Hi Kidz Rawngbawlna Reportbu Thuhma.

Hi Kidz Ministry; naupang rawngbawlna kum 5 chhung kan lo hmang zo ve ta reng mai. Min kaihruaitu Lalpa hming fakin awm rawh se.
Kum 5 chhunga kan rawngbawlna report bu kan siam dawna tah chuan thuhma (foreward) ziak  turin Rev. Jubilee Thanga (Director) leh keimah (Board chairman) min ruat a, insit tak chungin tihian ka ziak ve ta a: 

Foreward:
Hi Kidz kum 5 chhung rawngbawlna chanchin (report) kal tlanga Pathian hna thawh ropui tak chhiar theiha a awm hi a lawmawm tak zet a ni.

Pathianin thlarau pakhat theuh min pe a, a hlut dan pawh a inchen vek a. Miten 'uite rim in nem' an tih mai thin naupangte thlarau pawh puitlingte thlarau nen Pathian atang chuan a hlut dan a inchen reng a ni tih hria, Hi Kidz rawngbawltu mi tlawm takte kal tlanga naupang sang tam takin rilru, taksa, thlarauva chhandamna an chang hi Pathian duh zawng tak a ni.

Naupangte natna leh lungngaihna te, tihhreawma an awmna leh an bawhchhiatna te (Isai. 53:4-5) phura tuam dam tur hian Hi Kidz rawngbawltute leh ringtu zawngte Lalpan min tichak zel rawh se.

C. Lalawmpuia
Hi Kidz National Board Chairman, Myanmar.

Hualngo Tlangdung Tawng

Tlang leh mual a danga tawng leh aw phawi pawh a dang hret hret thin. Kawl tawng pawh hi khaw pui tawng leh khaw te tawng chu a hriat hran theih khawp mai.
Mizoram zim teah pawh chhim leh hmar tawng in ang lo a awm nual a.
Hualngo tlangdung khaw then khata Mizotawng hman dan then khatte lo thlir ho lawk ila:
1. Denchhen: New Haimual-ah hian 'denchhen' hi chhenden an ti a.
2. Dan leh dun: hei pawh hi 'dun leh dan' an ti ve hlauh thung.
3. Chawimawina : Hualngo tlang dung ami te hian 'chawi' hi an han lam sang chho vak a, 'mawi' hi an tihniam thla leh deih a. Mizoram leh Tahanah chuan a ri hi a inchenin kan lam ri thin.
4. Kohhran : hei pawh hi anni chuan 'hran' lai tak hi an lam ri pir sang chho a, hmun dangah erawh zawl phei raihin an lam ri thin.
5. Nizan : Hei pawh hi falam tawng copy-in 'mizan', 'mizansun' te an ti a. Nichin tih turte pawh naupang chhe tawng ang maiin 'michin' an ti a.
6. In tek : In neitu sawina a ni a. Kan va len luhna emaw kan thlen in te chu in tek nu, in tek pa tiin an ko mai thin. Chhungpui nu, chhungpui pa tihna a ni.
Kum 1990 hnu lamah Tahan-ah pawh kan hmang lar ve tan niin ka hria. Tlangram lam atang rawn pem an tam tak deuh vang nge, han sawi leh lam rik hi a awlsam vang zawk?
7. Theihai : Anni chuan awlsam takin 'hai' an ti mai.
8. Atangin : Tahan atangan min lo phone. Aizawl atangan kan lo kal, an hman dan a dangdai ang reng khawp mai.
8. A ze : Satawm-ah chuan 'mak an tih deuh leh an uar deuh chang hian 'a ze' an ti thin. 'Ze' lai tak hi an thluk deuh duai duai thin.
Hualngo tlang Falam township a chengte chuan falam tawng an thiam a. Hualngo tlang dung tho nisi Tedim township chhunga chengte chuan Tedim tawng an thiam leh a. Schoolah pawh Tedim bial chhungah chuan zirtirtu Tedim mi an tam a, naupang pawhin kawl tawng thiam vak lovin tedim tawng an thiam em em a ni. Falam bialah chutiang ve tho chu a ni a.
Siallam upa pakhat chuan Pu Pui, keini ho hi tawng kan hman pawlh avangin mizotawngte hi kan thiam loin zirtir kan ngai khawp mai, a ti a. Kan chenna tlang leh mual a zirin tawng hi a lo danglam ve zel a nih hi.
Tawng dan dik leh dik lo hi awm teh reng mahse, hun leh a tawng hmangtute avanga pawm rem/zam theih hi a awm thei dawn niin a lang. Lu met tih tur sam met kan titlat mai te hi, thang tharte rilruah a mak hu tawh chuang lova, hman tlanglawn a ni zawkmah tawh a. Tarmit ka vuah tih ai chuan tarmit ka bun tih chu tawng dik zawk ang maiin kan hmang rim tawh zawk mah a nih hi.
Tawng dik leh tha zawk ka teh vena chu, lehkhabuah ziaka dah a rem em? Mipuiin an hrethiamin, an pawm em? Bible ami nen a mil em? tih te hi a ni.

