Lt. Colonel. C. Lalmuana Chanchin

by Capt. Zaithuama

Lt.Col. Lalmuana (fam) hi Tualcheng khua Pu Vanhnuaithanga leh Pi Kapliani-te fa panga zingah a upaber dawttu a ni. A u chu Pi Biakkungi a ni a, a naute chu Pu C. Vulluaia (Ex. MLA), LL.B. Dr. CVL.Auva (Advocate) leh Dr. C. Biakmawia (Durtlang Damdawi in liana thawk thin) te kha an ni.

Pu Lalmuana hi kum 1950 March thlaah 4^th Bn. The Chin Rifle's sipai-ah a tang a. A sipai tan hma hian Mizo lehkha pawl li a zirzo hman a, pawl nga a zirmek laiin sipaiah atang ta zawk a ni. Sipaia a luhtirh phat atangin Kawl lehkha hi thiam a tum em em a, ama private pawhin a zir ngat ngat thin. Kum 1951 velah sipai sikul atangin a zir ta a. Reiloteah (Ah tunglung) an tih hi a zirzo ta mai a. A thiam theih avangin a zirzawm zel a, 

Burma Army Education chu 1^st class-in a pass ta mai a ni. He class hi pawl sawm anga ngaih a ni. Kum 1953-ah Belkhat (L/Cpl) a kai a. Burma Army Officer tura Qualify test pawh a vawi khat chhannaah a pass nghal bawk a ni. Mahse remchanlohna engemaw avangin (OTT) chu kal ta lovin ziaktu hna a thawk ta zawk a. Kum 1958-ah sipai ziaktu bel thum (Sgt. Clerk) a kaisang a. A thiannu Pi Nuchhungi (Chhungpuii) nen hian Mandalay tlang hnuaia awm, 4^th Bn. The Chin Rifles-ah Kristian dan thianghlimin an innei a. Pu Lalmuana thiannu hi Zawngte khua Pastor Lalzika fanu a ni. A u Raltawna leh Pi Thangseii te ina a awmlaiin a ni.

Kum 1959-ah Officer Training-in Bathoo-ah a kal a. Kum 1959 vek hian Burma Army Commission Officer (2^nd/Lt.) a kai a. 1965-ah Captain, 1973-ah Major a kai a, 1976-ah Commanding Officer (C.O)-in 13^th Burma Regiment-ah a kal a. Lt. Colonel nihna pek a ni chho nghal bawk a ni. Pu Lalmuana hi Officer te a nih atangin a thiante ang  bawkin promotion a kaichho ve zar zar a ni. Burma Army; Mizo zingah Officer lian pahnih kan nei a, Lt.Col. Zakhuma leh Lt.Col. Lalmuanate hi an ni. Lt.Col. Zakhuma chuan vawiin ni thlengin min la dam puia, a damlai nite Lalpa'n min pawhseisak zel rawh se. Lt.Col. Lalmuana erawhchuan, a awmna ram tan leh a biak thin Pathian tan rinawm tak leh a theihtawka a thawhmek laiin, Pathianin a hnenah a chawlh hahdamtir ta a ni.

Lt. Col. Lalmuana Mizia

Pu Lalmuana mizia, duhawm tak tak thenkhat phochhuah ka duh a. A naupan lai atang rengin meizial a zu lova, sipai atan hnuah pawh zuk leh hmuam thilah a fihlim thak a ni. Fiamthu a duhin, thian leh rual kawm a thiam em em a, thiante ngaina thei tak mi a ni bawk. Tin, a thil thiam duhzawngte chu, theihtawp chhuaha thiam tum mi a ni bawk. Vawikhat pawh, Pakkoku-a kan awm laiin Tingtang perh a zir a, thiante mut hnuah a tum tlut tlut mai a, tichuan thiante zinga pakhatin "Lalmuan, i bengchheng i thiam mang si lova, tawk tawh rawh," a ti a. Lalmuana chuan, "Ka thiam loh avangin ka zir reng a lawm, nangni thiante lehzelin chutia in tih chuan engtin nge ka thiam theih ang," a ti then mai a ni.

