh Sam bu inkawp siam a ni zui leh ta a hei hi Mizo Biblechhut thlur hnih (double column) chhuak hmasa a ni. Kum 1983 khan ate deuh (pocket size) chi siam a ni ve ta a.

 Kum 1992 khan United Bible Societies, Asia-Pacific Regional Center, Hongkong chuan lehkhapuan tha leh man to hmangin Mizos Bible chi li (thumb index, leather zipper, pictorial, ordinary) Seoul, Korea-ah a chhu ve leh a. Hetiang zul zui hian India ramah pawh a pangngai chhu reng chungin tihchhuah a ni ve ta zel a ni. Tichuan, he Pulpit Bible Edition hi vawiin ni thlengin Mizoten Bible kan hman pui berah atang chho ta a. Tunah hian kan bible hmas ber ji Mizo tawng ziak dan hamgtge enthat leh mek a ni.

(He thu hi Mizo Bible Golden Jubilee lawm a nih tuma, chutih laia Auxiliary translation Secretary, Rev. Dr. Vanlalnghaka ralte-in Dawrpui Biak Ina a thusawi a ni).

Mizo Bible Hmasa Ber Chanchin II

(Chhunzawmna) Chhim lam leh Hmar lama Zosapte hi Bible lehlin hnaah Mizoten an tanpui ve reng bawk a. Chhim lamah chuan Pu Buanga te chu atirah Pu Darruma leh Pu Darchhungaten an pui a, a hnu lamah a pui tu ber chu Rev. Haudala, Rev. Chuautera, Rev. Khawnghinga leh Rev. Cahllianaten ennawn hna an thawk thin. Hmar lam atangin Rev. Chhuahkhama pawhin ennawn hnaah hian ava pui ve thin a ni awm e. Chhim lam leh Hmar lam hi inhre thiam tak inngaichang rawn elin lehlin hna an thawk, chanpualte pawh mumal takin an insem thin. Thuthlung Thar lehlinnaa an insem dan chu hetiang a ni.

Mmar lam: Luka, Johana, Tirhkohte, Rom, Galatia, Ephesi, Timothea I&II, Johana I,II&III, leh Juda.

Heng bakah hian Philippi, Kolossa, Thessalonika I&II te hi Zosapthara khan a letling ngei nia hriat a ni, a awm loh hnuah Pu Buanga te khan an ti tha leh niin a lang. Tichuan , hun hrang hrnga an lo lehlin tawhte chub u khata chilh khawmin June 1916-ah a hmasa ber atan Thuthlung Thar bu kim copy 1000 an lo chhu ta a. A bu hmingah chuan Kan Lalpa leh Chhandamtu Isua Krista Thuthlung Thar tih a ni a, a hnuaiah The new Testament of Our Lord and Saviour Jesus Christ, In Lushai tih a ni. Hemi kum July thla leh December 1917-ah copy 1000 dang an chhut belh leh a, hemi bu  vek hi kum 1919-ah an chhu nawn leh a ni.

THUTHLUNG THAR LEHLIN ENNAWNNA

(He thu "Thuthlung Thar Lehlin Ennawnna" hi a ngaihnawm khawp mai. Kan Mizotawng hmasawn dan chiang takin a hmuh theih a. Tin, lehlin hmasa (1898) han chhiar hian kan unau Falam (pawi) leh Halkha-ten Mizotawng thiam vak lova an tawng hi a ang berin ka hria.Entirnan, Jisua tih hi Falam lam chuan Jisu an ti. Heta tanga thil ni thei awm anga ka ngaih chu; hun hmasa lama Mizotawng kha, tuna kan unau Falam (pawi) leh Halkha tawngte hian a hnaih zawk awm mange. Tin, kan hla thu hlui tak tak leh Hla do te kha han bihchian chuan Paihte tawngte, Falam (pawi) te, Halkha te a ni nawk reng a. Tawng hi a nunga a danglam thin an tih angin, Kristian kan nih hnua kan hmasawnna chak tak hian tuna Mizotawng (duhliang tawng) hi a nghawng chak ta bik hle niin ka ngai. Pba).

Thuthlung Thar lehlin chu enthat ngaia hriat a nih avangin CHhim lam leh Hmar lam tangkawpin hun hrang hrangah an ennawn leh ta a. Ennawn hmasa ber (2nd Edition) chu kum 1926 ah tihchhuah a ni a, kum 1931-ah 3^rd Edition tihchhuah a ni leh a, kum 1937 ah 4^th Edition chu reference (phek mawnga dah) telin tihchhuah a ni a, 5^th Edition chu 1941 ah tihchhuah niin a lang. Thuthlung Thar lehlin ennawnna kal zelah 6^th Edition chu kum 1950 khan copy 10,000 an chhu a ni.

