Chinlone

Hnangtah ball hi kawl ho chuan chinlone an ti. Kawl ho infiamna ber pakhat a ni a, an national game a ni hialin ka hria. Kawng sirah te hian an ding bial laih a, an kawl pawnfen hi an mawngah an vawh zep lut a. Kawl mipa ho hian kekawrte hi an ha ngai lo tlangpui, tun hnuah hian a ni tho em ka hre lo, kekawrte hak pawh an ching ve tawh niin ka hria. Ser leh sang (or puithuna atthlak) hi an ngah em em a. Hmeichhe underwear reng reng hi, pawnfen pawh nise kawng chin chunglamah an zar ngai lo. Hmeichhe pawnfen zar hnuaia kal chu thih hrehin an hre ni berin ka hria. Ke dahdanah an fimkhur em em a, an kephah midang chhawn zawngin an dah ngai lo.

An tawng hi a hausa a, an ram lakna ber pawh niin ka hria. Heng Karen kan tih ho te leh burma rama hnam dang dang hian an mahni tawng aimahin an thiam zawk emaw tih tur a ni a. Asoe chin ho pawh hian kawl tawng an hmang. Kan mizo khawpuia seilian ho pawh hian hman nuam an ti em em a, mizo tawng aiin a fiah zawk an ti. Kei erawh chuan ka thiam lo hle a, tlang mi kawl tawng thiam tak tak te pawh hian, tawngtai nan leh Pathian thu sawi nan chuan har an ti tho. A chhan chu an bazar (khawlai) tawng leh sakhua tawngkam hi a dang lam. An sakhaw tawngkam hi a un a, an urhsun ka ti mai. Palih tawng te leh Sanskrit tawngte nen pawh a inpawlh sawp deuh nuai ni maiin ka hria. Kawl tawng rau rau pawh hi khawte leh khawpui tawng chu a innalh hleih khawp mai. Keini tlangmi tam zawk phei hi chuan kan lam fuh hleithei loin kan pai em em a, mahse kawl hian min nuihzat ngai miah lo. Innuihzatna chi niin an hre lo a niang, chuvangin thiam vak lo tan pawh tawng kha a inthlhrunawm hran lo va, tichuan an lo thiam chawp ve zel mai a ni.

An drama leh cinema film reng reng pawh hi tawng hre lem lo tan chuan a ho viau a, mahse kan mizo zingah leh kawl film ngai na tak tak ho hian an ngaihnatna chhan ber nia ka hriat chu an tawngkam mawi tak leh hausa tak hi niin ka hria. Cowboy bu ka chhiar thin lai khan an tawngkam khan a nia min hneh em em tu chu.

Ei leh in an ngaithupui em em a, inlengte eitur chhawp an ching khawp mai. chaw hmeh siam pawh an thiam a, ei neuh neuh tur borai tih vel leh a dang dang pawh an siam thiam hle, keini ai an vir zawk a nih hi ei siamah chuan kan tluk lo khawp mai, bawlhlo pawh kei ni chu kan ngah vak lo, chingal leh saum a ni tlawng ma a. Mahse ka kaah chuan behlawi bai hi zawng a tui chiang a ni.

Ei leh in zawhah chuan incheina an ngai thupui leh a. He tah tak hi chuan kan in ang lo hle a ni. Keini chuan mahni neih phutawka inchei hi kan sawi uar ber a. Mahni neih phu lo va inchei te hi chu kan nuizat ngei bawk a. Keipawh hi he ngaihdan hian min hneh ngang a niang incheina lam hi chu ka ngaihsak ngai em em vak lo va. Mahse nupui neih hnuah hian nuber puan thuithiam tih takah hak thlak tur pawh a chi dang deuh te ka nei ve mial a. Incheina chungchang an sawifiah dan leh ngaihdan pawh hi thlir dan chikhat atang chuan tha tak chu a ni tho a ni. Sawifiah kual vak lo mai teh ang. Thing deuh ai chuan tharlam deuh chu hmuh a nuam zawk kan ti ve mai a niang chu, nula ho tui zawng tak a lo ni bawk nen. Kan thenawmnu chu office-a a kal dawn te, damdawi inah te leh mi a dawr dawn hi chuan a rangkachak neih ang ang kha a inbela, mi lian nu ang takin a inchei thin a. A va dawrna te pawhin an lo zah nge nge a, berhchep deuh tan chuan office hnathawkte leh nurse te hi biak tawng zawh an har. A pathumnaah chuan keinin pakhatnaah kan dah pawimawh ber mai nung chang hi a ni ve tawh mai.

A ha.. hnangtah ball youtube a mi rawn post tum mai chauh ka nia, kei lo ang renga ka ziah tak teuh chu. Heng hnangtah ball infiam ho hnen atang hian emaw ni leh kan Soccer player Ronaldinho te C. Ronaldo te hian bawl sep an zir chu aw,, ka ti vel ta mai mai a. Mahni tui zawng a ni bawk a, post ve mai mai teh ang, mahse hnangtah ball (chinlone) hi ka thiam vak lo.

Hei zet hi chu en ve ngei chi a ni, hmeichhia te hlei hlei hian an thiam emaw tih mai tur a nih hi le.