Fiamthu sawi pawh a thiam em em a, Officer a train lai pawhin, hun reilote an chawlhlawk chhunga "Trainee ho an nuih dar dar tawh chuan, a laia Pu Muana fiamthu vang a lo ni reng thin," an ti.

Sakhuana Lam

Sakhuana lamah pawh Pu Lalmuana hi tet te atanga Kristian chhungkuaa lo seilian a ni a. Mizo tlangval tam tak hi Kristian chhungkua atanga lo chhuak, Sunde Sikul a tanga seilian chu kan ni deuh vek awm e. Nimahsela, nu leh pa inchhung atanga han talhran hnu chuan, mi tam takin Kristian ka ni tih pawh insawi ngam lova pilbo ta, kan awm nual awm e. Pu Lalmuana hi chuan, Krista hnungzuitu, Kristian a nih zia zep miah lovin, Pathian ta Sawma Pakhat (1/10) hi a pe ziah thin a ni. 4^th Bn. The Chin Rifles-ah hian Pastor neiin Sunday ni-ah Pathian biak inkhawm kan nei ziah thin. Chutah pawh chhuan, a thiante'n inkhawm kan ngaihsak loh lai pawhin, a duty loh chuan a inkhawm ziah thin a ni. Pathian a tihin a theih ang anga Pathian biak leh A rawngbawl hi a tum tlat a ni.

Thlarau Hnathawh; Mahni Inhriatchianna

Kan Lalpa Isuan, khawvela rawng a bawl lai khan, Nikodema hnenah, "Tuiah leh Thlarauva I pian thar loh chuan Pathian Ramah i lut thei lovang," a ti a. Kan naupan lai chuan, Pathian thuawih chu Vanram kaina a ni tih chu kan hriaa, "Chhandam nih leh nih loh inhriatna" te chu kan lo uar hranpa lem lova. Kum 1974 velah khan Pu Lalmuana Major a nih laiin, Rangon-ah a rawn zina, Evan. Phunuka a rawn kal lai a ni bawk a. Zan khat chu, kan inah inkhawmna leh Pathian thu sawihona kan nei a, "Chhandam nih inhriat chian" chung chang kan sawi ho va. Pu Lalmuana chuan, "Kristian chhungkua atanga seilian ka ni a, chhandam nih in hriat a tul hran kher em ni? tiin a sawi a. Evan. Phunuka chuan, "Pu Muan!!, I nupui i hria em?" tiin a zawt a. Pu Muana chuan, "Hria e," tiin a chhang a. Kan nupuite kan hriat chuan, chhandam nih leh nihloh pawh mahni kan inhriat chian a pawimawh a ni, tih chungchang leh thu dangte pawh kan sawiho hlawm a. 

Zan a rei deuh tawh avangin mi dangte chu an tin darh ta hlawm a. Thiante an tin hnuah pawh chuan Pu Phunuka zawhna kha, tuna C.O.G-a an hotu; kan fanu Tei (Dorthy) nen an pahnihin an chhunzawm leh a, kei chu ka lo muhil tawh. Zanlai dar sawmpahnih velah chuan, Thlarau Thianghlim zarah, Chhandam nih inhriatchianna Pu Muana chuan a chang ta a ni. Pu Muana chu a hlimin a lawm em em mai a. Aw-rawl chhuah meuhin a tap chhuak zu nia. Ka thian nu, Pi Vanlalruaii'n tap ri a hriat chuan, "Mampuia pa tho rawh! Pu Muana chhandam nih inhriatchianna a nei a, lawm avangin a tap hial a nia!" a ti a. Kei lah pek chuan, "Lalmuana tah avangin engah nge ka thawh kher ang," ka lo ti vel a. Mahse, thian duh tak maiin Lawmna tak mai Isua pek, thinlunga a lo changta chu lawmpui tlak ka ti a, ka zuangtho ta nghal a. Ka thiannu Pi Ruaii, Te-i leh Pu Muana te nen chuan Pathian hnenah lawm thu sawi tawngtai kan neih hnuah hlim takin kan mu ta a ni.