Lehlin hmas lamah chuan 'Pathian' tih hi Jehova' tia dah a ni a, hetianga an dah chhan hi a Bible tawngkam deuha an hrait vang leh a tlukpui Mizo tawnga dah tur an hrait mail oh vang a ni. 'Lalpa' tia dah kha 'Lal' tia dah thin a ni. 'Isua' tih pawh hi Jisua' tiin an dah a, 's' hmanna turah 'sh' an hmang zel a, 'aw' leh 'u' hmanna tur tam takah 'o' hman a ni bawk a, 'vantirhkoh' tia dah tak hi 'tirkoh' tih ngawta dah a ni, 'h' ri hi thumal laia a awm chu ziak lan loh a awm zual laiin thumal tawpah chuan an ziak lang ngai meuh lo:'Tirhkohte Thiltih' kan tih tak pawh hi 'Tirkote Thilti" tiin dah a ni. Tin, 'serhtan' tih tawngkam hi a lehlin china lamah chuan a Greek tawng la chhawngin 'peritem' tiin an dah a ni awm e. Lehlin hmasa kum 1898-a chhuta mi Bible chang thenkhat lo thlir ila a chiang deuhin a rinawm.

Tin, heti hi a ni a, tirkote chu an hnana-ta van a an kal veleh, beram veng-tute chuan "Tuna Bethlehem thleng-in kali la, Lal-in thu min hril lo-thleng hi, I en ang u," an in-ti a. Tin, an kal thuai thuai a, Mari nen, Josefa nen, ran chaw pek-na thleng-a nauoshen mu nen an hmu a. TIn an hmu-in nauopang chanchin thu tirko-vin a hril kha an shoi vel a. Tin, a hria apiang chuan, beram veng-tu thu shoi chu mak an ti hle a. Chutichuan Mari'n chu thu shoi zong zong chu rilru-in a ngaitua a, a vong reng a. Tin, beram veng-tute chuan tirko hril ang zel-in engkim an hmu a an hriat avangin, Jihova choimoi leh fak chung zel-in an kir leh ta a. (Lk. 2:16-20)

Tin, Pharisai zinga, a hming Nikodema, Judate ho-tu pakhat a om: chu mi chu zan a Jisua hnena a lo kal a, a hnena "Rabbi, Jihova hnena-ta zirtirtu-a lo kal i ni tih ka hria e. Jihova an chunga a om lo chuan heng thil mak I ti ang hi tuma'n an ti thei lo vang," a ti a. Tin, Jisua'n a chhang a, a hnena "Ti tak meoh vin, ti tak meoh vin ka hril a che, mi tupawh an pian thar lo chuan Jihova ram an hmu thei lo vang," a ti a. (Jn. 2:1-3).

Jihova'n khawvel a hmangai em em, chutichuan a Fapa mal nei chhun a pe a, ama chu tupah a ring apiang an boral lo vang a, chatuana nun an nei nan. (Jn. 3:16)

Hetiang lehlinna tawngkam tha tawk lote hi lehlin ennawnnaah siam rem hret hretin tuna kan neih ang hi hman zui zel a lo ni ta a ni.

(Chhunzawm tur)

THUTHLUNG HLUI LEHLIN HNA

Mizo Bible Hmasa Ber Chanchin

By- Rev. Vanlalnghaka Ralte

Aizawl Report : The Bible Society of India, Aizawl Auxiliary – News Letter. Vol. IV                  Issue No.2

(He thu ziak hi tha ka tih em avangin ka type chhuak a, vawn that atan leh ka blog timawitua'n ka ti a ni.)

Bible Society of India and Ceylon hmalaknaa buatsaih, Mizote Bible bu pum kan neih hmasak ber chu, Septerm ni 6,1959-ah khatih hunlaia Assam Auxiliary Secretary, Mr. R.W. Philip chuan Mission veng Biak inah a tlangzarh a. A tlangzarhna hun atanga kum 50-na (Golden Jubilee) chu Sept. 6, 2009 hian Pathian khawngaihnain kan lo thleng ta a ni.MIzo Bible hmas ber lehlinnaa tel ve Zosap zinga mi Rev. E.L.Mendus (Pu Mena) hova sak, Dawrpui Biak inah ngei he Golden Jubilee lawmna leh Pathian hnena lawmthu sawina hun pawimawh tak kan hmang thei hi a inhmehin a lawmawm tak meuh mai. Mizoten kan Bible hmanga taksa leh thlarau malsawmna sawisen loh kan dawnte avangin a lawmawm lehzual.

Bible Lehlinna Atana Inbuatsaihna

Kum 1892 khan Mizorama Missionary lo kal hmasa ber Rev. William Williams, Welsh Calvinistic Methodist ( a hnua PrsbyterianChurch of Wales tia hming an thlak tak) Missionary, Khasi Hills-a thawk chu Mixorama rawngbawlna tur thlithaliin a lo kal a. A zin report bawhzuiin Wales rama Kohhran General Assembly chuan hun renchang hmasaa rawngbawlna hmun atan Mizoram chu a apwm a. Chumi zul zuia Mizorama thawk tura a inbuatsaih laiin, vanduai thlak takin Rev. Williams chu April 12, 1892 khan Typhoid natnain a thi tat hut mai a, a ruang chu Shillong-ah an phum ta a ni.