Ka han sawi takte hi hei hi a dik, hei chu a dik lo tih thuah Literature lama kan mithiamte thutluknaah ka dah e.
Rangon lama kan fate Mizotawng tam tak hi chu Kawl tawng direct translate angin thu an sawi a. Eg. Kawl chuan aw chhang hi (a tan win) tiin an sawi a. 'A tan' chu ri, aw tihna a ni a. 'Win' chun lut tihna a ni leh a. Kan thenawm tleirawl chuan 'ka aw a chhang' ti lovin 'ka aw a lut' a ti mai a.
Chuvang chuan tih turte hi khavang chuan an ti a. Hrilh peih an ngai khawp mai.
Inah mizotawng kan hmang a, chuti chung chuan ka fanu hi a mizotawng correct sak reng a ngai. A chang chuan amah zawk hian min correct-na tur hi an zawng sateh ve thin a. School-ah leh pawn lamah kawl tawng an hmang lo thei si lova tan lak a ngai ang reng khawp mai.

Kawl Ramah Chuan (Mizotawng)

1. Tomato hi Bawkbawnthur kan ti a. A mizo zaih mai.
2. Sazupui hi Sabek kan ti a, tawng a tihausa fe bawk. Tin, Sazu no nei apiang hi Sazupui an ni tho si a, hriatpawlh a awl. Sabek tia koh hi a hmel leh a beng tung zet nen pawh hian a inhmeh zawk fe.
3. Bawrhsaia be hi Rahnal kan ti a, a hming hian a nihna pawh a sawifiah nghal zaih mai.
4. Iskut hi Hangbo tia ko leh Iskut tia ko an awm.
5. Sinhlu (sunhlu): Mizorama sunhlu kan tih mai hi Mizo-sunhlu kan tikher a, chuan Kawl-sunhlu a hran kan nei bawk. Tun hnu deuh khan sunhlu chi dang a rawn chhuak leh a. A then chuan Japan-sunhlu an ti a. A thenin theiler an ti bawk. Theiler an tihnachhan chu, kawngkam ami chu a rah duh a, kawmchar lama mi hmuh vak loh chu a rah tha duh lo. He thei hi a ler reuh khawp mai an ti ta mai a ni, mi thil chik miten.
6. Solar hi Ni tha an ti. "Tunlai chu Ni tha kan hmanga zanah pawh kan eng ve ta pap mai. "
7. Electric current hi Mei kan ti leh mai. Mizoramah current tiin sap tawng kan la a, ram dang chuan electricity an ti mai.
8. Confi. kan hmang regu. ve lo va. Phan (lengchhawn thingpui) leh Pha-nat erawh kan hmang nal khop mai.
9. Kan intisap ve lova kan intimizo hram hram zawk. Kan tawng a awn ve lova a pai zeuh zeuh.
10. Inhrik hi daidep kan ti a, Mizoramin daidep an tih hi Piteng kan ti ve deih! Daidep leh inhrik hi Mizoramin an koh dan hi a tha zawkin ka hria.
11. A nu, a pa hi Na nu, pa pa kan ti a. Naupang rawngbawlna Champhai leh Aizawl school hrang hrangah ka neih tumin; Nanu,papa tiin thawnthu ka hrilhnaahte ka lo hmang leh thin a, an hre hrang hlein ka hria. 'N' nen intan (bulah) 'Na' kan hmang a, 'P' nena intan (pa) bulah 'Pa' kan hmang hi tawng kal hmang a nih duh hmel zawk.
12. A pi, a pu pawh hi Papi, papu kan ti.
13. A nau, a u hi Na nau, a u kan ti.
14. Kar leh, kar kalta hi kawl ramah chuan Hma kar, kan hnung kar tiin kan sawi. Hei hi chu mi tam takin kan hman pawlh.
15. Na leh ni: Hemi hmanna hi thalai then khatin an thliar hrang thiam lo. Eg. Nakin, Naktuk, Naktip, Nakum hun lo kal tur sawi nan 'Na' kan hmang a. Hun kal tawh sawi nan 'Ni' kan hmang. Eg. Nichin, Nimin, Nikum.
Then khat chuan Namin te an ti a, Nikin te an ti bawk a, a dik lo a ni.
* Heng ka thu ziakte hi Mizotawng tihhausakna atan ni se la.

Danglamna Khawvel

Kawm ngeih hman lovin nundan a danglam zung zung a, thiana siam hman loh khawpin ngaih hlut zawng a inthlak thut thut bawk a. Kawl reng tlak lohvin thil hlute hi a hlui zung zung a, neih kim sen loh thil tharin min hual vel reng thin, tiin Rev. Vanlalzuata'n a sawi a.

Heb. 13:8
Khawvel danglam zut zut hmachhawn thiam tur hian nimin, vawiin, naktuk pawha danglam ve ngai lo Krista i bel tlat ang u.

