Thlalak hi April 2008 -a lak a ni.
Khampat bungpui hi vawi 3 chu ka tlawh ve tawh a. Tum khat chu kum 1997 chawhma lam kha a ni a, 'Perhthlak Hmui Ziah' tih film kan buatsaih laiin a hmunah hian film shooting kan nei a, ka nu min boral san hlim te a lo ni bawk nen lung a tileng hle mai.Thlalaka a landan atang sawi mai ila, a hnung chiahah khuan Khampat lui lian tak mai a awm a, a lui ko (bung hnaih lam hi) pawh a sang hle a, a lehlam pang erawh chu phaizawl leilet in a champhei put tawh mai a ni. Thal lai hi chuan tui a tam ngai lo va, furah erawh tui pawh a tam thin hle a ni.
Hetianga Burma ram pawn atanga hnam ro humhalhna kawngah leh kan history-a thil pawimawh tak hmuh theiha kan la neih te humhalh duhna hi thil ropui tak a ni a, hmalatute pawh ka fak hle a ni. Mizoram pawh ram pawna awm ten an vei em em a, hetianga thil tha duhna vanga kan invei tawn pawh hi kan hnam tan thahnem kan ngaih tlan zia lantirtu pakhat a ni.
Ka naupan lai khan hmuh ve ka chak thin khawp mai a, hun a lo inher zela puitlin hnu chuan ka hmu ve ta nge nge a. Ka kal hmasak ber tum chuan Khampat atang hian thirsakawrin kan kal a, mel 3 vel chu a ni ve mai awm ma nge, ka chiangchiah lo. chutihlai chuan a bul velah thingkung dang leh hnim vel pawh a awm nual a, a vel chu leilet hmun a ni a.
Tun thlenga ka ngaihtuahna la em em tu chu Khampat khua leh Bungpui inkarah hian Kawl khaw te tak te pakhat a awm a. An khaw daiah chuan thir pipe chawnpuar tiat lenglawng hi a inphuma chuta tang chuan tui hi a rawn chik chhuak tur tur reng mai a ni. Thallai pawhin chu tui chu he khaw mite tlan ber a ni. kan pipute hun lai khan a awm tawh ang em aw? Helai hmun vel hi kan pipu te inbenbelna zawk tak kha a nih duh hmel si a. Japan ral hun laia an siam zawk nge ni dawn ni. Han chhuichian a chakawm hle mai, zawhna bak han sawi belh tur lah ka hre mawlh si lo. Kal leh hunte a la awm em ang chu maw.
Khampat bungpui hi tunhma deuh kha chuan enge maw changa mizo thenkhatin an va tlawh ve leh zeuh thin tih mai loh chu han uk saka, ngaihtuahna thar nena hmalakna a awm lem lo niin a lang. Kan rilruah erawh a thi lo va, a bul hnaia mi te tan lah ngaiha neih satliah ang vel mai niin ka hria a. Hetianga hmalakna thar Zoram lama atanga an rawn nei hi a lawmawm tak zet a ni.
Tunhma zawng kha chuan saw ti sawn kum tam tak ngawireng leh khawhar takin Mizo mipuite ngaihsak hun tur rinawm takin a lo nghak fan fan a, ngaihtuah chian chuan hnuk a tiulh rum rum thei a ni. Burma ramah kawl ho nekchepin kan awm a, India-ah lah chuan hnam dang kara chehral tham lek kan ni bawk si a. kan pipute khan theihtawpin chempui nen ram an lo humhalh a. Ziak leh chhiar an thiam ve tak tak hmain British ho Divide and rule policy chu kan lo tawng ve ta si a. Tunah zet chuan thil tha lo do chung zel si a intihchak tawnna leh tanrualna hi kan hnam damna tur a ni.
Kan chhehvel hnam dang an pawng thur thur lai leh ram zuana hma an lak lai hian ngaihtha taka kan uipui tuilian thlir mai mai chuan ni theia mawi lo hi kan hnam chungah a thleng thei reng a ni. Kawng hrang hranga tanruala hmathar laa mipuite chawkphura hma thar lak ve zel hi thilpawimawh tak niin alang ta. Mipui lampawhin hmathar latute kan tawiawm thiam hi a hlu tak zet a ni.
A hnuaia mi hi Timothy Z Zote ziak a ni a, Date a tarlan hi a dik leh dik loh ka hre chiah lova dik thawkhat turah ka ngai a, mahse Vanapa pian kum leh thih kum hi chu a tisual ni ngeiin a lang. (Shan rama bungpui chanchin hi ka lo la hre ngai lova).