Rev. Williams a thih atanga kum 2 pawh a vei hmain England rama Leeds khaw mi hausa, Chanchin Tha thehdarhna lama mi thahnemngai tak, Robert Arthington-an a din, Indian Aborigines Mission hnuaia thawk Rev. J.H. Lorrain (Pu Buanga), leh Rev. F.W. Savidge (Sap Upa), Mizoram luh tuma lo hel ve rengtute chuan Ja. 11,1894 khan Sairang an rawn thleng a. Anni pahnih hi Thingpui huan tlang, Aijal-ah hun eng emaw chen enbengbelin Chanchin Tha meichher mit lova kohhranhoten an chhawm nun zel tur mizorama rawn dep kai hmasatute an lo ni ta a ni. Pu Buanga leh Sap Upa te hian chanchin tha puanna hmanrua atan thilpawimawh leh tangkai hmasa tur a ni tih hriain Mizo tawng hawrawp A Aw B an saim a, Mizo a Aw B siamna atan hian William Hunter-an tawng ri benga hriat anga Roman hawrawpa a dah chhuah dan (Hunterian System of Orthography) an zui a. Sir Hunter hi India ram chungchanga thuziak hlu tak tak hnutchhiahtu British awpna hnuaia Indian Civil Service of ficer mi thiam a ni. Tichuan, Pu Buanga leh Sap Upa chuan an A AW B siam chu hmang tangkaiin Mizo Bible lehlin hnaah pawh a sultu leh a thawhhlawk berte zinga a mi an lo ni ta a ni.

Bible Lehlin Tan A Ni

Pu Buanga leh Sap Upa chu kum khat leh a chanve zet Mizorama an awm hnu chuan Mizotawng pawh an lo thiam ve ta viau a. Amah Pu Buangan a log book-a a ziah danah August 21, 1895 chawhnu her atangin Bible lehlin hna chu an thawk tan a, Bible bu an lehlin hmasak ber chu Chanchin Tha Luka ziak a ni. Chanchin Tha Johana ziak leh Tirhkohte Thiltih an letling chhunzawm ta zel a ni. Heng bu thum, Lal Isua Chanchin Tha mitin tan a nihzia chiang taka tarlanna hi Chanchin Tha la hre ngai lote zinga Bible bu lehlin hmasak awm tak a ni reng a ni.

Pu Buanga leh Sap Upa te hi an hnen atanga ziak leh chhiar thiam hmasa Mizo pahnih Pu M.Suaka (a hnua Durtlang lal ni ta) leh Pu Thangphunga (a hnua Chaltlang lal ni ta) ten Bible lehlinnaah an tanpui thin. Pu Buanga log book-ah Jan. 9,1896-a an hna thawhho dan heti hian a ziak: "Suaka nen zing dar 9 atanga 11 thleng lehlin hna thawkin kan ziah chhuah sate kan endik a, chawhnu lamah chuan Sap Upa nen chawhma lama kan thuziak siam that tawhte chu kan ziak chhawng leh a, tin, dictionary-ah thumal kan dah luh belh bawk, thumal thar ni tin kan dah luh belh ta zel a ni," tiin. An fimkhur hle a, a chhiartu leh ngaithlatu tur Mizote tan a fiah tawk em tih chu an ngai pawimawh hle thin. Chu chu Pu Buangan a log book Feb.29,1896-a a ziak atang vekin a hriat: "Kan lehlin tawh atangin thu awlsam awm deuhte la chhuakin Sunday School-a naupangte hnenah ka chhiar ta a, tha taka an hriat thia theih avangin a awlmawm hle," a ti.

Pu Buanga te Mizoram an luh atanga kum thum leh thla sarih hnu Aug. 31, 1897-ah Rev. D.E. Jones (Zosaphluia) chu Wales ram atangin Welsh Calvinist Methodist (Presbyterian) Mission tirhin Mizorama Missionary hna thawk turin Aizawl a lo thleng ve leh a. Pu Hluia hian Pu Buanga te pahnih, a tirtu lamin Zoram chhuahsan tura an hriattir tur chu inremsiamin hun eng emaw chen a hrawn hman a. An hnen atangin Mizo tawng leh thil dang tam tak a zir bakah Bible lehlinnaah pawh eng emaw chen an thawkho hman. Pu Buangate pahnih chuan Dec.31,1897 khan Pu Hluia chu hawsanin Mizoram an chhuahsan ta a ni.

Pu Buanga te haw thla chuan an Bible bu mal lehlin pathum Chanchin Tha Luka, Johana leh Tirhkohte Thiltih chu Calvutta-a Bible Society hotute hnenah chhut turin an pe lut nghal a. Mahse,  sum harsat vang nge ni, hun eng emaw chn hnuah Zosaphluia hnenah an rawn thawn kir leh ta a, an Mizzion hotuten an lo nawrpui bawk ni tur a ni. British and Foreign Bible Society, London chuan Chanchin Tha Luka leh Hohana ziak te hi kum 1898-ah an chhu ta a, Tirhkohte Thiltih chu 1899-ah an chhu ta a ni.

