Vanapa Tawngkam

Hmanlai chuan in do reng reng thin an ni a, rawlralin an che bawk thin a, feh kal tla fal deuh te hi rawlrala che (ral)-in an hmuh chuan hmeichhia pawh nise an thah loh vek pawhin sal atan an man thin a. Thlawhhma hla ber neitu tan chuan a ralmuang lo va, chu bakah buh seng hunin a kawng a thui bika, hei ringawt pawh hi khaw lian deuhah chuan huphurhawm tham a ni. Chutiang chiahin vengtawp ber in chu zanah a ral muang lo em em a, Sapui (Sakei etc) a hlauhawm a. Tin engtik lai pawhin ral lo kal thut sela insaseng ve hman lova tawng hmasa ber tur an ni a, a ral muang duh lo khawp ang, tunlai ang hian electric te an lo nei ve si lo. A tlangpui thuin michhe veng a ni bawk a, mi zawng zawngin Lal mual kil phaa awm theih chu an duh em em vek a, Zawlbuk pawh Lal mualah hian an sa thin a, a bul hnai a mi te tan a thlamuan thlak hle bawk a ni.

Heng neuh neuh ka ngaihtuah hian, “Keiin thlawhhma tawp berah sadai ka theu ang a, hmeithaiten dai hnai neiin lal leh upaten a laiah thlawh hma la rawh se. In pawh veng tawp berah ka sa ang a, dai ka do ang e. Lalin a lai takah in a sa ang a, upaten lum rawh se,” ti a Vanapa thu sawi hi a lo ril raih raih hle mai. A rilru hi a va lo ropui tak em tih loh rual a ni lo. Kan mizo pasaltha ho ten an khua leh tui chhan nan an nun an ui loh zia leh huaisen zia ngaihtuah hi chuan tunlai kan politician tam zawkte nen hi chuan an va in ang lo take m!!

He a tawngkam atang hian Pasaltha Vanapa hian hmeithai te pawh a lo ngaihsak hle a ni tih a hriat theih a, Lal leh upate a zahin a duhsak hle tih a lan tira, ram leh mipuite tan a huaisenna leh tlawmngaihna pawh a lang chiang hle niin ka hria.

Lal leh khawnbawl ho nupuiten zu in an chinga chu chu pa ho chuan tha an ti lo va, Lal nu leh Pasaltha Vanapa nupui te chu a phusa ber an ni bawk sia, hauhngam chi mai an ni bik si lo va, a tawpah chuan Vanapa an han rawn ta a, tichuan “Chawngkhum dan tlang huat loh” tih tawngkam mawi tak hi a lo chher chhuak ta a. Lal leh khawnbawl upa inchhungpui nu berin zu an in fo chuan hnam chawm leh hmeichhe dang pawhin an ching ve mai anga Mizo nun kal chho zel tur kha ngaihtuah awm tak a ni dawn a, a tihreh nan Vanapa hian a nupui pawnfen chu lo hlim sak turin upa pakhat chu a tir ta tawp mai a ni. Helaia a chet duh dan hi a mak ang reng hle a, mahse a hlawhtlin zia atang hian a fing hle tih loh chi rual a ni lo. Pasaltha Vanapa nupui meuh pawh a pawnfen an hlim sak chuan tiin hmeichhe dang phei chuan an hlau ta em em a, an zu in thin pawh an sim ta a ni.

Hmanlai kan mizo pasaltha te kha tlawmngai tak tak vek leh huaisen em em mai an ni vek a. Vanapa a chungchuanna erawh chu heng bakah hian ral rel a thiamna leh a finna hi a ni a. Ral rel mai pawh ni lo vin Lal leh khawnbawl ho rorelnaah pawh Vanapa a tawng ve hma chuan Lalin thu tawp a sawi mai mai ngai lo hle a ni an ti, a thu chhuak hi a fing tlat thin a vangin.

A nunah insum theihna leh mahni inthunun theihna a neih hi a ropui thlawt a. Hei ringawt pawh hi hahipa sawi tham a tling reng a ni. Mi thinchhe tawp thanga an sawi kha mi zaidam berah a rawn chhuak thei hi chu thil mak tak a tling a. Hei ringawt pawh hi a chanchin hmalamah a hunlaia mite mak tih a tling. Mi pakhat tak zawng a la ni ang tih kha rin pawh a harsa lo viau ta ve ang.

Thikthu

Tunlai chu he fiamthu hi ka rilruah a awm deuh reng mai a, keimaha ka ngaihtuah mai mai pawh hian ka nuih a za leh thin a, ngaihtuah chianin nuih a tiza a ni ber awm e, hrisel nan ka blog-ah hian dah ve mai mai ila a that dawn hi. Mi thenkhat chuan an nupui/pasal te thikthu han chhe deuh hlek (a lutuk ni lo)hi nuam an ti, an ngaih a tha, an duh lutuk vang leh an hmangaih vangin an thikthu a chhia a ni an ti a, an hrethiam khawp zuk nia.

Pa pakhat thikthu chhe lutuk ve thung chu an nu hian a ning ve thei khawp a, an han inbia te hi an invin deuh hlak hlak reng mai a ni. Tuk khat chu an feh duna, khuaiin an nu chu a rawn zar sek mai a:
Pa: Kha khuai kha!!
Nu: Enge mawle~~ khuai mai mai te chu (a ti vin hlar a).
Pa: Zang a nei, zang a nei a nia!!

Vanapa Thlahte: Ka Genogram

Hnam tin hian tihdan phung culture kan nei theuh va. Keini mizo danah chuan Fapa naupang ber te hian nu leh pa ro leh nihna tam tak an chhawm thin a. Nu leh pa te enkawltutura ngaih leh inpui nghaktu tura ngaih an ni a, chuvangin fapa naupang ber hian mizo chhungkuaah pawimawhna an nei ve tlat niin ka hria a.

Vanapa thlah kal zel hi ka hriat sual loh chuan ka rawn tar lan ang khi a ni mai a. Kan tam lo hle a. Vanchiauva, Ralduha > Hranghleia, Chhuahzova te hian fa an lo nei tlem em a ni. Tichuan tunah hian Zumura thlah kal zel leh Lalauva thlah kal zel te chauh hi kan ni ta mai a. Hmeichhefa hi chu thlahtu chhuinaah kan pipute khan an telh ngai lova, keipawhin ka sawi tel ta bik lo.
*Lianchungnunga leh Pastor Aikila hian fa an nei lo tih a ni a.

Ralduha chu Thangzachhinga (Vanapa) fapa naupang ber a ni a. A ni hian fa eng zat nge a neih ka hre lo va, fa a neih tam hmain sakeiiin a seh hlum ta mai pawh a ni thei a, ka Pu Chhuahzova chiah hi a fa neih chhun pawh a ni mai thei e. Tichuan Chhuahzova chuan ka pa (Lalauva) leh ka ni chiah hi fa a nei a. Tichuan kei hi kan unau (mipa 4 zingah) zingah mipa naupangber ka ni a, chuvangin kan thlahtute chanchin theih ang tawka chhui hi ka tih ve tur niin ka hre ta tlat mai a.