IMPORTANT YEARS & EVENTS IN Zo (MANMASIAN) HISTORY
-Timothy Z. Zote
220 - 207 BC - Sinlung (China) settlement
200 - Migration From Sinlung (China)
298 - Shan (Myanmar) settlement
410 - Migration from Shan (Myanmar)
1203 - Hmars’ Migration to Mizoram
1250 - Ancestors planted Khampat Bung (Myanmar)
1264 - Takam Chakma and Hmar Guerilla war.
1500-1600 - Sattlement at Lentlang.
1700 - The Hmars had settled down in Assam well before this time.
1700-1750 - The Luseis migrated en masse from Upper region
1765 - Lusei Chief Sibuta and Lalsavunga borned.
1770-1780 - The Raltes migrated en masse. Mizo Warrior Vanapa born
1780 - Hmar’s Migration to Manipur
1782 - Zo hero Vanapa died.
7 comments:
Hotupa, Khampat Bungpui hi ka ngaihhlut ang ai hian a chanchin hi ka hre tam lutuk lova, hei i post atangin hriat belh leh ta teuhmai , lawmawm e. Kalve a chakawm ngawt mai.
@Seki..,
Keipawh a chanchin hi ka hre em em bik lo va. Khiti laiah khian khawhar tak leh rinawm takin hmun a lo nghak ve reng mai a ni.
e khai! i ti tha khawp mei. Vanapa tupa nge nge.. :)
Khampat bungpui chu a hmunah ka hmu ve chak khawp mai. Zirlai a kan zir bak ka hre vak lo. I vannei bik khawp mai Pi leh Pute hmun hlui te i fang thei a... I tlawh leh hunah chuan min rawn hre ve reng dawn nia
Ekhai, lung a va tileng em. Khampat, Kanan, Zohmun etc.. te hi Mizo khua vek an ni hlawm a. Khampat Bung hmun tak phei hi chu Mizo pipute sulhnu a nihna chu thuhran ni se. Kum za 700 chuang a liam hnuah pawh Mizote thinlungah a cham reng a. Kum 1930 vel khan Mizoram atangin Pastor thenkhat leh chhungkaw thenkhat chu an pem chhoh phah nghe nghe a nih kha.
Khatih lai khan he Bungpui hmunah hian engmah a awm tawh lo va. A hnu kum 20 hnuah(1952) Mizoram atang bawkin K.Mana te, Pu Hranghmingthangate leh Pastor Lianthuama ten an han din tha leh ta a. Hetih lai hian Khampat khua atanga hla lutuk lo a Kawl khua putar ho an kawm zet a. Chung ho chuan, Khampat Bungpui hi hmanlai Lushai ho ta a ni a. He hmunah hian Lushai ho an lo kir leh dawn a ni tiin an pi leh pute atanga an thurochhiah an sawi chhawng nghe nghe an ti.
Chutiang khawpa Kawl ho history kalchhawng zel pawhin a lo sawilawk ang mai chuan Mizote chuan khua an din thar leh a, a tirah chuan Zoramthar tiin a hming an phuah a. Mahse, a larpui ta lem lo va. A hnuah Kawngpui hlat lutuk a awm chu a buaithlak e tiin tuna Kawngpui awmna lamah hian an insawn san ta a ni.
Thil mak tak mai chu kum 1930 khan Pipute phun zawk lian em em mai kha an thlen tukah a tlu ta ruah mai a. A chhehvela Kawl puithiam chuan, he Bungpui hian in lo let leh hun a lo nghak ngar ngar che u a, tunah in lo thleng a, a thi ve ta a nih hi, a ti e, an ti a. tuna a lem kan hmuh zawk hi pipute phunin a zar a thlak lo thanglian a ni.
Han sawi zel teh hotupa... ka la duhtawk lo.. History-a inziak ang nilo, he Bung chungchang hi.. a kam velte pawh.. ka hre chak huam2 :) tak tak.
In rawn comment liam liama ka lawm khawp mai.
Sawi belh vak tur ka hre em em lo va, mahse hei Zorunpuia'n a rawn sawifiah viau a, a lawmawm.
Ka pa hi Tahan-ah engtikah chiah nge a luh ka hre lova, Bel (leh khuhhriang) chhung hmasa ber pawl chu a ni ngei ang.
Pu K. Mana te an let leh kum 1952 vel hi chuan Ka pa hi kum 31 vel a ni anga, Tahan-ah chuan a awm tawh ka ring deuh. Japan ral laia thlawhna tla chhia emaw, silver vel kha an zawng khawm thin a, belah an chhung thin a ni awm e.
ka rilruah a rawn lan lai tiin ka sawi ta teuh mai a nih hi :)
Post a Comment