A bu hmingah chuan hetiangin an dah: (1) CHAN-CHIN THA LUKA ZIAK, a hnuaiah, THE GOSPEL ACCORDING TO ST. LUKE (IN LUSHAI) tiin. (2) CHAN-CHIN THA JOHANA ZIAK, a hnuaiah, THE GOSPEL ACCORDING TO ST. JOHN (IN LUSHAI) tiin; (3) TIRHKOHTE THIL TI, a hnuaiah,  THE ACTS OF THE APOSTLES (IN LUSHAI) tiin. Chanchin Tha Luka Ziak chu dakah an rawn thawn hmasa a, June 1899-ah a lo thleng a. A hnuah Chanchin Tha Johana Ziak leh Tirhkohte Thiltih pawh an rawn thawn chhunzawm a ni. Saphluia sawi danin hemi kum hian bu 150 an hralh nghal. Hetiang boruak karah hian December ni 31 1898-ah khan Zosaphluia pui turin Rev. Edwin Rowlands (Zosapthara) chuan Aizawl a lo thleng ve leh a. Ani hi Pu Hluia aiin kum thumin a upa zawk a. Mi inzir mi tak a ni a, Mizo tawng pawh a zir chak hle a, Mission School lamah mawh a phurh bakah Bible lehlinnaah Pu HLuia nen an thawk dun a ni.

Pu Buanga leh Sap Upa chu kum ruk chhung zet an thang bo hnuin 1903 khan Mioram chhim lama thawk turin Baptist missionary-in an lo chhuak ve leh a. Zosaphlia leh Zosapthara te nen Bible lehlin hna an thawkho leh ta a ni (An thawhhona azarah Bible bu pumpui pawh hma takah lehlin zawh a lo ni ta a ni - Pba). Hetih hun lai hian Mizoram chu harhna in a tuam a (harhna an chang hma hle- Pba). Thlarau thilpek ze mawi chi hrang hrangte a lo chhuak a. Chutiang karah chuan Kohhran tana tangkai tur nia hriatna a awm avangin Korinth I & II lehlin a ni. Kohhran mamawhna avangin kum 1908 khan Calcutta Auxiliary-in copy 3000 a chhu nghal.
(Kan zosapten Bible lehlin hmasak tur an thlan chhuah dan hi a fing hle mai. A tawi tawi, a awl sam sam, a hmasa a piang bi tiam mai lo va, an rawngbawlna hmun ami (Mizo)-te mamawh hmasa thlir ran chunga an han letling hi an fing hle a ni tih loh rual a ni lo- Pba).

Kum 1914 khan Rev. F.J. Sandy (Pu Dia) (Mizote khan Missionary-te hming hi an tana hriat awl tur leh koh hnuam turin an lo phuah ve zung zung mai a, hming han phuah mai kha an awlsam hle a ni- Pba) chu Welsh Mission tirhin Hmar lama thawk turin a lo chhuak ve leh a, thuziak leh lehlin lama mi tui tak a ni. Vanduai thlak takin a thi hma ta hlauh a., Bible lehlinnaah a thawh chhung a rei lova, sulhnu a hnuchhiah tam ta lutuk lo. Chhim lam leh Hmar lama Zosapte hi Bible lehlin hnaah Mizoten an tanpui ve rawng bawk a.

(Chhunzawm tur)

Kum 1840 atang 1960 (kum 120) chhunga America President-te zinga thil thleng inmil (coincidence) mak tak:

 Kum 1840 atang kum 20 dan zela America President thlan tlinte hi President hna an chelh lai ngeia thi te an ni tlat mai hi a mak ve khawp mai (President dangte erawh chu an tan tawh loh hnua thite an ni). Chung mite thlan tlin an nih kum chu: Harrison kum 1840-ah, Lincoln kum 1860, Garfield kum 1880, McKinley kum 1900, Harding kum 1920, Roosevelt kum 1940, leh Kennedy kum 1960-ah.

William Henry Harrison hi America President zinga thawk rei lo ber a ni a, President office a chelh atanga thla khat velah Pneumonia natnain a thi. President hna chelh rei bertu chu Franklin D. Roosevelt (1933-1945) hi a ni a. A term li (4)-na a chelh atanga rei vak loah a thi. President hna thawk rei lo ber leh thawk rei ber inkar hun chhung hian kum zabi khat a awh a ni. Tichuan America sorkar chuan kum 1951 atang khan mi pakhatin President hna a zawnin Term 2 bak a chelh thei lo vang tiin dan a siam ta a ni.

Heng zawng zawngah hian President Abraham Lincoln leh President John F. Kennedy chunga thil thleng inmil hi a mak chungchuang bik hle a ni. Lincoln-a chu kum 1860-ah thlan tlin a ni a. Kennedy chu kum 1960-ah thlan tlin a ni (*President office hi '61-ah an chelh). An pahnih hian Charismatic mi ve ve an ni. Armed force-ah an thawk ve ve a, an thawh chhan pawh civil rights chawisan duh vang an ni. An pahnih hian President hna an chelh laia thah (assassinated) an ni. Lincoln-a thattu hi kum 1839-a piang a nih laiin Kennedy-a thattu hi kum 1939-a piang a ni ve thung. A thattu te hi chhim (south) lam mi ve ve an ni a. President-te hi Zirtawp (Friday)-a thah an ni a, thah an nih lai hian an nupuite an awm ve ve bawk. Heng President 2-te hi thah an nih hma hian an kalna hmun turah hian kal lo tura hriattir (warn) ve ve an ni. An thih hnua an aiawhtute hming hi a in ang leh chiah a, Johnson tih ve ve an ni. Andrew Johnason chu kum 1808-ah a piang a, Lyndon Johnson chu kum 1908-ah a piang ve thung, mak ang reng tak chu a ni.