Thangzachhinga (Vanapa) hian fapa 3; Vanchiauva, Lianchungnunga, Ralduha a nei a. Liangchungnunga hian fa a nei lo an ti. Vanchiauva hian fa Hranghleia leh Chawngpuithangi a nei a. Hranhleia'n Zumura leh Pastor Aikila a nei a. Pastor Aikila hian fa a nei lo an ti. Zumura hian fa Mamtuka, Engliana, Chawnglianchhinga a nei a.
Chawnglianchhinga hian fa a nei lo. Mamtuka hian fapa 4 a nei a, Engliana hian fapa 3 a nei.

Ka thil hriat chian chu ka Pu Chhuahzova hi a dam rei lova, ka pa naupangte a nih laiin a thi a, chuvangin ka pa chu Zumura inah a seilian a. Hetah hian thlah kal zel indawt danah chuan ka pa leh Zumura hi a stage in ang chiah mah se Zumura hi chu a upa fe zawk a.
Heti hian han sawi ta ila a fiah deuh mahna; Zumura chu Vanchiauva (Thangzachhinga fa upa ber) tupa a ni a. Lalauva (ka pa) chu Ralduha (Thangzachhinga fapa naupang ber) tupa a ni ve thung a.
Tichuan ka pa chu an inah seilianin Zumura fapa Mamtuka, Upa Engliana, Chawnglianchhinga te nen unau piang hmun ang chiahin an awm ta a ni. Hei hian keini chhungkaw hnih te pawh in enhranna emaw awm miah lovin, chhungkaw khata seilian ang maiin keini an tu an fate pawh hi kan inngaina nghal em em mai a ni.

Hetiang a lo nih tak avang hian Mamtuka te Upa Engliana te, Chawnglianchhinga te hi inthlah dan indawtah chuan kan stage in ang chiah mahse Ka pa Mamtuka, ka pa Enga, ka pa Chhinga tiin keini unau chuan kan ko ve ta mai a ni. Anni lahin fa ang chiahin min en bawk a.

Keipawh Aizawlah Zumura fa naupang ber Chawnglianchhinga inah kum 12 dawn ka awm a. Chawnglianchhinga hi ka pa tiin ka ko mai thin a, (a nihna takah chuan ka cousin a ni a) a chhan chu a chunga ka sawi tawh ang khian ka pa hi an ina seilianin unau ang chiaha awm ho an ni a (ka pa hi an pa tur a ni nan). Kum thu ah kan pa te rual an ni ve reng bawk a. Kei phei chu an fa ang chiahin min en a, achhan chu Chawnglianchhinga hian fa a neih lo va, ka pa hian; ka fapa hi inhnenah awm sela in fapa a ni ve mai, kei chu fapa ka ngah a lawm a lo ti a, chuvangin Ka Pa Chawnglianchhinga te nupa pawh hian ka chungah beisei lian tak an nei tih pawh ka hria. Min enkawl dan leh ka chunga an thatna zawng zawng hi ka dam chhungin ka rul seng lo ang. An mi hmangaihna mawlh mai hi a ropui ber chu a ni.

Keipawhin anni enkawl hi ka mawhphurhna a ni tih ka hria. Ka pian thar hnu hian ka ngaihtuahnaah pawh awm ngai lo, mumangah pawh ka manphan ngaih loh danin Rangon lamah te ka awm ta deuh deuh va. Burma pawh hi ka nu dam lohna avanga va let leh zawk, awm rei pawh tum lo kha ka ni a. Rawngbawlna te ka nei a, nupui te ka nei ta deuh deuh va, chutah tum lawk pawh awm lovin Pathian thu zirin Mandalay leh Rangonah lam ka lut ril ta deuh deuh va.

Mahse ka nu leh ka pa (Chawnglianchhinga te nupa) hi ka tawngtainaah ka theihnghilh ngai reng reng lo va. Anni pawh Piangthar tha em em mai an ni a, hetia ka piangthara rawngbawlna ka nei ve te chu an lawm zawk zawk em em a. Kawng leh lamah min mamawh viau mahse rawngbawla ka kal hi min duh sak em em a, min tawngtai sak thin a. Mahse keimah zawk hi vawiin ni thleng hian ka rilruah hian a awm renga, ka nupui pawh hian min hriatthiam pui em em a, ka pa Chhinga leh ka nu Hnuni te han enkawl phaka awm chu a chak ve em em a. Ka nupui hi Aizawlah tum 2 ka zinpui tawh a. Kan inneih hlim leh kan fanu kum 2 a nihin ka zinpui a. Ka fanu Lalhmangaihi hming hi Ka Pa (C.L.Chhinga) sak a ni.

(Ka Pa thlan lungah "Lalauva chawngthu, Vanapa tupa chu 25.3.94 hian Lalpa hnenah a chawl ta" tih a inziak.)
Ka pa 'Lalauva' hi Mizoram NE.khawdungsei atang Burma hi engtikah chiah nge a luh ka hre lo va. Mahse Kawlphai mizo zingah bel chhung hmasa ber pawl chu a ni ngei ang. Janpan ral laia thlawhna tla leh silver vel te zawngin bel (leh khuhhriang) te an chhung thin a ni. Ka nu Lalengi, Tahan venglai Presbyterian Upa Satliana fanu nen hian kum 1961 vel khan Tahan Missionveng biak inah an innei a. Ka nu te hi Champhai bul Ruantlang a tanga Tahana pem lut hi an ni.

Kan in hi Tahan bazar bul chiaha awm a ni a. Ka naupan tet lai hian Tahan Lal, bazar committee ho chuan Bazar area-a rin luh an tum a. Mi dang tam tak pawh an inhmun an chhuhsak nual a. Mahse ka pa hian tha hnem ngai taka a in leh lo lo din sa chu chti maia chhuahsan chu a tum hauh lo. Vanapa thlah a nih zia hi a inhre chiang em em a ni. Kan kawlram thuneitute lal thin dan chu kan hre awm e. Tichuan Lal ho chu inti thu nei takin an rawn kal ta a, kan compound chhungah chuan ka pa leh ka nu nuta te ho chu inring takin an lo ding thap mai. Ka nu nuta (ka pu te ho) hi khawlhring pachal pa rual tak leh huaisen tak an ni vek a.

