Zawngte leh Muvanlai

Thangkhat lian zet zawt liam tawhah khan comics ang reng deuh va cartoon lem nena thu ziak ka chhiar a, a ziaktu hi ka hre ta lova (artist Tea a ni mai thei). Chu thu ziakah chuan zawngte leh muvanlai hian intihsiakna chi hrang hrang an bei a. A ziaktu chuan Zawngte chu hnehna a chantir zel a. A tawpah chuan Muvanlai chuan tunge mit var zawk in el ang a ti ve ta khauh mai a. Tichuan hetiang hian rem a ruat ve ta a:

Van boruak sang takah kan thlawk anga tunge thil hmufiah thei zawk kan inel ang. Thil te takte pawh fiah taka hmu thei chu mit var zawk an ni ang a tit a. Zawngte chuan a huphurh ngang mai a. Tun tum zet chu a hneh dawnin a hre lova, chhuan lam tur a zawng ta a. Vanboruak sang taka thlawk turin thla ka nei ve si lova, kan intihsiakna tur hi ka tan chuan tihtheih loh thil a ni e, a ti a. Mahse Muvanlai chuan ka chungah hian i chuang anga ka thlawh chhoh pui ang che a ti leh ta zel si a. Intihsiakna chu an tan ta a.

Zawngte chu muvanlai chungah chuangin a nghawngah a kuahbet ran mai a. Biak in chhip zum an thlawh pelh hnu chuan thliin a mit a beng a, a mit chu a lo thip tan a. Hnuai lam a zuk hawi thlaa Bawngpa chal te chu kel pui tiat lek lekin a hmu tan ta mai si a. A tan chuan an intihsiakna chu thil huphurhawm tak mai niin a hria a. Hnehna a chan theih dan tur ngaihtuahin a thluak a vei vir pap pap reng thung a. Muvanlai lah chuan phur em emin a thla chu a zap sauh sauh va, kar lova van boruak sang tak chu an thleng chho ta mai a. Dik tak chuan zawngte tan chuan an awmna boruak chu a sang lutuk a, mawng a za chuai chuai a, hnuai lam pawh a thlir ngam lo a ni. Mahse a hlauhna leh a tlin lohna chu a thup tlat a vangin Muvanlai chuan a hrethiam hran lo va. A chang chuan kan thiam loh leh tlin lohna te hi sawi miah lo ila, miten min hmusitna tur leh ngaihnepna tur lakah kan inveng an ti. Kan sawi avang khan miten chakna thar leh beiseina thar an nei phah dawn te a nih lem loh chuan. Tin thiam zawng leh kan tihtheih zawng tak hi sawi uar zawk ila leader nihna atan chuan a inhmeh zawk an ti. Keini mizote hi chu thukhuh ka chinga a harsa deuh hlek zawng a ni hnam dang karah lek phei chuan.

Nakinah chuan Muvanlai chuan khai le Zawngte, nang enge I hmuh sawi rawh le a ti ta a. Zawngte chuan, a tam a lawm khu in te, biak in te pawh ka hmu tiar tuar mai a ti a. Muvanlai chuan nuihsawh takin chu ai thil te deuh te hmuh i nei lo a mi? a ti a. Nei e, thil dang pawh ka la hmu teuh mai tiin a chhanga. Mahse nang enge i hmuh han sawi ve phawt la a ti a. Muvanlai chuan hnuai lam chu a thlir thla vang vanga, khu ta feh kawng sira sazu thi khu chu i hmu ve thei lo ang maw? A ti a. Zawngte chu a ngawi vang vang a. Heta ka thil hriat chhuah pakhat chu judo infiamna zir ho chuan an khingpui te tha (force) kha hmanlet dan an thiam a, awlsam tein an vawrh let tawp tawp thei a ni.

Muvanlai chuan intithei fahran hian nang ai chuan ka mit var zawk a ni e, sawi tur pawh i hre ve ta lo a nih kha a ti a. Zawngte chuan intithei mai lo khan lo ngawi la, ka en chiang a nih hi; I sazu thi hmuh khu han en chiang ve mahteh a lungin an bawm tan tawh a nih khu, a ti ve ta then a. Muvanlai chuan mak ti takin chu ti maw, a lung chu a te lutuka ka hmu ve thei lo, a ti. Tichuan an zawk thlawk thlaa an enchiang ta a. Zawngte sawi ang ngei chuan chu sazu thi chu a lungin a lo bawm a, tichuan Zawngte chuan muvanlai mitvarna rinchhan chungin, a ngaihruat thiamna leh finna hmangin hnehna chu a chang leh ta a ni.