Jul 17, 2019

Ka Patea Ka Thlahna

.

I Chanchin Sawi Mai Hi Ka Tihtheih Tawk A Ni Ta Si A:

Ka pa chanchin tlem han sawi ila. An inah lehkha zirin rei tak ka awm a, fa an neih loh avangin an fapa ang chiahin min en a, min hmangaih a, min ngaihtuah em em thin a, an rilru luahtu ber pawh ka ni ve hialin ka hria. Ka tan engmah ui an nei lo. Mahse, an lakah hian fa mawhphurhna ka luah zo lo hle a, hreawm ka ti rilru hle thin. Rawngbawlin Burma-ah ka awm san leh daih si a. An hnena awm tur hian min duh tih ka hria, mahse Lalpa rawng ka bawl ve hi min duhsak a, an lawm em em tho a ni. Keipawhin an hnena awm hi ka duh a, ka bat ni pawhin ka hria. Mahse Krista min kohna chu dah lal a ngai miau si a, an tan tawngtai kha ka tih theih tawk a ni a, ka tawngtaisak fo thin a ni. An nupaa min hmangaihna leh enkawlna zawng zawngah ka lawm em em a ni. Fa nei lo mah se la, Pathian leh a kohhran hmaa an inneihna thu tiam chu thih thlengin a hlen chhuak a. Hetiang ang nupa rinawm min enkawltu Lalpan min pe hi ka va lawm tak em!

Ka pa (Chawnglianchhinga) nunah hian Thufingte 3:1-10 thu hi a thleng dikin ka hria.

Thifingte 3:1,2, Dam ni leh kum, thlamuanna pek belhchhah tih hi ka pa chungah hian a lo thleng dik a ni. A sipai tan lai hian nikhaw hre lovin ni 15 a awm a. Tichuan, sipai damdawi inah kum khat leh thla sarih a awm. Pathian tih tlat mi, a dan thute zawm tlat mi a ni a. A sipai tan lai hian tum khat chu an chhuti (leave) chhung zawng haw lovin a thiante 3 nen chanchin tha hril nan an hmang a. Chu chu Police- in manin tan inah an khung a, ni 47 lai an tang. Mahse, an battalion hotuten an la chhuak a case engmah an file lo. Lalpan a dam ni leh kumte chu belhchhahin ni 25.6.2019-a min boralsan khan kum 85-a upa a ni.

Thufingte 3:3-4 Khawngaihna leh thu tak chuan hnuchhawn che suh se... Tichuan pathian leh mihring mithmuhah Duhsakna leh hming thâtna i hlawh dawn nia: Mite chunga thatna kan lantir hi khawngaihna hnathawh a ni. Ka pa hian electric bill leh tui bill hi thenawmte ta a peksak thin a, an tan hun khawral a buaithlak si tiin a tanpui thin a ni. Kohhran chanchinbu;- Ramthar chanchinbu, kohhran beng, Lalpa grape huan te hi a sem thin a. Hei hi ka rawngbawl ve theihna a ni a ti thin. Khawlaia bawlhhlawhte hi kalpahin a chharfai thin a, kei tleirawl rilru pu chu a bula kalte kha ka zak ru deuh thin a. Keini an tu leh fate tan an in hi kan zirna hmun atan an phal em em a, min duhsak em em thin a ni. An ina rawn leng lutte hi thingpui a lo thlit sak vat thin. 
Kan mikhualten thingpui an lum ve changte hian khawia mi nge thingpui fe kha i thlak? Kha chu kohhran thingpui fe bawm a nih kha, tham eng zat nge i thlak? Kan taa mi hi dah let leh rawh a ti thin.

Amahah hian thu tak; dikna leh takna a awm tlat a. Sipai a penson hnuah Biak in Chowkidar hna mission vengthlangah (kum 24 leh thla ruk) a thawh lai pawh khan kohhran upa zahawm tak takte pawh hian a thu hi an ngai pawimawh tlat niin ka hria. Dik takin pehhel kual vak lovin thil hi a sawi mai thin a, a chungah tuman thinrimin an la ngai lo. Heng zawng zawngah hian Pathian leh mite duhsak a hlawh nasa em em a, hmingthatna pawh a hlawh ve niin ka hria.

Thufingte 3:5-6 I thinlung zawng zawngin LALPA ring la, Nangma hriatnaah innghat suh; I kawng zawng zawngah amah hre reng la, I kawngte chu a kawhhmuh zel ang che. 
Lalpa ring tlattu a ni: Mizia nghet tak nei a ni a, chutiang bawkin Isua a rinna hi a nghing ve mai mai ngai lo niin ka hria. Kum rei tak an hnena ka awm chhung khan Harsatna a sawi hi ka hre ngai lo. Chhung inkhawm a ngaipawimawh a, sawma pakhat a ngaipawimawh em em a ni. Pathianin a kawng pawh a hruai zel a ni.