Kawtthlerah chuan thlirtu mipui an ding khat tlat bawk a. Ka pa chuan a ngam ngamin ka compound chhung hi rawn rap rawh ule a ti ta chher chher mai a ni. Nakinah chuan an zinga pakhat chuan ramri chinah chuan hmawlh rawn khen bur a tum a, chu chu ka pa chuan a nam tlua mahse a khawih em lo. Tichuan Lal ho chu intilal tak thoin an court lama min khin dan tur ngaihtuah turin an kal ta a.

Khami nia ka pa kha khawvel pa zawng zawngah hian ka tan chuan pa nih a va han tling tak em! A fate mitah hian pa huaisen nih a tlinga, ka ngaisang lo thei lo. He Tahan bazar hmun chungchang sawi chuan vawiin ni thleng hian chhungkaw thenkhat rilru a la na vawng vawng zel zuk nia. Ka pa zawng a huaisen zarah vawiin ni thlengin kan in leh lo tih tur keini a fate hian kan neih ve phah a. Kan chhungkaw tan chuan a ni tluka Nopui dawm tlak an awm bil lo.

Hemiin a nghawng hi kan chhungkua chuan sum leh paiah te nen nasa takin kan tuar a. A chhan chu Lal ho hian ka pa chu Court-ah an khing ta a, tichuan ukil te rawih a lo ngai a, court kal reng a lo ngai bawk a. Tin chi hrang hrangin ka pa hi an hek zui a, Mizoram mi a ni a, MNF underground ho tanpui thintu leh chaw pe thintu a ni ti tein an hek a. Court lah hian thu a titlu mai duh thin si lova, sum leh pai a inseng nasa hman em em a ni. Mahse hun a lo rei chuan Lal ho hi court-ah an kal ngai ta lova, a tawpah chuan ka pa hian thiam a chang ta a ni.

Mizoramah lehkha zirturin 1985 kumtir teah ka pain ka u Kima nen min hruai a. Chumi hnu lama Mizoram lama unaute tlawha a rawn zin changa Mizoram miten nangni Burma mi tia hmusitna tawngka te pawh a lo dawng ve ni ngei tur a ni. Tum khat chu kan chaw ei laiin a sawi a, a office lennaah mi pakhatin Burma mi tiin a lo hmusit deuh a ni awm a. Office chhungah chuan ring tawk takin ka hau tak hrep kha, a ti a, he Mizoram tan hian kei leh ka pu te hian thisen chhuah pawh huamin kan lo thawk ngai a sin, nang enge sawi tur i neih ve a. A hunlaia MNF vanga Burma mizo ten kan tuarnate hi hnawmhneah i ngai em ni? tiin, a thiltawn chu a sawi a. He mi tum hian ka pa hi kum upa lam a ni ve tawh a, an lo chhanglet duh lem lo va, a sawi chhawn lai pawh chuan ka lo inthlahrung ang reng zawk khawp a.

Kan unau hi mipa 4 hmeichhia 2 kan ni a. Ka u Chawngthanmawia, Tahan hian fapa 2 a nei a, a upa zawk chu ka pain a hming a sa a, ka pu Chhuahzova hriat reng nan Thangchhuahzova tiin a sa a ni. Ka u Tharzuala (fam) hian fapa 1 a nei a, a hming chu Rodinliana a ni. Ka u Lawmkima, Aizawl hian fapa 3 a nei. Kei (C. Lalawmpuia, Yangon) hian fanu 2 ka nei a, Angeline (kum 9), leh Dorothy (fam)te an ni.##

Ka genogram hi ka blog-a dah that ka duh ve si, lian fiah tha taka dah theih turin paint-ah ka luhpui fuh hlei thei lo va, ka thianpa Pastor Suia'n min siam sak hlauh mai a ka lawm hle mai.

Vawiin (17,8,2010) hian he ka thu ziak hi ka chhiar a, fapa ka neih hma a mi a nih avangin ka fapa chanchin a tel lova, ka ziah belh leh ta a ni. Ka fapa Morgan Chawngchhingpui Lalau hi date 4 Feb. 2010 tlai dar 4pm khan Rangon Insein damdawi inah a piang a, pound 7.10 rit a ni. A hming ka sak chhan chu ama  chanchin kaziahnaah chiang takin ka ziak lang.

Vawiin (21.Feb.2014) hian ka chhiar leh a, ka fapa te zawk David Lalhlimpuia Lalau chu 18.2.2012-ah Rangonah a piang. Thla 11 a nihin a kal thei a. A kal theih veleh pen thum pawh a la pen that theih hmain a hmaah ball ka dah a, a lo pet zel a, a mak khawp mai. Vawiin ni thleng hian ball hi a lawm em em a, thil mum tawh phawt chu ball a ti vek a. Anhling rah chen hian ball a ti a, pet a tum zel mai a ni.(Edited)

Mizotawng

Inpumkhatna lam hawi kan sawi a pianga thil pawimawh tak kan sawi tel fo thin chu Tawng (common language) chungchang hi a ni a. Amaherawh chu ngaihdan hrang leh hmuh dan hrang nei kan nih thin a vangin thu tlukna mumal awm lo vin kan tawp san leh mai thin a. Mahni hmasialna neih hi mihring nunah thil mak vak pawh a ni lo va, hemi a vang pawh hian a ni mahna kan hnam pum pui tan kan zinga mi eng tawng ber hi nge common language atan hmang (promote) ila tha ang tiin kan ngaihtuah tha duh vak thin lo pawh a ni mahna.

Zo hnahthlak Paite, Lai, Hmar, Lusei, Mara..etc zawng zawng khai khawm nan Mizo kan inti a.

Lai tawng, Hmar tawng, Lusei (or duhlian) tawng, Ralte tawng.. etc nei hrang thliah mah ila kan vaia kan hman tlan atan tawng hman bik neih kan mamawh a, heng kan tawng hrang hrang zing ami hi thlang chhuak ila, a hming tur pawh a hranpa ngatin kan phuah ang a.

Tichuan kan tawng hman (Common language) chu a hming a tan Mizotawng ti mai ila (Eg. a nih loh pawhin "Phungpui" tiin a hming pawh phuah ila a theih vek), tunah hian official taka kan hnam pumina kan nem ngheh tlan fak chu awm hrih lo mah se, Kan zinga mi eng tawng ber emaw pawh hi lo thlang chhuak ila, a hming atan chuan (Phungpui tih ai chuan) Mizotawng tih mai hi a tha ka ti.

Kan history kan en letin leh tuna Mizoram state-in a hman mek atang te, kan hnam pum pui huapa kan thlir pawhin tuna kan hman mek mi tam takin duhlian tawng an tih fo hi, Common language-ah kan pawm tlang a nih chuan duhlian tawng or Lusei tawng ti ti tawh lo vin, Mizote common language a nihna anga ngaiin Mizotawng tiin a hming thar hi i pawm tlang mai ang u.