Heng America President ropui tak pahnihte chanchin atang hian hma lam hun kum za dang min thlirtir a. Kum 2060-ah tunge rawn President ang? President Lincoln-a leh Kennedy-a te chunga thil thleng inmil mak tak ang hi a thleng ve ang em????

Ka Fanu Tan Lehkha Thawn (First Letter To My Daughter)

Ka Fanu Duhtak - Angeline Lalhmangaihi

GGi, Chhandamtu Lal Isua hmingin chibai ka buk a che.

Pathian zara i dam thute, lehkha pawh tha tak i zir thute i nu hnen atang ka lo hriaa ka lawm hle mai.

Ka fa hmuh hmasak ber ka duat em em i ni a, i tet laia thawnthu ka hrilh thin che leh Mu-chu (nau awmna) i kal laia thirsakawra ka thlah thin che kha ka la hre reng a. C. Nuni nen ka phur che u a, Mu-chu gate kan thlen veleh ka tawngtai sak thin che u kha Lalpan a hre renga lehkha pawh i thiam thei em em a ni. Tunah chuan i lo tleirawl ve tan ta a. Nangmahin engkim i inngaihtuah ve thei tawh a, school i kal pawhin thlah i ngai tawh bik lova. In lamah i nu pawh i pui ve thei tawh tihte ka lo hriatin ka hlim em em a ni.

Pathian rawng ka bawlna atan hian min lo tawngtaipui ve thin turin ka sawm che a. Keini chhungkua chu Pathian rawngbawl turin kan inhlana. I nu nen kan inneih zan hian Kristian chhungkaw tha tak din turin kan tawngtaia, Pathian hnenah kan inhlan a, chak loh changte chu nei ve thin mah ila, Lalpan kan tawngtaina a hre renga heti hian vawiin ni thlengin a rawng kan bawl thei hi i nu leh i pa chu kan lawm em em a ni.

Lalpa rawng kan bawl avangin khawvel thilah kan tlan ve thei lova, hemi avang hian rual awhna tam tak pawh i nei mai thei e. Mahse lei lam thil leh van lam thil hi kan khaikhin dawn chuan van lam thil hi a ropui fe zawk a. Vawiin nia dam leh hriselna kan neih te, ei leh bar tur kan neihte hi van lam malsawmna kan dawn a ni a. Lalpa Pathian hi kan fak fo tur a ni.

Mate, ka lo enkawl danah che tlin tawk lohna tam tak ka nei a, ka vin thin te, ka thinchhe thin te kha min ngaidam rawh aw. Tunah chuan nangpawh i tleirawl ve tan tawh a, thinchhe taka vin che ka duh tawh lo a ni. Nangpawh nula zaidam tak nih i rawn tum hram hram dawn a nia. I nu nen hian kan inhmangaih em em a, nangni fanu leh fapate kan nei che u hi kan hlim em em a ni. Heng hlimna kan neih zawng zawng hi Pathian min hmangaih vang a ni a. Pathian hi chu a va han tha tak em!

Mate, Pathian rawngbawla ka vah chhuah hlan hian i nu lo pui tur hian ka ring em em che a ni. Kan fanu neih chhun i ni a. I lo lian ve tawh hi ka lawm tak tak a ni. Hei i puan bih tur 1 ka rawn thawn che a. I puan neih hmasak ber tur ka lei sak thei che hi ka va han hlim tak em! Malsawmna min petu Pathian hnenah lawmthu i lo sawi ve dawn a nia.

Hun i neih chuan lehkha tawi te talin min rawn thawn vela, ka lawm ngawt ang.

I nu leh i naute kha lo duat la, an tan leh ka tan min lo tawngtai sak thin ang che aw.

Van lam khi thlir tlat thin ang che.

Nangmah hmangaihtu,

I Pa.

Ka Nupui Hnena Lehkha Thawn

2013 Champhaia kan rawngbawlna Report (Hi Kidz Ministry, Mizoram)

Champhaiah hian April 29-ah kan lut a. Ni 30-ah Brightway English School-ah Camp kan tan nghal a, heta tang hian chawl lovin July 12, 2013 thleng khan school hrang hrangah rawngbawlna kan nei a. School pahnih khat tih lohvah chuan ni 3 thum zel hun hman thin a ni. Inhlanna hun buatsaih ziah a ni. School exam te a hnaih tak avangin keini pawh chawlh hmangin Aizawlah ni 13- 24, July 2013 thleng hun kan hmang a, Champhai let lehin rawngbawlna chhawnzawm leh tur kan ni.