Rawngbawlna Lam

Rawngbawlna hi chi hranghrang a awm angin, rawngbawl dan pawh a inang vek lem lovang. Pu Lalmuana hi Bn. C.O (Commanding Officer)-a hun rei tak chhung hnathawk a nih avangin Burma ram hmun hrang hrang pawh, (Shan State, Kachin State, Karen State, etc.) a thleng fo thin a ni. A chang chuan a kalna khuaa ringtu thalaite nen inhmelhriatna neiin ama sumpai senga "Gospel Team" buatsaihin Pathian rawngbawl hna an thawk thin. A chang chuan a kalnaa Kristiante nen an inhriatchian hnuah, chung ringtute chu a remchan dan a zirin a kalnaah rawngbawlin a hruai bawk thin. 

A kalna apiangah Kristian a zawngchhuaka, rawngbawltu Pastor a hmuh chuan, a theih ang angin a tanpui a, an rawngbawl hna pawh a remchan angin a pui bawk thin. Tingtang a tum thiam a, a zai ring bawk a, a kalna biak inah tawh chuan hla mawi rem te a uar em em bawk a ni. Tin, Pu Muana hi lem ziak thiam tak a ni. Karen, Kachin, Shan ram leh hmun hrang hrangah Pu Muana ziak 'Isua lem' Pastor inah leh kohhran Upate inah chuan hmuh tur a awm thluah zel a ni. Hengte pawh hi a rawngbawlna a ni zel awm e. Khawi khuaah pawh hnathawkin kal sela, chawlh nia Kristiante inkhawmna biak inah tawh chuan inkhawm ngei ngei tum tlat mi a ni. Officer lian a ni bawk a, sipai ven thupin a inkhawm a, a remchan angin Pathian thu sawi (Sermon!)-na pawh a nei bawk thin.

Pu Lalmuana Mize Danglamna

Sipai-ah hian a tlangpuiin 'Rank' hian kan inko deuh ber thin a. L/Cpl. atanga W.O chin hi Saya, Saya Kyi tiin koh an ni a, Officer chin hi, Bo Kyi, Bo hmu, Bo Hmu Kyi tia koh anni thin. Pu Lalmuana hi a hote'n a rank (Bo Hmu Kyi) tiin tumahin an ko lova, Abah (Ka pa) tiin an ko zawk thin. Sipai Nupui-fanaute lamin Aba tiin an ko vek mai a ni. A hnathawk leh sipai chhungkuate a enkawl danah 'Pa' nih a tling hle a ni ang. Tun hnuah hian Sipai ten an aia rank sang zawkte Aba tia koh an ching tate pawh hi Pu Lalmuana sipaite'n Pu Muana an koh dan kha an ching chhunzawm ta a ni awm mange ka ti thin.

Fanaute

Pu Lalmuana leh Pi Nuchhungi te hian fanau fel tak tak leh duhawm tak tak paruk an nei a. A upa ber chu Pi Molly (Lalnunziri), Imigration Officer thawk mek a ni. Pi Siami, Pi Mawitei, Pi Sangi, Pi Cherry-I leh Pu Chit Thwe-a te an ni. A naupangber Pu Chit Thwe-a hi Merchant Navy-a thawk mek a ni. An unau za hian nupui pasal neiin changtlung tak an ni vek bawk. Pu Lalmuana te nupa hi fanau enkawl puitlin thu-ah pawh an duai lo hle a ni.

Lt. Col. Lalmuana nunah hian zir tur tam tak awmin ka hria a. A naupan tet atangin zuk leh hmuamah a fihlima, sakhuanaah ama thawhchhuah atangin sawma pakhat a pe thina, zirna lamah pawh, pawl nga  vel thleng nu leh pa te'n an buaipui hmana, pawl nga a zir laiin sipai atang a, sipai a tan hnuah pawh inzirchawpin Officer lian tak thlengin a zir chho a ni. A hnathawh sipai-ah ram tan, 'thih thlenga rinawmin a thawk a, chutichung chuan, Pathian; a Lalpa rawngbawl hna a thawh dan zawng zawngte hi Lt. Col Lalmuana hnen atanga "Zirtur" tam tak ka hmuhte chu a ni.

Source: YZTP Palai