Mizo Comedian Search (Critic)

Fiamthu an thiamin Thlir a nuam khawp mai.

An fiamthu then khatah Vai rawngkai a tel nual a. Vai ram (India)a awm ve lem lo mizo tan chuan a nuihzat thlak teh chiam loh, sap ho fiam thu thenkhat sap pain an nuihpui bawk bawk hi keini mizo te tan nuihzat thlak miah lo a tam.

Fiamthu hi a thawhtu context mila nuihzat thlak, hnam dang leh hmun dang ami te tana nuihzatna tur awm miah lo a awm thei a. An Fiamthu then khat chu mizoram politics virvel leh an Politician te hre ve lem lo tan chuan a nuihzat thlak miah lo mai thei bawk. International level pawha nuihpui theih fiam thu a awm thei bawk ang. Polotics leh Kohhran kal filawrna han kah nan pawh fiamthu hi a tangkai thei fu. Tun hma deuh khan Sudden Muanga fiamthu bu pawh kha mipuiin kan hlut hle a. Zoram Kohhran pawl ram leh politician te a kap zeuh zeuh thin a, fiamthu phenah khan ami zirtir ropui tak hmuh tur a awm thin.

Mizoram chhunga mizo te chauh ni lo, khawvel ram danga mizote tan pawha nuih zat thlak tur pawh Comedian ho hian  an sawi tel teuh a, Burma ramah pawh kan lo nuihpui ve bawk bawk a ni.

Tin mizoram comedian search judge te an nui duh hle hian a tihlimawm a. Mahse, an comment-naah sap tawng an rawlh tam mah mah, a bikin Mafaa Hauhnar hi. A comment-na atang knowledge chhar tur a awm deuh zel erawh a fakawm khawp mai. An mizotawngin a daih ngang lo nge, sap tawng han telh kha nuam an tih zawk vang nge, mizotawng hman thuah an inthlahdah vang zawk em ni?

Anni hian mizo mipuite an tihlimin fiamthuah hmasawnna ropui tak an kalpui a, zahmawh rawngkai lo fiamthu an han tikher te hi a hlu lehzualin ka hria.

Bye bye: Fiamthu thawhtuten an thiante leh an chhungte tan 'bye bye' an han ti thin hi an thiante leh chhungte hian engtin nge an lo dawnsawn (feel) ang, tih hi ka ngaihtuah thin.

Bye bye hi in thlah nan, kan invai liamna chi khat atan kan hmang ve mai a.
Fiamthu thawh zawhah min rawn bye bye ve ta pawh nise engtinmah ka feel ve awm lo mange. Burma rama mizo te chuan khatia bye bye kha engtin vak kan feelin ka ring lo, chuvangin tul tihna pawh kan nei lemin ka ring lo. Mahse, kan hmingte an rawn lam rik erawh chuan thinlung min thawng ve ngei ang. Mizoram mipuite hian engtin chiah nge khatianga bye bye kha in lo feel dan hriat a chakawm ngawt mai.
Hei hi communication a thil pawimawh tak mai a ni.

Kut zungchal in hmuh ringawt te, lu han inkhawih sakte hi hnam hrang hrangin a awmzia hrilhfiahna kan nei hrang thei a. Hetiang ang Non verbal communication zingah chuan, kut han vei liam (bye bye) hi chu inthlahna, inthenna lam hawi ni maiin ka hria.