Thufingte 3:7-8 Mahni ngaihin intifing suh la; LALPA chu tih la, sual kalsan rawh. I lai atân hriselna a ni ang a, I ruh atân thling a ni ang. 
Sual kalsan thintu a ni. A tleirawl chhuah chhoh atangin Sunday school-ah inhmangin Tleirawl sual kan tih pawh hi a nei ve lo. Zuk leh hmuam ti lo. A sipai tan lai pawhin army rum an dawnte hi a dahkhawl a, sumah a chantir thin. Mahni intifinga infakmawi chi a ni lo. A tan heng zawng zawng hi hriselna a lo ni e. Sipai a tan laia dam lo na tak, thi mai tura ngaih, medical pension hmu kha a ni a, mahse bible-in mihring dam chen a sawi pel thei hialin Lalpan a nun a kaihruai zel thin.

Thufingte 3:9-10, I sumin LALPA chawimawi la. i thil lo pung hmasa ber zawng zawngte nên; Tichuan i buh in chu a lo khat liam ang a, i sawrkhur uain tharin a luang liam ang.
Mite angin sum leh pai tam tak tak pek tur nei lo mahse sela, sawma pakhat dik taka pe thin a ni a. Chhung inkhawmnaah a hlan sa thlap thin. Hengte avang pawh hi a ni ang an fairel bel a ruak ngai lova. An lawmna hi a luang liam reng zawk a ni.

Sipai ration card hmanga zu (army rum) lakte kha a duh ve ngai lo. Lalpa duh loh zawng tih hi a hlau hle niin ka hria.

Ni 17.5.2019 (Fri.) khan an kai tho zo lawk lo va, a kal mai dawn emaw an ti a. In lam pawh thalai hovin an thiar chhuaka an singsa fel vek a. Chutah a rawn harh leh chuan "Nuam zawng zawng kimnaah Isua kan faka a nawm teh reng nen, nangni lah chuan min lo kai tho a, ka han harah a, kei lah chu hei, kal pawh ka kal thei si lo va," a rawn ti a. "Van kanaan chawin min chawma kan puar leh mai thin," tiin a sawi. A kalna tur hi a thlamuan thlak hle a ni.

Tun tum a dam loh zual chhunga ka awmpui laia a hnen atanga ka dam chhunga ka zirtur min hnut chhiah chu hei hi a ni.

1. "Ka va han lawm tak em" a ti thei reng mai kha a ropui ka ti. Dam lo khum bet a ni chung khan a lawm zel thin a ni.

2. "Pathian hi chu a va tha tak em" a ti reng mai a, a chunga thil thlengah hian Pathian a fak zel mai a ni.

A eng zawnga thil thlir thin mi a ni tih a chiang hlein ka hria.

3. Pathian ram sawma pakhat pek a ngaipawimawh em em mai hi a ropui ka ti.

Ka pa mangtha, thlamuang takin kal la, i chak em em thin nuam zawng zawng kimnaah chuan Lal Isua chu i fak kum khua tawh dawn nia.

I fapa Rev. C. Lalawmpuia


Note: Chawnglianchhinga hi mizo pasal tha hmingthang Vana pa (Thangzachhinga) tuchhuan 3na a ni.

Thangzachhinga (Vanapa) hian fapa 3 a nei. Chungte chu: 1. Vana, 2. Lianchungnunga, 3. Ralduha.

1. Vana hian Hranghleia a hring a. Hranghleia hian Zumura leh Aikila (pastor) a hring a.

Zumura fapa naupang ber chu Chawnglianchhinga hi a ni.

(Ka patea hi a nihna takah chuan ka cousin a ni a. kan in upat hlei em a, ka patea tiin kan ko ta a ni. Tin, Ka pa (Lalauva) hi ka pu Chhuahzovan a boralsan hma avangin Zumura teinah a sei lian a. Tichuan ka patea te nen hian unau ang chiahin an sei lian ho a ni. 

Kei pawh hi Vanapa (Thangzachhinga) tuchhuan 3-na ka ni.
Thangzachhinga (Vanapa) fapa tlum ber Ralduha'n Chhuahzova a hring a. Chhuahzova'n Lalauva a hring a. Lalauva chu ka pa a ni.)



No comments: