Ka ngaihtuahnain Han khawpui leh a chhehvel a hrut kual a. Tun ang hunah hian engtin nge khitilaia kan mipuite khian hun an hman ve ang aw? Hei hi zawhna atthlak tak a ni mai thei e, a chhan chu Chapchar Kut an hmang dawn a, mi zawng zawngin an nghakhlel em em vek si a. Chungmu iangin len thiam ve ila chuan kan chenna mual za pui kar dan atang hian thlawkin ka fang ve anga, kan sumtual leh kan vangkhua liailuaiah chuan ka tum ri ve chhak chhak tur a nia. Tichuan Tahan bazar thil man (rate) te pawh ka zawt chhuak vek anga, tun lai Economic crisis hian tuibur zuar tute thlengin a lo tibuai teh reng emaw chu. March thla a lo her chhuah meuh hi chuan Han khawpui leh a chheh vel boruak pawh engemaw ti tak chuan a nawm lai tak a nih thin kha maw. He tih hunah hi chuan zan lam boruak a la nuam em em a, tlangval awl thawng deuhte tan pawh zan lama nula rim a nawm hun lai tak a ni a. Chhun lamah erawh thinghlim hnuai a awm a nuam tan a, thal thli pawh a rawn thaw vuk vuk thin a, kang mei lamah pawh fimkhur a ngai tan a, mei sipai lam pawhin uniform thar an dawn hun leh an intuai thar leh hun a ni. April thla atang chuan khawlaiah kal chunga meizial zuk an khap leh ngeiin a rinawm. Chhun lamah nula ho vin thiante nen thei thur an bawl a. Thlasik chat a lo reh tawh a, nula ho tan pawh inchei nalh a awlsam hun lai tak a ni awm e.
Zirlai naupang lam zawng zawngin exam an zo tawh a, hun thawl zalen taka an hman hun a ni a, khawtlang pawh kan thawmvang a tha ang reng hle thin a nih kha. Naupang sunday school lamin inkhawmpui atan tan an lak hun a ni a, vengtin biak in tinah naupang chang zir thawm a ri leh sup sup a. Inkhawmpui kawrmawi an neih tharte chuan an chang zir a tiphur leh zual a. Amah erawh chu pawl 10 exam chhang turte tan chuan an beihngawrh hun lai kha a ni thin a. Tution kalin thiante nen exama chhuak tur an inrin siak hun lai a ni a, tun hma deuh kha chuan exam-naah entawn kha a lar em em a, pawl 10 exam turte khan lehkha chhiar lam ai mahin entawn tur buaipui khan zan rei tak tak thleng an meng fo zawk a. Kuminah chuan exam hall an luh hmain zirlaite chu an kekawrte thlenga check vek tur tih a ni a, chuvangin a awlsam zawk nan pawl 10 exam turte chu kekawrte ha lo va exam theuh tur tih a ni.
Tunah tak hi chuan Tahan-ah chuan ti ti dang a leng theiin ka ring lo, engvang maw? Ele, Chapchar Kut maw le. Ni 25-27-a Chapchar Kut hmang turin vengtinin hnam lam an zir mup mup ngei ang a. Inchai chak zawnna tur chuan mipui rilru a ti phawk lek zo vek awm si a. Pu Zarlawma hovin khawlaiah sakawr tawlailirin Chapchar Kut ropui taka hman a nih tur thu leh kawl phai zofate zingah inchai chak zawnna a awm dawn tiin mi zawng zawng sawm kan nih thu an rawn au leh dum dum ang a. Boxing erawh kumin chu an ti tel thei dawn lo niin ka lo hria a, ka thu hriat hi dik tak maw. Chapchar Kuta zai thiam tak tak zai tur te chu tute nge ni dawn? T. Melody hi an rawn haw hman dawn em? Nge hrang hlui ho Zodi leh vulmawi an che dawn em ni zawk? Aw... Tahan-a ka awm lo chu aw inchhir ngawt theih lah a ni bawk si lo. Ka mizo kawr ka ha anga, ngotekherh ka veng anga, Lalawithangpa iang zo lo mah ila chawmkhuang benga lam han thai ve a va han chakawm ve le. A nih loh leh Chhawnghnawh te hi a awm ve dawn em le? Kan thangthar zingah hian Chhawnhnawh tih hming hrim hrim pawh hre lo an awm nualin ka ring tlat pek a nih chu maw le. A chhan chu thangtharte zingah a lar lo em a lawm. Hmm.. a hmuna awm lo na na na chuan zawhna a pui ka va ngah tak em!!
Hetianga Tahan leh a chhehvel khaw mipuite ko khawm tur hian thil awl ai tak chu a ni lo va. Mizoram te angin sorkarin Chapchar Kut buatsaihna tur hian sorkar atang tanpuina emaw, art and culture atang emaw NGO (YMA) atang te sum hmuhna tur a awm ve si lo. Chuti a hnehin sorkar thu neitute tih lawmna tur a ngai zawk thin si a. Pa tlawmngai leh hnam tana mi thahnem ngaite a zarah ropui takin he chapchar kut hi an puitlin ngei theih nan keini pawhin kan awm hmun atangin i tawngtai pui ve ang u hmiang. He chapchar kutah hian Huivalenthiam group pawh theih ang tawkin tel ve kan tum nghe nghea a lawmawm tak zet a ni.
