Australia ram kang hi rin ai a nasa hle mai. Thal va ek char kan tih ang mai khaw lum rum rut, a lum lam pawh degree 45 C. chuang lai mai a ni a, phul hnim hring leh luang hnimhnah te pawh an ro tlawk tlawknaa kangmei chhuak chu thli natak mai darkar khata Km 100 (60 mile/h) lai chak chuan a chhem alh puat puata Australia chhim lama Victoria state leh New South Wales ram zau tak mai chungah chuan chap pui kangin van boruak sang tak thlengin par a chhuanga, meikhu chhah tak mai chu vanpui a chim ta emaw tih turin a rawn pang aw inzial tup tup mai a ni. Nungcha an bu zawla awmte leh in sa sengtura chakna nei chham tak tak te chuan boruak hip tur nei lovin leh kangmei nasa tak a vanga dang ro huam huamin nunna an chan a. In sasengna tura tha nei tha leh a tlan chak deuhte pawhin kawng dik lo zawhin kang mei laka tlan chhuah tum kha, tlangkang zau tak chuan a lo hual pup mai si.
Australia ram chungah chuan romei zam lovin sen mei khu a zam phui chuk a, meizap pawh a leng chum chum ngei ang le. Mipuite an chiai nasa hle a, mahni in leh lo hlu tak mai ven him hram hram duhte pawh an nunna chhan him nan tlanchhiat a ngai si a ni. Mei sipai a sang a sang telin hnuai lam atang leh chunglam atang Helicopter nen mei kang zau zel tur thelhin leh nunna chhan chhanchhuah ngai an awm em tiin nasa takin tan an la bawk a. He kangmei hi a nasain a zau em em mai a, ram 3000 Sq/Km lai kang chhia a ni.
Australiaah hian tun hma pawhin nasa takin ram hi a lo kang fo tawh reng a. Tun tum kang mei chhuak hi kum 110 chhunga Victoria state-a kangmei laka chhiatna rapthlak ber a ni a. He kangmei avanga thi hi hriat theih mi 173 an tling tawha, mi 200 ai tam thi an awm rin a ni. Chenna in leh lo pawh 1000 dawn lai kang chhia rin a ni.
Victoria Police Deputy Commissioner chuan he kangmei hi natural causes vanga kang a nih a rin loh thu leh mi tuten emaw an hal a nih ngei a rin thu a sawi a. The premier of South Australia state Mike Rann chuan kang mei 20% hi Arsonists (hel ho) tih a nih a ring a, a dang 20% hi chu mi tladah (nikhua lo) ho vang a nih a rin thu a sawi. He kang mei rap thlak tak hi mi tam tak chuan Arsonist (terrorist)-ho tih a nih an ring a. Mike Rann chuan Arsonists terrorist ho lakah hian kan inralring reng a ngaia, enthlak reng an ngai a ni a ti.
Khua a lum hle a, Feb. 7,09 khan khaw lum lam hi 47 celsius a thleng hial a, mi thiamte chuan Australiaah hian global warming sang zel vang leh mihring pung chho zelah hian tun atanga kum 20-ah khawlum sang chho zel turin leh ram kang pawh nasa zawk turin an ngai a ni.
He kangmei avang hian in leh lo 1000 dawn lai a kang chhia a, nungcha chhiarsen lohten nunna an chan bawk a ni.
Source: worldnews
newsday.com,
www.startribune.com
http://article.wn.com/view/2009/02/10/Australia_fears_more_than_200_dead_in_bushfires_1/
5 comments:
Australia hi a kang reng mai. Kan hi ram changkangho pawh hian an pumpelh hleithei lo chu a nih hi!
A kang zau hle a ni.
Mizoramah chuan chappui an hal dawn chuan mei Lam (kawng)tha takin an sial thin.
Ram a kan pawhin a kan zau zel loh nan an lo hal khalh thin a, Aus. ho hian an hre ve lo a niang haha.
News ah khan ka lo hmu ve a, a hlauhawm khawp mai. Mi hring lah kha an thi hnem phian lehnghal a, zialo tak ani.
Ka pu, ka pa pa, hi 1994 MArch khan ram kang ( inbul ) kang an thelhna lamah a kang hlum a, mei kang vel hi chuan tun thleng hian ka rilru a khawih dan hi a la danglam fo mai.
Ram kang thelh hi hlauhawm tak chu a ni. Thal lai tak hi a ni thin bawk sia.
Vawi khat chu Aizawla H/S ka kal laiin ka school thlang a kanga, Kan h/master khan thlang deuhah khuan a rawn alh chho zel tur lo zuk dang rawh u a ti a, nuam duh lo tak a ni. A thenin meisi per lo en a ngai a, kan dinna chhaklamah khan meisi perin lo kang ta hluah mai sela tlang chhiatna a van tur zia ringawt mai kha rilruah a awm a. Kangmei a chhuah lai hian thli lah hi a na duh riau vin ka hria.
*tlan* chhiatna (typing misstake)
Post a Comment