He Mizotawng hi a hranpa ngat a ni a, mahse a lo zik chhuahna chu Duhlian tawng ni tho mah se Duhlian tawng ngial ngat pawh a ni lo va, hnam bil tawng a ni lo ve tiin hrilhfiah ta zel bawk ila. Mizo tawng tiin kan lo sawi ri fo tawh a, chuvangin a thar a ni lo i ti a ni mai thei e. Mahse President thar an thlang a, an thlan thar chu nikuma mi tho kha ni mah sela, thlan thar a nih miau avangin a thar ang chiaha lawm luh leh lak a nih ang hi, a ni vel e.
Tichuan a ziak danah pawh hming (noun) a lo nih takah chuan ziak zawm ta ila - "Mizotawng" tiin.

Vawiin ni hian lei leh van a mi zawng zawngte hriatah "Mizotawng" hi Zo hnahthlak zawng zawngte Vantlang(Common language) tawng (National language) hming atan ka puang e. A duh zawng chuan min tawmpuiin min hmanpui nghal turin zo hnahthlak u leh nau zawngte ka sawm e. Lalber zungbun nen han nemngheh nghal ka va chak tak em!! Mahse a pawi love, thinlunga nemngheh hi sulrul leh tuiekin a ei chhe thei lo ang bawkin politics leh sum leh paiin a ei chhe thei bik hlei lawng nge.

NB. Mizo tawng tih leh Mizotawng tih hi a ziah dan a in ang lo ang bawkin hriat pawlh lo ila. Phungpui tih khi chu ka sawi tum kan hriatfiah theih nan mai a ni e.

Khampat Bungpui

Vawiin chu khampat bungpui hla ka ngai thlaa, ka blog-a post tur a thlalak thar engtin nge ka neih theih ang aw tiin ka ngaihtuah a, thlalak ka enlawr duat duata ka thianpa (kei ai a naupang fe a) thlalak hi ka hmu fuh hlauh maia, chutah Khampat bungpui humhalhna Dr. PC. Biaksiama hova hmalakna kha engtin nge ni ta zel le tiin ka ngaihtuah zui vang vanga.
Thlalak hi April 2008 -a lak a ni.
Khampat bungpui hi vawi 3 chu ka tlawh ve tawh a. Tum khat chu kum 1997 chawhma lam kha a ni a, 'Perhthlak Hmui Ziah' tih film kan buatsaih laiin a hmunah hian film shooting kan nei a, ka nu min boral san hlim te a lo ni bawk nen lung a tileng hle mai.
Thlalaka a landan atang sawi mai ila, a hnung chiahah khuan Khampat lui lian tak mai a awm a, a lui ko (bung hnaih lam hi) pawh a sang hle a, a lehlam pang erawh chu phaizawl leilet in a champhei put tawh mai a ni. Thal lai hi chuan tui a tam ngai lo va, furah erawh tui pawh a tam thin hle a ni.

Hetianga Burma ram pawn atanga hnam ro humhalhna kawngah leh kan history-a thil pawimawh tak hmuh theiha kan la neih te humhalh duhna hi thil ropui tak a ni a, hmalatute pawh ka fak hle a ni. Mizoram pawh ram pawna awm ten an vei em em a, hetianga thil tha duhna vanga kan invei tawn pawh hi kan hnam tan thahnem kan ngaih tlan zia lantirtu pakhat a ni.
Ka naupan lai khan hmuh ve ka chak thin khawp mai a, hun a lo inher zela puitlin hnu chuan ka hmu ve ta nge nge a. Ka kal hmasak ber tum chuan Khampat atang hian thirsakawrin kan kal a, mel 3 vel chu a ni ve mai awm ma nge, ka chiangchiah lo. chutihlai chuan a bul velah thingkung dang leh hnim vel pawh a awm nual a, a vel chu leilet hmun a ni a.
Tun thlenga ka ngaihtuahna la em em tu chu Khampat khua leh Bungpui inkarah hian Kawl khaw te tak te pakhat a awm a. An khaw daiah chuan thir pipe chawnpuar tiat lenglawng hi a inphuma chuta tang chuan tui hi a rawn chik chhuak tur tur reng mai a ni. Thallai pawhin chu tui chu he khaw mite tlan ber a ni. kan pipute hun lai khan a awm tawh ang em aw? Helai hmun vel hi kan pipu te inbenbelna zawk tak kha a nih duh hmel si a. Japan ral hun laia an siam zawk nge ni dawn ni. Han chhuichian a chakawm hle mai, zawhna bak han sawi belh tur lah ka hre mawlh si lo. Kal leh hunte a la awm em ang chu maw.
Khampat bungpui hi tunhma deuh kha chuan enge maw changa mizo thenkhatin an va tlawh ve leh zeuh thin tih mai loh chu han uk saka, ngaihtuahna thar nena hmalakna a awm lem lo niin a lang. Kan rilruah erawh a thi lo va, a bul hnaia mi te tan lah ngaiha neih satliah ang vel mai niin ka hria a. Hetianga hmalakna thar Zoram lama atanga an rawn nei hi a lawmawm tak zet a ni.

Tunhma zawng kha chuan saw ti sawn kum tam tak ngawireng leh khawhar takin Mizo mipuite ngaihsak hun tur rinawm takin a lo nghak fan fan a, ngaihtuah chian chuan hnuk a tiulh rum rum thei a ni. Burma ramah kawl ho nekchepin kan awm a, India-ah lah chuan hnam dang kara chehral tham lek kan ni bawk si a. kan pipute khan theihtawpin chempui nen ram an lo humhalh a. Ziak leh chhiar an thiam ve tak tak hmain British ho Divide and rule policy chu kan lo tawng ve ta si a. Tunah zet chuan thil tha lo do chung zel si a intihchak tawnna leh tanrualna hi kan hnam damna tur a ni.
Kan chhehvel hnam dang an pawng thur thur lai leh ram zuana hma an lak lai hian ngaihtha taka kan uipui tuilian thlir mai mai chuan ni theia mawi lo hi kan hnam chungah a thleng thei reng a ni. Kawng hrang hranga tanruala hmathar laa mipuite chawkphura hma thar lak ve zel hi thilpawimawh tak niin alang ta. Mipui lampawhin hmathar latute kan tawiawm thiam hi a hlu tak zet a ni.

A hnuaia mi hi Timothy Z Zote ziak a ni a, Date a tarlan hi a dik leh dik loh ka hre chiah lova dik thawkhat turah ka ngai a, mahse Vanapa pian kum leh thih kum hi chu a tisual ni ngeiin a lang. (Shan rama bungpui chanchin hi ka lo la hre ngai lova).
IMPORTANT YEARS & EVENTS IN Zo (MANMASIAN) HISTORY
-Timothy Z. Zote
220 - 207 BC - Sinlung (China) settlement
200 - Migration From Sinlung (China)
298 - Shan (Myanmar) settlement

400 AD - Luopui Thiek Planted the famous Bungpui tree at the central part of Shan (Myanmar)
410 - Migration from Shan (Myanmar)
1203 - Hmars’ Migration to Mizoram
1250 - Ancestors planted Khampat Bung (Myanmar)
1264 - Takam Chakma and Hmar Guerilla war.
1500-1600 - Sattlement at Lentlang.
1700 - The Hmars had settled down in Assam well before this time.
1700-1750 - The Luseis migrated en masse from Upper region
1765 - Lusei Chief Sibuta and Lalsavunga borned.
1770-1780 - The Raltes migrated en masse. Mizo Warrior Vanapa born
1780 - Hmar’s Migration to Manipur
1782 - Zo hero Vanapa died.

Rome mi nihna: The Dalai Lama

Feb. 9, 09 khan Dalai Lama chu honorary citizen of Rome nihna pek a ni. He mi chungchangah hian China sorkar chu a lawm lo hle. Kum 2006 khan Honorary Citizenship of Canada pawh pek a ni. Tibet miten mahnia ro an inrel ve theih nan a dam chhung zawnga tharum thawh lova zalenna sual chhunzawm zel a tum thu a puang nawn leh a ni.
Kan kawl rama kan hotunu pawh hi tharum thawh lova sualtu leh England atanga rawn luhchilh raptu a ni a. Heng tibet ho ang tho hian China sorkar hi chuan kan ram hi chu a ei chhia a ni e. Kawl ram sorkar lahin khawvel mite laka inhumhim nan tak a hmang bawk si a. Thiam takin kawlram thau hi a sawk heuh heuh mai a ni. Ram chhungah company tam tak leh dawr lian tak tak hi China ho ta a ni deuh vek mai a ni.

Dalai Lama hian Chawimawina award chi hrang hrang 84 chuang Doctorate degrees te, Nobel peace prize te leh chawimawina zahawm tak leh hlu tak a dawng teuh va, heng a nihna title te hi a hming tawpah ziak dawn ila lehkha puan a hek duh hle ang.

Kim chang zawkin www.zoin.info ah chhiar tur a awm.

Mahal kita

Nula tlangval ten kan duh zawng tak, kan ngaihzawn ruk em emte hlan kan chak thin em em chu “Ka hmangaih che” tih hi a ni a. Mahse a thu hi a ril em a vang leh beisei loh zawk chhanletna dawn mai hlauh vanga chhamchhuak ngam lo (tlangval sek pui pui)-te pawh awm theih a ni a.

Kan nu leh pa te zingah pawh hia hmangaih thu inhlan fo hi an tlem hlein ka ring. Kan pipu te hunah phei kha chuan a vang viau mai thei. Nulat tlangval laia an inhlan kha an la ring ngar ngar a ni mai thei e. A lo dawngtu nupui/pasal tan thu huatthlala tak a ni dawn lo tih chu a chiang sa ropui si a maw.

Mihringte thinlungah hian ka Hmangaih che tih tluka lungrun thlak leh thinlung khawih thei thu mal a vang viau awm e. Chuvangin khawvela mi chi hrang hrangte pawhin Ka hmangaih che tih chu mahni tawngin kan lo nei ve thliah a:

Afrikaans - Ek het jou lief
Cantonese - Ngo oiy ney a
Chinese/ Mandarin - Wo ai ni
Dutch - Ik hou van jou
English - I love you
French - Je t'aime, Je t'adore
German - Ich liebe dich
Greek - S'agapo
Hawaiian - Aloha wau ia oi
Hebrew - Ani ohev otah (to female), Ani ohev et otha (to male)
Hindi - Hum Tumhe Pyar Karte hai
Italian - Ti amo
Japanese - Aishiteru
Korea - Sarang Heyo
Latin - Te amo
Malay - Saya cintakan mu / Aku cinta padamu
Mizo - Ka hmangaih che
Philippines - Mahal kita
Portuguese - Amo-te *Latin tawng nen a in ang hle mai.
Russia - Ya tebya liubliu
Swedish - Jag alskar dig
Spanish - Te quiero / Te amo *Latin tawng nen in ang
Thai - Chan rak khun (to male), Phom rak khun (to female)
Vietneamese - Anh ye^u em (to female), Em ye^ anh (to male)

Sign Language - ,\,,/ (represents position of fingers when signing 'I Love You'

Valentine's Day

Love is composed of a single soul inhabiting two bodies- Aristotle.

V' Day a lo thlen tawh hi chuan 1998 kum kha ka hre chhuak ve ziah thin. Valentine's day (ni) ngeia a lo hmuh ngei turin Feb 13-ah phur em em-in ka present tur kha Mandalay rel station-ah ka va kal pui a. Rangon lamah chuan ka thawn ta vang vang mai a, ka beisei ang ngeiin a ni ngeiah chuan a lo dawng a, a lawm der thiam em em mai a, kha mi ni leh kha thil khan vawiin ni thlengin kan pahnihin min la tihlim thin a, he ni a lo thlen hi chuan kan hre chhuak lo thei lo va, kan sawi chhuak ngei thin bawk a, lawmna leh hlimna thar chu min pe ve thin a nih hi. Nichin dar kar 4 kal ta maiah khan kan in chat-a 1998 V' Day kha kan sawi chhuak leh nge nge a.

Ka awmna hmun atang V' Day present inthawn a harsa ta hrih si a, email -in ka hmangaihna thu tawi te ka thawn a, hmangnaihna Rose par sen mawi tak ka attach hram bawk a. A ni chuan ti hiam a ti a, "Thil dang engmah ka phut lo va che i hmangaihna min hlan hi ka tan chuan a hlu ber a ni," tiin.

Keini ringtute tan chuan ni tin mai hi Hmangaihna ni a lo ni e.

Australia Ram Kang

Australia ram kang hi rin ai a nasa hle mai. Thal va ek char kan tih ang mai khaw lum rum rut, a lum lam pawh degree 45 C. chuang lai mai a ni a, phul hnim hring leh luang hnimhnah te pawh an ro tlawk tlawknaa kangmei chhuak chu thli natak mai darkar khata Km 100 (60 mile/h) lai chak chuan a chhem alh puat puata Australia chhim lama Victoria state leh New South Wales ram zau tak mai chungah chuan chap pui kangin van boruak sang tak thlengin par a chhuanga, meikhu chhah tak mai chu vanpui a chim ta emaw tih turin a rawn pang aw inzial tup tup mai a ni. Nungcha an bu zawla awmte leh in sa sengtura chakna nei chham tak tak te chuan boruak hip tur nei lovin leh kangmei nasa tak a vanga dang ro huam huamin nunna an chan a. In sasengna tura tha nei tha leh a tlan chak deuhte pawhin kawng dik lo zawhin kang mei laka tlan chhuah tum kha, tlangkang zau tak chuan a lo hual pup mai si.
Australia ram chungah chuan romei zam lovin sen mei khu a zam phui chuk a, meizap pawh a leng chum chum ngei ang le. Mipuite an chiai nasa hle a, mahni in leh lo hlu tak mai ven him hram hram duhte pawh an nunna chhan him nan tlanchhiat a ngai si a ni. Mei sipai a sang a sang telin hnuai lam atang leh chunglam atang Helicopter nen mei kang zau zel tur thelhin leh nunna chhan chhanchhuah ngai an awm em tiin nasa takin tan an la bawk a. He kangmei hi a nasain a zau em em mai a, ram 3000 Sq/Km lai kang chhia a ni.

Australiaah hian tun hma pawhin nasa takin ram hi a lo kang fo tawh reng a. Tun tum kang mei chhuak hi kum 110 chhunga Victoria state-a kangmei laka chhiatna rapthlak ber a ni a. He kangmei avanga thi hi hriat theih mi 173 an tling tawha, mi 200 ai tam thi an awm rin a ni. Chenna in leh lo pawh 1000 dawn lai kang chhia rin a ni.

Victoria Police Deputy Commissioner chuan he kangmei hi natural causes vanga kang a nih a rin loh thu leh mi tuten emaw an hal a nih ngei a rin thu a sawi a. The premier of South Australia state Mike Rann chuan kang mei 20% hi Arsonists (hel ho) tih a nih a ring a, a dang 20% hi chu mi tladah (nikhua lo) ho vang a nih a rin thu a sawi. He kang mei rap thlak tak hi mi tam tak chuan Arsonist (terrorist)-ho tih a nih an ring a. Mike Rann chuan Arsonists terrorist ho lakah hian kan inralring reng a ngaia, enthlak reng an ngai a ni a ti.
Khua a lum hle a, Feb. 7,09 khan khaw lum lam hi 47 celsius a thleng hial a, mi thiamte chuan Australiaah hian global warming sang zel vang leh mihring pung chho zelah hian tun atanga kum 20-ah khawlum sang chho zel turin leh ram kang pawh nasa zawk turin an ngai a ni.

He kangmei avang hian in leh lo 1000 dawn lai a kang chhia a, nungcha chhiarsen lohten nunna an chan bawk a ni.

Source: worldnews
newsday.com,
www.startribune.com
http://article.wn.com/view/2009/02/10/Australia_fears_more_than_200_dead_in_bushfires_1/

Butterfly man

He pic hi a mak ve em a (Internet kawngsira ka chhar ve mai mai), hmanah kawlthei hnah ar-mawnghawlha chang tur ni awm tak hi ka hmu tawh.

Ninhlei post vel mai mai a ni e

Ninhlei vel mai mai teh ang zanin chu. Tun hma deuh kha chuan Pheikhawk hrui suih dan ler deuh te kha kan tikual vel ve a.





























Titanic ve vel a leee!

Heti hian ka han ngaihtuah chhin a.

Nakinah chuan Kawlram sorkar inawpna te a lo la tha ve anga, chutih hunah chuan tuna kawlphai mizotena kan luah ram Kalay Kabaw phaizawl nuam tak hi Zoram lama kan unaute bazarna leh thlenin a la ni anga. Bangkok leh China ram lama indawr duhte tan pawh Calcutta lam atanga kal ai chuan a hnai zawkin a samkhai zawk anga, kawlram leilung hausakna leh remchanna chu Zoramlamah nasa zawkin a la luang lut anga. Silchar kawng pin vela buaina pawh a nep phah ngei ang.

Zoram atang a tam thei ang ber an lo la zin anga. Thil chiang sa em em chu Tiau ral an rawn kai chiah atangin an rilru ngaihtuahna chu kan pipute hunah khan hruaikirin a awm anga. Rih dil an hmuh chuan tu hrilh leh chhawn ngai lovin rilruin kan history a chhuikir anga, chutah ni chhuahna lam chu thlirin Lentlang chu thlen thuai thuai an chak tawh ang. Tichuan Lentlang lam pana an kal laiin “a saw ral tiang lentu….mi ngeng pasal tha lung tilengtu buannel ram dai lungdumtu,” tichung zelin Lentlang an han thleng anga, ngaihtuahna mit atang mai lo chuan kan pi pute sulhnu leh hnuhma hmuh thiam chu har an ti ve deuh ngei ang. Chutah rei chawl lovin Han khawpui leh Khampat bungpui mawlh chuan an rilru ngaihtuahna chu a thum rawn tluk tluk anga. Run lui an zawhkai lai chuan bei nge sei rundung tichung zelin Runlui atang chuan chho zawng hlirin an inkhalh chho anga, nakinah chuan Thantlang an han chuankai meuh chuan boruak a lo vawt var mai ang, phulrai nuam tak chung atang chuan khua an han chuan anga, Mizoram lam an hanthlir let anga, ral hla taka Lengteng leh phawngpui tlangte chu thlirin Aizawl lama bialnu leh bialpa te pawh mitthlaah an rawn lang chuai chuai anga. Chutah ni chhuahna lam an han thlir thla leh vang vanga Tahan leh khampat phaizawl chu khawilai vel ber khu nge ni ang tiin an han inrin siak vel anga. Hriat loh chhungin chutlangsang boruak leh thli vawt var mai chuan an heh a lo chhem ro anga, an nui thi deuh seng seng tawh mai dawn a ni. Chutah a thlang lawk hnim buk kar atang chuan sebawng thi inthen ri rawl rawl chu an han hria anga, Liandova te unau thawnthu pawh an hrechhuak rum rum mahna. An bul vel chu an han en anga Chhawkhlei par sen mawi em em mai chu thla an lakpui mawlh mawlh tawh mai ang. Tichuan chhuk zawng hlirin Tahan chu an pan thla anga, kan pipute khan Khampat atang he tlangsang tak mai an rawn lawn kaia, Lentlang, leh Tiau ral Mizoram a then phei chu Bangladesh thleng thlenga thlawh hma an loh zauh zel mai hi a va lo ropui em! Zohnah thlakte kan luah ram zau tak min lo valh sak kuau mai a nitih ngaihtuah thleng pha tan chuan, lungrual taka kan pipute lo khawsa ho dial dial turte ngaihtuahin lung a lenga hnuk lam lam pawh a ulh ve mahna.

Ei bar zawnna leh inpawh tawnnain kan nun a nghawng theih dan tur lamah han lut mai ila, eizawnna nasa zawkin kan inshare tawn anga, kan sum vei vak pawh keimah ni leh keimahni inkarah a veitawn nasa zawk anga, kan market a lo zauh sawt anga, kan zaithiam leh infiammi te tan sumhailuhna tihpun a ni anga. A thlum a al ei za thin kan nih ang leh khawvel changkannain a kentel a nih ang bawkin hmasawnna leh remchanna chuan thil tha tam tak min pek ang bawkin thiltha lo pawh a kengtel ngei ang le.
Hmanah Pathian bawm an zawn ang khan Zoram lama unauten kawlramah harhna ropui an rawn zawn lut anga. Mizoram-a camping ropui ber buatsaihtu El-bethel speaker chu kawlram zafaten an rawn thehchhuah angin, chutih hunah chuan Zoram atang speaker ropui leh missionaryte an rawn feh chhuak ve thung anga. Milem biakna ramah Pathian ram pawh zauhin a awm phah ngei ang.

Siahthing zarah zoawi lelte kha Khampat bungpui zarah a rawn kiu veng veng tawh anga, thu leh hlain kan inawi tawn tawh anga. Communication lam a that na na na chuan khual khuaa hmuh ngai loh unaute ai chuan kan in-unauna pawh siam tharin a awm zawk anga. Ka iptepui banna te an nih hi kan intitawn tawh zawk ang. Hmanah Zodi, Vulmawi, Zorock leh T. Melody ten Zoramah perhkhuang tingtang nen lam an thai ang mai khan, Zoram lam lanu val rual zai thiam tak tak leh music thiam tak takten tour an rawn nei thin tawh anga. YZTP Sweet December-ah pawh zohnah thlak zaithiam leh model pawh kan kim tawh zawk ngei ang.

Sport lam mawlh mai hi kawlphai zofate zingah hian promote theih hun a nghahhlelawm mange. Hmanah chuan K. Kawla te, (MAP leh PHE foot players zing ami an hming ka sawi mai thei ta lo), Tlangsiama te, Chalchungnunga te, Pahnianga te, Zoramthanga te, thu leh hlaah B. Lalthangliana ten Zoramah than lai an hawl ang khan, Zoram lanu val rual thangthar sport tithei tak takten khawphai zofate min rawn hrual ve tawh thung ang a. Talent nei tha tak tak ten eizawn nan an lo hman theih phah anga, Asia games leh Olympic velah pawh zofate kan invawrh sang chho ve zel theiin a rinawm.

Myanmar Zofate tana Vartian (Chhunzawmna)

Kan thupui ziaktuin a rawn tuihnih lehna ka rawn suan phei leh dawrh mai.

Kum 2002-a kawlphaia Lusei (Mizo) awm zat khi, Lah Wah Kah (Custom) lam atanga an chhui dan a ni a. 1993 bawr vela National Registration Card siam lai khan, inzawhchianna awm lem lova, hnam hming ziah/ ziah sak mai an tam hle nia hriat a ni a. Tin, hlauhna vang emaw, intihthaihna vang emaw, fimkhur vang emawa, Lusei ( Mizo ) inti ngam lo te pawh an awm nia hriat a ni leh zel a.

Tunah pawh politics lam hawi zawnga pawl siam a la awm lova. Dec. 13, 2008 ah khan Khampatah thahnemngai zualte inhmuhkhawmna an nei a. Tahan, Varpui, Phulmawi, Hmuntha, Satawm, Sanmyo, Pinkhonelay, Myohla, Tuivar, Letpanchhaung, Changel zawl atang te Khampat, Kanan, Zohmun, Haizawl, leh Tamu atang te kalkhawm an ni a. Pali 96 lai an ni awm a. An thu a rualin an phur tlang hle a ni awm e. Engpawhnise, ka tarlan ang khan, Myanmar rama hnampui 100 chuang zinga hnam 30 thlanchhuaha kan tel ve hrim hrim kha, ngaihthlak leh hriat a nuam hranpa ve hrim hrim ka ti a, beisei tur pawh awmin a lang a ni.

A hnuai ami hi Pu Zawma rawn tuihnihna a ni a, beng tivartu atan ka rawn copy and paste leh tawp e.
Kawlram sorkarin Chin thlah chi hrang hrangte a record dan chu he tiang hi a ni.

Chin comprises (53) different ethnic groups.
(1) Chin
(2) Methei (Kathe)
(3) Saline
(4) Ka-Lin-Kaw (Lushay)
(5) Khami
(6) Awa Khami
(7) Khawno
(8) Kaungso
(9) Kaung Saing Chin
(10) Kwelshin
(11) Kwangli (Sim)
(12) Gunte (Lyente)
(13) Gwete
(14) Ngorn
(15) Zizan
(16) Sentang
(17) Saing Zan
(18) Za-How
(19) Zotung
(20) Zo-pe
(21) Zo
(22) Zahnyet (Zanniet)
(23) Tapong
(24) Tiddim (Hai-Dim)
(25) Tay-Zan
(26) Taishon
(27) Thado
(28) Torr
(29) Dim
(30) Dai (Yindu)
(31) Naga
(32) Tanghkul
(33) Malin
(34) Panun
(35) Magun
(36) Matu
(37) Miram (Mara)
(38) Mi-er
(39) Mgan
(40) Lushei (Lushay)
(41) Laymyo
(42) Lyente
(43) Lawhtu
(44) Lai
(45) Laizao
(46) Wakim (Mro)
(47) Hualngo
(48) Anu
(49) Anun
(50) Oo-Pu
(51) Lhinbu
(52) Asho (Plain)
(53) Rongtu

A chunga kan tarlan takte khi Burma ram chunga cheng Zofa (Chin) chi peng hrang hrangte chu kan ni.

A thu lakna (Source): Political Situation of the Union of Myanmar and Its Role in the Region
April 2004 ( 28th Edition, Revised and Update ). Page 160.

Myanmar Zofate tana Vartian

By: Kpa

Myanmar Zofate tana vartian han ti ila, kan sawi sual ang em maw chu!

Sawrkar-in Ram Dan a zam dawn khan National Convention a nei hmasa a. National Convention ah chun, convention atana an duan, innghahna 104 chu Ram Dan Bul siamna innghahna atan an pawm a. Dan hrilhfiahna phek 3 leh 4 naah chuan, ' Hnam inlungrualna kehchhiat loh,' ' non-disintegration of National solidarity' hrilhfiahna a awm a; tiang hian:
He ramah hian, hman hman kum sang tam atang tawh khan hnam hrang hrangte chuan, a nuamah leh a hrehawmah pawh lungrual takin, kut insuih tawnin kan lo awm dun tawh a. Heng hnam Kachin, Kayah, Kayin, Chin, Bama, Mon, Rakhine, Shan te telin, hnam hrang hrang 100 chuang chuan, inlungrual takin, hmelma beihnaah te, ram leh hnam hmasawn changkanna lamah te tan an lo la dun tawh thin a. Tunah pawh chu inlungrualna chu ram tan a pawimawh ber te zinga mi a la ni fo a.
Kum 2002 January ni 1a, kan ram chhunga hnam hrang hrang 100 chuang zinga mihring singkhat (10000) chuang hnamte chu;

1. Bama 34816681
2. Kayin 3420676
3. Shan 2525652
4. Rakhine 2064519
5. Mon 1386422
6. Chin 907585
7. Pa O 666967
8. Kachin 575884
9. Palaung 368081
10. Wah 321892
11. Danu 228444
12. Laahu 203920
13. Lishu 170794
14. Kukang 161685
15. Inta 139838
16. Naga 117021
17. Akha 115084
18. Kayah 98343
19. Kakam 93054
20. Mro 42492
21. Taungyu 42240
22. Khumi 29950
23. Kadu 29267
24. Lusei 19724
25. Kayaw 18602
26. Dainet 16665
27. Kanaan 15959
28. Gon (Khun) 14813
29. Yinbaw 14680
30. Gebaa 13260 te an ni. Mro leh Khumi hi hnamkhata ngai pawh an awm.