Khi kalay, kabaw phai kuam khi kei ka tan chuan Paris leh Manila khawpui te aia ka suihlung lentu a va ni tak em! Chutiang bawkin ka suihlunglen hnemtu pawh a ni. Heng khawpui ropui tak taka hmel fai tak takte car tlawh rum ri leh restaurant-a chawhmeh tui, man to tak tak te ai chuan Tahan bazara phuihnam tel khat khan ka lung a len tlat zawk pek si a. Anhling tlak hawp tur a awm leh tan tawh ngei awm si a, hm.. hetiang thil sual hi enga ti maw ka ngaihtuah fo chu le, ka tan chuan hetiang ngaihtuah ringawt pawh thilsual nasa tak ti ang mai ka ni. Ka suihlunglen a ti zual a, ka ei chak a, hetah ei tur a awm bawk si lo.
Chapchar Kut ka hmang ve pha lo va, Tahan bazar-a thlai hnah tui tak tak ka ei pha bawk si lo. Kalay, kabaw vel chanchin hrim hrim hriat chaka tui hal te tan thil man (rate) vel mai mai pawh hi hriat tur a awm lawm ni le tiin ka han dap a, he tah hi beiseibo blog-ah Tahan thil man (rate) nikum October thla ami a awm e, tunah chuan enge maw chen chu a danglam leh tawh ngei mai thei.(a indawt dan alphabetically in ka rawn rem tha a).
Alu bukkhat - Ks.600
Arsa leh Sangha bukkhat K.4000
Artui pumkhat K.110
Badam hriak (Pesi) bukkhat K.4200
Banhla thlar (phichian) K.300
Bawnghnute nokhat K.300
Bawngsa bukkhat K.6000
Bike (Jialing) pakhatah K.Nuai 7(Laisen awm)
Buhfai pyi khat (Iyamin) K.900
Chi funkhat (tical 35 vel) K.400
Chini bukkhat K.800
E-lan sahbawnphut(200g) funkhat K.300
Hmarcha phut no khat K.500
India cheng 100 = Ks 2600
Jumbo thosi hlo box khat K.350
Kabawleih tlawnkhat K.500
Kalape bukkhat K.1300
Kurtai bukkhat K.1200.
Kuva khawr 4, K.100
Lisa Hasiai lian burkhat K.400
London sirek burkhat K.1000
Meizialte telkhata 5 awm K.50
Munghingka (chau) a toh puai khat K.300
Pesen (be) pyi khat K.900
Petrol (Diesel) um khat K.1000
Sahbawn rimtui(Family Care) a lian pakhatah K.450
Sanpiauh puai khat K.200
Tahan atanga Kawlpui (mel 3) Taxi fair mipakhatah K.500
Tahan atanga Khampat (mel 45) Bus chuan man mi pakhatah K.1500
Tahan atanga letpanchaung Bus fair K.500, Bike-in 1000
Thidamna (SHE, E-va, comfit) funkhat K.400
Thingpui nokhat K.200
Thirsakhawr (Hero) pakhatah K.100000
Thirsakawr 9Panbein) pakhatah K.250000
Thlalak pakhat tlan man K.500
Vawksa bukkhat K.5000
Vegas Sirek burkhat K.500
Zana mei eng (private current) lak man (feet 2 bulb) thlakhatah K.3000
Zikhlum bukkhat K.300.
6 comments:
Kan ram pawisa ni se, to awm hlawm tek tek... hehehe
Sanpiauh puai khat hi engzat tak ni ang maw?
Varte,
I kutna te a dam tawh ang chu maw?
Sanpiauh puai (plate) khat hi Ks. 300 a ni. Munghingka (wet noodle)nen hian a rate a in ang :)
Thubelh:
Pawl 10 exam chungchangah kekawrte ha lo va exam tur chungchang ka rawn belh leh zawk a (thil thar a ni), tin Tahan-ah function pui deuh a awmin Pu Zarlawma hova sakawr tawlailir nena tlang au thin a nih zia ka han belh leh bawk a, hengte hian kan khawtlang dinhmun pawh a sawi lang chiang hle a. Tun hnu kum 20-ah kan chhiar leh pawhin kan khawtlang dinhmun then khat chiang takin min hmuh lettir thei ang.
Ka chhiarthla den den a,kan pawlsawn exam hun lai te pawh mi ti hrechhuak in,mihmuhtir uar uar mai a lawm lee.Upuibawih a nge nge,,,,,,
Hotupa, India pawisa cheng 100 leh Ks 2600 a inhen tih i tarlang na a, chini buk khat man leh kuhva khawr khat man hi ka la chhut chhuak thiam chuang lo!!
Zaia,
Chini buk khat hi Rs. 31 vel a ni a, kuhva khawr khat hi Rs 1 vel a ni mai e.
Ram changkang a piangah hian chini ei tam an hlau va. Ka thianpa (Korean) chuan kan ramah chuan coffee pawh a hlang (chini tel lo)-a in kan intihhmuh tawh zawk a ti.
Mahse keini chu thingpui thlum tawk taka min lo siam chuan duhsak lantirna a la ni pha deuh tlat haha.
Kawlramah kuhva rah a tam hle a, kuhva pawh an ei nasa, pawisa lakluh a harsat zia ngaihtuahin a to fu a ni.
Mizoramah chuan vawksa rate leh labour rate hi khaikhin fo a ni a. Kan ramah ka awm lohna hi a rei ve deuh hlek tawh a, Labour hlawh zat hi ka hriat hnuhnung berah kha chuan nikhatah Ks. 1500 a ni. Patlingin vawksa buk khat kan hlawh chhuak zo lo a nih chu (h)!
Post a Comment