ISIS

ISIS (Islamic State):
Tunlai khawvela pawl hlauhawm ber, hmeichhia leh naupangte pawh zuah lova, rawng taka that hmiah hmiahtu, sakhaw hmun thianghlim leh sakhaw ro, hmun pawimawh pawh tihchhiat pawisa lo, pawisak nei lo leh rawng taka an chet theihna tura an Commander ten drugs leh an sakhaw zirtirna hmanga an thluak an suk sak ten khawvel ram hrang hrangte thin a tithawngin, a barakhaih hle a nih hi. He pawl nuai chimit tur hian ram hrang hrang an intelkhawm tan ta.
Tunah hian ISIS te hi Iraq leh Syria ramah an che nasa hle a, sang tam tak an that a, nuai tam tak mahni in lumah pawh awm ngam lo an raltlan mek a. Heng Muslim firfiak ho hian ram hrang hrang an vau ta zel mai bawk a. Khawvelin a buaipui ta luai luai mai a nih hi.
ISIS chu Islamic State of Iraq and Syria tihna a ni a. Islamic rorelna ram din an tum a ni ber a. Tunah hi chuan IS (Islamic State) tih chauhin an sawi tlangpui. Iraq-ah Muslim chi 2 an awm a, Sunni muslim leh Shiite muslim. Sorkarna chelh mektu hi Shiite Muslim an ni. ISIS ho hi Sunni muslim an ni a, Sadam Hussien pawh kha Sunni muslim a ni. Shiite muslimte hi an sakhuana tidazattuah ngaiin nuai chimih an duh a.
Iraq leh Syria ram hmun tam tak an la tawh a, an thlenna chinah chuan sakhaw dang awm an phal lo a ni ber a. Christiante leh sakhaw dang betute chu Muslimah an inlet duh lo a nih chuan ram chu chhuahsan turin an ti a, an chhuah duh loh chuan thahah an vau a. An that teuh reng a ni.
Iraq-ah hian ISIS sipai 30,000 vel awmin an ringa, chung zinga 15,000 velte hi foreign fighter an ni. Ram hrang hrang atangin Muslim tlangval then khat IS sipaiah an inpe a; UK, Germant, Afghsnistan, Pakistan, India, Belgium, etc.
IS te hian media kal tlangin sipaia tang duh hi an zawngin an sawm reng a. Ram tam takin an hlauhthawn chu heng IS sipaia inpete hi an ramah an kir leh hunah harsatna an siam ang tih hi a ni. Thih an hlau si lo va, IS agent-ah te an tang chhunzawm palh ang tih hi venthawn awm tak a ni.
Israel ram chuan ISIS chu danin a phal loh pawl "Illegal Organization" tiin a puang hmiah. He pawl nena inhnamhnawihna nei a piang chu dan anga man theih an ni dawn tihna a ni, an ti tha khawp mai. An lo inveng lawksa tihna a ni. Tunah hian Arab ram thenkhatah IS thlawptu hi an awm nual a, hei hian IS laka inven pawh a tih harsat phah ngei dawn a ni. India muslim te chuan ISIS ho hi muslim zirtirna dik lo taka kalpenpuitute an ni an ti ve thung.
IS te hian American chanchibu mi 2, an lu an tan sak tawh a. Tin, IS te hian Syria thlawhna tum hmun pakhat Ragga an lak khan Russia Jet fighter an man tel a. "Min bei tura i thlawhna pekte ngei hi i ram beih let nan kan la rawn tir dawn," tiin Russia pawh an vau. Saudi Arabia pawn ISIS ten beih an tum thu an hria a, an hruaitute an buai ru hle a. Khawvel ram dangte IS do rawn turin a sawm.

An sawi danin IS te hian an mi thah then khat hi an taksa a la lum laiin an kal ilo vel la chhuakin Turkish rama human trafficking sumdawnna lamah an hralh thin an ti.
Tin, muslim hel pawl hrang hrang Al-Qaeda, Taliban, Egypt rama Islam Brotherhood te leh Nigeria rama hel pawl te pawhin IS hi an thlawp chho tan zel niin an hria. Tin, Turkish doctor ten IS sipai hliamte hi an lo enkawlsak thin niin an sawi bawk.
ISIS leader Abu Bakr Baghdadi chuan fanu pakhat aia tam nei chuan an sipai, a bikin foreign atanga lo kalte nupui atan pe rawh se tiin thuchhuah a siam thar. He pa lu man atan America chuan US $ 10 millions a phal a ni. A tam tham hle mai. Second Bin Ladena tiin an ko a, Bin Ladina ai pawhin mi nunna a ren lo zawk a ni.
ISIS Vs NATO
USA leh a thurualpui ram 10 _ UK, Germany, France, Canada, Italy, Australia, Poland, Turkey, Denmark te chuan ISIS beihrawn turin hman ni lawka NATO inkhawmpui Walse rama neihah an rel thlu ta. Tangrual pawl 'Core Coalition' an din nghal a. Iraq sipaite ralthuamin an tanpui ang a, tin chung lam atangin thlawhnain an pui bawk ang.
Syria ram sorkarna chelh mektu Asaad-a sorkar hi US hian paih thlak a duh hrim hrim a. Chuvangin Syria ram chhunga ISIS ho beih dan tur pawh ngaihtuah mek a ni. Asaad-a sorkarna paihthlak duhtu Syria ram chhunga hel hote thawhpui turin US hian a rim mek a. ISIS ho awp chin khuate an la let leh a nih pawhin Asaad-a sorkar kutah a hlan don lo a ni. Hei hi Russia sorkar chuan hriain an president Putin-a chuan "Syria ram chhunga ISIS ho do chu Syria run ang a ni," tiin US chu a dem a. A va han buai hnawk vel vei tak em, khawvel hi!!

Islam Sakhua

Tunlai ISIS ho Iraq leh Syria vela rawng taka an chetnain khawvel a deng chhuak a. Firfiak taka an sakhua kalpui an tumnain khawvel a barakhaih a. An  chanchin tlem te tein he tah hian ziah khawl ka tum a ni.

Islam kan tih hi sakhaw hming a ni a. A awmzia chu Pathian hnena inhlan pumhlumna emaw inpumpekna (submission) tihna a ni. Islam sakhaw betute chu Muslims emaw Moslems tih an ni. A awmzia chu ＇inhlante, inpumpekte＇tihna a ni.
Khawvel sakhaw lian 4 (Hindu, Buddhist, Christian, Islam) zinga naupang ber leh thang duang ber a ni. Middle east leh Africa mi tamtakte hi Muslim an ni.