Champhaiah hian school hrang hrang (Primary, middle, leh high school) 15-ah rawngbawlna kan nei tawh a. Tin Champhai atang hla vak lo North Khawbung Primary leh Middle school-ah kan nei tawh bawk a. Tichuan avaiin School 17 kan lut tawh a ni. Tin Champhai Bethel veng Presbyterian Kohhran-ah tum 2 naupang sunday school chawlh ni chawhnu inkhawm (1:00 – 3:00 pm)-ah hun kan hmang tawh bawk a. Sunday school zirtirtute pawh an phura kan hlim em em a ni. A.G kohhran naupang sunday school-ah tum 1 hun kan hmang tawh bawk. Tin, Champhai venglai Community Hall-ah inrin leh chawlhni chawhnuah inpawlhona hun hlimawm tak kar thum (inrin, chawlhni zel) kan hmang a, naupangte atang Item hrang hrang hman a ni a, fuihna thuchah sawi thin a ni. Hall-a kan inkhawm hi tum 2 Video-a lak a ni a. TV Local channel (IMEM)-ah tihchhuah a ni. Hall hawh man sum leh pai lamah harsatna kan neih a vangin Hall-a inkhawm hi kan chhunzawm thei ta lo a ni. Hall kan inkhawmah hian kan camp tawhna school hrang hrang atangin naupang an rawn kal khawm thin a, nuam an tiin kan hlim thei em em a, Item nei thei pawh kan pung zel a ni.

School hrang hrang kan kal tawhna naupang zawng zawng zat hi sang hnih chuang fe an ni tawh a. Naupang heng zo zai hnenah chanchin tha hrila a awm leh inpawl hlimna hun kan hmanpui thei hi kan lawm em em a. A ropui ber chu naupang tam takin sual nih inhria a, Isua chu an lal leh chhandamtuah pawmin, Krista hnenah mittui tla zawih zawiha inhlanna an nei hi a ni. An tawngtai lai han hmuh meuh chuan mittui kan dan zo lo, lawm avangin biangah mittui a luang zawih zawih thin. An zirtirtu then khatte pawhin min lo tahpui ve bawk thin a. Kan hmuhna mit pawh a vannei a ni.

Kar hnih kar thum hnuah kan kal tawhna school tam takah Devotion hmanpui turin min sawm leh a. Dar kar chanve lek devotion hmanpui tura kan inrin laiin, dar kar khat hmang mai rawh u tihte, chawhma hun zawng min hmansak thei mai lawm ni, hetah Lunch te kan eiho dawn nia tiin sawmna aw mawi tak tak kan dawng zel bawk a ni. Lalpa a ropui a ni. Hetia kan va kal leh hian naupang zawng zawngin min lo chibai duh vek a, a thenin vawi 2 vawi 3 min chibai nawn a. Hun a heh loh zawk nan Hi 5 tiin kan chibai a, kutphah min benna a thip sen vek thei hial a ni. A hlimawm tur zia chu i hre thiam thei maiin ka ring.

Tunah zet chuan Champhai khawpuiah han leng ila, kalna apiangah naupang min lo nuih sen sentu kan tawng zel a, an hmingte leh tunge an nih hre seng lo mah ila, kan naupangte zing ami an nih ngei dawn hi tiin hlim hmel kan hmuh zel thin. "Saya Pui," tia hlim taka min lo kotu kawngsir leh Bus chhung atangte, leikapui atangte chhangletin Bey tiin kan invai lawp lawp reng mai a ni. Khaw hrang hrang ka kal tawhnaah hetiang renga khawlaia ka hming kotu ka tawn tamna hi a la awm ngai lo. Champhai khawlaiah ka hming hi a khat ni berin ka hria (chu chu keimah ka inhriat dan a ni a).

Naupang mai an nih avangin an hnen atang hian sum leh pai leh chaw eia sawmna kan dawng lo, mahse chu aia ropui leh hlu zawk an hlim hmel leh ngaisang leh nel tih hriat tak maia an mi kohna awka kan dawng hi a ropui thlawt a, sum leh paiin a leih theih loh, hralh leh phal mai mai chi loh naupangte hnen atang an thinlung thianghlim tak atanga rawn chhuak ngei ka dawng thei hi Lalpa lak atanga malsawmna ka dawnte zinga pakhat ka theihnghilh tawh reng reng loh tur chu a ni.

Ka rawngbawlpui ka naute zinga pakhat, Madika chuan, "Naupangte hi an school Uniform an hak loh chuan khawi school ami nge tih ka hre lova, a then chu ka nuih sual a," a ti a. Kan kal tawhna school a thahnem tawha khawlaia naupang a tawh apiang mai chu Smiling face a lo hmuh ve zel mai hi a lo ni a, chutianga tih ngai khawp dinhmunah kan ding a lo ni ve reng mai a, tiin ka ngaihtuah zui nghe nghe a.

(Chhunzawm tur).

Naupangte thian                                                                                        Dated Aizawl

C. Lalawmpuia (Puibawiha or Saya Puia)                                                  The 19^th July, 2013.

International Seminar On Mizo Leterature and Language

Jointly Organized by Mizo Academy of Letters & Tahan Literature Circle

A hmun: MYA Chapel, Mission Veng, Tahan

A hun: 6 March 2013 (Nilaini) 7:00-2:35 pm.

Khual lian Lalthangfala Sailo, President, MAL.

