Mizoram Chapchar Kut 2009

Vawiin march ni 13 hian Mizo ten kut kan neih zinga Ropui ber Chapchar Kut 2009 lawmna hun chu Aizawl sipai lammualah a pui a pangin ropui taka lawm a ni a, Pu PC Zoramsangliana Art & Culture Minister chu Kut thlengtu a ni a, Chief Minister Pu Lalthanhawla chu Kut Pa a ni.

Mizoram larsap MM Lakher chuan, Kumina Chapchar Kut kan hman hian mitinte hnenah remna, hmangaihna leh in unauna thlen se ka duh a. Hnam lam leh rimawi kan phochhuahte hian kan nihna ze ril mahni inphatna te, ram tana inpekna leh tlawmngaihna thangthar nunah tuh thar se, a ti.

Chapchar Kut lawmna hun hi chawhma dar 11 atanga tan a ni a, Pu PC Zoramsangliana Art & Culture Minister chuan Chapchar Kut lawm tura kalkhawm te chu hun hlimawm tak hmang turin duhsakna a hlan a, a bik takin ram pawn lam atanga he hun rawn hmangtute chu an lo lawm tak zet tih a sawi bawk. Kan culture vawnnuna a awm hi a lawmawm hle a ni, a ti. Chapchar Kut Souvenir a tlangzarh bawk.

Rev.H.Lianngaia Vice chairman, MKHC chuan Pathian hnena inhlanna hunserh a hmang a, TNT zaipawl ten Haleluia Chorus thiam takin an rem a ni.

Central YMA president Pu JH zoremthanga chuan lungrual a pawimawh zia te, Chapchar Kut hi Mizo mipuite nasa zawka min phuar khawm tu ni se, a ti a. Mizoram pawn lam leh ram pawn lam atanga rawn chhimtute tih tak zetin an lo lawm tih a sawi bawk ani.

Kut Pa Pu Lalthanhawla Chief minister chuan mipuite chu Kut chibai bukin mahni culture zahpui lova a vawn nun kawnga hmalak hi Hnam changkang te tihdan a ni a, Mizo te tan pawh culture hi Malmak chi a ni lo a ni a ti. Kan Kristianna leh khawvel changkang chho zel mila kan Culture te her rem hi a tul hle a, hemi rual hian kan humhim erawh a tul hle a ni a ti. Thenawm ram leh State pawnlam atanga he hun Hlut tu zo hnahthlak te chungah lawmthu sawiin Kut hi mizo te ni ropui a nih avangin hman zuizel chi a ni a ti a, kut lawm tura kalkhawmte chu mahni awmna hmun theuh ah Full time in Kristian kan ni vek thei a ni tih hrilh in Item hrang hrang nei turte chu duhsakna a hlan a, inremtlang tak leh hlim taka hun hmang turin kalkhawmte chu a sawm nghal a ni.

Pu S.Hiato, tourism Minister chuan Chapchar Kut ah hian chhungkaw inrem lo te, Nupa kara buaina thlengin inrem taka awm tur tiin kan pi leh pu te chuan he hun hi an lo hmang thin a, Kut sa zawn ni hial an siam thin a, Kut kan lawmna ah hian kan nungchang leh awmdan te chu Khualzin te hip thei tur ang bera mawi taka kan hman a tul a ni a ti.

Chapchar Kut lawmna hun ah hian Item chi hrang hrang 35 lai neih niin YMA Bracnh 72 in a ruala cheraw an kan te, TNT Zaipawl ten haleluia Chorus an rem te, YMA Branch 33 in Chawnglaizawn an entir te, Kut lawma kal zawng zawng te a huhova chheihlam leh chhawnghnawh te chuan Kut lawma kal te a ti hlim leh zual a, group zai, malzai leh lemchan bak ah zaipawl thahnem tak an zai bawk a ni.

Thulakna: Buannel a mi leh emizoram a mi ka rawn edit nil nela, pic khi chu lawrkhawm a mi a ni.

* Ka rilrua ka ngaihpawimawh leh tel ve min tichaktu Chhawnghnawh an hmang tel thei tih ka hriatin lawmawm ka ti hle a ni.