Mohammed-a:
Islam sakhaw dintu Mohammeda hi chhungkaw zahawm tak atangin A.D 570 khan Mecca khawpuiah a piang a. Kum 25 mi a nihin hmeithai hausa Khadija nen an innei. A hun tam tak fianriala Pathian thu ngaihtuah nan a hmang a. Vantirhkoh Gabriela pawh hmuin a insawi. Thupuan chhuah a dawnte chu puang chhuak turin a nupuiin a fuih a. Tichuan, bazar hmunah te, kawt thlerah te thu a hril tan a. Mecca khawpuia milem biakna leh sualna bawlhhlawhte chu a do nasa em em a. Amah hawtu pawh a ngah phah em em a. Mahse, a patea, mi thil tithei tak Abu Talib-a thlazar hnuaiah a him hram hram a.
A nupui leh a patea thih hnu kum 2na, AD 622 July 16-ah Mohammeda leh a hnung zuitute chu Mecca khawpui atang an um chhuak a. Yathrib khuaah an tlan chhia a. He an tlanchhiatna hi Hegira tih a ni a. Chu chu Islam sakhua lo intanna ni atan chhiar a lo ni ta a ni.
A hnuah he khua hi ‘Medina’ tia hriat lar a lo ni ta a. Zawlnei khawpui tiin an ko thin. Chutah chuan Mohammeda chu sakhua leh politicsah hotu a lo ni chhova. Mecca chu a run leh a. Tin, a zawlnei nihna leh a rorelna chu Arabia ramah chuan tilianin, Allah (pathian) tan khawvel ram zau tak la turin Arab hnamte chu tipumkhatin sipaiah a siam a. AD 632ah a thi a, a thih hnuah pawh a hruihhruaite chuan ram la zelin an sakhaw zirtirna chu Africa leh Asia-ah te,tin europe ram thenkhatah te thehdarhin, sipai chakna hmangin hma an la a. Vawiin ni thlengin kan hriat angin Islamic state tiin Iraq leh Syria ah hma an la tan mek a nih hi.

Koran (Quran):
Islamic sakhaw lehkhabu thianghlim chu Koran (recite) tih a ni a. Bung (surah)114 a awm. A bung (chapter) sei dan indawta rem a ni. Tin, a thusawite a hnung zuituten an ziak chu amah a thih hnuah lakhawmin lehkhabu pakhatah an siam. Koran bua thu then khatte hi a hnawkin hriatfiah a har a. Mahse, Moslem te chuan hei hi a oroginal atanga copy a ni a, a original dik tak chu tunah vanah a awm an ti.

Islam Doctrine 5:
1. Pathian: Pathian 1 chauh a awm a, a hming chu Allah a ni.
2. Vantirhkoh: Gabriela chu vantirhkohte hotu ber a ni a, Mohammeda hnenah a in lar. Vantirhkoh paihthlak setana (shaitan) leh a hruihhruai (demon) te pawh an awm.
3. Pathian thu: Pathian thawkkhuma pek chi 4an pawm. Chungte chu: (i). Torah, Mosia lehkhahu (Gen. -Deut). (ii). the Zabur, Sam bu. (iii). the Injil, Isua chanchin tha bu. (iv). the Koran.
Heng zawng zawngah hian Koran hi a chungchuang ber a, bu dangte chunga thutlukna leh innghahna ber atan pawh hman a ni.
4. Mohammeda: Koranah chuan Allah zawlnei 28te hming list a ni a. Chungte chu: Adama, Nova, Abrahama, Moses, Davida, Jona, Isua...etc. Heng zingah hian Mohammeda chu zawlnei ropui ber leh hnuhnung ber a ni.
5. Hun tawp: Ni hnuhnungah chuan mitthi te chu an lo tho leh ang. Allah chu roreltu niin, mi tin an kalna tur hremhmun emaw vanram emawah a thawn ang. Vanram chu hmun nuam eltiang a ni a. Hremhmun chu Allah leh a zawlnei Mohammeda do daltute tana buatsaih a ni.