Chawhma            : Chairman – Rev. Vankhuma, Chairman, TLC

Hunserh: Rev. Lalrinsanga

Hawnna Thusawi: Lalthangfala, Khual lian. (Zobawm bu 6-na tlangzarh – Khual lian)

Thusawi : Pu Zosangliana, Ward Administrator, Tahan

Papar I chhiar leh sawiho "Hlain Zofate A Khawih Dan" by Prof. R.L Thanmawia

Papar II chhiar leh sawiho "Mizo Tawng Tihhmasawn leh Vawn Him" by C. Chhuanvawra

11:10-12:10 Noon – Tukthuan eiho

Chawhnu             : Chairman – Lalzuia Colney, MEC MAL

Paper III chhiar leh sawiho "Zoram Khawvel Tana Kawlram Zofate Thawh (Contribution) leh Hnuhma A Neih Dan" by B. Lalthangliana

Paper IV chhiar leh sawiho "Thalaite Tawng" by Vanneihtluanga

Lawmthu sawi: T.C. Jonunsanga, Secretary, MAL, Jt. Hqrs, Lunglei

2:40-5:00 pm- Sight Seeing

7:00-10:00 pm: Rokunga Nite.

He seminer-ah hian Mizoram atangin mi 25 an rawn kal a. Thu tha tak tak zirho a ni. TCL hian he Seminer-a tel tur hian Kawlram Zofate zinga thu leh hla lama tui mi 200 zet a sawm a ni.

March 9 hian MWO (Mizo Welfare Organization) hmingin Vanneihtluanga kawmna hun hlu tak hman a ni.

March 10 (Sun) chawhnuah Tahan Central Thalai Pawl hmingin Pu Vanneihtluanga kawmna neih a ni a. Sawiho tur thupui a tha a, a hlimawmin a hlawk thlak hle a ni.

Note: Heng inkawmhona te hi video lak vek a ni a, Mizoram lamah Local channel-a tihchhuah leh tur a ni.

Thalai hminga kawmnaah hian keipawh ka tel ve a. Naupang rawngbawlna nei mek ka nih avangin tlai dar 3:20 velah ka tel ve hman chauh va. Tlawmngaihna chungchang-ah tunhma kan phak tawh loh thu leh tan lak a ngaihthu an sawi tlangpui a. Keipawhin ka hmuh dan ka sawi ve a. Tlawmngaihna kan tlahniam tih hi a dikna mual a awm ang a. Tin, kan tehna a zirin kan tlawmngaihna hi tunhma aiin a man a sang zawk fe a ni. Entirnan, thlanlaih hi tlawmngai tehna tana kan hman dawn chuan Tahan-ah chuan thlan kan lai tawh lo va. Thlan lai tlawmngai titha lawmman pawh kan pe tawh lo. Chuvangin tlawmngai kan tehna key hi a inang diat diat thei tawh lo. Tunlaiah chuan kan bungraw neih te lam hian an tlawmngai vek tawh zawk a. Kan Telephone te, kan Bike te leh Motor te pawh an tlawmngai vek tawh zawk a ni. Chuvangin, tunlaia kan tlawmngaihna hi hmanlai ai chuan a man pawh a sang zawk fe a ni. hmanlaia kan tlawmngaihna leh tunlaia kan tlawmngaihna hi kan tehna Key kan thlak danglam hret hret a ngai ta zawk niin ka hria, tiin.

Ka ngaihtuah zuia heti hian ka ziahbelh ta a ni.

Mizote min ti-Mizotu ber pakhat chu Tlawmngaihna rilru kan pianpui tlat mai hi a ni. Rilru leh thinlungah tlawmngaihna kan la vawng nung reng a, tunhmaa tlawmngai kan tehna hmanrua te chuan mual minsan hret hret mah sela, veng thenkhatah thlan laih a ngaih tak loh avanga an nula tlangvalte chu tlawmngai ta lo a ngaih mai tur a ni lo. Chumi vengah chuan thlanlaih kha tlawmngai tehna atan a tlak ta lo mai zawk a ni. Veng thenkhatah khawhar in riak kan awm tak mang loh avangin an nula tlangvalte chu tlawmngai ta lo a ngaih tur a ni bawk hek lo. Mi kan inchiahpiah nasa tawh a, ruihhlo ngai leh kutkem nei pawh awm theih a ni a. Hmanlai ang lo takin kan chhungah bungraw man to tak tak leh sumpai tam tak kawl pawh kan awm ta nuk a, tutih hriat mang loh thalai inriak an awmin inneitute an muttui loh phah zawk tlat a ni. Khawhar in riak kha tlawmngai tehna a tan veng thenkhatah chuan a tlak ta vak lo a ni.

