Sweet December Khual Liante Thusawi

YZTP Hminga Inkawmhona

Ni 2.12.2012 (2:00-4:00 pm) khan English Methodist biak in Yangon-ah YZTP hminga kan khual liante kawmna hun hman a ni a. Kan khual liante thusawina hun pek an ni a, chumi zawhah mipui lam atanga zawhna leh sawi duh neite tan hun rei lo te hawn a ni bawk.

Kan khual liante thusawi laktawi kan han tarlang e.

Pu Buta (Vulmawi)

Mipui rawn kal khawmte chibai bukna a neih zawhin YZTP Sweet December hmang tura sawmna chuan a barakhai nasat zia leh a beisei phak loh sawmna duhawm a nihzia hahipin a sawi a. Tun tum hi a tan chuan kum 28 hnua Rangon a thlen lehna a nih thu a sawi bawk.

Khawvela Mizote rilruah 'Burma Mizote' YZTP hian a chawimawi a, Mizorama awm Burma atanga chhukthlate tan pawh khawhawi a tinuam tak zet a ni.

Pu Kaptea chungchang Local TV-ah ka lo en a, in tanlakna avangin mi bo hmuh leh a ni a. Mizoram lam pawh kan lawmin kan hlim a ni. In tanlakna hian Mizo zingah inunauna nasa takin a siam a ni.

Zai mite in lo lawm danah te thil tha intihsaktawnna kawngah in entawn tlak em emin ka hria. Inpumkhatna kawngah pawh hma kan sawn zel ang.

He in thiltih ropui tak leh hau tak tak mai inbuatsaih thei hi a ropui thlawt a ni. In tanrualzia, pumkhatzia ka hmu hi ropui ka ti a, ka rilru a lawm tak zet a ni.

Mi tam takte thahnem ngaih vang a nih rual rualin heng zawng zawng hi Pathian avang chauh a ni tih hi kan hriat tlan ka duh.

"Mi chawimawina chang hria Nangni hi miin chawimawi let ve che u rawh se."

Pu T. Zorampela (Zodi)

YZTP chungah lawmthu sawiin, Sweet December hmang tura min sawm hi Pheichham man ang hialah ka inngai. Kawlram hun rei tak ka chhuahsan hnuah chhungte tlawhna hun rem chang tak ka neih phahte hian ka lawmna a tinasa leh zual tak zet a ni.

In thil buatsaih dan hi ropui ka ti tak zet a ni. Mizoram leh kawlram tan Lei ropui tak dawhtu in ni tih rawn theihnghilh reng reng suh u. Tun hma atanga ka lo vei em em thin insuihkhawm lehna chu tunah hian YZTP-in a rawn hnukhnai ta a ni, tiin mittui tla zawih zawihin a sawi a. A hnukulh avanga sawi tha hlei thei lova a ngawihreng laiin mipui lam pawh kan hnuk a lo ulh ve a ni ang, boruak a reh thup a.

Fuihna thuchah sawi chhunzawmin; thahnem ngai takin hma la zel ula, Zofate tan inpumkhatna kawnga in hmalakna hian hma a sawn zel a ni tih hi in hriat ka duh em em a ni, tiin.

Pu T. Zorampela hla phuah "Duhaisam" chang tawp berah chuan tihian a inziak a:

Ram tin kil tina zofate zawng hian,

Suihlungruala thinlung hmun khat puin;

Hmangaihnaa insuihkhawm ve hi,

Kei ka lungkham leh Duhaisam ber a ni.

Mimi Renthlei

A tira Sweet December hmang tura in misawm tum chu nichiah lo mah ila, hei ka rawn thlenga nuam ka ti em em a ni, tiin nui sen sen chungin a sawi a.

Ka rawn kal dawn hian ka chhungte pawh ka rawn a. Nunui chuan aw nem deuh hian, "Ih maw… Mimi i han kal anga nuam i ti ngawt ang," min ti a. A sawi angin nuam pawh ka ti khawp mai.

Pasal ka neih hnu hian zai tura min sawmna nazawngah ka kal ngai tawh lo va. Insawitheihna ni lo vin, program hman dan turah ka duh tui ve em em a. Tun tum pawh hi ka chhungte, a bik takin Rev. Dr. Lalchhuanawma'n, "YZTP hmalakna chu a tha a lawm," min ti a. Tin, ei leh in kha a tui thei si a, va insum nasa rawh tiin min chah nghe nghe, a ti chu(h) mipui kan nui dur dur a. YZTP hmalakna hi hnam thilte a nih avangin keimah pawhin ka ngaipawimawh hranpa ve reng reng a ni, a ti.

Ka pasalin, "Thu i sawi dawnin thu sawi ka thiam lo va ti hmasa la," tiin thu min chah a. "I lo sawi tha ta viau a nih leh rin ai a va sawi tha e.. an ti dawn che a lawm," a ti a. Ka sawi thiam vak lo a nih leh min lo hrethiam dawn a nia.

Ka lo rin aiin in lo nuamin in lo zalen hle mai, in awmhawm letling zawk niin ka hria. Step kal ngai lo hrim hrim pawh hi a manhla.

Insuihkhawmna tha lo nei deuh deuh ula, hmasawn zel ula. Zoram lam pawh hian puih inngaihna zawng zawngah chuan puih che u an duh em em ang tih hi ring tlat rawh u, tia fuihna thu a sawi zawhin a thlen in Pu Lalzidinga te chhungkaw chungah leh amah lo lawmtu Rangon mipui chungah a lawmthu a sawi.