Rinna Ban 5:
Islam sakhaw ringtuin a tih ngei ngei tur chi 5:
1. Rinna puanchhuah: Allah chauh lo chu pathian dang an awm lova, Mohammeda chu a zawlnei ropui a ni.
2. Tawngtai: Ni khatah vawi 5 Mecca lam hawia thingthiin a tawngtai thin tur a ni.
3. Tanpuina thil thlawn pek: Moslem chuan a thawh chhuah atang sawm lia pakhat (1/40) chu hmeithai, fahrah, dam lo, retheite tan a pe tur a ni.
4. Ramadan: An calendara thla 9na chu serh thianghlim a ni a. Hemi thla chhung zawng hian ni en chhungin engmah an ei tur a ni lo. Hemi hun chhung hian thil sual a ti a nih chuan a chaw ngheina zawng zawng chu awmze nei lo a ni ang.
5. Ram thianghlim zin: Muslim chuan a dam chhungin vawi khat tal Mecca ah a zin tur a ni. Mahni ngei kal theih loh pawhin ai kal tur a tir thei ang.
Indona thianghlim (Jihad): Hei hi official taka an neih chu ni lo mah se an tih tur zinga chhiar tel ve thin tho a ni. A awmze bul dik takah chuan Islam sakhua venhimna avanga indona a kawk a. Mahse, Allah tan ram dang la tura indona sawi nan hman a ni bawk.
A chunga Rinna ban 5 te hi chhandamna an chan theihna tura pawimawhte an ni. Chutiang bawkin heng 5te zawm loh hi sual chu a ni.

Mihringin a chhandamna a thawk chhuak tur a ni (Surah 4:111). A sual man pawh aman a pe/phur ang.

Kan sual tlan nan Kross ah Isua a thi lo. Khen beh a nih hmain Allah-in vanah a la chho deih. Kross-a thi kha chu Judas a ni an ti.
Arab ho hian Abrahama fapa Ishmaela thlah kan ni a, Isaka thlahte aiin chanvo nei tha zawkah an inngai.

Bible zirtirnaa Pathian chungchang te, taksa thawh lehna chungchang te, vanram leh hremhmun chungchangah te an zirtirna nen a inzul hle.

Isua leh Mohammeda inan lohna an sawi chu:
Mohammed is only a dead prophet, but Christ is a living Saviour!

HHualng Ram Kan Vei

Kumin 2014 Jan - May thla chhung zawng kha kan hun hlu tak Hualngo ram tan kan hlan a. 2014 Jan. 7 khan Hualngo rama rawngbawl turin Rangon atang nupui fanaute kal sanin ka feh chhuak a. Ka kawr haklai thenkhat leh ka hak vak tawh loh te, second hand (sem) atan ken ka duhthu ka nupui ka hrilh a. A ni pawhin a kawr thenkhat a rawn theh chhuak ve a. Ka fanu tleirawl hnenah i rawn thawh ve don em ka ti a. Ka nei ve vak lo a ti a, a ui deuh a. Malsawmna dawn i duh ve lom ni ka ti a. Chutah chuan, duh e, tiin a thawmhnaw thenkhat chu a rawn pawm chhuak ve a. Tichuan bag khat lai a lo tling ta a. Ka nupui fanaute pawh ka rawngbawlnaah an tel ve duh avangin ka lawm tak zet a ni. Tahanah ni 5 ka cham a. Ka nupuiin naupang rawngbawl tur in ni sia tiin Rangon bazarah naupang kawr second hand hak 40 a leia a ron thawn leh bawk a. Tichuan Jan.13 ah kan chhuak a, lentlangah Tuidil thalai thenkhatin min lo hmuak a. Rawngbawlna khawtlang huapin schoolah kan tan nghal a. Ka second hand thenkhat kan sem a. Zan lamah nu leh pa pualin naupang Pathian thua enkawl chungchang kan zirtir a. Kan tih thin tha lo te kan haichhuahsaka a tha zawk tih tur home work te kan inpe a. Nupa inhmangaihna tihpun zel a pawimawh zia ka hrilh a. Kan subject kan hlimpui em em a. Nu leh pa pawh mi 80 vel lai an rawn tel a. Tuidil hi in 64 vel an ni. An headmaster pawhin tha a ti ve hle a niang kuminah Kristmas hmain tih leh ngei kan tum dawn a nia a ti. Tin an zirtirtu pakhat Laitui khua pawhin an khuaah ti ve turin min sawm a, tawnglettu a tul chuan ka ngaihtuah vek ang a ti a. Mahse kal lehna turte kan biak sa tawh avangin hun remchangah kan la rawn kal don a nia tiin kan inthlah a. A tawi zawngin sawi tawh mai ila. Khawtinah ni 3 zel hun kan hmang a. Zing dar 9:00 atang tlai dar 4:00 thleng naupang tan hun kan hmang a. Zan lam erawh chu Nu leh pa thalai tan zirhona te, leh sermon zawngtein hun hman thin a ni. April thla chawhnu lam kha Tahan lamah mahni kohhran thalai inkhawmpuiah ka team member ten chanvo an neih ve a vangin kan haw zawk a. Keipawh Rangonah ka nupui fanaute bulah chawlhna hun atan hmangin kar 2 vel ka chawl ve hman tawk a. Tahan lamah inkhawmpui hmangin kan haw dawn tih an hriatin khaw thenkhat leh kohhran then khatin min lo book sa a. Mahse Hualngo tlangdung tan kan lo inhlan tawh avangin khaw 2; Varpui leh Sanmyo ah chauh kan neih sak thei a. Tichuan May thla tirah tlangram lam pan chuan mahni bike thawh chhuahpuiin kan inkhalh chho a. Insengso lo hian ka Pathian ka be dawn lo. Midang tihau tak lo thei ang bera rawngbawl hi ka duh dan a ni a. Mahse volunteera kal hlawh pawh nei lo kan nih avang erawh chuan kan tihau takna a awm lo thei lova, mittui tlain an tan ka tawngtaisak thin. Tumkhat pawh khaw khata kan rawngbawlna chaw hmeh an neih loh avanga an inthlahrun zia an sawi a, an tan chawhmeh han dap mai a harsat zia ka hria. An rilru thatna ka hmuh hmaih hauh lo. Mahse ka rilru an tihreawm tlat a, "Sawi sawi suh u, chaw hmeh beiseiin kan ron kal lo, chaw hmeh tha beisei ni ila chuan mahni inah neih ang angin kan intuituah ang chu. Rawngbawlna tha tak kan nei theih hi kan lom em em a ni. Theih ni sela in tan hian thil pek hlu tak in rawngbawlna atana tangkai tur hnutchhiah theih che u ka chak em em a ni," tiin ka sawi nghe nghe a. Hualngo rama kan kal tawhna khua te: Tuidil, Zimpui, Thinglei, Bukphir, Darkhai (Darkhai khua atang hian Mizoram Hnahlan khua chu hnaite a ni), Kawilam, New Haimual, Hmunluah, Lianhna, Tiau, Rihkhawdar, Thingchang Surbung, Siallam, Satawm, Khawpuichhip, Chawnghawih, Tuibual. Tin Wesleyan naupang sunday school Haimual district khawmpui leh EFC Hualngo ram naupang sunday school inkhawmpuiah te Speaker niin ka team memberte nen hlim takin hun kan hmanpui a. Heng khawmpuiah hian kan la kal lohna khua Zimte, leh Chawhte atang an rawn tel a. Hengkhua te kal chiah lo mah ila, khawmpuiah an rawn tel avangin kal tlukah ka inngai. Tichuan, naupangte June thla tirah school an luh tawh dawn avangin, May thla tawpah Champhai kan lut a. School-ah lutin rawngbawlna kan chhunzawm zel a. July thlatirah Aizawl lamah kohna kan dawng a. Kan thlen tuk atang Higher secondery school ah lut nghalin hun kan hmang chho a. Aizawlah school 5 tun tum hian kan lut a. Champhaiah khan school 4 kan lu hman bawk a. Nikum khan Champhai leh Aizawlah school 26 kan lut hman a. Chung school atang chuan naupang 3000 chuang chhandamna chanchin tha kan hrilh a. Khaw hrang hranga kan kalna te nen chuan nikum khan naupang 4000 vel Pathian thu kan zirtir a, inhlanna kan neih pui thei a ni. Tunah hian Aizawlah kan awm mek a. School naupangte tun thla tharah hian exam an nei don a. Kan chawlhhrih deuh a ngai don a. Tahan lamah chawlh hmangin haw tumin kan inbuatsaih mek a, lirtheia kan kalna turah te min lo tawngtai pui ve don nia. Tiau ah kan Bike te kan dah a. Vurlai a ni a, tawngtaipui kan ngai tak zet a ni. Kal lam khan Hualngo tlangdunga kan kalna petrol man tur leh mamawh zualpui Hi Kidz director Rev. Jubilee Thanga'n min tum sak a. Tin, Hi Kidz bike pakhat kan hmang tel bawk a, a thar vang nge petrol a heh bik khop a. Ka bike 110 let deuh thaw petrol a ei a. Tlangram kawngdiakah chuan Nipuia India bike chu tlan chak ve ngam lovin a tawlh pur pura nghah deuh zel a ngai. Khawtina kan rawngbawlna chanchin hi sawi tham a awm a. A hlimawm em em a. Naupangin nuam an ti a, nu leh pate an lom em em a. Rawn kal leh ngei ngei ang che u. Kar khat tal cham turin in rawn kal tawh dawn nia tiin an kham loh zia min hrilh a. School luh hmaa a tam thei ang ber luh kan duh vangin khaw khatah ni 3 bak hun kan pe phal lo va. Zingah khaw dangah kan insawn a. Naupangte dar 9:00 ah tan thei turin lo ko khawmsa ang che u tiin kan hrilh sa zel a. He rawngbawlnaah hian mahni ram leh hnam veitute, Krista hmangaihtu leh kan naupangte hmakhua ngaitu zawng zawngte mahni theihna zawn theuhah rwn tel ve turin Krista hmingin kan sawm tak zet che u a ni. Krista leh Naupangte tan, Sir C. Lalawmpuia. NB. Ka team memberte: Simon L. Chhuana, Joseph Lalrinchhana, Lalnipuia, Vanlalrindika.

Naupang Rawngbawlna

Zonuam Primary School, Aizawl-ah ni 3 chhung rawngbawlna hlimawm tak kan nei a. An head- master nen dar kar 2 zet office-ah ti tina hun ka nei thei a, "in rawngbawlna activity hrang hrangte hi video a laka local chanel a tih chhuah a chakawm hle mai," tiin kan rawngbawlna tha a tih thu min hrilh a. Naupangte nun vei em em tu a ni a. Naupangte moral develop a tul zia. Nu leh paten lungrual taka inhmangaihtawn tak chunga naupangte kan enkawl a tul zia te. Inchhung khura naupangte kaihhruaina tha neih a pawimawh zia te tui titakin kan sawi dun a. " In zirtir dan hmang hi tuna India education system CCE nen pawh a inmilin, motivation insiam dante hi zirtirtute tan pawh entawn tur tha tak niin ka hria," tiin kan phu loh fakna awkate ka dawnga ka lawm tak zet a ni. Tunlai naupangte sual kawngah an tlan nasat zia school hrang hranga kan rawngbawlnaa zirtirtute han sawipui hian sawi tur an ngah thin khawp mai. School hrang hrangah naupangte hi zawhna thiam takin ka zawt a: Bible, Pathian thuzawm hi malsawm dawnna a ni tih ka zirtir laiin, Bible-ah tunge Pathian thu zawma malsawmna dawng? A sawi thei a piang mark 1 ka pe ang tiin. Mark hmuh an duh a, A thenin Abrahama, Mosia, adt. Engtin nge Pathian thu an zawm? An zawm avangin eng harsatna or malsawmna te nge an dawn tiin ka zawt zel a. Um, tun chu mark 2 a ni tawh ang; in vengah, chhungte zingah emaw in kohhranah tunge Pathian thu zawma malsawmn/harsatna tawk? An ron sawi leh sap sap a. Tun chu, mark 5 a ni tawh ang. Nangmahni-ah Pathian thu zawma harsatna emaw malsawmna emaw dawng in awm em? Midang en suh nangmah khan sawi tur i nei ve em? Mark 5 ka pe tawh don che u a ni tiin. Tah chiah chuan ani naupangte Testimony ngaihnawm tak tak, rilru khawih em em, a then phei chu kan mittui a tla hlawm hial thin. Pawl 2 zirlai mipa naupang pakhat chuan ti hian a sawi a,"ka thianten Denrite hnim rui turin min sawm a, Pathian thu ka awi a ka hnim ve duh miah lo," tiin. A va ropui ve, a nih leh Pathian i awih avang chuan eng malsawmna nge i dawn ve? Tiin ka zawt a. " Lehkha thiam theihna, examah pawh pakhatna te, pahnihna te ka ni thin" tiin min chhang a. Pawl 2 zirlai naupangin "ka thianten denrite hnim turin min sawm a" tia a sawi lai khan mak ka ti lutuk a, sawi tur pawh hre lovin ka Ka ho ringawt mai a ni. Hei lo pawh Middle zirlai pawl 5 zirlai mipa naupang leh pawl 8 zirlai hmeichhe naupang leh H/S pawl 10 zirlai hmeichhe tleirawl testimony te leh zirtirtute sawi thenkhatte pawh sawi tur ka nei nual mai. Rawngbawla school hrang hrang kan luhnaah hian ka zir pah ve zel a. Naupang rawngbawlna hi kan ram kan hnam hian a va mamawh tak em! Tihtak thlaka naupang rawngbawlna bik neia mahni in surrendera feh chhuak sawi tur hi keini lo hi kan mizo zingah hian an awm em aw?? An awm chuan hriat ka chak khawp mai. Heti taka pawisi thawktu kan tlem em em mai te, a awm chhun te pawh kohhran leh khawtlang ngaihven hlawh lo tak kan la ni bok si. Puitling ngawlvei te siam that hleih theih tawh mang loh leh da leh hma em em te buaipuiin hlawk lo zetah sum tam tak sengin kan bei vak vak a. A hlawk zawk leh tih makmawh naupangte rilru thianghlim puitling nei tir tura beih hi senso tlem zawk bawk si, thar hlawk zawk bawk si tih nachang hre lo tur hian Setana hian engchen nge min bum reng don le? Naupangte Lal Isuan a hmangaih thu han hrilh hian ngaih thlak nuam an ti tak zet a sin. "Isuan a hmangaih lutuk che u a, 'naupang te te ka hnenah lo kal tir ru' tiin a sawm che u a sin, a hnenah in kal duh ang em? Tia ka zawhte hian min chhang ring thei teh mai a sin. Naupangte ka kawmna atanga thil ka hmuh chu Naupangte hian thil an lo feel ve theih zia, an rilrua an lo tuar ve thin zia. Mahse rilru inngaitlawm tak chuan sawi chhuak ve lo va an rilrua an lo pai khawl ve zia, hlim thei tak an nih avanga puitlingten kan hriat thiampui thin loh zia te hi aw....