Chutiang zelin,mitthi in tlaivar leh khawhar inleng pawh nula leh tlangval zawng zawng kan kal hlei thei ta lo va. Hei pawh hi tih dan kan thiam a ngai tan ta hle a ni. Hmanlai chuan kan pasal thate thangchhuah tumin sapelin ram an riak tak meuh meuh va, tun an sawisel lo. Hmanlaia thangchhuah dan leh tunlaia thangchhuah dan a inang ta lo a ni. Tunlaiah chuan kan thalaiten zirna lamah thangchhuah tumin an beingawrh a, mitthi in apianga tlaivar leh zan tin lengkhawm tur chuan an taksa leh hunin a tlin lo va, an thangchhuahna turah an bahlah theih phah dawn tlat si a. Hmanlai pasal thate ramriak tun an sawisel lo ang khan sawisel bik lo ila. Zirlaite pawhin khawharina lan ngei tumin hun insiam thiam tum ve hram bawk sela. Tin, hei erawh hre reng bawk rawh se; hmanlai thangchhuahte khan khawtlang nasa takin an hraitlai thin a, khawtlanga michhe ber thlengin an zar an zo pha thin a ni, tih hi. Zirna kawnga thangchhuahtute pawhin an thiam an finna leh theihna te, khawtlang leh kan hnam tan tiin chutah chuan Tlawmngaihna chu lantir ve bawk sela, kan Mizo khawtlang chu tunhmaa Mizo khawtlang ang tho khan a Mizo reng dawn a ni.

Kan ramah Company hrang hrangte an rawn lut dawn a. Hei hian kan khawsak dan, ei zawnna nasa takin a rawn khawih dawn a ni. Kan thalai tam zawkte Company-ah hnathawka an invawm luh hunah chuan, chhiat ni that nia kan khawtlanga tlawmngaihna kan lantirna chi hrang hrang hi a hman hleih theih dawn lo va. Company tam zawkah chuan Chawlh ni (Sun) tak ngial pawh an chawl tawh lo va, thla khatah ni khat chiah chawlh an nei thei a. A then chu zan lamah an thawk a. Tunah chuan zirlaite chauh hi a hman lo zual chu an ni a.( Chhunzawm tur)

Graduation Pics

Kan lecturer 2 an rawn tel thei lo va, pawi kan ti khawp mai.

 Kumin hian mi 7-in B.Th an graduate a ni.

Kan student te hi Mizo, Karen, Kachin, leh Shan an ni.

Kohhran

by - Puibawiha

Enganga ralthuam tha pawh nise a chhunga che veltuah Vawkpui in hmantlat chuan awmzia a nei lo,' Russia sorkarin Iran sorkar hnena a sawi a ni. Kohhran pawh hi a neitu leh dintu chu Pathian ni mah sela, a chhunga thuneihna lekkawhtu chu Piangthar lo, bum hmang a nih chuan; Kohhran chu thlarau bo vei lo, mission rawngbawlna ngaihthah, ringtu thanlenna ngaipawimawh lo, memberte Thlarau Thianghlim aw hriattir aia mahni aw hriattir ngai pawimawh zawk, Kohhran nihna dik luah zo lo a ni ang. Kohhran chuan a thawhtur ang tak a thawh theih nan leh a nihna dik tak a lan chhuah theih nan chutiang ang hruaitu chu a mamawh lo tawp a ni. (Kohhran chu a Greek tawngin Ecclesia a ni a tih lam sawi ka tum lo.)

Committee member te hian kan ngaihtuah fo atana tha chu 'kan rorelte hian Pathian chawimawina tur a kawk em? Thlarau Thianghlim a lawm ang em? Pathian thua kan inlungrualna a tinghet em? A ram a zauh phah dawn em? tih hi.

Ringtute hi indona field-a awm kan ni a. Sual doral hma chhawntute kan ni. Sual do ngam lo, sual khawingamtu ringtu tha a awm theih loh. Hrem hlauh vang emaw, chan hlauh vanga Pathian Kohhran zahawmna leh dikna humhim ngam lo ringtu chu a nep a ni. Ringtute chu thuawih tur kan ni tihah hian a pawimawh ber chu Tu thu nge kan awih? tih hi a ni. Kohhran siamthatna thawktu Martin Luther-a khan hotute thuawih chu a tha a lawm tiin Pope thil tih kha dodal duh ta lo se la, tuna keini ho "Protestant" hi kan piang lo ang. Ringtu tan chuan thil ka tisual lo tihmai hi a tawk lo, Buddhist, ring lo mi fel tak tak an tam. A chhelai siam thatur, thil tha ti a tana siam kan ni.

Kohhran chu Pathian chenna a ni a, a ropui a, a thianghlim tur a ni. Roreltute zing ami ni ve si a, thil dik lo pawh hmu ve reng si a, sawi chhuak ngam lo emaw, siam that tum lo chu, a tisualtu nen ang khat reng an ni. Hre lo ang maia a zep ruk a vangin.

Bible chuan Pathian In (Kohhran) kan nih thu min hrilh. Nangmah (Kohhran)-a sualna emaw, dawt thu emaw, bumna emaw, eirukna emaw a awm tih hriaa hmu reng si a, siam that tum si lo i nih chuan sah thlakin i awm ngei ang. I Kohhran chu sualna; hlemhletna, eirukna, bumna hmanga khalh kal chu phal hlek suh ang che. Burma rama Kohhran tam tak hi Dollar hmanga khalh kal emaw tih mai tur an ni a, chuvangin dollar umin a tlan zel em ni? tih hi zawhna awm lo a ni lem lo.

Sual pawisalotu: Dik lohna hmu reng si a, hre reng si a, sawi chhuak ngam lo, siam that tum lotu chu sualna titu nen ang khat reng an ni; sual pawisalotu ve ve an ni.

Heng sual anga lang zawng zawng laka inthiarfihlim tura Kohhran chu i ni.