Kum 2005 Nov. 5 a, Bagan khaw hluia state leh region hrang hrang atanga kal khawm thalaite chuan sawihona an nei a. Sagaing Region atanga thalai, Ma Kyawh Yin Win-i chuan, ' Kan Region chu a zau a, tlang leh lui tamna hmun a ni a. Divison 8, Township 37 a insiamin mihring 5945000 kan cheng a, a ram zau lam chu 36535 Sqr Mile a ni a. Chuta cheng hanmte chu Kachin, Naga, Lusei, Kadu, Kanaan, Shan hnam hrang hrang kan ni.' a ti a.

May 15 2008 a Sawrkar thuchhaukah chuan, a rampum mihring chu 57504368 kan nih thu a chuang a.

Tichuan 2008 May 29 ah chuan Ram Dan zam chu mipuiin ( Vote pe thei zawng zawng 98.12% in vote an pe a, 92.48%in tha an ti) an duh tlan avangin, Dan atan Chairman, Senior General Than Shwe chuan a puang a.

Kan ram Dan ziahna Bu, ( Constitution of the Republic of the Union of Myanmar 2008 ) phek 58 naa ' Formation of the Region Hluttaw or the State Hluttaw' hnuaia No. 161. (b) naah chuan, ' Region chhunga ' Self- Administered Area' hmu lo hnam dang; a ram pum mipuia 0.1% tling te chuan Region Palai an nei thei' tih a chuang a.

Tichuan, Sagaing Region-a tuan leh manga cheng hnamte zinga hnam Lusei ( Mizo ) te tan chuan kawl a eng tan dawn a ang a. Amaherawhchu, a ram pum mihring zawng zawnga 0.1% ni tur chuan mi singnga leh sangsarih chuang (57000) nih a ngai a. Eng nge an an zel dawn tih chu sawi a har a. Kan sawi theih awmchhun chu, ' A ram chhunga hnam lian 100 thlanchhuah zingah a tel ve e.' tih hi a ni.

(He thu hi zonun groupmail a mi lak chhawn a ni).

Hun ka nei lo em a, ngaihdan tlemte chauh han belh ve ila. Tuna a lan ang khian Lusei chu sing hnih pawh kan tling lova, he data hi engtin an lakkhawm ka hre lo va, ka rin dan mai chuan Burma ram mi nihna identity card-a inregister-na atang a nih ka ring a. Ka ID-ah hian Chin tiin ka inregister-a, khatih lai khan Lusei tiin an inregister tih pawh ka hre bawk lova. Ka sawi duh chu Lusei nisi keimah ang bawka inregister hi an tamin ka ring. Tunah hian Lusei (Mizo)-a inregister duh hi mi sing hnih ai chuan kan tam vein ka ring. Tikha ni phawt teh se.

Without You (chhunzawmna)

Without truth, no healing;
Without forgiveness, no future;
Without you, ..........;

Hmanlai hian vathu nupa hi an awm a, an hlim dun thei em em a.

Tuk khat chu a pa zawk chu chaw zawngin a thang chhuak ta vang vang mai a, chutia chaw zawnga a thang chhuah hlan chuan a nu zawk chuan thian thar a lo chhar ve a. A thian thar nen chuan an ti ti a, a lunglen thu leh a pasal ngaia a khawharna chu a thian thar hnenah chuan a hrilh keuh keuh va. A thian pawh chuan a din hmun chu a hriat thiam pui em em a, fiamthu te nen hlim takin a kawm ve a. Ni a lo tlang san meuh chuan lunglen leh khawhar reng hre tawh lovin a thian thar nen chuan an inchhaih zar zar mai a, nakinah chuan thlifimte dawng dun turin an thlawk chhuak dun ta rial rial mai a.

Tlaiah chuan vathu pa chu a rawn haw ta a, mahse vathu nu chu a lo awm si lova, an bu zawlah te chuan sava hmul danglam tak a hmu ta, tichuan ngaihtha lo vin a indawmkun ta reng mai a. Chutihlai chuan vathu nu chu a rawn thlawk haw ve ta a. Engmah thil thleng awm lo ang maiin hlim takin a rawn ti ti a, khawiah nge I vah bo deih le tia zawhna pawh chu chhang tha fumfe lovin a pha mar a, an pa a ngaihthu leh a thlakhlel zia chu a sawi zeih a, mahse a mitmeng erawh hnuai deuh hian a hriat a.

Chutah a pa zawk chu a rilru rinhlelhnain a luah khat tan ta a. Sava hmul danglam tak a hmuhte chu han zawh chian a chak a, a awm loh chhungin tu nen nge an lo inkawm tihte chu hriat a chaka, zawh a chak a, mahse a rinhlelh ang ngeiin chhanna a dawng ang tih a hlau tlat lawi bawk si, a hmangaih em a vangin sava dang nen an lo awm tlang a ni tia chhanna a dawn vaih chuan a rilru a na dawn lutuk a. chuvangin zawhna pawh siam ngam lovin, sava hmulte pawh chu a thukru ta zawk a.

Nupa in hmangaih tak thin karah pawh dawt a tlak zep tawh chuan chu chuan natna a thlen a. Thu dik puan chhuaha a awm hunin ngaihdamna a awm si loh chuan hmalam hun chu a va thim dawn tak em!

Nupui uire chingte hian an pasalte rilru engtiang chiahin hliam ang maw! An taksa zawng kawl ringawt mahse an rilru an thinlung an hnenah a awm tawh siloh chuan inneihna chuan awm zia a nei dawn a mi. Kan taksa te hian biak in lam chu a pan ve fo va... Krista mo kan ni a, A hmangaihna lak ata vak bovin rilru na taka siamin uire san thin mah ila inchhira kan inlamlet hun thlirin min ngaidam duh renga, a ngaihdamna tel lo chuan hmalam hunah beiseina reng a awm lo.

Pathian min hmangaihna a va ropui tak em!