Hrilhfiahna

Zonun Newsletter

February 2012, Tum 7, Vawi 2na ( page no. 4)

Hrilhfiahna

HLCA, Yangon Thu Inhriattirna, 1.2.2012 Thupui hmanga YMS chungchang Pu Lallianchhunga thuchhuah kha YMS chuan pawi a ti em em a. HLCA hming hmanga ama duh dan danin a ziak kual mai niin a ring a. HLCA hian YMS sawi chhiat vak vaka ro a rel hi a ring lo a ni. YMS chuan chhan tlakah a ngai lo va, heti hian a hrilhfiah zawk a ni.

Tin, a lehkhaa 12.2.2009 a PCM Biak ina YZTP, YZS, HLCA hruaitute inhmuhovin YMS din tur kan rel tluk niin YZS hming thlak thleng tura rel a ni lo. YZS, YMA, YMS tih rawtna pathum a awm a, ban pharin vote lak a ni a. YMS in a hneh ta a. YMS din tura rel a ni tawp mai. "Hemi nia kan inhmuhhonaah pawh hian YZS hruaituten Meeting hruaihna an chuh a, Rev. Lalmuana'n chair a la a, Pu Ralkapthanga Secretary a ni a. An duh anga ro a tluk loh vang emaw meeting minutes pawh an chhuah lo" tiin a ziak a. Rorel minute hi a chhuak chiang hle a. A dawng turte chuan an dawng a. Dawng tur lote chuan an dawng lo a ni a, minute dawn loh avanga chhuak lo anga ngaih tur a ni lo a, a dawng tur zingah a tel lo tihna a ni. Minute reng reng hi file that vek a ni a, a en theih reng a ni. Rorel Minute reng reng hi mimal duh anga ro a tluk leh tluk lovah a inghat ngai lo a, rorel ang thlapa record a, a copy chu a dawng turte hnena pek thin a ni tih hi hre lo rual chu a ni lo mawl e.

A lehkhaah "EC/ Auditor/ Fee khawntu etc. atana ruat i nih pawhin mawihawih atan chauh I ni, mipui ruat I ni lo, tih inhriat a hun ta e. Phur taka thawk I nih phei chuan mahni hnam leh mipui phatsan tluk nih pawh inhriat thiam tur a ni. Chu chu unaute mi hmuh dan a ni tih pawh hriat a tha." tiin a ziak leh a. Hei hian Mizo zinga inlungrualna tihchhiat a duhzia a tilang a. Mizo chu 'Kalay Kabaw phai ami emaw, Chinhills Hualngo tlangdung ami emaw, Mizorama mi emaw, Manipur ami emaw Mizo tawng hmang atu ate mai pawh hi Mizo kan ni" tih hi YMS ngaih dan a ni a. YZTP chuan 'insuihkhawm zai I rel ang u' tiin mi a huikhawm a, chu chu kan tih tur reng a ni.

Tichuan fimkhur ila, kan zing ata min tihnawk thei tu apiang chu paih ngam ila. Mizo te hian Literature pakhat chauh kan nei a, Culture pawh pakhat chauh kan nei. Hualngo-in emaw Sailo-in emaw Pachuau-in emaw literature leh culture hran an nei lo e, nei anga an sawi chuan, hei hi inbumna mai a ni tih hre bawk ila. Literature leh culture hran a neih chuan Mizo a ni lo tihna a ni. Mizo-ah lungawi ila, Mizo kan ni hi lawm ila, tih kan han infuih nawn leh duh a ni.

·         Pu Lallianchhunga hian "Chin, Duhlian, Lusei, Hualngo, Mizo Chanchin Sawichianna" tih a bu hminga hmangin November 1, 2010 khan lehkhabu a chhuah tawh bawk.

Phek 6naah chuan "Sawisel Suh" tih thupui hmangin article tawi te tar lan zui a ni a.

Sawisel Suh

Kan Pathian hi fak duh, chawimawi duh Pathian a ni. Chutih laiin a zuitu, a ringtute erawh chu mi sawisel ching, mi hau hmang leh mi chhiatna lai sawi nuam ti zawk kan ni fo mai! Bible thianhlim chuan "sawisel suh u, sawisela in awm loh nan. In sawisel ang bawkin an sawisel ang che u" Matt. 7:1-2 ah a ti a ni.

Thiam taka mite kan sawisel piap piap lai hian mahni hi engnge kan nih chiah kan inbih ngam a ngai a ni. Nuho thukhawm pawh hian a tirah Pathian thu pawh sawi sela, a tawp lamah chuan rawngbawlpuite an rel hman deuh zel a ni an ti.

Mite felna leh thatna enkhuma an tihsual leh fellohna lai ringawt inhmuhpui hi chu a hmutu mit hi a fing bik lo. In sawi chhiat leh inrel hian mi a siam tha lo va, thinrimna leh inhauhna mai a thlen zawk thin. Ringtute hian kan hmui kan lei kan ven that a tul. Kan kam chhuak hi mite tan thlum sela. Hmangaihtute zilhna chu na deuh mahse kan haw ngai lo. Hmangaihtu der zilhna erawh chu a na thin. Zilhna ni lo, inrel leh insawichhiatna phei chu a na duh hle thin.