Ka Fanu leh Fapate

Fanaute hi Lalpa laka kan rochan an ni.
In ro awmna a piangah in rilru pawh a awm ang, tia Bible-in a lo sawi hi a dik khawp mai.
Fate hi min tihlimtu leh kan rilru luahtu berte chu an lo ni e. Nu leh pa-in hahtaka rilru zawng zawng senga kan thawhrimna pawh hi fate tan tiin mahni kan inhrechang lo a ni ber mai e.

Ka fanu Angeline hi ka fa hmuh hmasak ber a ni bawk a, a naupan zual lai chuan ka theih ang tawkin ka duat ve a. Tunah chuan a lo nula ve deuh tawh a, tirhna tur ka hre thei riau mai a ni. A chhang tur chu kum 3 hnuah nise, kum 4naah inhmu se tiin duhthu ka sam thin a. Chutiang chiah chuan a kum 4naah a nau Dorothy-i chu a lo pianga, a hmel that reuh em a vangin thenawmten Ukhumi tiin an ko thin a. Keini nupa a kara pianga mawi lo khawpin a hmel tha ve reuh lah tak a. Kan inhnuai nu hian "nang hi i hmel tha reuh em mai i dam rei dawn lo a niang a" a ti fiamthu thin a. Tichuan kum 1 leh thla 5 a nihin min boralsan a. A boral lai hian Philippines-ah Bible school kalin ka awm a, ka haw thei lo nghe nghe a. Mahni chauhva ka tlaivar laite kha!!! Khatih lai khan kan Seminar-ah mizo emaw burma mi emaw tumah an awm si lo va, ka thleng hlim deuh hlawl a la ni bawk nen. Airport-a min rawn thlah laia ka pawm laite khan ka pawm tawpna tur a ni tih reng ka hre tak si lo kha a nia... Pathian khawngaihna zarah Thlarau Thianghlim pawlna nasa tak ka chang hlauhva. Tunah hian la dam chu ni sela a unaute zingah hian a tel ve tur..

 Ka fapa upa zawk Mama tia kan kohduat hi ka hmuh hmasak zawk a nih vang nge, a chhawnchhaih theih deuh zawk vang nge, ka kawm nasa deuh zawk a. Pathian zarah a dama a harh hle a ni. A nau nen hian kum 2 chiahin an inthlau a. A nau hi a duat a, a chang leh a sawp nawk nawk bawk a. A kalpah vel mai mai thin bawk a. A dim thiam hran lo a ni. An zing tho hi khumah an inlawma nu leh pa tan chuan thlir an nuam a ni.

 Ka fapa te zawk Puitea hi January 18 khan thla 11 a kim ve chian a. He mi niah hian a kal theih chiah bawk a. A ha hnuai lam a to ve chiah bawk a ni. A tuk ni 19 zan khan pen thum vel chu a pen thei ve a. Kan dintir a, a hmaah plastic pall kan dah a, thei leh thei lovin a ke ding lamin a pe ve a, mak kan ti khawp a. Kan dah leh a pe ve leh zel mai a ni. Ball hi a lawm ve hrim hrim a, a pa min chhun a ni ber mai e. Zana a zun a chhuahin sawi thiam lo mahse, a tapa a rak thin a. tichuan pawnah kan zuntir thin. Tun hnai te atang khan, a zun a chhuah chuan varandah-ah a a va  zawng ve thin a, mak kan ti ang reng hle.

 Angeline Lalhmangaihi

 David Lalhlimpuia

 Ka fanu pawhin min chen ve tep ta mai.